Josue 23:1-16
23 Israelerã dji quĩrũ ume djõ pananada Ãcõrẽba necai ɓʉɗacarea dãrãbʉrʉɗe Josuera drõãda ɓesia.
2 Maʉ̃ne idjia israelerã dji drõãrãda, dji bororãda, dji cawa obadarãda, dji dromarã siɗa jũma trʉ̃bipeɗa nãwã jarasia:
–Mʉ̃ra drõãda ɓʉ bẽrã dãrã droaẽ́a.
3 Bãrãba unusiɗaa sãwã dadjirã Boro Ãcõrẽra dadjirãare djõsida. Idjia carebasia naʉ̃ druaɗe ɓea purura poyaɗamãrẽã.
4 Mãwãnacarea mʉ̃a ãdji ẽjũãra dadji Israelɗeba yõpeɗaɗa puru doce panʉ́a jũma jeɗecasia. Maʉ̃ awara dadjirãba waɗi edaɗaẽ́ panʉ ẽjũã siɗa mʉ̃a jarasia sãwã jeɗecaɗida panʉda. Jordaʉ̃ doɗeba aɓa ʉ̃mãdau ɓaebariare ɓʉ Pusa Droma Mediterraneo abadaɗaa mʉ̃a jarasia sãwã ẽjũãra jeɗecaɗida panʉda.
5 Dadji Boro Ãcõrẽba maʉ̃ ẽjũãne ɓea ẽberãrãra bãrã quĩrãpitabemada jũma ãyã jʉrecuaya. Mãwã bãrãba ãdji ẽjũã siɗa jũma edaɗia idjia jaraɗa quĩrãca.
6 Quĩrãcuita ɓeaɗadua. Ãcõrẽ ley Moiseba cartaɗe ɓʉɗara jũma ĩjã o pananadua. Ni maãrĩ biɗa ãĩ orãnadua.
7 Ẽberãrã waɗi naʉ̃ druaɗe ɓea ume ãbaa ɓearãnadua. Ãdji ãcõrẽ ɓeara ẽpẽrãnadua. Maʉ̃rã quĩrãpita chĩrãboroɗe copanenapeɗa bia beɗearãnadua idjaɓa iwiɗirãnadua. Wãrãneba jaraɗibʉrʉ ãdji trʉ̃neba mãwã orãnadua.
8 Ewariza aɓa dadjirã Ãcõrẽdrʉ ĩjã pananadua iɗi ĩjã panʉ quĩrãca.
9 Dadji Ãcõrẽba puru droma mẽsrã ɓeada bãrã quĩrãpitabemada ãyã jʉretacuasia. Aɓa iɗi biɗa ni aɓaʉba bãrãra droaɗaẽ́ panʉa.
10 Dadjirãnebema aɓaʉba ãdjirã mil panʉra ãyã mĩrũ pirabibaria Ãcõrẽra dadjirãare djõ ɓʉ bẽrã idjia jaraɗa quĩrãca.
11 Maʉ̃ bẽrã quĩrãcuita ɓeaɗadua. Dadji Ãcõrẽra bio quĩrĩãnadua.
12 23:12-13 Idjira igararãnadua. Maʉ̃ awara naʉ̃ druaɗebemarã waɗi dadjirã tãẽna ɓea ume ãbaa ɓearãnadua. Bãrãba ãdji caurãda edaɗibʉrʉ wa bãrã caurãda ãdjirãa diaɗibʉrʉ, bio cawaɗadua dadji Ãcõrẽba ãdjirãra bãrã quĩrãpitabemada waa ãyã jʉretaẽ́da. Ãtebʉrʉ jʉ̃caraba animarã jidabada quĩrãca ãdjirãba bãrãra biẽ́ ɓʉɗia. Soaba bãrã ẽcarraɗe ubʉda quĩrãca wa ʉrʉ bãrã dauɗe ɓʉ quĩrãca ãdjirãneba bãrãra bio mĩga panania aɓa naʉ̃ ẽjũã bio bia ɓʉ Ãcõrẽba diaɗaɗe bãrã jũma quinibʉdaɗaa.
14 Dãrãẽ́ne mʉ̃ra beuya. Mãwãmĩna bãrãba soɗeba, jaureɗeba biɗa cawa panʉa dadji Ãcõrẽba dadjirã itea oyaɗa aɗara wãrãda jũma osida. Ni maãrĩ biɗa ãĩ oẽ́ basía.
15 Dadji Ãcõrẽba dadjirã itea ne bia oyaɗa aɗara wãrãda osimĩna idjida igaraɗibʉrʉ idjia dadjirã biẽ́ ɓʉi jaraɗa siɗa wãrãda oya.* Mãwã naʉ̃ ẽjũã bio bia ɓʉ idjia diaɗaɗe dadjirãra jũma quinibiya.
16 Ãcõrẽba dadjirã ume beɗea ɓʉɗada bãrãba ĩjã oɗaẽ́bʉrʉ, dewara ãcõrẽ ɓeada ẽpẽnapeɗa ãdji quĩrãpita chĩrãboroɗe copanenibʉrʉ, dadji Ãcõrẽra bãrã ume bio quĩrũya. Maʉ̃ba bãrãra dãrãẽ́ne naʉ̃ ẽjũã bio bia ɓʉ idjia diaɗaɗe jũma quininia.–
Beɗea eɗaare
^ 23:15 Deuteronomio 28:15-68
