Hecho 15:1-41
15 Maʉ̃ ewariɗe ʉ̃cʉrʉ Judea druaɗebemarãda Antioquía puruɗaa wãsiɗaa. Mama ãdjia djabarã judiorãẽ́a jaradia panesiɗaa Moiseba ɓʉɗa quĩrãca umaquĩrã cacuada wẽãgoɗaẽ́bʉrʉ, Ãcõrẽba ẽdrʉ edaẽ́da.*
2 Maʉ̃ carea Paulora, Bernabe siɗa ãdjirã ume bio caicayasiɗaa. Maʉ̃be djabarãba Pauloda, Bernabeda, dewararã siɗa Jerusaleʉ̃naa diabuesiɗaa maʉ̃nebemada Jesuba diabueɗarã ume, djabarã bororã ume biɗa ãbaa beɗeaɗamãrẽã.
3 Djabarã Antioquíaɗebemaba diabuesiɗaɗe ãdjirãra Penicia druaɗe, Samaria druaɗe biɗa pʉrrʉa nĩbasiɗaa. Puruza nẽbʉrʉsiɗaa sãwã judiorãẽ́ba ãdji crĩcha drõãra igaraɗapeɗa Jesuda ĩjãsiɗada. Maʉ̃ beɗea ũrĩsiɗaɗe jũma djabarãra ɓʉsriɗasiɗaa.
4 Jerusaleʉ̃ne jũẽsiɗaɗe Jesuba diabueɗarãba, djabarãba, dji bororã biɗa ãdjirãra bia edasiɗaa. Maʉ̃ne Pauloba, Bernabe biɗa jũma Ãcõrẽba ãdjiɗeba judiorãẽ́ tãẽna oɗada nẽbʉrʉsiɗaa.
5 Baribʉrʉ ʉ̃cʉrʉ pariseorã Jesu ĩjã ɓeaba ʉ̃ta nũpanenapeɗa jarasiɗaa:
–Jũma djabarã judiorãẽ́ra cacua wẽãgoɗida panʉa. Ãdjirãa jaradiaɗida panʉa Ãcõrẽba Moisea diaɗa leyra ĩjã oɗamãrẽã.–
6 Maʉ̃nebemada beɗeaɗi carea Jesuba diabueɗarãra djabarã bororã ume ãbaa dji jʉresiɗaa.
7 Dãrã beɗeabʉdaɗe Pedrora piradrʉpeɗa jarasia:
–Djabarã, bãrãba cawa panʉa bãrã tãẽna Ãcõrẽba mʉ̃da naãrã edasida judiorãẽ́a jaradiamãrẽã.* Maʉ̃ne dãrãbʉrʉa judiorãẽ́ba beɗea bia Jesuɗebemada ũrĩnapeɗa ĩjãsiɗada.
8 Ãcõrẽba jũmarã sora cawa ɓʉa. Maʉ̃ judiorãẽ́ba ĩjãsiɗaɗe Ãcõrẽba cawabisia ãdjirãra bia edasida. Idji Jaurera ãdjirãa diasia dadjirãa naẽna diaɗa quĩrãca.*
9 Ãcõrẽba dadjirãra ãdjirã ume quĩrã awara oẽ́ basía. Ãdjia ĩjãsiɗaɗe ãdji sora sʉgʉsia.
10 Bãrãba ¿cãrẽ cãrẽã Ãcõrẽba cawabiɗara igara panʉ? ¿Idjia sãwã oi cawaya mãwã panʉca? ¿Cãrẽ cãrẽã dadjirãba, dadji drõãenabemarã biɗa poya oɗaẽ́ baɗada ãdjirãa obi quĩrĩã panʉ?
11 Dadjirãba ĩjã panʉa dadji Boro Jesuba idji biaɗeba dadjirãra, ãdjirã siɗa ẽdrʉ edasida.–
12 Maʉ̃ne Bernabeba Paulo biɗa nẽbʉrʉsiɗaa Ãcõrẽba ne ununacada ãdjiɗeba judiorãẽ́ tãẽna osida. Maʉ̃ba cawabisia idjira ãdji ume ɓʉda. Maʉ̃ne jũmarãba chupea ũrĩ duanasiɗaa.
13 Maʉ̃ nẽbʉrʉpeɗaɗacarea Santiagoba jarasia:*
–Djabarã, mʉ̃ beɗeara ũrĩnadua.
