Job 1:1-22
1 Ẽberã Jo abadada Uz druaɗe ɓasia. Maʉ̃ Jora ne jũmane jipa ɓasia idjaɓa jaraɗi neẽ́ ɓasia. Idjia Ãcõrẽra bio waya ɓasia idjaɓa cadjirua siɗa quĩrĩãca basía.
2 Joba siete warrarãda eroɓasia. Wẽrãcaurãda ũbea eroɓasia.
3 Siete mil ovejada, mil ũbea cameyoda, mil pacada, burro siɗa quiniento eroɓasia.* Idjaɓa nezocarãda zocãrã eroɓasia. Jũma Jordaʉ̃ do ʉ̃mãdau odjabariare ɓearã cãyãbara idjira ne baraara ɓasia.
4 Idji warrarãba ãdji deza ɓʉsriɗa ãbaa ne coɗi ewarida obadjiɗaa. Mãwã obʉdaɗe ãdji ũbeabema djabawẽrãra trʉ̃badjiɗaa ãdjirã ume ãbaa ne coɗamãrẽã.
5 Maʉ̃be ãdji ɓʉsriɗa ãbaa ne coɗi ewari jõnacarea ãdji zeza Joba ãdjirãra trʉ̃badjia Ãcõrẽ quĩrãpita bia ɓʉi carea. Nãwã obadjia: diapeɗeɗa piraɓaripeɗa idji warrarã carea animarãda aɓa aɓa Ãcõrẽa babue diabadjia. Idjia crĩcha ɓasia: “Ãĩbẽrã mʉ̃ warrarãba cadjiruada osiɗada wa ãdji soɗeba Ãcõrẽra biẽ́ jarasiɗada.”
6 Ewari aɓa Ãcõrẽ nezocarã bajãnebemada idji quĩrãpita zesiɗaa.* Diauru siɗa ãdjirã ume zesia.*
7 Maʉ̃ne Ãcõrẽba diaurua iwiɗisia:
–¿Bʉra sãmaʉba ze ɓʉ?–
Diauruba panusia:
–Bʉa oɗa ẽjũãne pʉrrʉa nĩbaɗada ze ɓʉa.–
8 Ãcõrẽba diaurua iwiɗisia:
–Bʉa mʉ̃ nezoca Jora ¿sãwã unu ɓʉ? Mʉ̃a oɗa ẽjũãne dewarada idji quĩrãca neẽ́a. Idjira ne jũmane jipa ɓʉa idjaɓa biẽ́ jaraɗi neẽ́ ɓʉa. Idjia mʉ̃ra bio waya ɓʉa idjaɓa cadjiruara quĩrĩãcaa.–
9 Maʉ̃ne diauruba jarasia:
–Idjira ni cãrẽ siɗa sãwãca bẽrã mãwã bʉra waya ɓʉa.
10 Bʉa idjira, idji ẽberãrã, jũma idjia eroɓʉ siɗa bio waga eroɓʉa auɗu jũrã eroɓʉ quĩrãca. Idjia o ɓʉra bʉa jũma bia odjabi ɓʉa. Mãwã idjia animarã ɓeara zocãrã eroɓʉa.
11 Baribʉrʉ bʉa jũma idjia eroɓʉda jãrĩbʉrʉ, idjia bʉda biẽ́ jaraya ara bʉdji quĩrãpita.–
12 Maʉ̃ne Ãcõrẽba diaurua jarasia:
–Mãẽteara mãwã odua. Jũma idjia eroɓʉra bʉ jʉwaeɗa ɓʉa. Baribʉrʉ idjira biẽ́ ocara ɓʉa.–
Ãcõrẽba mãwã jaraɗacarea diaurura Ãcõrẽ quĩrãpitabemada ãyã wãsia.
