Josue 6:1-27
6 Jericoɗebemarãba israelerã wayaaba ãdji puruɗe eɗa wãbadara bio jũãtrʉ eropanasiɗaa. Maʉ̃ba ni aɓaʉda puruɗeba ẽdrʉɗaca basía, ni eɗa zeɗaca basía.
2 Maʉ̃ne Ãcõrẽba Josuéa jarasia:
–Ũrĩdua. Mʉ̃a Jerico puruda, dji boroda, sordaorã siɗa bãrãa poyabiya.
3 Bãrã sordaorãra ewariza ɓarima aɓa Jerico auɗu pʉrrʉgaɗadua. Sei ewari mãwã oɗadua.
4 Maʉ̃ne sacerdoterãba mʉ̃ baurudera eronĩbaɗida panʉa. Dewara siete sacerdoterãda ãdji na nĩbaɗida panʉa. Ãdjirãza cachiru oveja cachu oɗada edeɗida panʉa. Sietebema ewariɗe bãrãra ɓarima siete Jerico auɗu pʉrrʉgaɗadua. Maʉ̃ne jũma maʉ̃ cachiru eropanʉba jĩgua zaɗida panʉa.
5 Cachiru dãrã jĩguabʉdaɗe bãrãra jĩgua ɓiaɗadua. Maʉ̃ne Jerico auɗu jũrã ca ɓʉra iduɓa toɗogozoaya. Maʉ̃ne bãrãra daucha pirapoɗapeɗa puruɗe eɗa djõne wãbʉrʉɗadua.–
6 Ara maʉ̃da Nuʉ̃ warra Josueba israelerã sacerdoterãra jũma trʉ̃cuapeɗa jarasia:
–Ãcõrẽ baurudera Jerico puru auɗu pʉrrʉga edeɗadua. Idjaɓa bãrãnebemada siete edaɗapeɗa baurude nocoare cachiru bara nĩbaɗadua.–
7 Maʉ̃be sordaorãa nãwã jarasia:
–Bãrã siɗa wãnapeɗa Jerico puru auɗu pʉrrʉgaɗadua. Ʉ̃cʉrʉ sordaorã djõni careabema bara Ãcõrẽ baurude na nĩbaɗadua.–
8 Josueba jaraɗara jũma ĩjã osiɗaa.* Sacerdoterã siete panʉra Ãcõrẽ baurude nocoare nĩbasiɗaa ãdji cachiru zá panʉda.
9 Ãdjirã nocoare ʉ̃cʉrʉ sordaorãda djõni careabema bara nĩbasiɗaa. Waabema sordaorãra Ãcõrẽ baurude caiɗu errubusibasia. Mãwã nĩnane sacerdoterãba ãdji cachirura zá jõnaca basía.
10 Baribʉrʉ Josueba sordaorãa nãwã jarasia:
–Ɓiarãnadua. Ni maãrĩ biɗa beɗearãnadua. Chupea pananadua aɓa mʉ̃a jarabʉrʉɗaa. Mʉ̃a bãrãa jarabʉrʉɗe ɓiaɗadua.–
11 Maʉ̃ ewariɗe Josueba Ãcõrẽ baurudera ɓarima aɓa Jerico puru auɗu pʉrrʉga edebisia. Mãwã oɗapeɗa wayacusa ãdji cãĩbadamaa zesiɗaa.
12 Nurẽma diapeɗeɗa Josuera piradrʉpeɗa sacerdoterãa Ãcõrẽ baurudera wayacusa Jerico puru auɗu pʉrrʉga edebisia.
13 Sacerdoterã siete panʉra Ãcõrẽ baurude nocoare nĩbasiɗaa. Ãdjiza cachirura zá nĩbasiɗaa. Ãdjirã nocoare ʉ̃cʉrʉ sordaorãra djõni careabema bara nĩbasiɗaa. Waabema sordaorãra Ãcõrẽ baurude caiɗu errubusibasia. Mãwã nĩnane sacerdoterãba ãdji cachirura zá jõnaca basía.
14 Maʉ̃ umébema ewariɗe ãdjirãra wayacusa ɓarima aɓa Jerico puru auɗu pʉrrʉgaɗapeɗa ãdji cãĩbadamaa jẽda zesiɗaa. Sei ewari mãwã osiɗaa.
