Hecho 5:1-42
5 Idjaɓa ẽberã Ananía abadada ɓasia.* Idji quimara Sapira abadjiɗaa. Ãdjia biɗa ẽjũãda nẽdobuesiɗaa.
2 Baribʉrʉ Ananíara dji quima ume beɗea auɗapeɗa dji paratara jũma diaẽ́ basía. Mãwãmĩna Jesuba diabueɗarãba cawa jeɗecaɗamãrẽã diabʉrʉɗe jũma diabʉrʉaɗa asia.
3 Maʉ̃ne Pedroba jarasia:
–Ananía, bʉa ¿cãrẽ cãrẽã diaurura bʉ soɗe idu eɗa wãbisi? Bʉa Ãcõrẽ Jaurea sewada o ɓʉa. Bʉ ẽjũã nẽdobueɗaɗebema paratara ʉ̃cʉrʉ mẽrã eroɓʉa.
4 Jãʉ̃ ẽjũãra ¿bʉreẽ́ basica? Nẽdobuepeɗa dji parata siɗa ¿bʉreẽ́ basica? Jũma dia quĩrĩãẽ́ basibʉrʉ ¿cãrẽ cãrẽã jãwã bʉ soɗe sewa oida crĩchasi? Bʉa ẽberãa sewa oẽ́ basía, ãtebʉrʉ Ãcõrẽa sewa osia.–
5 Maʉ̃ ũrĩsiɗe Ananíara aɓeɗa beu ɓaesia. Maʉ̃nebema ũrĩpeɗaɗara bio ne wayasiɗaa.
6 Maʉ̃be ʉ̃cʉrʉ cũdrarãba dji bẽwãrãra wuaba bʉraɗapeɗa tʉɓariɗe edesiɗaa.
7 Dãrãẽ́ne Ananía quima Sapirada jũẽsia.* Idjia Ananía sãwãnada adua ɓasia.
8 Pedroba idjía iwiɗisia:
–Mʉ̃́a jaradua ¿bãrã ẽjũãra nẽdobuesiɗaca bʉ quimaba parata enena quĩrãca?–
Sapiraba panusia:
–Mãẽ, jãʉ̃gʉ nẽbʉaɗe nẽdobuesiɗaa.–
9 Maʉ̃ bẽrã Pedroba jarasia:
–Bãrãra ¿cãrẽ cãrẽã sewa oɗi carea beɗea ausiɗa dadji Boro Jaureba sãwã oi cawaya? ¡Acʉdua! Bʉ quima tʉɓariɗe wã pananada awuá zebʉdaa. Ara nawena bʉ siɗa tʉɓariɗe edeɗia.–
10 Ara maʉ̃ jarabʉrʉɗe idjira Pedro jĩrũ caita beu ɓaesia. Cũdrarã eɗa jũẽbʉdaɗe unusiɗaa idjira beu taɓʉda. Maʉ̃ne dajadaa edeɗapeɗa dji quima caita tʉɓarisiɗaa.
11 Maʉ̃ carea djabarãra, jũma maʉ̃nebema ũrĩpeɗaɗa siɗa ne wayasiɗaa.
Jesu ĩjã ɓeaba ẽberãrã zocãrã biabipeɗaɗa
12 Maʉ̃ ewariɗe Jesuba diabueɗarãba ne ununacada zocãrã ocuabadjiɗaa. Mãwã cawabisiɗaa Ãcõrẽra ãdjirã ume ɓʉda. Aɓari crĩchaɗeba jũma djabarãda Ãcõrẽ de droma mõgaraba auɗu jũrã ca ɓʉ eɗaare ãbaa dji jʉrebadjiɗaa. Dji jʉre pananama Salomoʉ̃ abadaa.
13 Djabarã awara ne wayaaba ni aɓaʉda ãdjirã ume pananaẽ́ basía, baribʉrʉ zocãrãba ãdjirãnebemada bia beɗea duanasiɗaa.
14 Maʉ̃ne zocãrã umaquĩrãrãba wẽrãrã biɗa dadji Borora ĩjãsiɗaa. Mãwã idji ĩjã ɓeara yõ wãsiɗaa.
15 Jesuba diabueɗarãba ne ununacada zocãrã o panʉ bẽrã ẽberãrãba cacua biẽ́ ɓeada o icawa cʉɗaɗe wa jueporoɗe ɓʉbadjiɗaa Pedro wãyã wãbʉrʉɗe idji cacua jaureba waramãrẽã.
