Josue 4:1-24
4 Jũmarãda Jordaʉ̃ do quĩrãrãa chãpeɗaɗacarea Ãcõrẽba Josuéa nãwã jarasia:
2 –Israelɗeba yõpeɗaɗa doce puruɗebemada aɓa aɓa edadua.
3 Ãdjirãra doeɗa wãbidua sacerdoterãba mʉ̃ baurude jira eropanʉmaa. Mamaʉba mõgarada doce enebidua bãrã cãĩnimaa edeɗamãrẽã.–
4 Ara maʉ̃da Israelɗeba yõpeɗaɗa doce puruɗebema edaɗara Josueba trʉ̃cuasia.
5 Maʉ̃ne nãwã jarasia:
–Bãrãra doeɗa wãnadua dadji Ãcõrẽ baurude jira eropanʉmaa. Bãdjiza mõgarada aɓa equiaɗe edaɗapeɗa enenadua dadji cãĩnimaa ʉ̃tʉ boromea bueɗi carea. Israelɗeba yõpeɗaɗa puruza mõgarada aɓa eneida ɓʉa.
6 Maʉ̃ mõgara ʉ̃tʉ boromea bueɗaba quĩrãnebabi ɓaya sãwã Ãcõrẽba dadjirãra carebasida. Nocoarebema ewariɗe bãrã warrarãba maʉ̃ mõgara unubʉdaɗe nãwã iwiɗiɗisicada: “Naʉ̃ mõgarara ¿cãrẽã jãwã ʉ̃tʉ boromea buesiɗa?”
7 Mãwã iwiɗisiɗara nãwã panunadua: “Sacerdoterãba Ãcõrẽ baurude Jordaʉ̃ doɗe edesiɗaɗe oda põãsa ewasia. Naʉ̃ mõgarara ʉ̃tʉ boromea buesiɗaa dadji israelerãba ewariza quĩrãnebaɗamãrẽã sãwã Ãcõrẽba dadjirãra carebasida.”–
8 Ara maʉ̃da israelerãba jũma osiɗaa Josueba jaraɗa quĩrãca. Doce mõgarara Jordaʉ̃ doeɗa edasiɗaa. Israelɗeba yõpeɗaɗa puruza mõgarada aɓa edasiɗaa. Maʉ̃be ãdjirã cãĩnimaa edeɗapeɗa jũma ãbaa buesiɗaa Ãcõrẽba Josuéa jaraɗa quĩrãca.
9 Maʉ̃ awara Josueba mõgarada doce jʉrʉ pepeɗa doeɗa ʉ̃tʉ boromea buesia sacerdoterãba Ãcõrẽ baurude jira eronũpanʉma. Maʉ̃ mõgarara waɗibiɗa mama bue nũmʉa.
10 Sacerdoterã Ãcõrẽ baurude jira eropanʉra Jordaʉ̃ doeɗa nũpanasiɗaa aɓa Ãcõrẽba Josuéa jaraɗara puruba jũma obʉdaɗaa. Moiseba Josuéa naẽna jaraɗa quĩrãca puruba jũma osia. Purura isabe chãsiɗaa.
11 Jũmarã chãpeɗaɗacarea sacerdoterã Ãcõrẽ baurude jira eropanʉra chãnapeɗa wayacusa puru na wãsiɗaa.
12 Maʉ̃ awara Rubeʉ̃neba, Gaɗeba, idjaɓa ʉ̃cʉrʉ Manaseɗeba yõpeɗaɗa mẽsrã ɓeara chãnapeɗa waabema israelerã na wãsiɗaa Moiseba ãdjirãa jaraɗa quĩrãca.
13 Maʉ̃ mẽsrã ɓeara cuarenta mil panasiɗaca ɓʉa. Ãdjia Ãcõrẽ quĩrãpita jarapeɗaɗa quĩrãca Jerico jeweɗaɗaa wãsiɗaa djõni carea.
14 Maʉ̃ ewariɗe Ãcõrẽba Josuera israelerã quĩrãpita dji dromada ɓʉsia. Mamaʉba ʉ̃taa ewariza israelerãba Josuera waya panesiɗaa Moise waya panana quĩrãca.
15 Jũmarã chãpeɗaɗacarea Ãcõrẽba Josuéa nãwã jarasia:
16 –Sacerdoterã mʉ̃ baurude jira eropanʉrãa jaradua drua zeɗamãrẽã.–
17 Ara maʉ̃da Josueba sacerdoterãa jarasia Jordaʉ̃ doɗeba drua zeɗamãrẽã.
18 Maʉ̃ne sacerdoterã Ãcõrẽ baurude jira eropanʉra drua zesiɗaa. Ẽjũã põãsa tʉgabʉdaɗe dora wayacusa wea dogopeɗa nãbua ũmesia idji ɓaɗa quĩrãca.
19 Poa djiwiɗi nabema jeɗecoɗe die ewariɗe israelerãra Jordaʉ̃ do chãnapeɗa Gilgal abadaɗaa wãbʉrʉsiɗaa. Gilgalera Jericoɗeba ʉ̃mãdau odjabariare ɓʉa.
20 Mama doce mõgara Jordaʉ̃ doɗeba edepeɗaɗara Josueba ʉ̃tʉ boromea buesia.
21 Maʉ̃ne idjia israelerãa nãwã jarasia:
–Nocoarebema ewariɗe bãrã warrarãba nãwã iwiɗiɗisicada: “Naʉ̃ mõgarara ¿cãrẽã ʉ̃tʉ boromea buesiɗa?”
22 Mãwã iwiɗisiɗara nãwã panunadua: “Dairãba mãwã osiɗaa quĩrãnebaɗi carea dadji israelerãra Jordaʉ̃ dojã põãsaɗe chãsiɗada.
23 Dadji Ãcõrẽba dora jũãtrʉ eroɓasia dadji israelerã dojã põãsaɗe jũma chãbʉdamisa. Ara maʉ̃ quĩrãca Pusa Purruɗe oda ewasia pusajã põãsaɗe chãnamãrẽã.
24 Dadji Ãcõrẽba mãwã osia bãrãba idjira ewariza waya pananamãrẽã idjaɓa jũma naʉ̃ ẽjũãnebemarãba cawaɗamãrẽã idjira bio ʉɓʉa ɓʉda.”–
