Hebreo 13:1-25
13 Bãrãra djabarã bẽrã aɓarica dji quĩrĩã ɓeaɗadua.
2 Quĩrãdoarãnadua bãrã deɗe zebʉdara bia edaɗida panʉda. Ʉ̃cʉrʉba cawaɗaẽ́ne bajãnebema nezocarãda ãdji deɗe bia edasiɗaa.
3 Preso ɓeara quĩrãdoarãnadua bãrã siɗa ãdjirã ume preso panʉ quĩrãca. Ẽberãrãba biẽ́ o panʉneba bia mĩga ɓeara quĩrãdoarãnadua bãrã siɗa ãdjirã ume bia mĩga panʉ quĩrãca.
4 Jũmarãba ãdji quimara waya ɓeaɗida panʉa. Ãcõrẽba auɗua obadara, daunemabada siɗa cawa oi bẽrã aɓabe bãrã quima ume cãĩnida panʉa.
5 Paratara awua ɓearãnadua. Ãtebʉrʉ bãdjia eroɓeaba ɓʉsriɗa ɓeaɗadua Ãcõrẽba nãwã jaraɗa bẽrã: “Mʉ̃a bʉra ameẽ́a idjaɓa igaraẽ́a.”*
6 Maʉ̃ carea dadjirãba ne wayaa neẽ́ nãwã jaraɗida panʉa:
Mʉ̃ Boroba mʉ̃ra careba ɓʉa. Maʉ̃ bẽrã mʉ̃ra ne wayaẽ́ ɓʉa. ¿Ẽberãba mʉ̃da sãwã biẽ́ oi?*
7 Bãrã bororãda quĩrãnebaɗadua. Ãdjirãba Ãcõrẽ beɗeara bãrãa jaradiasiɗaa. Crĩchaɗadua sãwã ãdjira nĩbasiɗada idjaɓa maʉ̃gʉba cãrẽda sãwãsida. Ãdjia Crito ĩjã panana quĩrãca bãrã biɗa ĩjã pananadua.
8 Jesucritora quĩrã awara ɓacaa. Nuena ɓaɗa quĩrãca iɗi biɗa aɓarica ɓʉa, idjaɓa ewariza mãwã ɓaya.
9 Baribʉrʉ ʉ̃cʉrʉba ne quĩrãtanoa ãĩ jaradiabadaa. Ãdjirãa idu cũrũgabirãnadua. Bãrãba co panʉneba wa coɗaẽ́ panʉneba Ãcõrẽra biara ĩjãnaẽ́a. Maʉ̃ba ni aɓaʉda carebacaa. Ãtebʉrʉ Ãcõrẽba idji biaɗeba careba ɓʉa bãrãba biara soɗeba ĩjãnamãrẽã.
10 Dadjirãba Jesuda eropanʉa animarã dadji cadjirua carea babue diapeɗaɗa quĩrãca. Baribʉrʉ Ãcõrẽ deɗe waɗibiɗa ãdji cadjirua carea animarã babue diabadarãba Jesura poya edaɗaẽ́a.*
11 Cadjirua carea sacerdote dji dromaba animarã oara Ãcõrẽ itea biara ɓʉ dejãne eɗa jĩãpoɗe wãbaria. Baribʉrʉ dji animarãra puru jĩga edeɗapeɗa babuebadaa.
12 Ara maʉ̃ quĩrãca Jesura puru jĩga bia mĩgasia idji oaba ẽberãrãra Ãcõrẽ itea bia ɓʉi carea.
13 Maʉ̃ bẽrã puru jĩga Jesumaa wãbʉda quĩrãca idjira ẽpẽnida panʉa. Ẽberãrãba Jesu biẽ́ jarapeɗaɗa quĩrãca dadjirã siɗa biẽ́ jarabʉdaɗe droaɗida panʉa.
14 Naʉ̃ ẽjũãne dadjirãra puru jõcaɗe panʉẽ́a, ãtebʉrʉ jʉ̃ã panʉa bajãnebema puru jõcaɗe panani carea.
15 Maʉ̃ carea Jesucritoɗeba dadjirãba ewariza Ãcõrẽa bia beɗeaɗida panʉa. Dadji Ãcõrẽ ĩjã panʉana a panʉba idjía bia beɗeabʉdaɗe animarã babue diabʉda quĩrãca o panʉa.
16 Quĩrãdoarãnadua bia oɗi carea idjaɓa bãrãba eropanʉneba dji careba panani carea. Jũma maʉ̃gʉra Ãcõrẽba bia unu ɓʉa animarã babue diabʉda quĩrãca.
17 Djabarã, bãrã bororãba jara panʉra ĩjã oɗadua. Bãrãra waga panʉ bẽrã ãdji jʉwaeɗa ɓeaɗadua. Ãdjirãba cawa panʉa Ãcõrẽba cawa obʉrʉɗe jũma ãdjia opeɗaɗara idjía ebuɗa jaraɗida. Maʉ̃ bẽrã ãdjia jara panʉra ĩjã oɗadua. Mãwã ãdjirãba ɓʉsriɗa, sopua neẽ́ jũma oɗia. Bãrãba ĩjã oɗaẽ́ panʉneba ãdjirãda sopuabiɗibʉrʉ, bãrãra poya bia carebaɗaẽ́a.
18 Dai carea Ãcõrẽa iwiɗiɗadua. Daira ne jũmane jipa nĩba quĩrĩã panʉa. Cawa panʉa cadjiruara oɗaẽ́ panʉda.
19 Mʉ̃ djuburia, Ãcõrẽa iwiɗiɗadua wayacusa isabe bãrãmaa wãbimãrẽã.
20 13:20-21 Dadjirã Boro Jesucritora Oveja Wagabari dji Dromaa. Necai ɓai diabari Ãcõrẽba idjira beu ɓaɗada ʉ̃rẽbabisia. Jesucrito oaɗeba Ãcõrẽra ẽberãrã ume beɗea ɓʉsia. Maʉ̃ra ewariza ɓaya. Mʉ̃a quĩrĩã ɓʉa Ãcõrẽba ne jũma biada bãrãa o cawabida idjia quĩrĩã ɓʉ quĩrãca poya oɗamãrẽã. Idjaɓa quĩrĩã ɓʉa Jesucritoɗeba idjia dadjirã soɗe ne jũma oida idjia quĩrĩã ɓʉ quĩrãca ɓeaɗamãrẽã. Dadjirãba ewariza Jesucritoa bia beɗeaɗida panʉa. Bia ɓʉa mãwã ɓaida.
22 Djabarã, mʉ̃a naʉ̃ carta zaqueda ɓʉsia bãrãba biara ĩjãnamãrẽã. Maʉ̃ bẽrã mʉ̃a bãrãa beɗea djuburiaya naʉ̃ beɗeara bia edaɗamãrẽã.
23 Cawaɗadua dadjirã djaba Timoteo preso ɓaɗara ẽdrʉsida. Idjida isabe mʉ̃maa zeibʉrʉ, bãrã acʉɗe wãbʉrʉɗe mʉ̃a idjira edeya.
24 Djabarã, bãrã bororãa, jũma Ãcõrẽ ẽberãrãa biɗa jaraɗadua mʉ̃a quĩrĩã ɓʉda ãdjirãra bia duananida. Djabarã Italia druaɗebemarãba quĩrĩã panʉa bãrãra bia duananida.
25 Mʉ̃a quĩrĩã ɓʉa Ãcõrẽba idji biaɗeba bãrãra jũma careba ɓaida.
