Hecho 17:1-34
17 Paulora, Silara, ãdji ume nĩna siɗa Anpipoli puruɗe, Apolonia puruɗe biɗa wãyã wãnapeɗa Tesalonica puruɗe jũẽne wãsiɗaa. Mama judiorã dji jʉrebada deda ɓasia.
2 Pauloba obari quĩrãca judiorã ume dji jʉreɗe wãsia. Domia ũbea ʉ̃nãũbada ewariza ãdjirã ume beɗea ɓabadjia.
3 Ãcõrẽ Beɗeaɗeba idjia ebuɗa jaradiabadjia Ãcõrẽba ẽdrʉ edabari diai jaraɗara bia mĩga ɓaida ɓasida, idjaɓa beupeɗa ʉ̃rẽbaida ɓasida. Maʉ̃ awara nãwã jarabadjia:
–Mʉ̃a bãrãa jara ɓʉ Jesura wãrãda Ãcõrẽba ẽdrʉ edabari diai jaraɗaa.–
4 Ʉ̃cʉrʉ judiorãba maʉ̃gʉra ĩjãnapeɗa Paulo ume, Sila ume biɗa ãbaa panesiɗaa. Idjaɓa zocãrã griegorã Ãcõrẽ waya ɓeaba, ʉ̃cʉrʉ wẽrãrã dji dromarã biɗa ĩjãsiɗaa.
5 Baribʉrʉ judiorã Jesu ĩjãẽ́ ɓeara soɗe biẽ́ duanesiɗaa. Maʉ̃ carea ẽberã cadjiruarãda zocãrã jʉreɗapeɗa purura quĩrũbigaɗe wãsiɗaa. Pirapoɗapeɗa Jasoʉ̃ deɗe eɗa wãsiɗaa Pauloda, Sila siɗa jidaɗapeɗa jũmarã quĩrãpita nũmʉni carea.
6 Baribʉrʉ ãdjira maʉ̃ deɗe ununaẽ́ basía. Maʉ̃ carea Jasoʉ̃da, ʉ̃cʉrʉ djabarã siɗa jidaɗapeɗa dji puruɗebema bororãmaa erreɓari edesiɗaa. Jũmarãba ɓia jarasiɗaa:
–Ẽberãrã jũma naʉ̃ ẽjũãne nẽbʉra o panʉba aɓari quĩrãca nama oɗe zesiɗaa.
7 Maʉ̃ awara za ɓʉ Jasoʉ̃ba ãdjirãra idji deɗe bia edasia. Jũma ãdjirãba dadji romanorã boroba obi ɓʉra igara panʉa.* Jesumanada dadjirã boroaɗa abadaa.–
8 Maʉ̃ ũrĩsiɗaɗe purura, ãdjirã bororã siɗa quĩrũbucasiɗaa.
9 Mãwã duanʉne dji bororãba Jasoʉ̃a, waabemarãa biɗa jarasiɗaa ẽdrʉɗi carea paratada diaɗida panʉda. Diapeɗaɗacarea idu wãbisiɗaa.
Paulo, Sila ume Bereaɗe panana
10 Ara maʉ̃ diamasi djabarãba Paulora, Sila siɗa Berea puruɗaa diabuesiɗaa. Jũẽnapeɗa judiorã dji jʉrebada deɗaa wãsiɗaa.
11 Bereaɗebema judiorãra Tesalonicaɗebemarã quĩrãca pananaẽ́ basía. Ãtebʉrʉ Jesuɗebemara ũrĩ quĩrĩã panasiɗaa. Ewariza Ãcõrẽ Beɗeara bio quĩrãcuita acʉbadjiɗaa ãdjia jara panʉra wãrã cawaya.*
12 Maʉ̃ba zocãrã judiorãba Jesura ĩjãsiɗaa. Idjaɓa zocãrã griego wẽrãrã dji dromarãba, umaquĩrãrã dji dromarã biɗa ĩjãsiɗaa.
13 Maʉ̃misa judiorã Tesalonicaɗebemaba cawasiɗaa Pauloba Ãcõrẽ beɗeara Berea puruɗe jaradia ɓʉda. Maʉ̃ carea wãnapeɗa mamabemarã siɗa quĩrũbigasiɗaa Paulo biẽ́ oɗamãrẽã.
