Hebreo 9:1-28
9 Ãcõrẽ israelerã ume naãrã beɗea ɓʉsiɗe jarasia idji wua deda naʉ̃ ẽjũãne oɗida panʉda, maʉ̃ deɗe sãwã oɗida panʉ siɗa.
2 Maʉ̃ de oɗapeɗa dji nocoarebema dejãra “Ãcõrẽ itea ɓʉ dejã” abadjiɗaa. Maʉ̃ dejãne ĩbĩrãda, mesa siɗa ɓasia. Paʉ̃ Ãcõrẽ quĩrãpita ɓʉɗa siɗa ɓasia.
3 Dji eɗaara ɓʉ dejãne wuaba eatʉ jira ɓasia. Maʉ̃gʉ dejãra “Ãcõrẽ itea biara ɓʉ dejã” abadjiɗaa.
4 Quera bá diabadada mama ɓasia. Maʉ̃ra oroba jũma bʉrá ɓasia. Ãcõrẽ baurude siɗa ɓasia. Maʉ̃ siɗa oroba jũma bʉrá ɓasia. Epeɗeco jũgurua oro oɗada manába bira ɓʉda maʉ̃ baurudeɗe eɗa ɓasia.* Aaroʉ̃ bacuru tununa siɗa eɗa ɓasia.* Ãcõrẽba diaɗa ley mõgara peweɗeaɗe ɓʉɗa siɗa eɗa ɓasia.*
5 Baurude ʉ̃rʉ̃ bajãnebema nezoca quĩrãca i bara panʉda umé panasiɗaa. Ãdji iba dji baurude ʉ̃rʉ̃ coɓʉra jũãtrʉ eropanasiɗaa.* Ãdji panʉmaa Ãcõrẽ quĩrãwãrẽã dorrodorroada zebadjia. Maʉ̃ baurude ʉ̃rʉ̃ coɓʉmaa sacerdoteba oa jĩãpobʉrʉɗe Ãcõrẽba ẽberãrãba cadjirua opeɗaɗara quĩrãdoabadjia. Maʉ̃gʉɗebemada ara nawena daiba naʉ̃ cartaɗe jũma jaradiaɗaẽ́a.
6 Jũma maʉ̃gʉ pãrãpeɗaɗacarea sacerdoterãra ewariza dji nocoarebema dejãne eɗa wãbadjiɗaa ãdjia Ãcõrẽ itea oɗida panʉra jũma oɗi carea.
7 Baribʉrʉ dji eɗaara ɓʉ dejãne aɓabe sacerdote dji dromadrʉ poaza ɓarima aɓa eɗa wãbadjia. Eɗa wãbʉrʉɗe idjia cadjirua oɗa carea idjaɓa ẽberãrãba adua panʉneba cadjirua opeɗaɗa carea biɗa animarã oada Ãcõrẽ quĩrãpita jĩãpoi carea edebadjia.*
8 Maʉ̃neba Ãcõrẽ Jaureba cawabi ɓasia ẽberãrãra waɗi Ãcõrẽ de bajãne ɓʉɗe poya eɗa wãnaẽ́da. Sacerdoterãba waɗi Ãcõrẽ de naʉ̃ ẽjũãne ɓʉɗe ne oɗida panʉmisa mãwã ɓasia.
9 Naʉ̃ ewariɗe jũma maʉ̃gʉba cawabi ɓʉa Ãcõrẽa ne dia panʉneba idjaɓa animarã babue dia panʉneba biɗa dji mãwã o ɓea crĩchara poya jipa ɓʉẽ́da.
10 Ãcõrẽba Moisea diaɗa leyba aɓabe cawabisia cãrẽda coɗida panʉda, cãrẽda doɗida panʉda, idjaɓa Ãcõrẽba sʉgʉbi ɓʉra sãwã sʉgʉɗida panʉda. Jũma maʉ̃gʉra naʉ̃ djaraɗe obadjiɗaa aɓa Ãcõrẽba jũma quĩrã awara obʉrʉɗaa.
11 Baribʉrʉ Critora zesia dadjirã Sacerdote dji Droma bai carea. Jũma ne bia naʉ̃ ewariɗe ɓʉda idjia dadjirãa dia ɓʉa.* Idjira Ãcõrẽ de bajãne ɓʉɗe dadjirã carea ne o ɓʉa. Maʉ̃ dera dji araa. Ãcõrẽ de naʉ̃ ẽjũãne ɓʉ cãyãbara biara ɓʉa. Ẽberãba oɗaẽ́a; naʉ̃ ẽjũãnebemaẽ́a.
12 Critora Ãcõrẽ de bajãne ɓʉɗe dji eɗaara ɓʉ dejãne ɓarima aɓa eɗa wãsia. Maʉ̃ dejãra “Ãcõrẽ itea biara ɓʉ dejã” abadaa. Wãsiɗe chiwatu oada, paca zaque oa siɗa Ãcõrẽ quĩrãpita jĩãpoi carea edeẽ́ basía. Ãtebʉrʉ ara idji oada edesia. Ɓarima aɓa mãwã oɗaba dadjirãra ẽdrʉ ɓʉsia ewariza beɗea neẽ́ ɓeaɗamãrẽã.
13 Sacerdoteba paca dji umaquĩrã oada, chiwatu oada, paca zaque wẽrã babue diaɗa pora siɗa ẽberãrã ʉ̃rʉ̃ jĩãpobaria. Maʉ̃ba ẽberãrã Ãcõrẽ quĩrãpita biẽ́ ɓeaɗara naʉ̃ djaraɗe bia ɓʉbaria.
