Hebreo 8:1-13
8 Dji crĩcha droma daiba jara panʉra naʉ̃gʉa: dadjirã Sacerdote dji Dromada bajãne Ãcõrẽ bugue biya quiru jʉwa araare chũmʉa.
2 Bajãne Ãcõrẽ de dji wãrã araɗe idjira sacerdotea. Maʉ̃ dera ẽberãba oɗaẽ́a, ãtebʉrʉ dadjirã Boro Ãcõrẽba oɗaa.
3 Sacerdote dji dromarãda Ãcõrẽba jũma ɓʉbaria idjía ne diaɗamãrẽã idjaɓa animarãda babue diaɗamãrẽã. Maʉ̃ bẽrã Jesucrito biɗa ne diaida ɓasia.
4 Idjida naʉ̃ ẽjũãne ɓʉbara sacerdote baẽ́ bacasia naʉ̃ ẽjũãne sacerdoterã bara bẽrã. Maʉ̃ sacerdoterãba Ãcõrẽa ne diabadaa idji leyɗe ɓʉ́ ɓʉ quĩrãca.
5 Sacerdoterãba o panʉneba unubibadaa bajãne sãwãbʉrʉ ɓʉda. Maʉ̃ carea Moiseba Ãcõrẽ wua de oi naẽna Ãcõrẽba idjía nãwã jarasia: “Jũma daucha oɗadua mʉ̃a naʉ̃ eyaɗe unubiɗa quĩrãca.”*
6 Baribʉrʉ Jesu dadjirã Sacerdote dji Dromaba bajãne o ɓʉra sacerdoterãba naʉ̃ ẽjũãne o panʉ cãyãbara biara ɓʉa. Ara maʉ̃ quĩrãca Ãcõrẽba Jesuɗeba beɗea ɓʉɗara biara ɓʉa Moiseɗeba beɗea ɓʉɗa cãyãbara. Mãwã biara ɓʉa maʉ̃ beɗea ɓʉsiɗe Ãcõrẽba ẽberãrãra biara carebayaɗa aɗa bẽrã.
7 Ãcõrẽba Moiseɗeba naãrã beɗea ɓʉɗaba wãrãda carebaɗabara waya dewara beɗeada ɓʉẽ́ bacasia.
8 Baribʉrʉ Ãcõrẽba Moiseɗeba beɗea ɓʉɗara ẽberãrãba jũma opeɗaɗaẽ́ bẽrã idjia beɗeaɗe panʉda unusia. Maʉ̃ carea nãwã jarasia:
Jũmarã Boroba nãwã jara ɓʉa: “Ewari aɓa mʉ̃a israelerã ume, Judaɗebemarã ume biɗa beɗea djiwiɗida ɓʉya.
9 Maʉ̃ beɗea djiwiɗira bãrã drõã naẽnabemarã ume beɗea ɓʉɗa quĩrãca ɓaẽ́a.
Bãrã drõã naẽnabemarã ume beɗea ɓʉsia Egiptoɗeba quĩrãcuita waga ẽdrʉ enesiɗe.*
Baribʉrʉ wãrãda ĩjãpeɗaɗaẽ́ bẽrã mʉ̃a ãdjirãra igarasia.” Mãwã jara ɓʉa jũmarã Boroba.
10 Idjaɓa jũmarã Boroba nãwã jara ɓʉa: “Nocoarebema ewariɗe mʉ̃a beɗea djiwiɗida israelerã ume nãwã ɓʉya:
mʉ̃ leyra ãdjirã crĩchaɗe, ãdjirã soɗe biɗa ɓʉya.
Mʉ̃ra ãdjirã Ãcõrẽ baya, idjaɓa ãdjirãra mʉ̃ puru baya.
11 Maʉ̃ne jũmarãba mʉ̃ra cawa panania. Dji eɗaara ɓeaba, dji dromarã biɗa cawa panania.
Maʉ̃ bẽrã ni aɓaʉba idji druaɗebemarãa, idji ẽberãrãa biɗa waa jaradiaɗaẽ́a mʉ̃ jũmarã Boroda cawaɗamãrẽã.
12 Ãdjirãba biẽ́ opeɗaɗara mʉ̃a jũma quĩrãdoaya. Ãdjirãba cadjirua opeɗaɗara mʉ̃a waa crĩcha ɓaẽ́a.”*
13 Ãcõrẽba beɗea djiwiɗi ɓʉyaɗa asiɗe cawabisia idjia naãrã beɗea ɓʉɗara dji drõãda. Dji drõã bẽrã dãrãẽ́ne ãyã ɓʉya.*