14 Ara maʉ̃da djabarãba Paulora pusaɗaa diabuesiɗaa. Baribʉrʉ Silara, Timoteo siɗa Bereaɗe panesiɗaa.
15 Paulo edepeɗaɗaba idjira Atena puruɗaa diaɗe wãsiɗaa. Maʉ̃be Pauloba ãdjirã ume beɗeada diabuesia Silara, Timoteo siɗa idjimaa isabe zeɗamãrẽã. Ara maʉ̃da djabarãra jẽda wãsiɗaa.
Paulo Atena puruɗe ɓaɗa
16 Pauloba Sila, Timoteo siɗa Atena puruɗe jʉ̃ã ɓʉɗe unusia maʉ̃ purura jʉwaba oɗa ãcõrẽba bira ɓʉda. Maʉ̃ bẽrã idji soɗe biẽ́ ɓesia.
17 Mãwã ɓʉɗe Paulora judiorã dji jʉrebada deɗe ãdjirã ume, judiorãẽ́ Ãcõrẽ waya ɓea ume biɗa Jesuɗebemada beɗea ɓabadjia. Maʉ̃ awara puruɗe ewariza ẽberãrã duanʉma beɗea ɓabadjia.
18 Ʉ̃cʉrʉ ẽberãrã epicúreo crĩcha ẽpẽ ɓeada, estoico crĩcha ẽpẽ ɓea siɗa mama panasiɗaa.* Maʉ̃ ẽberãrã Paulo ume beɗea panʉne ʉ̃cʉrʉba ara ãdjiduɓa iwiɗi duanasiɗaa:
–Jãʉ̃ ẽberã nẽbʉrʉi awua ɓʉba ¿cãrẽnebemada beɗea ɓʉ?–
Dewararãba panusiɗaa:
–Ãĩbemarãba ẽpẽ ɓea ãcõrẽnebemada jaradia ɓʉca ɓʉa.–
Mãwã jarasiɗaa Pauloba beɗea bia Jesuɗebemada idjaɓa dadji ʉ̃rẽbaɗiɗebemada jaradia ɓaɗa bẽrã.*
19 17:19-20 Mãwã panʉne Paulora Areópago eyaɗaa edesiɗaa ãdji dji jʉrebada demaa. Maʉ̃be jarasiɗaa:
–Bʉa jaradia ɓʉra dairãmaarã crĩcha djiwiɗia. Maʉ̃ra dairãba waɗi ũrĩnacaa. Maʉ̃ bẽrã cawa quĩrĩã panʉa cãrẽda jara ɓʉda. ¿Bʉa dairãa jaradiaẽ́ca?–
21 Jũma Atenanebemarãba, drua ãĩbemarã mama ɓea biɗa aɓabe crĩcha djiwiɗi ũrĩpeɗaɗada nẽbʉrʉbada bẽrã mãwã iwiɗisiɗaa.
22 Maʉ̃ne Paulora ãdjirã ẽsi Areópago eyaɗe ʉ̃ta nũmepeɗa jarasia:
–Achirã Atenanebema, mʉ̃a unu ɓʉa bãrãba zocãrã ãcõrẽda bio ẽpẽbadada.
23 Puruɗe pʉrrʉa nĩne mʉ̃a unusia bãrãba ãdjirãa bia beɗeaɗi carea opeɗaɗada. Mõgara oɗa aɓaʉɗe naʉ̃ beɗeada ɓʉ́ ɓasia: “Ãcõrẽ dadjia adua panʉ itea oɗa.” Bãrãba adua panʉ Ãcõrẽa bia beɗeabadaa. Ara maʉ̃ Ãcõrẽnebemada mʉ̃a bãrãa jaraya.
24 Maʉ̃ Ãcõrẽba naʉ̃ ẽjũãra, naʉ̃ ẽjũãne nũmʉ siɗa jũma osia. Idjira bajãnebema Boroa idjaɓa naʉ̃ ẽjũãnebema Boroa. Idjira ẽberãba oɗa deɗe ɓacaa.*
25 Bia ɓai carea iwiɗicaa ẽberãba idji itea ne omãrẽã.* Idjiabʉrʉ jũma dadjirãa dia ɓʉa zocai ɓeaɗamãrẽã, ʉ̃yãbaɗamãrẽã, idjaɓa ne jũma dadjia eroɓaida ɓʉra eroɓeaɗamãrẽã.
26 Idjia ẽberã aɓaʉɗeba puruda zocãrã yõbisia jũma naʉ̃ ẽjũãne ɓeaɗamãrẽã. Idjia ɓʉsia maʉ̃gʉrã purura aɓa sãʉ̃be ɓeaɗida idjaɓa sãma ɓeaɗida.
