Josue 2:1-24
2 Maʉ̃be Nuʉ̃ warra Josueba ẽberãda umé trʉ̃peɗa nãwã jarasia:
–Canaaʉ̃ druara acʉɗe wãnadua. Sãwã ɓʉ cawaya Jerico puruda chupea acʉɗadua.–
Mãwã jarapeɗa Josueba ãdjira Sitiʉ̃ ẽjũãneba diabuesia. Wãbʉdaɗe Jericoɗe jũẽne wãsiɗaa. Mama wẽrã auɗua ɓʉ Rahá abada deɗe cãĩne wãsiɗaa.
2 Baribʉrʉ ʉ̃cʉrʉba ãdjira ununapeɗa Jericoɗebema boroa nãwã jaraɗe wãsiɗaa:
–Queubʉrʉɗe israelerãda umé jũẽsiɗaa. Dadjirã drua acʉɗe ze panʉa sãwã poyaɗi cawaya.–
3 2:3-4 Maʉ̃ carea Jericoɗebema boroba zarrarãda Rahámaa diabuesia. Maʉ̃misa Rahába israelerã umé panʉra mĩrũbisia. Zarrarãra jũẽnapeɗa nãwã jarasiɗaa:
–Ẽberãrã bʉ diguiɗa jũẽpeɗaɗara isabe dajadaa zebidua. Dadjirã drua acʉɗe ze panʉa sãwã poyaɗi cawaya.–
Rahába jarasia:
–Wãrãda mʉ̃ deɗe ẽberãrãra zesiɗaa, baribʉrʉ ãdjira sãmabemada mʉ̃a adua ɓasia.
5 Queubʉrʉɗe puruɗe eɗa wãbada jũãtrʉɗi naẽna ãdjira wãsiɗaa. Mʉ̃a adua ɓʉa sãmaa wãsiɗada. Baribʉrʉ bãrãda ãdji caiɗu isabe wãnibʉrʉ jidaɗe wãnisicada.–
6 Rahába jaraɗara sewa basía. Idjia maʉ̃ ẽberãrãra idji de ʉ̃rʉ̃ edepeɗa lino cajʉ̃na pae eroɓʉ edrecare mĩrũbisia.
7 Rahába mãwã jaraɗa bẽrã zarrarãra israelerã caiɗu wãsiɗaa jidaɗi carea. Puru dajadaa wãnapeɗa dewararãba puruɗe eɗa wãbadara jũãtrʉsiɗaa. Zarrarãra Jordaʉ̃ doɗaa wãbada oɗe israelerã jʉrʉɗe wãsiɗaa aɓa Jordaʉ̃ do chãbadamaa.
8 Israelerã cãĩni naẽna Rahára idji de ʉ̃rʉ̃ wãpeɗa jarasia:
9 –Mʉ̃a cawa ɓʉa Ãcõrẽba wãrãda naʉ̃ Canaaʉ̃ druara bãrãa diaida. Maʉ̃ bẽrã dairãba bãrãra bio waya panʉa. Jũma naʉ̃ druaɗebemarãra bãrã bio waya panʉneba ure duanʉa.
10 Daiba cawa panʉa bãrã Egiptoɗeba ẽdrʉsiɗaɗe Ãcõrẽba Pusa Purruɗe oda ewasida bãrã chãnamãrẽã.* Maʉ̃ awara cawa panʉa bãrãba amorreorã Jordaʉ̃ do quĩrãrẽ pananara poyaɗapeɗa ãdji bororã Sehoʉ̃da, Og siɗa beasiɗada.*
11 Maʉ̃ cawasiɗaɗe dairãra bio ne waya panesiɗaa. Sozarra ɓea siɗa ne wayasiɗaa bãrã Ãcõrẽra dji wãrã Ãcõrẽ bẽrã. Idjia bajãne, naʉ̃ ẽjũãne biɗa ne jũmada poya ɓʉa.
