Josue 1:1-18
1 Nuʉ̃ warra Josuera Ãcõrẽ nezoca Moise carebabari basía. Moise jaiɗaɗacarea Ãcõrẽba Josuéa nãwã jarasia:
2 –Mʉ̃ nezoca Moisera jaiɗaɗa bẽrã bʉa israelerãra ededua Jordaʉ̃ do wa quĩrãrẽ chãnamãrẽã mʉ̃a diai jaraɗa druaɗaa.
3 Mʉ̃a Moisea jaraɗa quĩrãca bãrã wãbʉdaza jũma ẽjũãda bãrãa diaya.
4 Mʉ̃a diai jaraɗa druara ɓʉa ẽjũã põãsa ewaraga ɓʉɗeba aɓa Libano eyaɗaa idjaɓa Euprate doɗeba aɓa pusa droma Mediterraneo abadaɗaa. Hititarã ẽjũãra jũma edaɗia.
5 1:5-6 Mʉ̃a bãrã drõãenabemarãa maʉ̃ druara diai jarasia ewariza bãrãne bamãrẽã. Bʉabʉrʉ purura edeya maʉ̃ ẽjũã edaɗamãrẽã. Maʉ̃ bẽrã ʉɓʉa ɓapeɗa sozarra ɓadua. Mʉ̃a bʉra bʉduɓa ameẽ́a idjaɓa igaraẽ́a. Bʉ zocai ɓʉmisa ni aɓaʉba bʉra poyaɗaẽ́a. Mʉ̃ra bʉ ume ɓaya Moise ume ɓaɗa quĩrãca.
7 Maʉ̃ bẽrã ʉɓʉa ɓapeɗa bio sozarra ɓadua. Mʉ̃ nezoca Moiseba ley ɓʉ́ amenara jũma ĩjã o ɓadua. Ni maãrĩ biɗa ãĩ oẽ́bʉrʉ bʉa obʉrʉra jũma bia odjaya.
8 Mʉ̃ ley cartaɗe ɓʉ́ ɓʉra jaradia ɓadua. Maʉ̃ leyra ãsa, diamasi biɗa bio crĩcha ɓadua jũma jipa oi carea. Mãwã bʉa obʉrʉra jũma bia odjaya.
9 Mʉ̃ra bʉ Ãcõrẽa. Bʉ wãbʉrʉza mʉ̃ra bʉ ume ɓaya. Maʉ̃ bẽrã mʉ̃a bʉ́a wayacusa jaraya: ʉɓʉa ɓapeɗa sozarra ɓadua. Ne wayarãdua. Jẽda crĩcharãdua.–
Rubeʉ̃neba, Gaɗeba, Manaseɗeba yõpeɗaɗaba carebaɗi jarapeɗaɗa
10 Maʉ̃be Josueba israelerã bororãa nãwã jarasia:
11 –Deza israelerãa nãwã jaraɗe wãnadua: “Ewari ũbeaɗe dadjirãra namaʉba wãbʉrʉɗia. Coɗira edeɗadua. Jordaʉ̃ do wa quĩrãrẽ chãnapeɗa dadji Ãcõrẽba diai jaraɗa druara eda wãnia.”–
12 Maʉ̃ne Josueba Rubeʉ̃neba, Gaɗeba, idjaɓa ʉ̃cʉrʉ Manaseɗeba yõpeɗaɗarãa nãwã jarasia:
13 –Ãcõrẽ nezoca Moiseba jaraɗara quĩrãnebaɗadua.* Idjia jarasia bãrã Ãcõrẽba naʉ̃ druara diabʉrʉda necai duananamãrẽã.
14 1:14-15 Jãʉ̃be bãrã quimara, warrarãra, animarã siɗa nama amenadua naʉ̃ Jordaʉ̃ do orroare Moiseba diaɗa ẽjũãne. Baribʉrʉ bãrã mẽsrã ɓeaba djõni careabemada edaɗapeɗa na chãnida panʉa. Chãnapeɗa dairãare djõnida panʉa aɓa dadji Ãcõrẽba dairãa diai jaraɗa ẽjũã edabʉdaɗaa. Idjia bãrã naʉ̃ ẽjũãne necai ɓʉɗa quĩrãca dairã siɗa maʉ̃ ẽjũãne necai ɓʉya. Mãwãnacarea bãrãra namaa jẽda zeɗida panʉa bãrã ẽjũã Jordaʉ̃ doɗeba ʉ̃mãdau odjabariare ɓʉɗaa, Ãcõrẽ nezoca Moiseba naʉ̃ ẽjũãra bãrãa diaɗa bẽrã.–
16 Ãdjirãba panusiɗaa:
–Bʉa jara ɓʉra dairãba jũma oɗia idjaɓa bʉa diabuebʉrʉmaa wãnia.
17 Dairãba maʉ̃ra jũma ĩjã oɗia, Moise beɗea ĩjã opeɗaɗa quĩrãca. Dairãba quĩrĩã panʉa Ãcõrẽra bʉ ume ɓaida Moise ume ɓaɗa quĩrãca.
18 Bʉ beɗea igara ɓʉra, bʉa jara ɓʉ ĩjã oẽ́ ɓʉra beuida ɓʉa. Baribʉrʉ bʉra ʉɓʉa ɓapeɗa sozarra ɓadua.–
Beɗea eɗaare
^ 1:13 Numero 32:1-33
