Job 2:1-13
2 Mãwãnacarea ewari aɓa Ãcõrẽ nezocarã bajãnebemada wayacusa idji quĩrãpita zesiɗaa. Diauru siɗa ãdjirã ume zesia.
2 Maʉ̃ne Ãcõrẽba diaurua iwiɗisia:
–¿Bʉra sãmaʉba ze ɓʉ?–
Diauruba panusia:
–Bʉa oɗa ẽjũãne jũma pʉrrʉa nĩbaɗada ze ɓʉa.–
3 Maʉ̃ne Ãcõrẽba diaurua iwiɗisia:
–Bʉa mʉ̃ nezoca Jora ¿sãwã unu ɓʉ? Mʉ̃a oɗa ẽjũãne dewarada idji quĩrãca neẽ́a. Idjira ne jũmane jipa ɓʉa idjaɓa biẽ́ jaraɗi neẽ́ ɓʉa. Mʉ̃ra bio waya ɓʉa idjaɓa cadjiruara quĩrĩãcaa. Ni cãrẽ cadjiruada oẽ́ ɓʉmĩna bʉa mʉ̃́a jũma idjia eroɓaɗara jãrĩbisia. Mãwãmĩna idjira waɗibiɗa jipa ɓabaria.–
4 Maʉ̃ne diauruba jarasia:
–Idjira cacua bia ɓʉɗe jipa ɓaya.* Ẽberãba beu amaaba idjia eroɓʉra jũma diaya.
5 Maʉ̃ bẽrã Jora puaɗeba cacua biẽ́ ɓʉdua. Maʉ̃nebʉrʉ idjia bʉda biẽ́ jaraya ara bʉdji quĩrãpita.–
6 Ãcõrẽba diaurua jarasia:
–Mãẽteara mãwã odua. Idjira bʉ jʉwaeɗa ɓʉa. Baribʉrʉ idjira beacara ɓʉa.–
7 Ãcõrẽba mãwã jaraɗacarea diaurura idji quĩrãpitabemada ãyã wãsia. Wãpeɗa idjia Jora chãdaba bio pua ɓʉsia.
8 Maʉ̃ne Jora ne babuebadamaa dji pora ʉ̃rʉ̃ chũmane wãsia. Mama zoco ãrĩnaba idji chãdara cʉrʉbadjia.
9 Mãwã ɓʉɗe dji quimaba jarasia:
–¿Bʉra waɗibiɗa jipa ɓa quĩrĩã ɓʉca? ¡Ãcõrẽda biẽ́ jarapeɗa beudua!–
10 Joba panusia:
–Wẽrã crĩcha neẽ́ ɓʉ quĩrãca beɗearãdua. Ãcõrẽba ne biada diabʉrʉɗe dadjia bia edabadaa. Ara maʉ̃ quĩrãca Ãcõrẽba idu bia mĩgabibʉrʉɗe ¿maʉ̃ siɗa bia edaɗiẽ́ panʉca?–
Jũma mãwãnamĩna Joba Ãcõrẽra biẽ́ jaraẽ́ basía.
11 Joba idji dji biarãda ũbea eroɓasia: Elipa, Temaʉ̃ druaɗebemaa; Bildá, Súa druaɗebemaa; idjaɓa Zopar, Naamat druaɗebemaa. Ãdjia ũrĩsiɗaa Jora ne jũmane biẽ́ ɓʉda. Maʉ̃ bẽrã beɗea ausiɗaa Jomaa wãnapeɗa sobiabiɗi carea idjaɓa idji ume ãbaa panani carea.
12 Jũẽbʉdaɗe tʉmʉba Jora unusiɗaa. Baribʉrʉ chãdaba idji cacuada jũma bira ɓʉ bẽrã idjida mãwã ɓʉda cawaɗaẽ́ basía. Maʉ̃ carea ãdjira jĩgua jĩã panesiɗaa. Maʉ̃ne ãdjia cacuaɗe jʉ̃ panʉra sopuaba cõãtasiɗaa idjaɓa ãdji boro ʉ̃rʉ̃ egoro porada cuasiɗaa.
13 Maʉ̃be Jo caita siete ewari egode chũpanesiɗaa ãsa, diamasi biɗa. Baribʉrʉ ni aɓaʉda idji ume beɗeaɗaẽ́ basía. Unusiɗaa idjira bio pua ɓʉda.
Beɗea eɗaare
^ 2:4 Idjira cacua bia ɓʉɗe jipa ɓaya. Hebreo beɗeaɗe ɓʉ́ ɓʉa: “Eda ebari.”
