Josue 20:1-9
20 Ãcõrẽba Josuéa nãwã jarasia:
2 –Israelerãa jaradua mĩrũbada puruda ɓʉcuaɗamãrẽã mʉ̃a Moiseɗeba bãrãa jaraɗa quĩrãca.*
3 Mĩã beai crĩchaẽ́ ɓʉɗe aɓaʉba djãrãda beaibʉrʉ, dji beuɗa ẽberãrãba idji beaɗi naẽna maʉ̃ puruɗaa mĩrũ wãida ɓʉa.
4 Mama jũẽpeɗa eɗa wãi naẽna puruɗe eɗa wãbadama dji bororãa jũma nẽbʉrʉida ɓʉa sãwãsida. Dji bororãba cawasiɗara maʉ̃ ẽberãba jara ɓʉra wãrãda, idjira puruɗe idu eɗa wãbiɗapeɗa jaraɗida panʉa sãma ɓeida ɓʉda.
5 Maʉ̃ne dji beuɗa ẽberãrãba idjida beaɗi carea maʉ̃ puruɗe iwiɗiɗe wãnibʉrʉ, dji bororãba idjira diacara panʉa mĩã beai crĩchaẽ́ ɓʉɗe beaɗa bẽrã idjaɓa quĩrũbiɗeba mĩã beaɗaẽ́ bẽrã.
6 Baribʉrʉ idjira mamaʉba ãyã wãcara ɓʉa aɓa dji cawa obadarãba jũmarã quĩrãpita wãrãda beɗeaɗe ɓʉẽ́ana abʉdaɗaa. Maʉ̃ awara ãyã wãcara ɓʉa aɓa sacerdote dji dromaara ɓʉda jaiɗabʉrʉɗaa. Mãwãnacarea wayacusa idji puruɗe ɓaɗe wãida ɓʉa.–
7 Mãwã jaraɗa bẽrã israelerãba mĩrũbada puruda ɓʉcuasiɗaa. Neptali ẽjũã eyaiɗa ɓʉɗe Quedé puruda ɓʉsiɗaa. Maʉ̃ purura Galilea druaɗe ɓʉa. Epraiʉ̃ ẽjũã eyaiɗa ɓʉɗe Siqueʉ̃ puruda ɓʉsiɗaa. Juda ẽjũã eyaiɗa ɓʉɗe Quiriat-arbá puruda ɓʉsiɗaa. Maʉ̃ purura idjaɓa Hebroʉ̃ abadaa.
8 Jordaʉ̃ quĩrãrẽ Jericoɗeba ʉ̃mãdau odjabariare mĩrũbada puruda ũbea ɓʉsiɗaa. Rubeʉ̃ ẽjũãne eya boro jeweɗaɗe Beser puruda ɓʉsiɗaa. Maʉ̃ purura ẽjũã põãsa ewaraga ɓʉɗe ɓʉa. Ga ẽjũãne Ramo puruda ɓʉsiɗaa. Maʉ̃ purura Gala druaɗe ɓʉa. Manase ẽjũãne Golaʉ̃ puruda ɓʉsiɗaa. Maʉ̃ purura Basaʉ̃ druaɗe ɓʉa.
9 Maʉ̃ mĩrũbada puruda ɓʉcuasiɗaa israelerã, drua ãĩbema ãdjirã tãẽna panʉ siɗa poya mĩrũnamãrẽã. Mĩã beai crĩchaẽ́ ɓʉɗe aɓaʉba djãrãda beasira mama mĩrũ ɓaida ɓasia aɓa dji cawa obadarãba puru quĩrãpita wãrãda beɗea neẽ́ ɓʉaɗa abʉdaɗaa.
Beɗea eɗaare
^ 20:2 Numero 35:9-29
