Hecho 27:1-44
27 Maʉ̃ ewariɗe dji boroba jarasia dairãra Italia druaɗaa wãnida panʉda. Maʉ̃ bẽrã Paulora, dewara preso ɓea siɗa Julio jʉwaeɗa ɓʉsia. Maʉ̃ Juliora sordaorã Augusto abadaɗebema dji boro basía.
2 Maʉ̃be dairãra barco Adramitio puruɗebemane ɓadoɗapeɗa wãsiɗaa. Maʉ̃ barcora Asia druaɗe puruza wãbʉrʉ basía. Djaba Aristarco Macedonia druaɗebemada dairã ume wãsia. Idjira Tesalonica puruɗebema basía.
3 Nurẽma Sidoʉ̃ puruɗe wiɓarisiɗaa. Maʉ̃ne Julioba biaɗeba Paulora idji biarãmaa idu wãbisia idjia neẽ́ ɓʉra diaɗamãrẽã.
4 Maʉ̃be Sidoʉ̃neba wãnane nãũrãra minijĩchia puá nũmʉ bẽrã Chipre morro idjaɓa Asia ẽsi wãsiɗaa.
5 Cilicia drua quĩrãpe idjaɓa Panpilia quĩrãpe auɗu tʉɗapeɗa Liciaɗebema puru Miraɗe wiɓarisiɗaa.
6 Mama sordaorã boroba dewara barco Alejandría puruɗebemada unusia. Maʉ̃ barcora Italia druaɗaa wãbʉrʉ basía. Daira idji ume maʉ̃ barcoɗe ɓadoɗapeɗa wãsiɗaa.
7 Ewari zocãrã nãũrã carea pĩãca wãsiɗaa. Gnido quĩrãpe jũẽne wãni carea bia mĩgasiɗaa. Waɗi nãũrãra minijĩchia puá nũmʉ bẽrã Creta morro icawa pʉrrʉga wãsiɗaa Salmoʉ̃ amia quĩrãpe.
8 Pusa icawa bia mĩga wãbʉdada Lasea puru caita Necai Wiɓaribada abadama jũẽne wãsiɗaa.
9 Bio dãrãbʉda bẽrã judiorã ne coɗaca ewari dromada wãsia. Maʉ̃ ewariɗeba ʉ̃taa pusaɗe wãida minijĩchia ɓabaria.* Maʉ̃ carea Pauloba dji bororãa jarasia nocoɗaa wãrãnamãrẽã.
10 Nãwã jarasia:
–Achirã, mʉ̃a cawa ɓʉa nawena wãnibʉrʉ minijĩchiaɗe wãnida. Barcora ãrĩya. Bãrãba edebʉda siɗa jũma aduaɗia.* Maʉ̃ awara dadjirã siɗa zocãrã quininia.–
11 Baribʉrʉ sordaorã boroba Paulo beɗea cãyãbara barco djibari beɗeada, barco peratʉbari beɗea siɗa ĩjãsia.
12 Doiɗaaɗe panani carea maʉ̃ Necai Wiɓaribadara biẽ́ ɓasia. Maʉ̃ bẽrã zocãrãba crĩchasiɗaa biara ɓʉda Penice puruɗaa wãnida aɓa doiɗaa jõbʉrʉɗaa. Maʉ̃ puru siɗa Creta morroɗe ɓʉa. Mama nãũrãra mãcua puáca bẽrã pusara tuma ɓabaria.*
Nãũrã cadjiruaba barco ãyã edeɗa
13 Maʉ̃ne nãũrãda jʉwa acʉareba ariɗe puá nũmesia. Maʉ̃ carea ʉ̃mãdau ɓaebariare bia wãnida crĩchasiɗaa. Ancla jira edaɗapeɗa Creta icawa wãsiɗaa.
14 Baribʉrʉ dãrãẽ́ne nãũrã cadjirua Euroclidoʉ̃ abadada jʉwa araareba dji cãbãyã tʉ nũmesia.
15 Maʉ̃ba barcora ãyã edesia. Barco quẽbʉra poya araa ɓʉɗaẽ́ bẽrã nãũrãa idu edebisiɗaa.
16 Morro zaque Clauda abada ãbudecare wãsiɗaɗe nãũrãra maãrĩ tumasia.* Maʉ̃ne jãba zaque ãdauare ũmʉda barcoɗe eɗa poya ɓʉɗaẽ́ pananapeɗa eɗa ɓʉsiɗaa.
