Hebreo 7:1-28
7 Maʉ̃ Melquisedéra Saleʉ̃ puruɗebema boro basía idjaɓa Ãcõrẽ dji Dromaara ɓʉ sacerdote basía.* Maʉ̃ ewariɗe Abrahaʉ̃ra ʉ̃cʉrʉ puru bororã ume djõpeɗa jũma poyasia. Abrahaʉ̃ jẽda zebʉrʉɗe Melquisedéba audiaɓariɗe wãpeɗa idjira bia jarasia Ãcõrẽba carebamãrẽã.
2 Maʉ̃be Abrahaʉ̃ba djõ ɓapeɗa jãrĩnanebemada Melquisedéa diasia. Die juachabʉrʉza aɓa diasia. Melquisedé trʉ̃ba jara ɓʉa “ẽberãrã boro jipa ɓʉ.” Idjaɓa idjira Saleʉ̃nebema boro abadjiɗaa. Maʉ̃ trʉ̃ba jara ɓʉa “necai ɓaiɗebema boro.”
3 Ni aɓaʉba adua panʉa Melquisedé zezara, dji papa siɗa cairã basida. Adua panʉa idji ẽberãrã drõã naẽnabemara cairã basida. Idji toɗaɗebemada, beuɗaɗebema siɗa adua panʉa.* Mãwã idjira Ãcõrẽ Warra quĩrãca ewariza sacerdotea.
4 ¡Melquisedéɗebemada bio crĩchaɗadua! Idjira wãrãda dji droma basía. Dadjirã drõã naẽnabema dji droma ɓʉ Abrahaʉ̃ba djõ ɓapeɗa jãrĩnanebemada idjía diasia. Die juachabʉrʉza aɓa diasia.
5 Mãwãnacarea Ãcõrẽba Moisea diaɗa leyɗe jarasia jũma israelerãba edabʉdaɗebemada Leviɗeba yõpeɗaɗa sacerdoterãa diaɗida panʉda. Die edabʉdaza aɓa diaɗida panʉa. Israelerãra maʉ̃ sacerdoterã djabarãmĩna, aɓari Abrahaʉ̃neba yõpeɗaɗamĩna, mãwã diaɗida panʉa.
6 Baribʉrʉ Melquisedéra Leviɗeba yõnaẽ́ basía. Mãwãmĩna Abrahaʉ̃ba jãrĩnanebemada idjía diasia. Die juachabʉrʉza aɓa diasia. Maʉ̃ne Melquisedéba Abrahaʉ̃ra bia jarasia Ãcõrẽba carebamãrẽã. Mãwã osia Ãcõrẽba Abrahaʉ̃a naẽna wãrãda carebayaɗa aɗamĩna.*
7 Jũmarãba cawa panʉa dji dromaara ɓʉba dji eɗaara ɓʉra bia jarabarida Ãcõrẽba carebamãrẽã.
8 Israelerãba edabʉdaɗebemada Leviɗeba yõpeɗaɗa sacerdoterãa diabadaa. Maʉ̃ sacerdoterã beuɗimĩna die edabʉdaza ãdjía aɓa diabadaa. Baribʉrʉ Melquisedéra waɗi zocai ɓʉca ɓʉa Ãcõrẽ beɗeaba idjira beusida jaraẽ́ ɓʉ bẽrã. Mãwã Abrahaʉ̃ba jãrĩnanebemada maʉ̃ beuca sacerdotea diasia. Die juachabʉrʉza aɓa diasia.
9 7:9-10 Israelerãba die edabʉdaɗebemada Leviɗeba yõpeɗaɗa sacerdoterãa aɓa diabadaa. Baribʉrʉ Melquisedéba Abrahaʉ̃ audiaɓarisiɗe Abrahaʉ̃ wiuzaque Levira waɗi neẽ́ basía. Maʉ̃ bẽrã dadjirãba nãwã jaraɗida panʉa: Abrahaʉ̃ba die juachabʉrʉza Melquisedéa aɓa diasiɗe idji wiuzaque Leviɗeba yõnirã biɗa ara maʉ̃gʉda diasiɗaa.
11 Ãcõrẽba idji ley diasiɗe Leviɗeba yõpeɗaɗa sacerdoterãda ɓʉsia israelerã maʉ̃ leyɗeba pe eronĩbaɗamãrẽã. Naãrã Aaroʉ̃da sacerdote dji droma basía. Maʉ̃ sacerdoterãba o panʉneba ẽberãrãda poya jipa ɓeaɗibara, ¿cãrẽ cãrẽã Aaroʉ̃ awara sacerdote Melquisedé quĩrãca ɓʉda zeida ɓasi?
12 Maʉ̃ sacerdotera Leviɗeba yõpeɗaɗa sacerdoterã cacuabari ɓesia. Maʉ̃ bẽrã dji ley siɗa awara ɓesia.
13 Jũma maʉ̃gʉba dadjirã Boro Jesuɗebemada beɗea ɓʉa. Idjira Leviɗeba yõnaẽ́ basía, ãtebʉrʉ Judaɗeba yõna basía. Maʉ̃ naẽna ni aɓaʉ Judaɗeba yõnada sacerdote ɓeaɗaẽ́ basía.
14 Moiseba jaraca basía sacerdoterãra maʉ̃ ẽberãrãneba zeɗida. Baribʉrʉ jũmarãba cawa panʉa dadjirã Boro Jesura Judaɗeba yõna basida.
