Hebreo 5:1-14
5 Ãcõrẽba sacerdote dji droma ɓʉbʉrʉza ẽberãda aɓa edapeɗa ɓʉbaria. Maʉ̃ bẽrã ẽberãrãba cadjirua opeɗaɗa carea sacerdoteba Ãcõrẽa ne diabaria idjaɓa animarãda babue diabaria.*
2 Ẽberãrãba adua panʉneba ãĩ opeɗaɗara sacerdote dji dromaba poya cawa quĩrã djuburiaya idjia biɗa aɓarica obari bẽrã.
3 Ẽberãrãba cadjirua opeɗaɗa carea animarã babue diabʉrʉɗe idjia oɗa carea biɗa animarã babue diaida ɓʉa.
4 Ni aɓaʉda ara idjiduɓa sacerdote dji dromada ɓecaa, ãtebʉrʉ Ãcõrẽbʉrʉ aɓa trʉ̃peɗa ɓʉbaria Aaroʉ̃ ɓʉɗa quĩrãca.
5 Ara maʉ̃ quĩrãca Critora ara idjiduɓa Sacerdote dji Dromada ɓeẽ́ basía, ãtebʉrʉ Ãcõrẽbʉrʉ idjira mãwã ɓʉsia. Ãcõrẽba idjía nãwã jarasia:
Bʉra mʉ̃ Warraa. Iɗi bʉra mʉ̃ Warraaɗa abʉrʉa.*
6 Idjaɓa nãwã jarasia:
Bʉra ewariza sacerdoteda ɓaya Melquisedé ɓaɗa quĩrãca.*
7 Crito naʉ̃ djaraɗe ɓasiɗe jĩã ɓʉba Ãcõrẽa jĩgua beɗea djuburiasia, Ãcõrẽba idji beuida ɓʉɗebemada poya ẽdrʉ ɓʉida ɓaɗa bẽrã. Maʉ̃ne Ãcõrẽba quĩrĩã ɓʉ quĩrãca ĩjã oyaɗa aɗa bẽrã, Ãcõrẽba idji beɗeara ũrĩsia.*
8 Critora Ãcõrẽ Warramĩna idji bia mĩga ɓʉɗeba ĩjã o cawasia.
9 Ne jũmane daucha ĩjã oɗa bẽrã, idjia jara ɓʉ ĩjã o ɓeara jũma ẽdrʉ edaya ewariza zocai ɓeaɗamãrẽã.
10 Maʉ̃ bẽrã Ãcõrẽba idjira Sacerdote dji Dromada ɓʉsia Melquisedé ɓaɗa quĩrãca.
Wãrã beɗeara igararãnadua
11 Maʉ̃gʉɗebemada daiba zocãrã jaradia quĩrĩã panʉa. Baribʉrʉ zarea ɓʉa ebuɗa cawabiɗida, bãrãba isabe cawaɗaca bẽrã.
12 Bãrãba Jesu ĩjãpeɗaɗara dãrãbʉdaa. Maʉ̃ bẽrã iɗira bãrãra Ãcõrẽ beɗea jaradiabadada ɓeaɗida panasiɗaa. Mãwãmĩna Ãcõrẽ beɗeara mãcua adua panʉ bẽrã poya bia jaradiaɗacaa. Aɓaʉba bãrãa Ãcõrẽ beɗeaɗebema cawaichaara ɓʉda wayacusa jaradiaida ɓʉa juɓa dawabʉrʉ quĩrãca. Bãrãra warra zaque quĩrãca ɓea bẽrã djico coɗi cãyãbara juɓadrʉ doɗida panʉa.
13 Juɓa do ɓeara waɗi djuburi queɗea bẽrã sãwã jipa oira adua ɓeaa.
14 Baribʉrʉ djico zareara drõãrã iteaa. Ãdjirãba Ãcõrẽ beɗea quĩrãcuita crĩcha panʉneba cawa panʉa cãrẽda biada idjaɓa cãrẽda cadjiruada.
