Josue 22:1-34
22 Mãwãnacarea Josueba Rubeʉ̃neba yõpeɗaɗada, Gaɗeba yõpeɗaɗada, idjaɓa ʉ̃cʉrʉ Manaseɗeba yõpeɗaɗa siɗa trʉ̃cuasia.
2 Ãdjirãa nãwã jarasia:
–Ãcõrẽ nezoca Moiseba obi jaraɗara bãrãba jũma ĩjã osiɗaa. Mʉ̃a jaraɗa siɗa jũma ĩjã osiɗaa.
3 Dairãra bãrã djabarã bẽrã, bãrãra dairãare dãrã djõsiɗaa. Iɗi biɗa waɗi mãwã panʉa. Dadji Ãcõrẽba obi jaraɗara jũma osiɗaa.
4 Dadji Ãcõrẽba jaraɗa quĩrãca dairã, bãrã djabarãra naʉ̃ ẽjũãne necai ɓʉsia. Jãʉ̃be bãrãra jẽda diguiɗaa wãnadua Ãcõrẽ nezoca Moiseba Jordaʉ̃ do quĩrãrẽ ẽjũã diaɗamaa.
5 Baribʉrʉ Ãcõrẽ nezoca Moiseba ley diaɗara quĩrãcuita jũma ĩjã oɗadua. Maʉ̃ leyba nãwã jara ɓʉa: dadji Ãcõrẽra quĩrĩãnadua. Idji quĩrãpita jipa nĩbaɗadua. Idjia obi ɓʉra ĩjã oɗadua. Ewariza idjira ẽpẽnadua. Jũma bãrã soɗeba, jũma bãrã jaureɗeba biɗa idjia jara ɓʉra oɗadua.–
6 22:6-8 Mãwã jarapeɗa Josueba ãdjirãra nãwã bia jara ɓʉsia:
–Jãʉ̃be bãrã diguiɗaa jẽda wãnadua. Bãrã dji quĩrũ nebiara edapeɗaɗa bẽrã iɗibʉrʉ bio ne bara panesiɗaa. Animarãda, oroda, paratada, bronceda, jiorroda, cacuaɗe jʉ̃bada siɗa zocãrã edasiɗaa. Maʉ̃ra bãrã djabarãa jeɗecaɗadua.–
Mãwã jarapeɗa Josueba ãdjirãra wãbisia. Ara maʉ̃da jẽda ãdji druaɗaa diguiɗaa wãsiɗaa. (Naẽna Moiseba Basaʉ̃ druara ʉ̃cʉrʉ Manaseɗeba yõpeɗaɗarãa diasia. Mãwãnacarea Josueba waabema Manaseɗeba yõpeɗaɗarãa Jordaʉ̃ doɗeba ʉ̃mãdau ɓaebariare ɓʉ ẽjũãda diasia ãdji djabarã israelerã tãẽna.)
9 Rubeʉ̃neba yõpeɗaɗara, Gaɗeba yõpeɗaɗara idjaɓa ʉ̃cʉrʉ Manaseɗeba yõpeɗaɗa siɗa waabema israelerã ume Canaaʉ̃ druaɗe pananada Silo puruɗeba ãdji drua Galaɗaa jẽda wãbʉrʉsiɗaa. Gala druara ãdjirãba naẽna edasiɗaa Ãcõrẽba Moiseɗeba jaraɗa quĩrãca.
10 Gala druaɗaa wãbʉdaɗe Jordaʉ̃ doɗe jũẽne wãsiɗaa.* Mama Canaaʉ̃ orroare Jordaʉ̃ do icawa mõgarada waiɓʉa ʉ̃tʉ pã buesiɗaa animarã babue diabada quĩrãca.
11 Mãwã opeɗaɗara waabema israelerãba ũrĩsiɗaa.
12 Maʉ̃ba ãdjirãba crĩchasiɗaa Galaɗe panʉba Ãcõrẽra igarasiɗada. Maʉ̃ carea Silo puruɗe jũma ãbaa dji jʉresiɗaa Galaɗe panʉ ume djõne wãni carea.
13 Baribʉrʉ djõne wãni naẽna sacerdote Eleaza warra Piné abadada Gala druaɗaa na diabuesiɗaa Rubeʉ̃neba yõpeɗaɗarã ume, Gaɗeba yõpeɗaɗarã ume, idjaɓa mama panʉ Manaseɗeba yõpeɗaɗarã ume beɗeamãrẽã.
14 Piné ume israelerã bororãda die diabuesiɗaa. Ãdjira dji dromarãda ɓeasia. Israelɗeba yõpeɗaɗa puruzabemada aɓa aɓa diabuesiɗaa.