27 Mãwã osia ẽberãrãba idjira jʉrʉɗamãrẽã. Mãwãra tãnaca jʉrʉbʉda quĩrãca ãĩbẽrã ununisicada. Wãrãda Ãcõrẽra tʉmʉ ɓʉẽ́a, ãtebʉrʉ dadjirãza caita ɓʉa.
28 Idjiɗeba dadjirãra zocai ɓeaa, nĩbabadaa, idjaɓa panabadaa. Maʉ̃ bẽrã ʉ̃cʉrʉ bãrãnebemaba jarasiɗaa: “Dadjirãra idji warrarãa.”*
29 Dadjirãda Ãcõrẽ warrarãbʉrʉ, crĩchaɗiẽ́ panʉa Ãcõrẽra oro oɗada, parata oɗada, wa mõgara oɗada, maʉ̃gʉra ẽberãba ara idji crĩchaɗeba oɗa bẽrã.
30 Ẽberãrãba Ãcõrẽ adua ɓeaɗeba mãwã opeɗaɗara idjia naẽna iduaribisia. Baribʉrʉ iɗira jara ɓʉa jũma druazabemaba cadjirua igaraɗapeɗa idjida ĩjãnamãrẽã.
31 Mãwã quĩrĩã ɓʉa idjia ɓʉɗa ewariɗe jũma naʉ̃ ẽjũãnebemarã jipa cawa oi bẽrã. Maʉ̃ awara aɓa edasia mãwã omãrẽã. Idjaɓa maʉ̃ ẽberãra cawabisia beu ɓaɗada ʉ̃rẽbabiɗa bẽrã.–
32 Maʉ̃ beu ɓaɗa ʉ̃rẽbabiɗaɗebema ũrĩsiɗaɗe ʉ̃cʉrʉra ipiɗasiɗaa. Baribʉrʉ dewararãba jarasiɗaa:
–Dewara ewariɗe bʉa maʉ̃nebema beɗea ɓʉda waya ũrĩnia.–
33 Maʉ̃be Paulora ãdjirã ume ɓaɗada wãsia.
34 Ʉ̃cʉrʉ dji jʉre pananaba Paulo beɗeara ĩjãsiɗaa. Aɓa Dionisio basía. Idjira maʉ̃ Areópagoma dji jʉrebadaɗebema basía. Idjaɓa wẽrã Damari abadaba, dewararã biɗa ĩjãsiɗaa.
Beɗea eɗaare
^ 17:7. Romanorãba ãdjirã borora Cesar abadjiɗaa. Maʉ̃ ewariɗe Claudio abadada ãdjirã boro basía. Maʉ̃ Claudiora dji boroda ɓasia poa 41ɗeba aɓa 54ɗaa.
^ 17:11. Ãdjia Ãcõrẽ carta drõãra acʉbadjiɗaa. Maʉ̃ ewariɗe Ãcõrẽ carta djiwiɗira waɗibiɗa neẽ́ basía.
^ 17:18. Griego Epicuro abadara ɓasia 300 poa Jesu toɗi naẽna. Maʉ̃ Epicuroba jaradiabadjia ẽberãrãba aɓabe ɓʉsriɗa ɓaidrʉ wa necai ɓaidrʉ jʉrʉɗida panʉda. Idji ẽpẽ ɓeada epicúreorã abadjiɗaa. Ãdjirãba crĩchasiɗaa ãdji ãcõrẽ ɓeaba ẽberãrãda crĩchaɗacada. Maʉ̃ne estoicorãba griego Zeno abadara ẽpẽbadjiɗaa. Ãdjirãba jaradiabadjiɗaa naʉ̃ djaraba o quĩrĩã ɓʉda igaraɗida panʉda, crĩcha cawaara wãnida panʉda, idjaɓa ne jũmada oɗida panʉda dewararãba carebaɗaẽ́ne.
^ 17:18. Maʉ̃ griegorãba crĩchasiɗaca ɓʉa ãcõrẽ dji umaquĩrãda ɓasida Jesu abadada maʉ̃ne ãcõrẽ dji wẽrãda ɓasida Ʉ̃rẽba abadada.
^ 17:24. 1 Reye 8:27 ;Hecho 7:48-50.
^ 17:25. Salmo 50:9-12.
^ 17:28. Griego Arato abadaba ãdji ãcõrẽ Zeuɗebemada mãwã ɓʉsia.