13 Ewari aɓa Jo warrarãba, wẽrãcaurã biɗa ãdji djaba nabema deɗe ɓʉsriɗa ãbaa ne coɗi ewarida o panasiɗaa.
14 Maʉ̃ne ẽberãda Jo deɗe jũẽpeɗa nãwã jarasia:
–Dairãra bʉ pacaba bʉ ẽjũãne traja panasiɗaa. Bʉ burrora dairã caita ne co duanasiɗaa.
15 Maʉ̃ne cawaẽ́ne sabeorãda ne drʉaɗe zeɗapeɗa bʉ nezocarãda jũma quenanapeɗa bʉ animarã ɓeara jũma drʉa edesiɗaa. Aɓabe mʉ̃drʉ ẽdrʉsia bʉ́a jaraɗe zei carea.–
16 Maʉ̃ba waɗi jũma nẽbʉrʉẽ́ne dewara nezocada jũẽsia. Maʉ̃ba jarasia:
–Bajãneba baada dji cãbãyã ɓaesia. Maʉ̃ baaba bʉ ovejara, bʉ oveja wagabadarã siɗa jũma quenasia. Aɓabe mʉ̃drʉ ẽdrʉsia bʉ́a jaraɗe zei carea.–
17 Maʉ̃ba waɗi jũma nẽbʉrʉẽ́ne dewara nezocada jũẽsia. Maʉ̃ba jarasia:
–Caldeorãda o ũbeaareba ne drʉaɗe zesiɗaa. Maʉ̃gʉrãba bʉ nezocarãda jũma quenanapeɗa bʉ cameyora jũma drʉa edesiɗaa. Aɓabe mʉ̃drʉ ẽdrʉsia bʉ́a jaraɗe zei carea.–
18 Maʉ̃ba waɗi jũma nẽbʉrʉẽ́ne dewara nezocada jũẽsia. Maʉ̃ba jarasia:
–Bʉ warrarãba, bʉ caurã biɗa ɓʉsriɗa ãbaa ne coɗi ewarida bʉ warra nabema deɗe o panasiɗaa.
19 Mãwã panʉne cawaẽ́ne ẽjũã põãsa ewaraga ɓʉareba nãũrãda dji cãbãyã puásia. Maʉ̃ nãũrãba dera bʉ warrarã ʉ̃rʉ̃ cora edesia. Maʉ̃ba ãdjirãra jũma quenasia. Aɓabe mʉ̃drʉ ẽdrʉsia bʉ́a jaraɗe zei carea.–
20 Jũma maʉ̃ ũrĩnacarea Jora piradrʉpeɗa sopuaba idjia cacuaɗe jʉ̃ ɓʉra cũẽtatasia idjaɓa boroɓichia tʉsia. Maʉ̃be chĩrãboroɗe ɓarru coɓepeɗa Ãcõrẽa bia beɗeasia.
21 Nãwã jarasia:
–Mʉ̃ra ara jãwã tosiɗaa. Ara jãwã beuya. Ãcõrẽba mʉ̃́a ne diasia. Idjaɓa maʉ̃ diaɗara idjia jãrĩsia.
Baribʉrʉ Ãcõrẽa bia jaraya.–
22 Jũma mãwãnamĩna Joba cadjiruada oẽ́ basía. Idjia jaraẽ́ basía Ãcõrẽba biẽ́ o ɓʉda.
Beɗea eɗaare
^ 1:3 Mil paca. Hebreo beɗeaɗe jara ɓʉa quiniento pacada eroɓasida umé uméa ãbaa jʉ̃ panʉda. Maʉ̃ba jara ɓʉa jũma ãbaa mil eroɓasida.
^ 1:6 Ãcõrẽ nezocarã bajãnebema. Hebreo beɗeaɗe ɓʉ́ ɓʉa “Ãcõrẽ warrarã.”
^ 1:6 Diauru. Hebreo beɗeaɗe ɓʉ́ ɓʉa “Satana.” Satana trʉ̃ba jara ɓʉa: “Djãrã biẽ́ jarabari.”
