Josue 3:1-17
3 Nurẽma diapeɗeɗa Josuera israelerã ume Sitiʉ̃neba wãnapeɗa Jordaʉ̃ do icawa jũẽne wãsiɗaa. Baribʉrʉ chãni naẽna mama duanesiɗaa.
2 Ewari ũbea baɗacarea dji bororãra deza wãsiɗaa.
3 Maʉ̃ne jũmarãa nãwã jarasiɗaa:
–Dãrãẽ́ne sacerdoterã Leviɗeba yõpeɗaɗaba dadji Ãcõrẽ baurudeda nocoɗaa edeɗia. Maʉ̃da unusiɗara caiɗu wãnadua.
4 Mãwã cawaɗia sãmaa wãnida panʉda, bãrãra waɗi naʉ̃ oɗe wãnaca bẽrã. Baribʉrʉ Ãcõrẽ baurude caita wãrãnadua; aɓa unuicha ɓʉmaʉba nĩbaɗida panʉa.–*
5 Maʉ̃ awara Josueba israelerãa jarasia:
–Nu Ãcõrẽba dadjirã quĩrãpita ne ununacada oya. Maʉ̃ bẽrã idji quĩrãpita bia duanani carea oɗadua.–*
6 Maʉ̃be Josueba sacerdoterãa jarasia:
–Ãcõrẽ baurude jira edaɗapeɗa puru na wãnadua.–
Ara maʉ̃da sacerdoterãba baurudera jira edaɗapeɗa puru na wãsiɗaa.
7 Maʉ̃ne Ãcõrẽba Josuéa jarasia:
–Iɗiba ʉ̃taa israelerã quĩrãpita mʉ̃a bʉra dji dromada ɓʉya. Mãwã ãdjirãba cawaɗia mʉ̃ra bʉ ume ɓʉda Moise ume ɓaɗa quĩrãca.
8 Sacerdoterã mʉ̃ baurude edebʉdarãa jaradua do icawa jũẽsiɗara doeɗa nũpanenamãrẽã.–
9 Ara maʉ̃da Josueba israelerãa nãwã jarasia:
–Dadji Ãcõrẽba jaraɗara ũrĩne zeɗadua.
10 3:10-11 Ãcõrẽ zocai ɓʉra dadjirã tãẽna ɓʉa. Idjia jũma naʉ̃ ẽjũãra poya ɓʉa. Idjiabʉrʉ cananeorãda, hititarãda, heveorãda, perezeorãda, gergeseorãda, amorreorãda, jebuseorã siɗa dadjirãa jũma poyabiya. Maʉ̃ra bãrãba nãwã cawaɗia: sacerdoterãba Ãcõrẽ baurudera Jordaʉ̃ doɗe bãrã na edeɗia.
12 Israelɗeba yõna doce puruɗebemada aɓa aɓa edaɗadua.
13 Sacerdoterã Ãcõrẽ baurude edebʉdara doeɗa tʉgabʉdaɗe oda ewa dogopeɗa dora wãrãga jũãtrʉ ɓʉ quĩrãca tuma nãbua ũmeya. Ãcõrẽ naʉ̃ ẽjũã jũma poya ɓʉba mãwã oya.–
14 Ara maʉ̃da israelerãba ãdji wua dera bʉraɗapeɗa wãbʉrʉsiɗaa Jordaʉ̃ do wa quĩrãrẽ chãni carea. Ãdji na sacerdoterãba Ãcõrẽ baurudera edesiɗaa.
15 3:15-16 Maʉ̃ne Jordaʉ̃ dora nãbua ũmasia. Poaza mãwã ɓabaria cebada jara. Sacerdoterã doeɗa tʉgabʉdaɗe oda do quĩrãrã ewa dogosia. Maʉ̃ne dora wãrãga jũãtrʉ ɓʉ quĩrãca tuma nãbua ũmesia. Dji tumara Adam puruma jũẽsia Saretaʉ̃ caita. Ɓarrea dora põãsasia aɓa Pusa Beuɗaɗaa. Mãwã ɓʉɗe israelerãra Jordaʉ̃ do chãnapeɗa Jerico puruare wãsiɗaa.
17 Israelerã chãbʉdamisa sacerdoterãba Ãcõrẽ baurudera doeɗa jira eronũpanasiɗaa. Mama nũpanesiɗaa aɓa jũmarãda põãsaɗe chãbʉdaɗaa.