14 Simoʉ̃ba dadjirãa nẽbʉrʉsia Ãcõrẽba judiorãẽ́ crĩcha ɓʉɗeba ãdjirãra edasida idji puruɗebemada ɓeaɗamãrẽã.
15 Simoʉ̃ba jaraɗara Ãcõrẽneba beɗeabadaba ɓʉpeɗaɗa quĩrãca ɓʉa. Nãwã ɓʉ́ ɓʉa:
16 Mãwãnacarea mʉ̃ra wayacusa zeya Davi jʉwaeɗa ɓaɗa ãrĩ ɓʉda bia oi carea.
Daviba pe eroɓaɗara wayacusa mʉ̃a bia ɓʉya.
17 Mãwã waabema ẽberãrãba, judiorãẽ́ mʉ̃a edaɗarãba mʉ̃ra jʉrʉɗia.
18 Dadjirã Boroba mãwã jara ɓʉa. Idjia drõã naẽnaʉba jũma maʉ̃gʉra ebuɗa cawabi ɓʉa.*
19 Maʉ̃ carea mʉ̃maarã dadjirãba judiorãẽ́ Ãcõrẽ ĩjãbʉdara mĩã sẽniẽ́ panʉa jũma dadji judiorã ley ĩjã oɗamãrẽã.
20 Baribʉrʉ cartaɗe ɓʉɗida panʉa jʉwaba oɗa ãcõrẽa nedjara diaɗara coɗiẽ́ panʉda, auɗua nĩbaɗiẽ́ panʉda, animarã otrãjʉ̃ beaɗara coɗiẽ́ panʉda, idjaɓa oa siɗa coɗiẽ́ panʉda.
21 Mãwã oɗiẽ́ panʉa dadji drõã naẽnabema ewariɗeba Ãcõrẽba Moisea diaɗa leyra puruza jaradiabada bẽrã. Ʉ̃nãũbada ewariza maʉ̃ leyra dadji judiorã dji jʉrebada deza jĩgua lebadaa.–
22 Maʉ̃ crĩchara Jesuba diabueɗarãba, djabarã bororãba, jũma djabarã biɗa bia ũrĩsiɗaa. Maʉ̃ bẽrã ʉ̃cʉrʉ edasiɗaa Paulo ume idjaɓa Bernabe ume Antioquíaɗaa wãnamãrẽã. Silada, Juda Barsabá abada siɗa edasiɗaa. Ãdjira djabarã tãẽna dji dromarã basía.
23 Ãdjirã ume cartada nãwã ɓʉ́ diabuesiɗaa:
Jesuba diabueɗarãba, djabarã bororãba, jũma djabarã biɗa naʉ̃ cartara ɓʉbʉdaa djabarã judiorãẽ́ Antioquía puruɗebema itea, Siria druaɗebema itea, Cilicia druaɗebema itea biɗa. Dairãba quĩrĩã panʉa bãrãra bia pananida.
24 Dairãba ũrĩsiɗaa ʉ̃cʉrʉ ẽberãrãda namaʉba bãrãmaa wãnapeɗa ãdjia jaradia panʉ carea bãrãra bio sopuaɗapeɗa aɓeɗa cawa crĩchaɗaẽ́ panesiɗada.* Baribʉrʉ maʉ̃ ẽberãrãra dairãba diabueɗaẽ́ basía.
25 Maʉ̃ carea ãbaa dji jʉreɗapeɗa jũmarãba crĩchasiɗaa ʉ̃cʉrʉ djabarãda edaɗapeɗa bãrãmaa diabueɗida. Ãdjira dadjia quĩrĩã panʉ djaba Bernabe ume, Paulo ume biɗa wãnia.
26 Minijĩchiaɗe panʉne biɗa Bernabeba, Paulo ume dadjirã Boro Jesucritoba quĩrĩã ɓʉda o panabaria.
27 Dairãba Judada, Sila siɗa diabuebʉdaa. Maʉ̃ djabarãba daiba naʉ̃ cartaɗe ɓʉbʉda quĩrãca jaraɗia.
28 Ãcõrẽ Jauremaarã, dairãmaa biɗa bia ɓʉa jũma dai judiorã leyra bãrãa õgo ĩjã obiɗaẽ́da. Aɓabe naʉ̃gʉda ĩjã obiɗia:
29 jʉwaba oɗa ãcõrẽa nedjara diaɗara coɗiẽ́ panʉa, oa siɗa coɗiẽ́ panʉa, animarã otrãjʉ̃ beaɗara coɗiẽ́ panʉa, idjaɓa auɗua nĩbaɗiẽ́ panʉa. Jũma maʉ̃gʉda ĩjã osiɗara bia panania. Waaẽ́a. Bia ɓeaɗadua.
