Josue 5:1-15
5 Maʉ̃ ewariɗe ʉ̃cʉrʉ amorreorãda Jordaʉ̃ doɗeba ʉ̃mãdau ɓaebariare panasiɗaa. Cananeorãda pusa Mediterraneo abadaare panasiɗaa. Ãdji bororãba ũrĩsiɗaa Ãcõrẽba Jordaʉ̃ dora põãsabisida israelerã chãnamãrẽã. Maʉ̃ba bio ne wayaɗapeɗa israelerã ume djõni crĩchara neẽ́ panesiɗaa.
2 Maʉ̃ ewariɗe Ãcõrẽba Josuéa jarasia:
–Mõgarada edapeɗa neco zaqueda ocuadua. Maʉ̃ba wayacusa israelerã dji umaquĩrãda jũma cacua wẽãgobicuadua.–
3 Ara maʉ̃da Aralot eya zaqueɗe Josueba mõgarada edapeɗa neco zaquera ocuapeɗa jũma israelerãra cacua wẽãgobicuasia.*
4 5:4-5 Josueba mãwã osia israelerã Egiptoɗeba ẽdrʉpeɗaɗacarea ẽjũã põãsa ewaraga ɓʉɗe nĩnane umaquĩrã warra topeɗaɗara cacua wẽãgoẽ́ ɓeaɗa bẽrã. Jũma mẽsrã ɓea Egiptoɗeba ẽdrʉpeɗaɗara cacua wẽãgo ɓeasia baribʉrʉ ẽjũã põãsa ewaraga ɓʉɗe quinisiɗaa.
6 Ãcõrẽba ãdjirãa nãwã jarasia: “Mʉ̃a bãrã drõã naẽnabemarãa wãrãneba jarasia Canaaʉ̃ druada diaida. Maʉ̃ druaɗe baridua ne upeɗaɗara bia zaubaria.” Baribʉrʉ Ãcõrẽba jaraɗara ãdjirãba ĩjã oɗaẽ́ basía. Maʉ̃ carea idjia wãrãneba jarasia ãdjirãba maʉ̃ ẽjũãra edaɗaẽ́da. Mãwã jaraɗa bẽrã ãdjirãra cuarenta poa ẽjũã põãsa ewaraga ɓʉɗe pʉrrʉa nĩbabadjiɗaa. Mãwã nĩnane jũma dji mẽsrã ɓea Egiptoɗeba ẽdrʉpeɗaɗara quinisiɗaa.
7 Ãdjirã cacuabari Ãcõrẽba ãdji warrarãa Canaaʉ̃ druara diayaɗa asia. Baribʉrʉ ãdjirãra cacua wẽãgoẽ́ ɓeasia oɗe nĩnane topeɗaɗa bẽrã. Maʉ̃ carea Josueba ãdjirãra cacua wẽãgobicuasia.
8 Jũma cacua wẽãgopeɗaɗacarea diguiɗa duanesiɗaa aɓa ãdji cacua anibʉdaɗaa.
9 Ãcõrẽba Josuéa jarasia:
–Egiptoɗe nezoca panasiɗaɗe bãrãra mĩã pera panasiɗaa baribʉrʉ iɗi bãrã cacua wẽãgosiɗa bẽrã maʉ̃ mĩã perara mʉ̃a ãyã ɓʉsia.–
Maʉ̃ bẽrã maʉ̃ ẽjũãra waɗibiɗa Gilgal abadaa.*
10 Israelerãra Gilgalɗe duanesiɗaa. Ãdji jũẽpeɗaɗa jeɗecoɗe ewari catorceɗe quewara Egiptoɗeba ẽdrʉpeɗaɗa quĩrãnebada ewarida osiɗaa mama Jerico caita ɓʉ jeweɗaɗe.
11 Nurẽma Canaaʉ̃ ẽjũãne zau ɓʉda co panesiɗaa. Paʉ̃ ẽsãbari neẽ́ ɓʉda oɗapeɗa cosiɗaa. Cebada jututiaɗa siɗa cosiɗaa.
12 Mamaʉba ʉ̃taa manára waa odjaẽ́ basía israelerãba coɗamãrẽã. Maʉ̃ poaɗe Canaaʉ̃ ẽjũãne zau ɓʉda co panesiɗaa.
Ãcõrẽ sordaorã boro zeɗa
13 Mama Jerico caita ɓʉɗe ewari aɓa Josueba ẽberãda neco jũẽ nũmʉda unusia. Maʉ̃ ẽberã caita wãpeɗa iwiɗisia:
–¿Bʉra daiare ɓʉca wa dai dji quĩrũare ɓʉ?–
14 Ẽberãba nãwã panusia:
–Mʉ̃ra ni aɓaʉare ɓʉẽ́a. Mʉ̃ra Ãcõrẽ sordaorã boro bẽrã ze ɓʉa.–
Maʉ̃ ũrĩsiɗe Josuera idji waya ɓʉɗeba chĩrãboroɗe ɓarru coɓepeɗa iwiɗisia:
–Mʉ̃ Boro, mʉ̃ra bʉ nezocaa. ¿Cãrẽda obi quĩrĩã ɓʉ?–
15 Maʉ̃ne Ãcõrẽ sordaorã boroba jarasia:
–Bʉra Ãcõrẽ quĩrãpita ɓʉ bẽrã bʉ jĩrũne jʉ̃ ɓʉra ẽrãdua.–
Ara maʉ̃da Josueba ĩjã osia.