17 Jãba zaque eɗa ɓʉpeɗaɗacarea barcora sogaba bio bʉrasiɗaa ãrĩrãmãrẽã. Maʉ̃ne waya panasiɗaa Sirte ĩbʉɗe poaɗe wãnida. Maʉ̃ carea barcoɗe wua ʉ̃tʉ jira ɓʉbadada eɗaa ɓʉɗapeɗa idu nãũrãa edebisiɗaa.*
18 Nurẽma nãũrãra waɗibiɗa dji cãbãyã puá nũmasia. Maʉ̃ carea barcoɗe traja panʉba netata edebʉdada daiɗu ɓatacuasiɗaa barcora wẽsaara ũmemãrẽã.
19 Nãũrãra waɗibiɗa dji cãbãyã puá nũmʉ bẽrã, ewari ũbeaɗe ara ãdji jʉwaba netata barcoɗebema dji zʉgʉa ɓeada daiɗu ɓatacuasiɗaa.
20 Mãwã panʉne ewari zocãrã ʉ̃mãdau, chĩdau siɗa ununaẽ́ panasiɗaa. Maʉ̃ ewari cadjiruaɗe waɗi panʉ bẽrã dairãba crĩchasiɗaa ẽdrʉɗaẽ́da.
21 Zocãrã ewari ne coɗaẽ́ duanasiɗaa. Maʉ̃ bẽrã Paulora dji bororã ẽsi nũmepeɗa jarasia:
–Achirã, mʉ̃a bãrãa jarasia Cretaɗeba wãrãnamãrẽã. Mʉ̃ beɗeada ĩjãpeɗaɗabara naʉ̃ minijĩchiaɗe duananaẽ́ bacasia idjaɓa ne aduaɗaẽ́ bacasia.
22 Baribʉrʉ sopuarãnadua. Naʉ̃ barcora jũma ãrĩmĩna ni aɓaʉda beuɗaẽ́a.
23 Mʉ̃ra Ãcõrẽnea. Idjida ĩjã ɓʉa. Iɗi diamasi ara maʉ̃ Ãcõrẽba idji nezoca bajãnebemada mʉ̃maa diabuesia.
24 Maʉ̃gʉba mʉ̃́a jarasia: “Ne wayarãdua, Paulo. Bʉra Romanebema boro quĩrãpita beɗeaida ɓʉa. Bʉ carea Ãcõrẽba jũmarã naʉ̃ barcoɗe wãbʉdara idu quinibiẽ́a.”
25 Maʉ̃ carea, achirã, sopuarãnadua. Mʉ̃a ĩjã ɓʉa Ãcõrẽba oida idji nezoca bajãnebemaba mʉ̃́a jaraɗa quĩrãca.
26 Baribʉrʉ baridua morroɗe poaɗe wãnida panʉa.–
Barco ãrĩna
27 Domia umé babʉrʉɗe diamasi waɗi nãũrãra dji cãbãyã puá nũmasia. Maʉ̃ba Adria pusaɗe awacãrĩ basiɗaa. Ariquẽtra babʉrʉɗe barcoɗe trajabadaba crĩchasiɗaa ẽjũã caita jũẽbʉdada.
28 Pusa nãbuada zasiɗaɗe veinte braza ɓasia. Wagabe wãbʉdaɗe wayacusa zasiɗaa. Maʉ̃ne quince braza ɓasia.
29 Mõgaraɗaa tẽũne wãni wayaaba anclada quĩmãrẽ barco ãdauare ɓatabuesiɗaa. Maʉ̃be bio daupera duanʉba isabe ʉ̃nadrʉida quĩrĩã panasiɗaa.*
30 Mãwã panʉne barcoɗe trajabadara barcoɗeba chupea ẽdrʉɗida crĩchasiɗaa. Maʉ̃ bẽrã jãba zaquera doeɗa ɓʉsiɗaa ancla nocoarebemada doeɗa ɓʉbʉda quĩrãca.
31 Baribʉrʉ Pauloba sordaorã boroa, idji sordaorãa biɗa jarasia:
–Jãʉ̃gʉrãda barcoɗe panenaẽ́bʉrʉ bãrãra poya ẽdrʉɗaẽ́a.–
32 Maʉ̃ carea sordaorãba jãba zaque jʉ̃ ɓʉ jʉ̃carara tʉtasiɗaa. Ara maʉ̃da jãba zaquera pusaba edesia.
33 Ãsaboɗoɗe Pauloba jũmarãda ne coɗamãrẽã jarasia:
–Dadji sãwãnida adua panʉ bẽrã domia umé bãrãra ne coɗaẽ́ panʉa.