30 Maʉ̃be ãdjia diabuepeɗaɗarãra Antioquía puruɗaa wãsiɗaa. Jũẽnapeɗa jũma djabarãda ãbaa trʉ̃napeɗa maʉ̃ cartara diasiɗaa.
31 Djabarãba maʉ̃ cartara jĩgua leɗapeɗa bio ɓʉsriɗasiɗaa ãdjirã crĩchara biabiɗa bẽrã.
32 Judara, Sila siɗa Ãcõrẽneba beɗeabadarã basía. Maʉ̃ bẽrã ne zocãrã jarasiɗaa djabarãba biara ĩjãnamãrẽã idjaɓa zarea pananamãrẽã.
33 Judara, Sila siɗa mama dãrã pananapeɗa djabarãba ãdji diabuepeɗaɗamaa jẽda bia wãbisiɗaa. [
34 Baribʉrʉ Silaba crĩchasia biara ɓʉda Antioquíaɗe ɓeida.]*
35 Maʉ̃ne Paulora Bernabe siɗa Antioquíaɗe panesiɗaa. Ãdjia, zocãrã djabarã biɗa dadji Boro beɗeara jaradia panasiɗaa idjaɓa beɗea bia Jesuɗebemada ebuɗa jarabadjiɗaa.
Paulo Bernabe umebemada awara wãna
36 Dãrãbʉrʉɗe Pauloba Bernabea jarasia:
–Puruza dadji Boro beɗea jaradia pananamaa wayacusa wãnaa djabarã sãwã duanʉ cawaɗi carea.–
37 Maʉ̃ne Bernabeba Juaʉ̃ Marcoda ãdji ume ede quĩrĩã ɓasia.
38 Naãrã wãsiɗaɗe maʉ̃ Juaʉ̃ Marcoba Panpilia druaɗe ãdjira amepeɗa jẽda wãsia.* Ãdji ume nocoɗaa jaradiaɗe wãẽ́ basía. Maʉ̃ carea Paulomaarã biẽ́ ɓasia Juaʉ̃ Marcora wayacusa edeida.
39 Paulora Bernabe ume maʉ̃ carea caicayaɗapeɗa awara wãsiɗaa. Bernabeba Marcora edapeɗa barcoɗe Chipre druaɗaa wãsiɗaa.
40 Maʉ̃ne Pauloba Silada edasia idji ume wãmãrẽã. Djabarãba ãdjira dadji Boro jʉwaɗe ɓʉsiɗaa idji biaɗeba carebamãrẽã.
41 Maʉ̃bebʉrʉ wãsiɗaa. Siria druaɗe, Cilicia druaɗe biɗa pʉrrʉabʉdaɗe puruza djabarãra carebabadjiɗaa dadji Borora biara ĩjãnamãrẽã.
Beɗea eɗaare
^ 15:1. Genesi 17:12.
^ 15:7. Hecho 10:1-43.
^ 15:8. Hecho 10:44-47.
^ 15:13. Maʉ̃ Santiagora Jesu djabaa. Santiagora idjaɓa Jacobo abadaa. Cãpũrĩã beɗeaɗe Santiago trʉ̃ra zesia “San Jacobo” isabe jarabʉrʉɗeba. Carta Santiago abadara maʉ̃ Santiagoba ɓʉsia.
^ 15:18. Amos 9:11-12.
^ 15:24. Griego beɗeaɗe ʉ̃cʉrʉ cartaɗe naʉ̃ siɗa ɓʉ́ ɓʉa: “Ãdjia jaradia panʉa bãrãra cacua wẽãgoɗida panʉda idjaɓa judiorã ley jũma oɗida panʉda Ãcõrẽba ẽdrʉ edamãrẽã.” Hecho 15:1,5.
^ 15:34. Griego beɗeaɗe ʉ̃cʉrʉ cartaɗe maʉ̃ versículora neẽ́a.
^ 15:38. Hecho 13:13.
