Hecho 16:1-40
16 Maʉ̃ne ãdjira Derbe puruɗaa wãsiɗaa. Mamaʉba Listra puruɗaa wãsiɗaa.* Mama Jesu ĩjã ɓʉ Timoteo abadada ɓasia. Timoteo papara judio basía; Jesuda ĩjã ɓasia. Idji zezara griego basía.
2 Djabarã Listraɗebemaba, Iconio puruɗebema biɗa maʉ̃ Timoteoɗebemada bia jarabadjiɗaa.
3 Maʉ̃ne Pauloba Timoteora ede quĩrĩã ɓasia. Baribʉrʉ jũmarãba cawa panasiɗaa Timoteo zezara griegoda. Maʉ̃ carea Pauloba Timoteora cacua wẽãgosia judiorã maʉ̃ druaɗe ɓeaba idjiɗebemada biẽ́ crĩcharãnamãrẽã. Maʉ̃bebʉrʉ wãsiɗaa.
4 Ãdji wãbʉda puruza jarasiɗaa Jesuba diabueɗarãba, djabarã bororã Jerusaleʉ̃ne ɓeaba cartaɗe ɓʉpeɗaɗara djabarãba ĩjã o pananamãrẽã.*
5 Mãwã djabarãba dadji Borora biara ĩjãsiɗaa idjaɓa ewariza cãbanaara yõ wãsiɗaa.
Pauloba Macedonianebema ẽberã ununa
6 Pauloda idji ume nĩna siɗa Prigia druaɗe, Galacia druaɗe biɗa pʉrrʉa wãsiɗaa Ãcõrẽ Jaureba beɗea Jesuɗebemara Asia druaɗe idu jarabiɗaẽ́ bẽrã.
7 Misia druaɗe jũẽne wãsiɗaɗe crĩchasiɗaa Bitinia druaɗaa wãnida, baribʉrʉ Jesu Jaureba mamaa biɗa idu wãbiẽ́ basía.*
8 Maʉ̃ bẽrã Misia druaɗe wãyã wãnapeɗa Troa puruɗaa jũẽne wãsiɗaa.
9 Diamasi Pauloba cãĩmocara quĩrãca unusia ẽberã Macedonia druaɗebemada ʉ̃ta nũmʉda. Maʉ̃ ẽberãba Pauloa nãwã beɗea djuburiasia: “Macedonianaa dairã carebaɗe zedua.”
10 Pauloba maʉ̃da ununa bẽrã daiba cawasiɗaa Ãcõrẽba daira trʉ̃ ɓasida beɗea bia Jesuɗebemada Macedoniaɗebemarãa jaraɗamãrẽã. Ara maʉ̃da wãni carea panesiɗaa.
11 Troaɗeba jipa wãnapeɗa Samotracia morroɗe wiɓarisiɗaa. Nurẽma Neápoli puruɗe jũẽsiɗaa.
12 Mamaʉba Pilipo puruɗaa jĩrũba wãnapeɗa mama dãrãsiɗaa. Maʉ̃ purura Macedonia druaɗe puru droma basía. Romanorãda mama panabadjiɗaa.
13 Ʉ̃nãũbada ewariɗe daira puru dajadaa wãnapeɗa doeɗaa wãsiɗaa. Crĩchasiɗaa mama judiorãba Ãcõrẽa iwiɗibadada. Wãbʉdaɗe wẽrãrãda ãbaa dji jʉre duanʉda unusiɗaa. Egode chũpanenapeɗa daiba ãdjirãa beɗeasiɗaa.
14 Maʉ̃ wẽrãrãnebemada aɓa Lidia abadjiɗaa. Idjira Tiatira puruɗebema basía. Wua pursupursuada nẽdobuebadjia. Maʉ̃ judioẽ́ wẽrãba Ãcõrẽra waya ɓasia. Dadji Boroba idji soɗe tãna bẽrã Pauloba beɗea ɓʉra Lidiaba quĩrãcuita ũrĩpeɗa ĩjãsia.
15 Lidia, jũma idji deɗebemarã siɗa borocuesiɗaɗe dairãa beɗea djuburiasia idji deɗe panenamãrẽã. Nãwã jarasia:
–Bãrãmaa mʉ̃a wãrãda dadjirã Boroda ĩjãsibʉrʉ, mʉ̃ deɗe panane zeɗadua.–
Mãwã daira idji deɗe panebisia.
16 Ewari aɓa Ãcõrẽa iwiɗibadamaa wãbʉdaɗe daiba nezocawẽrã jai bara ɓʉda unusiɗaa. Maʉ̃ wẽrãba dji jaiɗeba jarabadjia cãrẽda sãwãida. Maʉ̃neba idji bororãba bio parata edabadjiɗaa.
17 Maʉ̃ wẽrãra Paulo caiɗu, dai caiɗu biɗa zebʉrʉɗe ara pichia jĩgua jarabadjia:
–¡Naʉ̃ ẽberãrãra Ãcõrẽ dji Dromaara ɓʉ nezocarãa! Ãdjia bãrãa jara panʉa sãwã maʉ̃ Ãcõrẽba ẽdrʉ edabarida.–
18 Idjia ewari zocãrã mãwã jĩgua jara nĩmi bẽrã Paulora sẽsia. Idjimaa acʉpeɗa dji jaia jarasia:
–Mʉ̃a Jesucrito trʉ̃neba bʉ́a jaraya: naʉ̃ wẽrãnebemada ãyã wãdua.–
Ara maʉ̃da dji jaira ẽdrʉsia.