34 Mʉ̃a beɗea djuburiaya ne coɗamãrẽã. Mãwã cacua ʉɓʉa ɓeaɗia poya ẽdrʉɗi carea. Ni aɓaʉda cãrẽ siɗa sãwãnaẽ́a.–*
35 Mãwã jarapeɗa Pauloba paʉ̃da jʉwaɗe edapeɗa jũmarã quĩrãpita Ãcõrẽa bia ɓʉaɗa asia. Maʉ̃be cõrãcuapeɗa cosia.
36 Maʉ̃ unubʉdaɗe jũmarãda sobiaɗapeɗa ne cosiɗaa.
37 Dairãra barcoɗe 276 panasiɗaa.*
38 Ãdjirã jãwũãnapeɗa trigoda pusaɗe ɓatacuasiɗaa barcora wẽsaara ũmemãrẽã.
39 Ʉ̃nadrʉsiɗe ãdjirãba ẽjũãda unusiɗaa baribʉrʉ cawaɗaẽ́ basía sãma panʉda. Maʉ̃ ẽjũãne jogoada ɓasia ĩbʉ bara ɓʉda. Crĩchasiɗaa poyaɗibʉrʉ, barcora mama poabiɗida.
40 Maʉ̃ bẽrã ancla jʉ̃carara tʉcuaɗapeɗa pusaɗe jũma amesiɗaa. Idjaɓa barco bia edeɗi carea dji peratʉbari jʉ̃ ɓaɗada ẽrãsiɗaa. Maʉ̃be nocoarebema wua ʉ̃tʉ jira ɓʉbadara euɓarisiɗaa nãũrãba ĩbʉɗaa edemãrẽã.
41 Baribʉrʉ barco quẽbʉra ĩchitaɗe poa nũmepeɗa poya nocoɗaa wãẽ́ basía. Mãwã ɓʉɗe pusaba jĩãwẽ nũmʉba barco ãdaura ãrĩ wãsia.
42 Maʉ̃ne sordaorãba preso ɓeara beaɗida crĩchasiɗaa doyaa ũ wãnapeɗa mĩrũ wãrãnamãrẽã.
43 Baribʉrʉ sordaorã boroba Paulora ẽdrʉ ɓʉ quĩrĩã ɓasia. Maʉ̃ bẽrã idu quenabiẽ́ basía, ãtebʉrʉ jũma dji ũbi cawa ɓeada naãrã daiɗu tẽũbicuasia doyaa wãnamãrẽã.
44 Waabemara bacuruɗe wa barcoɗe ne ɓeaɗa ʉ̃rʉ̃ wãbisia. Mãwã jũmarãda drua bia jũẽsiɗaa.
Beɗea eɗaare
^ 27:9. Maʉ̃ ewari dromara Ãcõrẽba cadjirua quĩrãdoai ewaria. Levitico 16:1-34; 23:26-32. Poa zebʉrʉza septiembre jeɗecoɗe ɓaebaria. Septiembreɗe, octubreɗe biɗa pusaɗe wãida minijĩchiaara ɓʉa. Idjaɓa noviembreɗeba aɓa febreroɗaa wãnaca basía, jũmawãyã minijĩchia ɓʉ bẽrã.
^ 27:10. Maʉ̃ barco Alejandríaɗebemane trigoda waiɓʉa edebadjiɗaa Romanaa.
^ 27:12. Mama nãũrãra mãcua puáca bẽrã pusara tuma ɓabaria. Griego beɗeaɗe ɓʉ́ ɓʉa “mamaʉba ʉ̃mãdau ɓaebariare unubadaa.” Ʉ̃cʉrʉ traduccioʉ̃ne ʉ̃mãdau ɓaebariare cãyãbara “ʉ̃mãdau odjabariare” ɓʉ́ ɓʉa.
^ 27:16. Maʉ̃ Claudara idjaɓa Cauda trʉ̃ jarabadaa.
^ 27:17. Barcoɗe wua ʉ̃taa jira ɓʉbadada. Griego beɗeaɗe maʉ̃ra ebuɗa ɓʉẽ́a.
^ 27:29. Isabe ʉ̃nadrʉida quĩrĩã panasiɗaa. Griego beɗeaɗe maʉ̃ beɗeaba idjaɓa jara ɓʉa ãdji ãcõrẽrãa iwiɗisiɗada isabe ʉ̃nadrʉmãrẽã.
^ 27:34. Ni aɓaʉda cãrẽ siɗa sãwãnaẽ́a. Griego beɗeaɗe ɓʉ́ ɓʉa: “Bãrã buɗara ni aɓa biɗa aduaẽ́a.”
^ 27:37. 276. Griego beɗeaɗe ʉ̃cʉrʉ cartaɗe 76 ɓʉ́ ɓʉa.