15 Jũma mʉ̃a jaraɗara ebuɗaara ɓʉa naʉ̃da cawaɗibʉrʉ: Leviɗeba yõpeɗaɗarã awara Jesuda sacerdoteda ɓesia Melquisedé ɓaɗa quĩrãca.
16 Idjira sacerdoteda ɓeẽ́ basía leyba ɓʉɗa bẽrã. Leyba aɓabe Leviɗeba yõpeɗaɗadrʉ ɓʉbaria. Jesura sacerdoteda ɓesia idji ʉɓʉaɗeba beuca bẽrã.
17 Maʉ̃ carea Ãcõrẽ Beɗeaɗe nãwã ɓʉ́ ɓʉa:
Bʉra ewariza sacerdoteda ɓaya Melquisedé ɓaɗa quĩrãca.*
18 Naãrã ɓaɗa leyba ni aɓaʉda carebaɗaẽ́ bẽrã Ãcõrẽba ãyã ɓʉsia.
19 Maʉ̃ leyba ni aɓa biɗa jipa ɓʉẽ́ basía. Maʉ̃ ley cãyãbara Ãcõrẽba ne biara ɓʉda diasia dadjirã carebai carea. Maʉ̃gʉɗeba dadjirãra Ãcõrẽ caita wãbadaa.
20 7:20-21 Ãcõrẽba dji naãrã panana sacerdoterã ɓʉsiɗe ewariza ɓeaɗida jaraẽ́ basía. Baribʉrʉ Ãcõrẽba Jesura sacerdoteda ɓʉsiɗe wãrãneba jarasia ewariza mãwã ɓaida. Ãcõrẽ Beɗeaɗe nãwã ɓʉ́ ɓʉa:
Dadjirã Boroba wãrãneba jarasia bʉra ewariza sacerdoteda ɓaida Melquisedé ɓaɗa quĩrãca.* Idjia jaraɗara quĩrã awara oẽ́a.
22 Maʉ̃gʉra Ãcõrẽba wãrãneba jaraɗa bẽrã dadjirãba cawa panʉa Ãcõrẽba Jesuɗeba dadjirã ume beɗea ɓʉɗara wãrãda oida. Maʉ̃ beɗea ɓʉɗara idjia naãrã diaɗa ley cãyãbara biara ɓʉa.
23 Naãrã ɓeaɗa sacerdoterãra beubadjiɗaa. Aɓa jaiɗasira idjia o ɓaɗara waa poya oẽ́ bẽrã idji cacuabari dewarada ɓebadjia. Mãwã zocãrãda sacerdote basiɗaa.
24 Baribʉrʉ Jesura beuca bẽrã ewariza sacerdote baya.
25 Maʉ̃ bẽrã idjiɗeba Ãcõrẽmaa zebʉdara jũma poya ẽdrʉ edaya ewariza zocai ɓeaɗamãrẽã. Idjira beuca bẽrã ewariza dadjirã carea Ãcõrẽa beɗea djuburiabaria.
26 Dadji Sacerdote dji Droma Jesuba cadjiruara ocaa, ne jũmane jipa ɓʉa. Ãcõrẽba idjira bia unu ɓʉa. Cadjirua obadarã tãẽnabemada ãyã ɓʉpeɗa bajãne dji dromada ɓʉsia. Maʉ̃ bẽrã ne jũmane dadjirãra poya carebaya.
27 Idjia ocaa dewararã sacerdote dji dromarãba ewariza obada quĩrãca. Maʉ̃ sacerdoterãba ara ãdjia cadjirua opeɗaɗa carea naãrã Ãcõrẽa animarãda babue diabadaa. Maʉ̃bebʉrʉ dewara animarãda babue diabadaa ẽberãrãba cadjirua opeɗaɗa carea. Baribʉrʉ Jesuba animarã babue diabʉrʉ quĩrãca ara idjida idu beabisia ẽberãrãba cadjirua obada carea. Ɓarima aɓa mãwã oɗaba cadjiruara jũma sʉgʉsia.
28 Ãcõrẽba Moisea diaɗa leyba ẽberãrã ne jũmane jipaẽ́ ɓeada ɓʉbaria sacerdote dji dromarãda ɓeaɗamãrẽã. Baribʉrʉ maʉ̃ ley diaɗacarea Ãcõrẽba wãrãneba jarasia idji Warrara ewariza Sacerdote dji Dromada ɓaida. Mãwã idji Warrara ɓʉsia dadjirã carea sacerdote ariɗe ɓʉda ɓemãrẽã.
Beɗea eɗaare
^ 7:1. Genesi 14:17-20.
^ 7:3. Griego beɗeaɗe maʉ̃ versículoda nãwã ɓʉ́ ɓʉa: “Melquisedéra zeza neẽ́ ɓʉa, papa neẽ́ ɓʉa, ẽberãrã drõã naẽnabema siɗa neẽ́ ɓʉa. Idji toɗa ewari neẽ́ ɓʉa, idji beuɗa ewari siɗa neẽ́ ɓʉa.”
^ 7:6. Genesi 12:1-3.
^ 7:17. Salmo 110:4.
^ 7:20-21. Melquisedé ɓaɗa quĩrãca. Griego beɗeaɗe ʉ̃cʉrʉ cartaɗe maʉ̃ra neẽ́a.