19 Maʉ̃ne nezocawẽrã bororãba cawasiɗaa idjiɗeba waa parata edaɗaẽ́da. Maʉ̃ carea Paulora, Sila siɗa jidaɗapeɗa puru bororãmaa edesiɗaa.
20 Dji cawa obadarã quĩrãpita nũmʉnapeɗa jarasiɗaa:
–Za panʉ judiorãba dadjirã purura quĩrũbiga panʉa.
21 Dadji romanorãba ocara panʉda ãdjia jaradia panʉa.–
22 Maʉ̃ne jũma dji arima duanʉba Paulora, Sila siɗa orra edasiɗaa. Mãwã duanʉne dji cawa obadarãba ãdjia cacuaɗe jʉ̃ panʉra wẽãbiɗapeɗa bacuruba ubisiɗaa.*
23 Bio uɗapeɗa preso ɓʉsiɗaa. Dji preso ɓea wagabaría jarasiɗaa bio wagamãrẽã.
24 Ara maʉ̃da preso ɓea wagabariba Paulora Sila siɗa preso ɓʉbada deɗe eɗuara ɓʉɗe ɓʉpeɗa ãdji jĩrũra chicharoɗe catʉ nũmʉsia.
25 Ariquẽtra babʉrʉɗe Pauloba Sila biɗa Ãcõrẽa iwiɗi panasiɗaa idjaɓa idjía trʉ̃ã panasiɗaa. Maʉ̃da waabema preso ɓeaba ũrĩ panasiɗaa.
26 Cawaẽ́ne de uremiada wãsia. Maʉ̃gʉba preso ɓʉbada dera dji cãbãyã uresia. Jũma eɗa wãbadara ewacuasia. Preso ɓea jʉ̃ ɓʉ carena siɗa jũma ẽrã ɓaecuasia.
27 Maʉ̃ne preso ɓea wagabarira ʉ̃rʉ̃masia. Eɗa wãbada ewa nũmea unusiɗe crĩchasia preso ɓeara jũma mĩrũ wãbʉrʉsiɗada. Maʉ̃ carea idji necoda ẽũta edasia iduɓa beui carea.
28 Baribʉrʉ Pauloba jĩgua jarasia:
–Bʉduɓa beurãdua. Dairãra jũma nama duanʉa.–
29 Maʉ̃be preso ɓea wagabariba ĩbĩrãda enebipeɗa Paulo, Sila panʉmaa isabe eɗaa wãsia. Ne wayaaba cacua ure nũmʉba ãdji jĩrũ caita ɓarru coɓesia.
30 Maʉ̃be ãdjira dajadaare edepeɗa iwiɗisia:
–Achirã, mʉ̃a ¿cãrẽda oida ɓʉ Ãcõrẽba mʉ̃ra ẽdrʉ edamãrẽã?–
31 Ãdjia panusiɗaa:
–Bʉa, bʉ ẽberãrã biɗa dadji Boro Jesucritoda ĩjãnibʉrʉ, idjia bãrãra ẽdrʉ edaya.–
32 Maʉ̃be dadji Boro beɗeara idjía, jũma idji deɗebemarãa biɗa jarasiɗaa.
33 Ara maʉ̃ diamasi preso ɓea wagabariba ãdji djara cõãpeɗaɗara sʉgʉsia. Mãwãnacarea idjira, jũma idji deɗebemarã siɗa borocuesiɗaa.
34 Paulora, Sila siɗa idji deɗaa edepeɗa ne cobisia. Ãcõrẽ ĩjãpeɗaɗa bẽrã idjira, idji deɗebemarã siɗa bio ɓʉsriɗasiɗaa.
35 Nurẽma dji cawa obadaba zarrarãda preso wagabarimaa nãwã jaraɗe diabuesiɗaa:
–Paulora, Sila siɗa ẽdrʉ ɓʉdua.–
36 Maʉ̃be preso ɓea wagabariba Pauloa jarasia:
–Dji cawa obadaba bãrãra ẽdrʉ ɓʉbisiɗaa. Maʉ̃ba necai wãnadua.–
37 Baribʉrʉ Pauloba dji zarrarãa jarasia:
–Daira romanorã bẽrã baridua carea preso ɓʉcara panasiɗaa. Baribʉrʉ ãdjia daia bio iwiɗiɗaẽ́ jũmarã quĩrãpita ubiɗapeɗa preso ɓʉsiɗaa. Maʉ̃da ¿daira chupea ẽdrʉ ɓʉbiɗica? ¡Mãwãẽ́a! ¡Ãdjidrʉ zeɗida panʉa dai ẽdrʉ ɓʉɗi carea!–
38 Pauloba jaraɗara zarrarãba dji cawa obadarãa jaraɗe wãsiɗaa. Idjaɓa jarasiɗaa Paulora, Sila siɗa romanorãda. Maʉ̃ ũrĩsiɗaɗe dji cawa obadarãra ne wayasiɗaa.
39 Ara maʉ̃da ãdjimaa wãnapeɗa quĩrã djuburia iwiɗisiɗaa ãdjia opeɗaɗara quĩrãdoaɗamãrẽã. Maʉ̃be ẽdrʉ ɓʉɗapeɗa beɗea djuburiasiɗaa puruɗebemada ãyã wãnamãrẽã.
40 Paulo, Sila siɗa preso panana ẽdrʉpeɗaɗacarea Lidia deɗaa wãsiɗaa. Djabarã ume dji jʉreɗapeɗa ãdjirã ume beɗeasia dadji Borora biara ĩjãnamãrẽã. Maʉ̃bebʉrʉ wãsiɗaa.