14 Mãwã baibʉrʉ, ¿Crito oaba dadjirãra biara ɓʉẽ́ca? Critora cadjirua neẽ́ ɓasia. Ãcõrẽ Jaure beucaba carebaɗa bẽrã ara idjida idu beabisia animarã Ãcõrẽa babue diabʉrʉ quĩrãca. Cadjirua o panʉ carea dadjirãra beuɗida panasiɗaa. Baribʉrʉ Critoba ara idjida idu beabiɗa bẽrã dadjirãba cadjirua opeɗaɗara Ãcõrẽba quĩrãdoapeɗa dadjirã crĩchara jipa ɓʉsia. Mãwã Ãcõrẽ zocai ɓʉra dadjirãba poya ĩjãnia.
15 Ãcõrẽba naãrã beɗea ɓʉɗaɗeba panasiɗaɗe ẽberãrãba cadjiruada obadjiɗaa. Baribʉrʉ Critodrʉ beusia ãdjia cadjirua obadaɗebemada ẽdrʉ ɓʉi carea. Critora beuɗa bẽrã idjiɗeba Ãcõrẽba beɗea djiwiɗida ɓʉsia. Mãwã Ãcõrẽba ne jũma bia jõca diai jaraɗara idjia trʉ̃narãba Critoɗeba poya edaɗia.
16 Naʉ̃ quĩrãca ɓʉa: ẽberãba cartaɗe ɓʉbaria idji beuɗacarea caiba idjia eroɓʉra edaida. Baribʉrʉ dji edaida ɓʉba dji beɗea ɓʉɗara wãrãda beusida acʉbiẽ́bʉrʉ, poya edaẽ́a.
17 Dji beɗea ɓʉɗa waɗi zocai ɓʉmisa dji edaida ɓʉba maʉ̃ cartaɗe ɓʉ́ ɓʉra poya edaẽ́a. Aɓabe beuɗacareabʉrʉ poya edaya.
18 Ara maʉ̃ quĩrãca Ãcõrẽba israelerã ume naãrã beɗea ɓʉsiɗe animarã oada erozoasia. Maʉ̃ba cawabisia ãdjirãba maʉ̃ beɗea ɓʉɗara ĩjã oɗida panasiɗada.
19 Maʉ̃ra nãwã ɓasia: Ãcõrẽba diaɗa leyra Moiseba naãrã ẽberãrãa jũma jarasia. Maʉ̃be paca zaque oada, chiwatu oa siɗa baidoɗaa puerasia. Hisopo bacuru jʉwateɗe oveja cara purea oɗada jʉ̃peɗa oaɗe ɓeguea edasia. Maʉ̃ oaba idjia Ãcõrẽba diaɗa ley cartara, ẽberãrã siɗa jĩãposia.
20 Jĩãpobʉrʉɗe nãwã jarasia: “Naʉ̃ oaba jara ɓʉa Ãcõrẽ bãrã ume beɗea ɓʉɗara jũma ĩjã oɗida panʉda.”*
21 Ara maʉ̃ quĩrãca Moiseba Ãcõrẽ wua dera, jũma maʉ̃ deɗe eɗa ɓea siɗa oaba jĩãposia.
22 Wãrãda Ãcõrẽba Moisea diaɗa leyba jara ɓʉa berara ne jũmada oaba jĩãpoida ɓʉda Ãcõrẽ quĩrãpita bia ɓamãrẽã. Oada erozoaẽ́bʉrʉ dadjia cadjirua opeɗaɗara Ãcõrẽba quĩrãdoaẽ́a.
Crito oaba dadjia cadjirua oɗara jũma sʉgʉbaria
23 Ãcõrẽ wua dera, maʉ̃ deɗe eɗa ɓea siɗa Ãcõrẽ de bajãne ɓʉ zaca ɓasia. Jũma maʉ̃gʉra animarã oaba jĩãpoida ɓasia Ãcõrẽ quĩrãpita bia ɓamãrẽã. Baribʉrʉ Ãcõrẽ de bajãne ɓʉra, maʉ̃ deɗe eɗa ɓea siɗa animarã oa cãyãbara oa biara ɓʉba jĩãpoida ɓasia.
24 Critoba idji oara Ãcõrẽ de ẽberãba oɗaɗe eɗa edeẽ́ basía, maʉ̃gʉra aɓabe Ãcõrẽ de ara bajãne ɓʉ zaca ɓaɗa bẽrã. Critoba idji oara bajãnebʉrʉ Ãcõrẽ quĩrãpita edesia. Iɗira mama dadjirã carea Ãcõrẽa quĩrã djuburia iwiɗi ɓʉa.
25 Idjira bajãnaa wãẽ́ basía idji oada ɓarima zocãrã jĩãpoi carea naʉ̃ ẽjũãnebema sacerdote dji dromaba poaza Ãcõrẽ itea biara ɓʉ dejãne obari quĩrãca.
26 Mãwã ɓaɗabara naʉ̃ ẽjũã oɗaɗeba ʉ̃taa Critora ɓarima zocãrã beuida ɓacasia. Baribʉrʉ naʉ̃ jĩrũarebema ewariɗe zepeɗa ara idjida idu beabisia. Ɓarima aɓa mãwã oɗaba dadjirãba cadjirua opeɗaɗara jũma ãyã ɓʉsia.
27 Jũmarãda ɓarima aɓa beuɗia. Mãwãnacarea Ãcõrẽba cawa oya.
28 Ara maʉ̃ quĩrãca Critoba ɓarima aɓa ara idjida idu beabisia zocãrãba cadjirua opeɗaɗara ãyã ɓʉi carea. Idjira wayacusa zeya, baribʉrʉ maʉ̃ne dadjirãba cadjirua obadara ãyã ɓʉi carea zeẽ́a. Ãtebʉrʉ zeya idji jʉ̃ã ɓeara ẽdrʉ edai carea.