12 12-13 Maʉ̃ carea mʉ̃ quĩrã djuburia, Ãcõrẽ trʉ̃neba bãrãba wãrãneba jaraɗadua mʉ̃ ẽberãrãra carebaɗida mʉ̃a bãrã carebaɗa quĩrãca. Mʉ̃ djibarirãra, mʉ̃ djabarãra, mʉ̃ djabawẽrãrãra, jũma ãdji ẽberãrã siɗa bearãnadua. ¡Daira zocai ɓʉɗadua! Bãrãba mãwã wãrãneba jaraɗibʉrʉ, mʉ̃́a ebuɗa cawabiɗadua.–
14 Ãdjia panusiɗaa:
–Bia ɓʉa. Bãrãnebemada beaɗibʉrʉ, dai siɗa beuɗida panʉa. Baribʉrʉ daiba o panʉra bʉa djãrãa jaracara ɓʉa. Ãcõrẽba naʉ̃ drua dairãa diabʉrʉɗe bãrãra biaɗeba carebaɗia. Daiba jara panʉ quĩrãca wãrãda oɗia.–
15 Rahá dera dji puru mõgaraba jũrã ca ɓʉɗe eɗa ɓasia. Maʉ̃ bẽrã dajadaa acʉbadaɗe idjia jʉ̃carada jʉ̃ jira ɓʉsia ãdji ẽdrʉɗamãrẽã.
16 Wãni naẽna Rahába nãwã jarasia:
–Ẽjũã eyaiɗa ɓʉɗaa mĩrũ wãnadua zarrarãba unurãnamãrẽã. Mama ewari ũbea mĩrũ pananadua aɓa bãrã jʉrʉ panʉra jẽda zebʉdaɗaa. Maʉ̃bebʉrʉ wãnadua bãdji wãbʉdamaa.–
17 Ãdjia nãwã jarasiɗaa:
–Daiba bʉ́a wãrãneba jarapeɗaɗara jũma oɗia.
18 Baribʉrʉ naʉ̃ druaɗe djõne zebʉdaɗe bʉa dai ẽdrʉ ɓʉɗa dajadaa acʉbadaɗe naʉ̃ jʉ̃cara purruda jʉ̃ jira ɓʉida ɓʉa. Idjaɓa bʉ djibarirãda, bʉ djabarãda, jũma bʉ ẽberãrã siɗa nama bʉ diguiɗa eneida ɓʉa.
19 Aɓaʉda dajadaa wãibʉrʉ maʉ̃ne daiba beaɗibʉrʉ, daira beɗeaɗe pananaẽ́a. Baribʉrʉ nama bʉ diguiɗa ɓeada beaɗibʉrʉ, dai siɗa wãrãda beuɗida panʉa.
20 Maʉ̃ awara daiba o panʉda bʉa djãrãa jaraibʉrʉ, daiba bʉ́a wãrãneba jarapeɗaɗara oɗaẽ́a.–
21 Maʉ̃ne Rahába jarasia:
–Bia ɓʉa, bãrãba jara panʉ quĩrãca oɗia.–
Maʉ̃be ãdjira wãbisia. Wãpeɗaɗacarea Rahába jʉ̃cara purrura dajadaa acʉbadaɗe jʉ̃ ɓʉsia.
22 Israelerã umé panʉra ẽjũã eyaiɗa ɓʉɗaa wãnapeɗa ewari ũbea mĩrũ panasiɗaa. Maʉ̃misa zarrarãba ãdjira o ɓeaza jʉrʉ panʉmĩna ununaẽ́ basía. Maʉ̃ bẽrã wayacusa Jerico puruɗaa jẽda wãsiɗaa.
23 Maʉ̃bebʉrʉ ẽjũã eyaiɗa ɓʉɗe mĩrũ pananara ẽdrʉsiɗaa. Jordaʉ̃ do chãnapeɗa wayacusa Nuʉ̃ warra Josue ɓʉma jũẽsiɗaa. Ãdji sãwãpeɗaɗara idjía jũma nẽbʉrʉsiɗaa.
24 Ãdjia Josuéa nãwã jarasiɗaa:
–Wãrãda Ãcõrẽba jãʉ̃ Canaaʉ̃ druara dadjirãa diaya. Dadjirã carea ãdjirãra bio ne waya panʉa.–
