Josue 11:1-23
11 Maʉ̃ ewariɗe Jabiʉ̃ abadada Hazor puruɗebema boro basía. Maʉ̃ Jabiʉ̃ba ũrĩsia Josueba zocãrã poyasida. Maʉ̃ carea dewara puru bororãmaa beɗeada diabuecuasia israelerã ume djõne wãni carea. Maʉ̃ beɗeara diabuesia Madoʉ̃ puruɗebema boro Jobámaa, Simroʉ̃ puruɗebema boromaa, Acsap puruɗebema boromaa,
2 dji wãrãga eyaiɗa ɓʉ ẽjũãne ɓea bororãmaa, Cineret amene caita ɓea bororãmaa,* Dor puru caita ɓea bororãmaa, ʉ̃mãdau ɓaebariare ɓʉ jeweɗaɗe ɓea bororãmaa,
3 ʉ̃mãdau odjabariare ɓea cananeorã bororãmaa, ʉ̃mãdau ɓaebariare ɓea cananeorã bororãmaa, amorreorã bororãmaa, hititarã bororãmaa, perezeorã bororãmaa, eyaiɗa ɓʉ ẽjũãne ɓeaa jebuseorã bororãmaa, Hermoʉ̃ eya carraɗe ɓea heveorã bororãmaa idjaɓa Mizpa jeweɗaɗe ɓea bororãmaa biɗa.
4 Maʉ̃ bororãba cawayoɗeba djõbadarãda, carretaɗeba djõbadarãda, waabema sordaorã siɗa jũma djõne edesiɗaa. Bio cãbana wãsiɗaa. Pusa ĩbʉ quĩrãca ãdjirãra poya juachaɗaca basía.
5 Maʉ̃ bororãra israelerã ume djõni carea ãbaa wãnapeɗa Meroʉ̃ do zaqueɗe duanesiɗaa.
6 Maʉ̃ne Ãcõrẽba Josuéa jarasia:
–Ãdjirãra wayarãdua. Nu ara naʉ̃ hora quĩrãca mʉ̃a bãrãa ãdjirãra jũma quenabiya. Maʉ̃ne ãdji cawayo jĩrũ quẽgura jũma tʉcuaɗadua idjaɓa ãdji djõbada carretara jũma bácuaɗadua.–
7 Maʉ̃be Josueba idji sordaorã ume Meroʉ̃ do zaqueɗe cawaẽ́ne uraɗe wãsiɗaa.
8 Ãcõrẽba israelerãa ãdjirãra poyabisia. Maʉ̃ne israelerãba ʉ̃cʉrʉ ẽpẽsiɗaa aɓa Misrepot doɗaa idjaɓa Sidoʉ̃ puru caita. Maʉ̃ awara ʉ̃cʉrʉ ẽpẽsiɗaa aɓa Mizpa ẽjũãnaa. Aɓeɗa jũma quenasiɗaa. Ni aɓaʉda zocai ɓʉɗaẽ́ basía.
9 Ãcõrẽba jaraɗa quĩrãca Josueba jũma osia. Ãdji cawayo jĩrũ quẽgura jũma tʉcuasia idjaɓa ãdji djõbada carretara jũma bácuasia.
10 Maʉ̃be Josue idji sordaorã ume jẽda zebʉdaɗe Hazor puruɗaa djõne wãsiɗaa. Poyaɗapeɗa Josueba dji borora beasia. (Hazorɗebema borora dewararã cãyãbara dji dromaara ɓasia.)
11 Mama jũmarãda necoba quenasiɗaa. Ni aɓaʉda zocai ɓʉɗaẽ́ basía. Puru siɗa jũma babuesiɗaa.
12 Israelerã ume djõpeɗaɗa bororãra Josueba necoba jũma beasia. Maʉ̃ bororã puru ɓeara poyapeɗa jũma babuesia Ãcõrẽ nezoca Moiseba jaraɗa quĩrãca.
13 Israelerãba puru eya zaqueɗe ɓeara jũma babueɗaẽ́ basía. Josueba aɓabe Hazordrʉ babuesia.
14 Baribʉrʉ puruza jũmarãda necoba quenasiɗaa. Ni aɓaʉda zocai ɓʉɗaẽ́ basía. Ãdji animarãra, ne bia queɗea siɗa ãdji itea jũma edasiɗaa.
15 Ãcõrẽba Moisea jaraɗara Moiseba Josuéa jũma jarasia. Maʉ̃ra Josueba jũma daucha osia.
16 Josueba poyapeɗa ẽjũãda jũma edasia: Negue ẽjũãda, maʉ̃are ɓʉ eyaiɗa ɓʉ ẽjũãda, Goseʉ̃ ẽjũãda, ʉ̃mãdau ɓaebariare ɓʉ jeweɗada, Jordaʉ̃ do jeweɗada, idjaɓa eyaiɗa ɓʉ ẽjũã Israel abadada dji jeweɗa siɗa.
17 Jũma edasia Halac eyaɗeba aɓa Baal-ga puruɗaa. Halac eyara Seír druaɗe ɓʉa. Baal-ga purura Libano ẽjũãne ɓʉa Hermoʉ̃ eya carraɗe. Puruza dji borora Josueba jidapeɗa jũma beasia.
18 Idjira maʉ̃ bororã ume dãrã djõsia.
19 Aɓabe heveorã Gabaoʉ̃nebemada israelerã ume necai panani carea beɗea ɓʉsiɗaa. Waabema purura israelerãba poyasiɗaa.
20 Wãrãda Ãcõrẽbʉrʉ maʉ̃ puruɗebemarãra so zarea ɓʉsia israelerã ume djõne wãnamãrẽã. Mãwã quĩrã djuburia neẽ́ israelerãba ãdjirãra jũma quenasiɗaa Ãcõrẽba Moisea jaraɗa quĩrãca.*
21 Maʉ̃ ewariɗe Josueba anaquitarã ẽjũã eyaiɗa ɓʉɗe pananara poyapeɗa jũma quenasia. Hebroʉ̃ puruɗe ɓeaɗada, Debir puruɗe ɓeaɗada, Anab puruɗe ɓeaɗa siɗa quenapeɗa ãdji purura jũma babuesia. Mãwã Juda ẽjũã eyaiɗa ɓʉɗe, waabema israelerã ẽjũã eyaiɗa ɓʉɗe biɗa anaquitarãra jũma quenasia.
22 Anaquitarã ni aɓaʉda Israel druaɗe zocai ɓeẽ́ basía.* Aɓabe Gaza puruɗe, Gat puruɗe, Asdo puruɗe biɗa panesiɗaa.
23 Mãwã Josueba jũma maʉ̃ druara edasia Ãcõrẽba Moisea jaraɗa quĩrãca. Dji ẽjũãra Josueba israelerãa jũma jeɗecasia. Israelɗeba yõpeɗaɗa puruza ẽjũãda diasia ãdjirãne bamãrẽã. Maʉ̃be israelerãra ãdji druaɗe necai duanesiɗaa.