16 Zocãrã ẽberãrã Jerusaleʉ̃ caita ɓea puruɗebema biɗa cacua biẽ́ ɓeada, jai bara ɓea siɗa ãdjimaa edebadjiɗaa. Maʉ̃be jũmarãda biacuabadjiɗaa.
Bajãnebema nezocaba Jesuba diabueɗarã ẽdrʉ ɓʉɗa
17 Jesuba diabueɗarãmaa zocãrã wã panʉ carea sacerdote dji dromada, jũma saduceorã idjiare ɓea siɗa soɗe biẽ́ duanesiɗaa.
18 Maʉ̃ carea Jesuba diabueɗarãra jidaɗapeɗa preso ɓʉcuasiɗaa.
19 Baribʉrʉ ara maʉ̃ diamasi dadjirã Boro nezoca bajãnebemaba dji eɗa wãbadara ewapeɗa ãdjirãra ẽdrʉ ɓʉsia. Maʉ̃be jarasia:
21 Ãdjia ũrĩpeɗaɗara ĩjãsiɗaa. Nurẽma diapeɗa Ãcõrẽ de dromanaa wãnapeɗa jaradia panesiɗaa. Maʉ̃misa sacerdote dji dromaba, idji ume duanʉ biɗa jũma Israelɗebema drõãrã dji dromarãda trʉ̃siɗaa ãbaa dji jʉreɗi carea. Maʉ̃ne Ãcõrẽ de dromanebema zarrarãda preso ɓʉbada deɗaa wãbisiɗaa Jesuba diabueɗarã jʉrʉɗe wãnamãrẽã.
22 Baribʉrʉ zarrarãra preso ɓʉbada deɗe jũẽsiɗaɗe ãdjirãra ununaẽ́ basía. Maʉ̃ bẽrã jẽda jaraɗe wãsiɗaa.
23 Zarrarãba dji dromarãa nãwã jarasiɗaa:
–Dairãba preso ɓʉbada dera bio jũãtrʉ ɓʉda idjaɓa zarrarãda dji eɗaa wãbadaza panʉda unusiɗaa, baribʉrʉ ewa acʉbʉdaɗe ni aɓaʉda ununaẽ́ basía.–
24 Maʉ̃ ũrĩsiɗaɗe Ãcõrẽ de dromanebema zarrarã boroba, sacerdoterã bororã biɗa cawa crĩchaɗaẽ́ basía idjaɓa cawaɗaẽ́ basía mamaʉba ʉ̃taa cãrẽda sãwãida.*
25 Mãwã duanʉne ẽberãda eɗa zepeɗa jarasia:
–¡Bãrãba preso ɓʉpeɗaɗarãba Ãcõrẽ de droma dajada jaradia panʉa!–
26 Maʉ̃ ũrĩsiɗaɗe Ãcõrẽ de dromanebema zarrarãra, ãdji boro siɗa Jesuba diabueɗarã jʉrʉɗe wãsiɗaa. Baribʉrʉ enebʉdaɗe biẽ́ oɗaẽ́ basía. Wayasiɗaa puruba ãdjida mõgaraba taɓari beaɗida.
27 Enenapeɗa dji jʉre duanʉ quĩrãpita nũmʉsiɗaa. Maʉ̃be sacerdote dji dromaba ãdjirãa jarasia:
29 Maʉ̃ne Pedroba, Jesuba diabueɗarã waabemarã biɗa panusiɗaa:
–Ẽberãrãba jara panʉ cãyãbara Ãcõrẽba jara ɓʉdrʉ ĩjãnida panʉa.
30 Bãrãba Jesura cruɗe cachi beasiɗaa.* Baribʉrʉ bãrãba beapeɗaɗara dadji drõã naẽnabemarã Ãcõrẽba ʉ̃rẽbabisia.
31 Ãcõrẽba Jesura dadjirã Boroda ɓamãrẽã idji jʉwa araare ɓʉsia. Idjaɓa dadji Ẽdrʉ Edabarida ɓʉsia. Idjiɗeba israelerãba cadjiruara igaraɗapeɗa waya Ãcõrẽmaa poya zeɗia. Mãwãra ãdjirãba cadjirua opeɗaɗara Ãcõrẽba quĩrãdoaya.
