Josue 10:1-43
10 Maʉ̃ ewariɗe Adonisedéda Jerusaleʉ̃nebema boro basía. Adonisedéba ũrĩsia Josueba Haiɗebemarãra poyapeɗa purura jũma babuepeɗa dji borora beasida Jericoɗe oɗa quĩrãca. Maʉ̃ awara ũrĩsia Gabaoʉ̃nebemarãda israelerã ume necai panani carea beɗea ɓʉɗapeɗa ãdjirãare panesiɗada.
2 Maʉ̃ba idjira bio ne waya ɓesia, Gabaoʉ̃ra Hai puru cãyãbara waiɓʉara ɓaɗa bẽrã. Dji bororã panabada puru quĩrãca ɓasia. Maʉ̃ awara Gabaoʉ̃nebema sordaorãra bio mẽsrã ɓeasia.
3 Maʉ̃ bẽrã Jerusaleʉ̃nebema boro Adonisedéba beɗea diabuesia Hebroʉ̃nebema boro Hohaʉ̃maa, Jarmuɗebema boro Pireaʉ̃maa, Laquiɗebema boro Japiamaa, idjaɓa Egloʉ̃nebema boro Debiramaa biɗa.
4 Nãwã jarabisia:
–Mʉ̃ carebaɗe zeɗadua. Gabaoʉ̃nebemarã ume djõne wãnia. Ãdjira Josue ume idjaɓa israelerã ume necai panani carea beɗea ɓʉsiɗaa.–
5 Ara maʉ̃da amorreorã bororã juesuma panʉra jũma ãdji sordaorã ume ãbaa wãnapeɗa Gabaoʉ̃ purura jũrã edasiɗaa uraɗi carea. Jerusaleʉ̃nebemada, Hebroʉ̃nebemada, Jarmuɗebemada, Laquiɗebemada idjaɓa Egloʉ̃nebema siɗa wãsiɗaa.
6 Maʉ̃ unusiɗaɗe Gabaoʉ̃nebemarãba Gilgalɗaa Josue ɓʉmaa nãwã jarabisiɗaa:
–Eyaɗebema amorreo bororãra jũma ãbaa dairã ume djõne zesiɗaa. Dairãra bãrã nezocarã bẽrã daduɓa djõbirãnadua. ¡Isabe dairã carebaɗe zeɗadua!–
7 Ara maʉ̃da Josuera, idji sordaorã bio mẽsrã ɓeada, waabema sordaorã siɗa Gilgalɗeba ãdjimaa wãbʉrʉsiɗaa.
8 Maʉ̃ne Ãcõrẽba Josuéa nãwã jarasia:
–Amorreorãra wayarãdua. Mʉ̃a bãrãa ãdjirãra poyabiya. Djõbʉdaɗe ãdjirã ni aɓaʉba droaɗaẽ́a.–
9 Gilgalɗeba jũma maʉ̃ diamasi nĩbaɗapeɗa Josuera idji sordaorã ume araa jũẽnapeɗa amorreorãba adua panʉne urasiɗaa.
10 Israelerãba urabʉdaɗe Ãcõrẽba amorreorãra ne wayabipeɗa memenesiɗaa. Mãwã israelerãba ãdjirãra Gabaoʉ̃ druaɗe zocãrã quenasiɗaa. Amorreorã ʉ̃taa Bet-horoʉ̃naa mĩrũ wãbʉdaɗe israelerãba caiɗu quena wãsiɗaa aɓa Azecá puruɗaa idjaɓa Maquedá puruɗaa biɗa.
11 Amorreorã Bet-horoʉ̃neba eɗaa Azecáɗaa mĩrũ wãbʉdaɗe Ãcõrẽba hielo waiɓʉada cue quĩrãca ãdjirã ʉ̃rʉ̃ jurrubisia. Israelerãba necoba quenapeɗaɗa cãyãbara maʉ̃gʉba zocãrãara quenasia.
12 Ãcõrẽba israelerãa amorreorã poyabiɗa ewariɗe Josueba israelerã quĩrãpita nãwã jĩgua jarasia:
Ãcõrẽ, ʉ̃mãdaura Gabaoʉ̃ ẽjũãne ipi coɓʉdua; jeɗeco siɗa Ajaloʉ̃ jeweɗaɗe ipi coɓʉdua.