15 Maʉ̃gʉrãra Galaɗaa wãsiɗaa Rubeʉ̃neba yõpeɗaɗarã ume, Gaɗeba yõpeɗaɗarã ume, idjaɓa mama panʉ Manaseɗeba yõpeɗaɗarã ume beɗeaɗamãrẽã. Jũẽnapeɗa nãwã jarasiɗaa:
16 –Daira Ãcõrẽ puru trʉ̃neba nãwã beɗeabʉdaa. ¿Bãrãba cãrẽ cãrẽã dadji israelerã Ãcõrẽra igarasiɗa? ¿Cãrẽ cãrẽã dadji Ãcõrẽ ẽpẽ pananada idu ɓʉɗapeɗa mõgarara ʉ̃tʉ pã buesiɗa dewara ãcõrẽa animarã babue diaɗi carea? ¿Cãrẽ cãrẽã idjia jara ɓʉra ĩjã oɗaẽ́ basi?
17 Dadji israelerãba Peor abadaɗe jũmawãyã cadjiruada osiɗa bẽrã zocãrã quinisiɗaa.* Maʉ̃ cadjirua opeɗaɗa carea waɗibiɗa bia mĩga panʉa.* ¿Ara maʉ̃ba bia ɓʉẽ́ca?
18 Mãwãra ¿bãrãba wayacusa Ãcõrẽra igaraɗica? Iɗi bãrãba mãwã oɗibʉrʉ, nu Ãcõrẽra wayacusa jũma dadji israelerã ume bio quĩrũya.
19 Bãrãmaa naʉ̃ Gala ẽjũãda Ãcõrẽ quĩrãpita biẽ́ ɓʉbʉrʉ, idji wua de obiɗa druaɗaa zeɗapeɗa dairã tãẽna ẽjũãra edaɗadua. Baribʉrʉ Ãcõrẽba jaraɗara igararãnadua. Daiba jara panʉ siɗa igararãnadua.* Dadjirãba Ãcõrẽ wua de caita animarã babue diabadada aɓa eropanʉa. Maʉ̃ bẽrã dewarada orãnadua.
20 Quĩrãnebaɗadua Jericoɗe Ãcõrẽba ne jũma babueɗaduaɗa aɗamĩna Zerá warra Acaʉ̃ba ĩjãẽ́ ʉ̃cʉrʉ mẽrã edasida. Maʉ̃ carea Ãcõrẽra jũma dadji israelerã ume bio quĩrũsia. Acaʉ̃ba cadjirua oɗa carea idji awa beuẽ́ basía ãtebʉrʉ dewararã siɗa beusiɗaa.–
21 Maʉ̃ne Rubeʉ̃neba yõpeɗaɗaba, Gaɗeba yõpeɗaɗaba idjaɓa mama panʉ Manaseɗeba yõpeɗaɗa biɗa israelerã bororãa nãwã panusiɗaa:
22 –Ãcõrẽ dji dromaara ɓʉba cawa ɓʉa daiba ĩjã oẽ́ panʉneba ni idji igara panʉneba mãwã oɗaẽ́ basida. Maʉ̃ra jũma Israel puru biɗa cawaɗida panʉa. Dairãba Ãcõrẽ igaraɗi carea mãwã osiɗabʉrʉ, wa ĩjã oẽ́ panʉneba mãwã osiɗabʉrʉ, dairãra jũma quenanadua.
23 Dairãba Ãcõrẽ igaraɗi carea maʉ̃ mõgarada ʉ̃tʉ pã buesiɗabʉrʉ idjia cawa oya. Maʉ̃ awara dewara ãcõrẽa animarã jũma babue diaɗi carea osiɗabʉrʉ, néuɗebema babue diaɗi carea osiɗabʉrʉ, waa maʉ̃ ãcõrẽ ume necai ɓeaɗi carea animarã draga babue diaɗi carea osiɗabʉrʉ, Ãcõrẽba cawa oya.
24 Wãrãda dairãba maʉ̃ mõgarara ʉ̃tʉ pã buesiɗaa bãrã warrarãba dai warrarã igararãnamãrẽã. Crĩchasiɗaa ewari aɓa bãrã warrarãba dai warrarãa nãwã jaraɗisicada: “Bãrãra dai israelerã Ãcõrẽ ẽberãrãẽ́a.
25 Dai Ãcõrẽba Jordaʉ̃ dora dadjirã ẽsi ɓʉsia bãrã Rubeʉ̃neba yõpeɗaɗara, Gaɗeba yõpeɗaɗa siɗa awara ɓeaɗamãrẽã. Maʉ̃ba bãrãra Ãcõrẽ ẽberãrãẽ́a.” Bãrã warrarãba mãwã jarasiɗara dai warrarãa Ãcõrẽra igarabiɗia.
26 Maʉ̃ carea dairãba mõgarara ʉ̃tʉ pã buesiɗaa. Dewara ãcõrẽa animarã jũma babue diaɗi carea oɗaẽ́ basía, ni dewara siɗa babue diaɗi carea oɗaẽ́ basía.
