Hebreo 2:1-18
2 Maʉ̃ bẽrã ãĩ wãna amaaba dadjirãba wãrã beɗea ũrĩpeɗaɗara quĩrãcuita biara ẽpẽnida panʉa.
2 Ãcõrẽba naẽna obi ɓaɗa beɗeara bajãnebema nezocarãneba diasia. Maʉ̃ beɗeara ẽberãrãba jũma ĩjã oɗida panasiɗaa. Jũma ĩjã oẽ́ ɓeara, igara ɓea siɗa Ãcõrẽba ariɗe cawa obadjia.
3 2:3-4 Ara maʉ̃ quĩrãca Ãcõrẽba ẽdrʉ edaiɗebema beɗeada dadjirãba igaraɗibʉrʉ, ¿Ãcõrẽba cawa oiɗebemada sãwã ẽdrʉɗi? Maʉ̃ beɗea bio bia ɓʉra dadjirã Boro Jesuba naãrã jaradiasia. Maʉ̃ ũrĩpeɗaɗaba dadjirãa jarasiɗaa maʉ̃gʉra wãrãda. Maʉ̃ awara Ãcõrẽba ne ununaca waiɓʉada quĩrãtanoa obisia. Idjia quĩrĩã ɓaɗa quĩrãca idji Jaureba obi ɓʉra idjiɗerãza diasia. Jũma maʉ̃gʉɗeba cawabisia maʉ̃ beɗeara wãrãda. Maʉ̃da dadjirãba igaraɗibʉrʉ, ¿sãwã ẽdrʉɗi?
4 –
Jesucrito dadji quĩrãca ɓaɗa
5 Ẽjũã djiwiɗi zeida ɓʉ daiba jara panʉra Ãcõrẽba bajãnebema nezocarã jʉwaeɗa ɓʉẽ́ basía.
6 Ãtebʉrʉ Ãcõrẽ Beɗeaɗe nãwã ɓʉ́ ɓʉa:
Mʉ̃ Ãcõrẽ, ẽberãda ¿cãrẽ? ¿Cãrẽã dairãma crĩchabari?
Ẽberãda ¿cãrẽ? ¿Cãrẽã dairãda wagabari?
7 Bʉa daira bajãnebema nezocarã cãyãbara eɗaara ɓʉsia.
Mãwãmĩna daira naʉ̃ ẽjũãne bia ɓʉsia idjaɓa dji dromarãda ɓʉsia.*
8 Bʉa ne jũmada dai jʉwaeɗa ɓʉsia.*
Ãcõrẽba ne jũmada dadji jʉwaeɗa ɓʉsia. Dadji jʉwaeɗa ɓʉɗaẽ́ra neẽ́a. Mãwãmĩna waɗibiɗa ununaẽ́a ne jũma dadji jʉwaeɗa ɓʉda.
9 Baribʉrʉ Jesuɗebemada cawa panʉa.* Ãcõrẽba idjira bajãnebema nezocarã cãyãbara naʉ̃ ẽjũãne eɗaara ɓʉsia. Ãcõrẽba idji biaɗeba mãwã osia Jesura jũmarã carea beumãrẽã. Bia mĩga beuɗa bẽrã Ãcõrẽba idjira bia ɓʉsia idjaɓa dji dromada ɓʉsia.
10 Ãcõrẽba ne jũmada osia. Idjiɗeba ne jũmada ɓeaa. Ãcõrẽmaarã bia ɓasia Jesura bia mĩgaida. Mãwã idjira ẽberãrã Ẽdrʉ Edabarida ariɗe ɓʉsia. Idjiɗeba Ãcõrẽba idji warrarãda zocãrã edasia idji biya quiruɗebemada edaɗamãrẽã.
11 Jesuba ẽberãrãda Ãcõrẽ itea bia ɓʉbaria. Idjia, maʉ̃ ẽberãrã biɗa aɓari Zezada eropanʉa. Maʉ̃ carea Jesura peracaa ãdjirãra idji djabarã ai carea.
12 Ãcõrẽ Beɗeaɗe nãwã ɓʉ́ ɓʉa:
Mʉ̃a bʉɗebemada mʉ̃ djabarãa beɗeaya. Jũmarã ãbaa dji jʉre duanʉne mʉ̃a bʉda bia jaraya.*
13 Idjaɓa nãwã ɓʉ́ ɓʉa:
Mʉ̃a idjidrʉ ĩjã ɓaya.*
Idjaɓa naʉ̃ siɗa ɓʉ́ ɓʉa:
Mʉ̃ra nama ɓʉa, idjaɓa warrarã Ãcõrẽba mʉ̃́a diaɗara mʉ̃ ume ãbaa panʉa.*
14 Maʉ̃ warrarãba djarada, oa siɗa eropanʉ bẽrã Jesu biɗa aɓarida edasia idji beuɗaɗeba diauru poyai carea. Diaurura beu djibaria.
15 Jesuba diaurura poyaɗa bẽrã, beuɗi carea waya ɓeaɗara idjia jũma ẽdrʉ ɓʉsia. Ewariza beuɗi waya panʉneba ãdjirãra biẽ́ panasiɗaa nezoca quĩrãca.
16 Wãrãda Jesura bajãnebema nezocarã carebaɗe zeẽ́ basía, ãtebʉrʉ Abrahaʉ̃ quĩrãca Ãcõrẽ ĩjã ɓeadrʉ carebaɗe zesia.*
17 Idji zesiɗe ne jũmane dadji quĩrãca ɓasia djãrã quĩrã djuburiabari Sacerdote dji Droma bai carea.* Wãrãda Ãcõrẽ quĩrãpita sacerdote dji droma jũma ariɗe obarida ɓesia. Maʉ̃ba ara idjida idu beabisia ẽberãrãba cadjirua obadara Ãcõrẽba quĩrãdoamãrẽã.
18 Diauruba mĩã sẽ ɓasiɗe Jesura bia mĩgasia. Maʉ̃ bẽrã diauruba mĩã sẽ ɓeara careba cawa ɓʉa.
Beɗea eɗaare
^ 2:7. Griego beɗeaɗe ʉ̃cʉrʉ cartaɗe naʉ̃ siɗa ɓʉ́ ɓʉa: “Daira ɓʉsia ne jũma bʉa oɗa bororãda ɓeaɗamãrẽã.”
^ 2:8. Salmo 8:4-6. Dai jʉwaeɗa ɓʉsia. Griego beɗeaɗe nãwã ɓʉ́ ɓʉa: “Ne jũmada idji jĩrũ edre ɓʉsia.”
^ 2:9. Jesuɗebemada cawa panʉa. Griego beɗeaɗe nãwã ɓʉ́ ɓʉa: “Dadjirãba Jesura unu panʉa.”
^ 2:12. Salmo 22:22.
^ 2:13. Isaía 8:17.
^ 2:13. Isaía 8:18.
^ 2:16. Griego beɗeaɗe nãwã ɓʉ́ ɓʉa: “Abrahaʉ̃ ẽberãrãra carebaɗe zesia.”
^ 2:17. Dadji quĩrãca. Griego beɗeaɗe ɓʉ́ ɓʉa: “Idji djabarã quĩrãca.”
