Hebreo 3:1-19
3 Djabarã, bãrãra Ãcõrẽ ẽberãrã bẽrã idjaɓa Ãcõrẽba bãrãra trʉ̃na bẽrã, Jesucritoɗebemada bio quĩrãcuita crĩchaɗadua. Idjira Ãcõrẽba diabueɗaa idjaɓa Sacerdote dji Dromaa. Dadjirãba ebuɗa jarabadaa idjidrʉ wãrãda ĩjã panʉda.
2 Ãcõrẽba obiɗara Jesuba jũma ariɗe osia Moiseba Ãcõrẽ ẽberãrã ume oɗa quĩrãca.*
3 Ẽberãrãba de bia obariɗebemada dji de cãyãbara biara beɗeabadaa. Ara maʉ̃ quĩrãca dadjirãba Moiseɗebema cãyãbara Jesuɗebemada biara beɗeaɗida panʉa.
4 Dera dji oɗa bara ɓeaa. Baribʉrʉ Ãcõrẽba ne jũmada osia.
5 Moisera Ãcõrẽ nezoca bẽrã Ãcõrẽ ẽberãrã ume jũma ariɗe osia. Maʉ̃ne idjia cawabisia Ãcõrẽba nocoarebema ewariɗe cãrẽda jaraida.
6 Baribʉrʉ Ãcõrẽ warra Critora idji ẽberãrã boroa. Ãdjirã ume jũma ariɗe o ɓʉa. Dadjirãba Critoda ĩjã pananibʉrʉ idjaɓa idjiɗeba edaɗira ɓʉsriɗa jʉ̃ã pananibʉrʉ, Ãcõrẽ ẽberãrãa.*
Critora igararãnadua
7 3:7-8 Maʉ̃ carea Ãcõrẽ Jaureba nãwã jara ɓʉa:
Iɗi Ãcõrẽ beɗea ũrĩbʉdaɗe bãrã sora zarearãnadua bãrã drõã naẽnabemarã so zareapeɗaɗa quĩrãca.
Ãdjirã ẽjũã põãsa ewaraga ɓʉɗe duanasiɗaɗe Ãcõrẽba jaraɗara igarasiɗaa idjia sãwã oi cawaya.
8 –
9 Mama idjia oɗara cuarenta poa unusiɗamĩna ãdjirãba ĩjãnaẽ́ basía sãwã oi cawaya.
10 Maʉ̃ carea ãdjirã ume quĩrũpeɗa Ãcõrẽba nãwã jarasia:
“Ãdjirãba mʉ̃ra soɗeba wãrãda ẽpẽnacaa. Mʉ̃ ora cawa quĩrĩãnacaa.”
11 Idjaɓa quĩrũ ɓʉɗe wãrãneba nãwã jarasia: “Mʉ̃a ʉ̃nãũbima ãdjirãra jũẽnaẽ́a.”*
12 Djabarã, quĩrãcuita ɓeaɗadua. So cadjiruaba Ãcõrẽ ĩjãnaẽ́ ɓearãnadua. So cadjiruaba Ãcõrẽ zocai ɓʉra igarabaria.
13 Waɗi ewari ɓʉɗe eɗa ewariza dji carebaɗadua biara ĩjãni carea. Mãwã ni aɓaʉda cadjiruaba cũrũgapeɗa so zarea ɓeaɗaẽ́a.
14 Dadjirãba naãrã ĩjãpeɗaɗaɗeba aɓa beubʉdaɗaa Critoda ĩjã pananibʉrʉ, idji ume panania.
15 Maʉ̃ carea Ãcõrẽ Beɗeaɗe nãwã jara ɓʉa:
Iɗi Ãcõrẽ beɗea ũrĩbʉdaɗe bãrã sora zarearãnadua bãrã drõã naẽnabemarã so zareapeɗaɗa quĩrãca.*
16 Ãcõrẽ beɗea ũrĩpeɗaɗacarea ¿cairãda so zareasiɗa? ¿Jũma Moiseba Egiptoɗeba ẽdrʉ edaɗarãda mãwã so zareasiɗaẽ́ca?
17 ¿Ãcõrẽra cairã ume cuarenta poa quĩrũ ɓasi? ¿Cadjirua opeɗaɗarã ume quĩrũ ɓasiẽ́ca? ¿Maʉ̃ carea ãdjirãra ẽjũã põãsa ewaraga ɓʉɗe quinisiɗaẽ́ca?
18 ¿Ãcõrẽba cairãa wãrãneba jarasi idjia ʉ̃nãũbima jũẽnaẽ́da? ¿Idji beɗea ĩjãnaẽ́ ɓeaɗarãa mãwã jarasiẽ́ca?
19 Maʉ̃gʉɗeba dadjirãba cawa panʉa ãdjirãba ĩjãpeɗaɗaẽ́ bẽrã Ãcõrẽba ʉ̃nãũbida ɓaɗama poya jũẽnaẽ́ basida.