27 Ãtebʉrʉ jãwã osiɗaa bãrãba, dairãba, dadji warrarã biɗa quĩrãnebaɗamãrẽã dairã biɗa Ãcõrẽ de ɓʉma animarãda babue diaɗida panʉda, dewara siɗa babueɗida panʉda, idjaɓa Ãcõrẽ ume necai ɓeaɗi carea animarã dragada babue diaɗida panʉda. Mãwãra nocoarebema ewariɗe bãrã warrarãba dai warrarãa nãwã poya jaraɗaẽ́a: “Bãrãra Ãcõrẽ ẽberãrãẽ́a.”
28 Dairãba crĩchasiɗaa aɓaʉba dairãa wa dai warrarãa biɗa mãwã jaraɗibʉrʉ dairãba nãwã poya panunida: “Acʉɗadua, dai drõãrãba za panʉ mõgara Ãcõrẽa animarã babue diabada quĩrãca ɓʉda ʉ̃tʉ pã buesiɗaa. Baribʉrʉ animarã Ãcõrẽa babue diaɗi carea oɗaẽ́ basida. Ãtebʉrʉ maʉ̃ra osiɗaa bãrãba, dairã biɗa quĩrãnebaɗamãrẽã jũma dadjirãra Ãcõrẽ ẽberãrãda.”
29 Dairãba Ãcõrẽ igaraɗira ni maãrĩ biɗa crĩchaɗacaa. Idji ẽpẽ panʉda idu ɓʉɗaẽ́a. Aɓabe idji wua de ɓʉma animarãda jũma babue diaɗia, néuɗebemada babue diaɗia, dewara siɗa babue diaɗia. Dewara animarã babue diabadada oɗaẽ́a.–
30 22:30-31 Rubeʉ̃neba yõpeɗaɗaba, Gaɗeba yõpeɗaɗaba, idjaɓa mama panʉ Manaseɗeba yõpeɗaɗa biɗa jarapeɗaɗara sacerdote Eleaza warra Pinéba, israelerã bororã die panʉ biɗa bia ũrĩsiɗaa. Maʉ̃ne Pinéba ãdjirãa nãwã jarasia:
–Iɗi cawa panʉa Ãcõrẽra dadjirã ume ɓʉda. Bãrãba Ãcõrẽra igaraɗaẽ́ panʉ bẽrã idjia dadji israelerãra cawa oẽ́a.–
32 Mãwã beɗeapeɗaɗacarea sacerdote Eleaza warra Pinéra, israelerã bororã siɗa jẽda Canaaʉ̃ druaɗaa wãsiɗaa. Maʉ̃be Rubeʉ̃neba yõpeɗaɗaba, Gaɗeba yõpeɗaɗa biɗa Gala druaɗe jarapeɗaɗara ãdjirãba israelerãa jũma nẽbʉrʉsiɗaa.
33 Maʉ̃ra israelerãba bia ũrĩnapeɗa Ãcõrẽa bia beɗeasiɗaa. Mamaʉba ʉ̃taa Rubeʉ̃neba yõpeɗaɗarã ume idjaɓa Gaɗeba yõpeɗaɗarã ume djõnida waa beɗeaɗaẽ́ basía. Ãdji ẽjũã jũma ãrĩni siɗa waa beɗeaɗaẽ́ basía.
34 Rubeʉ̃neba yõpeɗaɗaba Gaɗeba yõpeɗaɗa ume mõgara ʉ̃tʉ pã buepeɗaɗara nãwã trʉ̃ ɓʉsiɗaa: “Za panʉ mõgara ʉ̃tʉ pã buepeɗaɗaba bãrãa, dairãa biɗa quĩrãnebabi ɓʉa dadjirã Borora Ãcõrẽda.”
Beɗea eɗaare
^ 22:10 Jordaʉ̃ doɗe. Ʉ̃cʉrʉmaarã maʉ̃ba jara ɓʉa “Guelilot, Jordaʉ̃ do icawa ɓʉma.”
^ 22:17 Numero 25:1-9
^ 22:17 Maʉ̃ cadjirua opeɗaɗa carea waɗibiɗa bia mĩga panʉa. Hebreo beɗeaɗe nãwã ɓʉ́ ɓʉa: “Maʉ̃ cadjirua opeɗaɗara waɗibiɗa jũma sʉgʉɗaẽ́ panʉa.” Ʉ̃cʉrʉmaarã maʉ̃ba jara ɓʉa ʉ̃cʉrʉ israelerãba waɗibiɗa maʉ̃ cadjiruara o panasiɗada.
^ 22:19 Daiba jara panʉ siɗa igararãnadua. Hebreo beɗeaɗe maʉ̃ba idjaɓa jara ɓʉa: “Dairãra bãrã ume beɗeaɗe ɓʉrãnadua.”