32 Maʉ̃gʉɗebemada dairãba ebuɗa jarabadaa. Ãcõrẽ Jaure biɗa aɓarida jarabaria. Ãcõrẽba idji Jaurera idji ĩjãbʉdarãa diabaria.–
33 Maʉ̃ ũrĩsiɗaɗe dji dromarãra bio quĩrũsiɗaa. Maʉ̃ba Jesuba diabueɗarãra bea quĩrĩã panesiɗaa.
34 Maʉ̃ne pariseo Gamaliel abadada ɓasia. Maʉ̃ Gamalielera judiorã ley jaradiabari dji droma basía. Jũmarãba idjira bio waya panasiɗaa. Gamalielera piradrʉpeɗa Jesuba diabueɗarãra dajadaa edebisia.
35 Maʉ̃be dji dromarãa jarasia:
–Achirã Israelɗebema, bãrãba maʉ̃ ẽberãrã sãwã oɗiɗebemada bio crĩchaɗadua.
36 Ẽberã Teudá sãwãnada quĩrãnebaɗadua. Maʉ̃ra dãrãẽ́ ɓʉa. Maʉ̃ ẽberãba ara idjida dji dromaana abadjia. Maʉ̃ bẽrã cuatrociento ẽberãrãba idjira ẽpẽsiɗaa. Baribʉrʉ romanorãba idji beasiɗaɗe jũma idji ume nĩbapeɗaɗara memenesiɗaa. Maʉ̃be jũma idjia oi crĩcha ɓaɗara jõsia.
37 Mãwãnacarea Romanebema boroba jũmarãda juachabisia. Maʉ̃ ewariɗe ẽberã Juda Galileaɗebemada ɓasia. Maʉ̃ Judaba ẽberãrãra zocãrã idji ume eronĩbasia. Baribʉrʉ romanorãba idji beasiɗaɗe jũma idji ume nĩbapeɗaɗara memenesiɗaa.
38 Maʉ̃ carea mʉ̃a jaraya: naʉ̃gʉ ẽberãrãra idu ɓʉɗadua. Ãdjirãra biẽ́ orãnadua. Ãdjia o panʉra, ãdjia oi crĩcha panʉ siɗa ara ãdji crĩchaɗeba ze ɓʉbʉrʉ, dãrãẽ́ne jũma jõya.
39 Baribʉrʉ Ãcõrẽba obi ɓʉbʉrʉ, bãrãba poyaɗaẽ́a. Maʉ̃ bẽrã quĩrãcuita ɓeaɗadua Ãcõrẽ ume djõna amaaba.–
Gamalielba jaraɗara jũmarãba ĩjãsiɗaa.
40 Maʉ̃be Jesuba diabueɗarãra wayacusa eɗaa trʉ̃siɗaa. Soaba ubiɗapeɗa ãdjirãa jarasiɗaa waa Jesu trʉ̃neba ẽberãrãa beɗearãnamãrẽã. Maʉ̃be ẽdrʉ ɓʉsiɗaa.
41 Ara maʉ̃da Jesuba diabueɗarãra dji dromarã ãbaa jʉre panʉmaʉba ɓʉsriɗa wãsiɗaa. Cawasiɗaa Ãcõrẽba ãdjirãra bia unusida, Jesu ĩjã panʉ carea idu bia mĩgabiɗa bẽrã.
42 Ãcõrẽ de droma dajadaare, ẽberãrã deza biɗa ãdjirãba ewariza chupeaɗaẽ́ Jesucritoɗebemada jaradiabadjiɗaa. Ebuɗa jarabadjiɗaa Jesura Ãcõrẽba ẽdrʉ edabari diai jaraɗada.
Beɗea eɗaare
^ 5:1. Maʉ̃ Ananíara aɓabe naʉ̃ capítulo 5ɗe odja ɓʉa. Capítulo 9ɗe, 22ɗe biɗa dewara Ananíanebemada ɓʉ́ ɓʉa. Idjaɓa capítulo 23ɗe dewara Ananíanebemada ɓʉ́ ɓʉa.
^ 5:7. Dãrãẽ́ne. Griego beɗeaɗe ɓʉ́ ɓʉa: “Hora ũbea babʉrʉɗe.”
^ 5:24. Sacerdoterã bororã. Griego beɗeaɗe ʉ̃cʉrʉ cartaɗe naʉ̃ siɗa ɓʉ́ ɓʉa: “Sacerdote dji droma.”
^ 5:30. Deuteronomio 21:22-23.