13 Ara maʉ̃da ʉ̃mãdaura, jeɗeco siɗa ipi copanesiɗaa aɓa israelerãba ãdjirã dji quĩrũ jũma quenabʉdaɗaa.
Maʉ̃gʉra Jaserba idji cartaɗe jũma ɓʉsia.* Josueba mãwã jarabʉrʉɗe ʉ̃mãdaura umatipa coɓʉda berara ewari aɓa ɓaeẽ́ ɓasia.
14 Josueba Ãcõrẽa iwiɗiɗara ne ununaca droma basía. Maʉ̃ naẽna ẽberãba ne ununaca droma iwiɗiɗara Ãcõrẽba ĩjã oca basía. Idjaɓa maʉ̃ ewariɗeba ʉ̃taa ĩjã oẽ́ ɓʉa. Baribʉrʉ maʉ̃ ewariɗe Ãcõrẽba ĩjã osia israelerãare djõ ɓʉ bẽrã.
15 Mãwãnacarea Josuera israelerã siɗa wayacusa Gilgalɗaa ãdji cãĩbadamaa wãsiɗaa.
16 Maʉ̃misa amorreo bororã juesuma panʉra Maquedá puru caita uriaɗe mĩrũsiɗaa.
17 Baribʉrʉ mama mĩrũ panʉda ununapeɗa ʉ̃cʉrʉba Josuéa jaraɗe wãsiɗaa.
18 Maʉ̃ne Josueba idji sordaorãa nãwã jarasia:
–Mõgara waiɓʉada bʉraɓari edeɗapeɗa uriara jũãtrʉ nũmʉnadua. Maʉ̃be ʉ̃cʉrʉba mama jʉ̃ã panenadua ãdjirã ẽdrʉrãnamãrẽã.
19 Waabemarãba dji quĩrũra ẽpẽnapeɗa jẽdaareba quena wãnadua ãdji puruɗe jũẽrãnamãrẽã. Dadji Ãcõrẽba bãrãa ãdjirãra jũma poyabibʉrʉa.–
20 Mãwã Josueba israelerã ume amorreorãra berara jũma quenasiɗaa. Zocãrãẽ́be ãdji puru mõgaraba jũrã ca ɓeaɗe jũẽnapeɗa mĩrũ panesiɗaa.
21 Maʉ̃ne israelerã ni aɓaʉda beuɗaẽ́ basía. Jũmaena bia jẽda zesiɗaa Maquedá puruɗaa Josue ɓʉmaa. Maʉ̃ bẽrã jũmarãba wayasiɗaa israelerã biẽ́ oɗi carea.
22 Maʉ̃ne Josueba idji sordaorãa jarasia:
–Isabe mõgara uria jũãtrʉ ɓʉra ãyã ɓʉɗadua. Maʉ̃be dji bororã juesuma panʉra dajadaa mʉ̃maa enenadua.–
23 Ara maʉ̃da dji bororã juesuma panʉra dajadaa enesiɗaa: Jerusaleʉ̃nebema boro, Hebroʉ̃nebema boro, Jarmuɗebema boro, Laquiɗebema boro, Egloʉ̃nebema boro siɗa.
24 Maʉ̃ bororã Josuemaa enenapeda Josueba idji sordaorãra jũma trʉ̃peɗa sordaorã bororã idji ume panʉ́a nãwã jarasia:
–Nama zeɗapeɗa jĩrũba ãdji ochiruɗe tʉga eronũpananadua.–
Ara maʉ̃da zeɗapeɗa ochiruɗe tʉga eronũpanesiɗaa.
25 Maʉ̃ne Josueba israelerãa jarasia:
–Za dadjirãba obʉda quĩrãca Ãcõrẽba jũma dadjirã dji quĩrũ siɗa oya. Ne wayarãnadua. Ni maãrĩ biɗa jẽda crĩcharãnadua. Ʉɓʉa ɓeaɗapeɗa sozarra ɓeaɗadua.–
26 Mãwã jarapeɗa Josueba dji bororã juesuma panʉra beasia. Beapeɗa ãdjira bacuru cũmiane su jira ɓʉcuabisia. Mãwã jira panesiɗaa aɓa queubʉrʉɗaa.
