Hebreo 4:1-16
4 Ãcõrẽba wãrãda jara ɓʉa dadjirãra waɗibiɗa idjia ʉ̃nãũbima poya jũẽnida panʉda. Baribʉrʉ quĩrãcuita ɓeaɗadua. Mãwãẽ́ra ʉ̃cʉrʉ bãrãnebemada mama jũẽnaẽ́a.
2 4:2-3 Beɗea bia Ãcõrẽba ʉ̃nãũbiɗebemada dadjirãba ũrĩsiɗaa drõã naẽnabemarãba ũrĩpeɗaɗa quĩrãca. Dadjirãba soɗeba ĩjã panʉ bẽrã Ãcõrẽba ʉ̃nãũbima jũẽnia. Baribʉrʉ drõã naẽnabemarãba ũrĩnapeɗa ĩjãpeɗaɗaẽ́ bẽrã maʉ̃ beɗeaba carebaẽ́ basía. Ãdjirãnebemada Ãcõrẽba nãwã jarasia:
Quĩrũ ɓʉɗe mʉ̃a wãrãneba nãwã jarasia: “Mʉ̃a ʉ̃nãũbima ãdjirãra jũẽnaẽ́a.”*
Mãwã jarasia naʉ̃ ẽjũã oɗaɗeba ʉ̃taa idjia oida ɓaɗara jũma o eroɓʉmĩna.*
3 –
4 Ãcõrẽba idji beɗeaɗe ʉ̃nãũbada ewariɗebemada nãwã jarasia:*
Sietebema ewariɗe Ãcõrẽba jũma pãrã eroɓasia. Maʉ̃ bẽrã sietebema ewariɗe ʉ̃nãũsia.*
5 Idjaɓa Ãcõrẽba idji beɗeaɗe nãwã jara ɓʉa:
Mʉ̃a ʉ̃nãũbima ãdjirãra jũẽnaẽ́a.*
6 Beɗea bia Ãcõrẽba ʉ̃nãũbiɗebema naãrã ũrĩpeɗaɗaba ĩjãnaẽ́ basía. Maʉ̃ bẽrã idjia ʉ̃nãũbida ɓaɗama jũẽnaẽ́ basía. Baribʉrʉ ʉ̃cʉrʉ ẽberãrãda waɗibiɗa Ãcõrẽba ʉ̃nãũbima poya jũẽnia.
7 Maʉ̃ carea Ãcõrẽba dewara ewarida ɓʉsia idjia ʉ̃nãũbima jũẽnamãrẽã. Maʉ̃ ewarira Ãcõrẽba trʉ̃ ɓʉsia “iɗi.” Maʉ̃ ewari ɓʉɗacarea dãrãbʉrʉɗe idjia Daviɗeba maʉ̃nebemada beɗeasia. Maʉ̃ beɗeara mʉ̃a naẽna naʉ̃ cartaɗe ɓʉsia. Nãwã ɓʉa:
Iɗi Ãcõrẽ beɗea ũrĩbʉdaɗe bãrã sora zarearãnadua.*
8 Josueba israelerãra Ãcõrẽba wãrãda ʉ̃nãũbimaa edeɗabara Ãcõrẽba dewara ʉ̃nãũbiɗebemada beɗeaẽ́ bacasia.
9 Maʉ̃ bẽrã ʉ̃nãũbada ewarida Ãcõrẽ ẽberãrã itea waɗibiɗa ɓʉa.
10 Aɓaʉda Ãcõrẽba ʉ̃nãũbima ɓʉbʉrʉ, idjia o ɓaɗaɗebemada ʉ̃nãũsia Ãcõrẽba ne jũma opeɗa ʉ̃nãũna quĩrãca.
11 Maʉ̃ bẽrã dadjirãba biara jʉrʉɗida panʉa Ãcõrẽba ʉ̃nãũbima jũẽni carea. Mãwãra ni aɓaʉda ɓaeɗaẽ́a drõã naẽnabemarã ĩjãnaẽ́ panʉneba ɓaepeɗaɗa quĩrãca.
12 Wãrãda Ãcõrẽ beɗeara zocai ɓʉa idjaɓa ʉɓʉa ɓʉa. Idji beɗeara djõbada neco quiɗa umé era ɓʉ cãyãbara peweɗeara ɓʉa. Idji beɗeaba dadji crĩchara, dadji soba o quĩrĩã ɓʉ siɗa jũma ebuɗa cawabibaria dadji crĩcha, dadji jaure, dadji so siɗa eɗu cõbʉrʉ quĩrãca.
13 Ãcõrẽba ne jũmada unubaria. Idjia unuẽ́ ɓʉra neẽ́a. Idjia oɗara, dadjia mẽrã eroɓʉ siɗa ebuɗa unu ɓʉa. Idjia cawa obʉrʉɗe jũma dadjia oɗara idjía jaraɗida panʉa.
Jesura dadjirã Sacerdote dji Droma
14 Ãcõrẽ Warra Jesura bajãnaa wãsia. Idjira dadjirã Sacerdote dji Dromaa. Dadjirãba idjira ĩjã panʉana a panʉ bẽrã wãrãda ĩjã pananida panʉa.
15 Jesu dadjirã Sacerdote dji Dromaba cawa ɓʉa dadjirãra ʉɓʉaẽ́ panʉda. Diauruba idjira mĩã sẽsia dadjirã mĩã sẽbari quĩrãca. Baribʉrʉ Jesuba cadjiruara oẽ́ basía.
16 Dadji ʉɓʉaẽ́ ɓʉɗebemada cawa ɓʉ bẽrã dadjirã idji bugue caita wãbʉda quĩrãca ne wayaa neẽ́ Ãcõrẽa iwiɗiɗida panʉa. Mãwã idjia dadjirãra quĩrã djuburiaya idjaɓa idjia carebamãrẽã iwiɗibʉdaɗe idji biaɗeba carebaya.