27 Queuboɗoɗe Josueba ãdjira eɗaa edabipeɗa ãdji mĩrũ panana uriaɗe ɓatacuabisia. Maʉ̃be mõgara waiɓʉa ɓeaba dji uriara jũãtrʉ nũmʉsiɗaa. Maʉ̃ mõgarara waɗibiɗa mama ɓeaa.
Israelerãba puru ɓea poyapeɗaɗa
28 Maʉ̃ ewariɗe Josueba idji sordaorã ume Maquedá purura poyaɗapeɗa jũma babuesiɗaa. Mamabemarãda necoba jũma quenasiɗaa. Ni aɓaʉda zocai ɓʉɗaẽ́ basía. Josueba Maquedáɗebema borora beasia Jericoɗebema boro beaɗa quĩrãca.
29 Mamaʉba Josuera idji sordaorã ume Libna puruɗaa djõne wãsiɗaa.
30 Ãcõrẽba Libna purura, dji boro siɗa israelerãa poyabipeɗa Josueba jũma quenabisia. Ni aɓaʉda zocai ɓʉẽ́ basía. Dji boro siɗa beasia Jericoɗebema boro beaɗa quĩrãca.
31 Mamaʉba Josueba idji sordaorã ume Laqui purura jũrã edaɗapeɗa araa djõne wãsiɗaa.
32 Ewari umé babʉrʉɗe Ãcõrẽba israelerãa Laquiɗebemarãra poyabisia. Ãdjirã siɗa necoba jũma quenasiɗaa Libnanebemarã quenapeɗaɗa quĩrãca.
33 Maʉ̃ne Guezerɗebema boro Horaʉ̃ra idji sordaorã ume Laquiɗebemarã carebaɗe wãsiɗaa. Baribʉrʉ Josueba idjira, idji sordaorã siɗa poyapeɗa ãdjirãra jũma quenabisia. Ni aɓaʉda zocai ɓʉẽ́ basía.
34 Mamaʉba Josuera idji sordaorã ume wãbʉrʉsiɗaa Egloʉ̃ puruɗaa. Purura jũrã edaɗapeɗa araa djõne wãsiɗaa.
35 Ara maʉ̃ ewariɗe Josue sordaorãba poyaɗapeɗa necoba jũma quenasiɗaa Laquiɗe opeɗaɗa quĩrãca.
36 Egloʉ̃neba Josuera idji sordaorã ume Hebroʉ̃ puruɗaa djõne wãsiɗaa.
37 Poyaɗapeɗa necoba jũma quenasiɗaa. Dji borora, puru caita ɓea ẽberãrã siɗa quenasiɗaa. Ni aɓaʉda zocai ɓʉɗaẽ́ basía. Egloʉ̃ne opeɗaɗa quĩrãca Hebroʉ̃nebemarãra quenanapeɗa purura jũma babuesiɗaa.
38 Mamaʉba Josuera israelerã ume Debir puruɗaa djõne wãsiɗaa.
39 Poyaɗapeɗa dji borora, puru caita ɓea ẽberãrã siɗa necoba jũma quenasiɗaa. Ni aɓaʉda zocai ɓʉɗaẽ́ basía. Hebroʉ̃nebemarã, Libnanebemarã, idjaɓa maʉ̃ puruɗebema bororã opeɗaɗa quĩrãca jũma quenasiɗaa.
40 Mãwã Josueba maʉ̃ ẽjũãne ɓeaɗarãra jũma poyasia. Eyaɗe ɓeaɗada, Negue ẽjũãne ɓeaɗada, jeweɗaɗe ɓeaɗada, eya carraɗe ɓeaɗada, dji puru bororã siɗa jũma poyapeɗa quenasia israelerã Ãcõrẽba jaraɗa quĩrãca. Ni aɓaʉda zocai ɓʉẽ́ basía.
41 Josueba jũmarãda poyasia Cadé-barneaɗeba aɓa Gazaɗaa idjaɓa Goseʉ̃neba aɓa Gabaoʉ̃naa.*
42 Dãrãẽ́ne Josueba jũma maʉ̃ ẽjũãne ɓea puru bororãda poyapeɗa ãdji ẽjũãra edasia Ãcõrẽra israelerãare djõna bẽrã.
43 Mãwãnacarea Josuera idji sordaorã ume Gilgalɗaa jẽda wãsiɗaa.