15 Sietebema ewariɗe ãdjirãra diapeɗeɗa piradrʉɗapeɗa Jerico puru auɗu pʉrrʉgasiɗaa naãrã opeɗaɗa quĩrãca. Baribʉrʉ maʉ̃ ewariɗe ɓarima siete pʉrrʉgasiɗaa.
16 Ɓarima siete pʉrrʉgapeɗaɗacarea cachirura dãrã jĩgua zasiɗaa. Maʉ̃ne Josueba jĩgua jarasia:
–¡Ɓiaɗadua! Ãcõrẽba naʉ̃ Jerico purura dadjirãa poyabibʉrʉa.
17 Jũmarãda quenanapeɗa purura, ne jũma puruɗe ɓʉ siɗa babueɗadua Ãcõrẽba idji itea mãwã obi ɓʉ bẽrã. Aɓabe wẽrã auɗua ɓʉ Rahádrʉ, idji deɗe panʉ siɗa zocai ɓʉɗadua dadjia wãrãneba mãwã oɗida jarapeɗaɗa bẽrã. Naʉ̃ puru sãwã poyaɗi cawaya mʉ̃a diabueɗa ẽberãrãda idjia mẽrãsia.
18 Baribʉrʉ bãrãra bio quĩrãcuitaɗadua. Puruɗe ne bia ɓeara ni cãrẽ siɗa edarãnadua, Ãcõrẽba idji itea ne jũmada babueɗaduaɗa aɗa bẽrã. Bãrãba ĩjãnaẽ́bʉrʉ, dadji purura beɗeaɗe ɓʉɗapeɗa Ãcõrẽba quinibiya.
19 Paratada, oroda, bronce oɗada, jiorro oɗa siɗa jũma Ãcõrẽa diaɗida panʉa. Maʉ̃drʉ Ãcõrẽa diaɗa wagabadaɗe ɓʉɗida panʉa.–
20 Sacerdoterãba ãdji cachiru dãrã jĩgua zasiɗaɗe jũmarãda jĩgua ɓiasiɗaa. Maʉ̃ne Jerico puru auɗu jũrã ca ɓʉra iduɓa toɗogozoasia. Ara maʉ̃da israelerãra daucha djõne pirapoɗapeɗa purura poyasiɗaa.
21 Maʉ̃ puruɗebema umaquĩrãrãda, wẽrãrãda, warrarãda, drõãrã siɗa necoba jũma quenasiɗaa. Ãdji pacada, ovejada, burro siɗa jũma quenasiɗaa.
22 Maʉ̃ne Josueba Canaaʉ̃ drua acʉɗe diabueɗa ẽberãrãa nãwã jarasia:
–Wẽrã auɗua ɓʉ Rahá diguiɗaa wãnapeɗa idjira, idji deɗe duanʉ siɗa ẽdrʉ enenadua. Bãrãba idjía wãrãneba jarapeɗaɗara oɗe wãnadua.–
23 Ara maʉ̃da Rahá diguiɗaa wãnapeɗa dji zezada, dji papada, dji djabarãda, dji djabawẽrãda, jũma ãdji ẽberãrã siɗa dajadaa enesiɗaa. Maʉ̃be israelerã duanʉmaʉba jĩga ɓʉɗe wãsiɗaa.
24 Maʉ̃misa waabema israelerãba Jerico purura aɓeɗa jũma babuesiɗaa. Baribʉrʉ paratada, oroda, bronce oɗada, jiorro oɗa siɗa Ãcõrẽa diaɗa wagabadaɗe ɓʉsiɗaa.
25 Josueba wẽrã auɗua ɓʉ Rahára, idji ẽberãrã siɗa zocai ɓʉsia, maʉ̃ wẽrãba idjia Jerico chupea acʉɗe diabueɗara mẽrãna bẽrã. Rahá ẽberãrãra waɗibiɗa israelerã tãẽna panʉa.
26 Mãwãnacarea Josueba wãrãneba nãwã jarasia:Aɓaʉba naʉ̃ Jerico puru wayacusa oi carea jʉwa ɓʉibʉrʉ, maʉ̃ ẽberãra Ãcõrẽba biẽ́ ɓʉya.Dji mõgara jũrã ca ɓaɗa wayacusa obʉrʉɗe idji warra iwinada beuya.Dji eɗa wãbada pãrãbʉrʉɗe idji warra tẽãbemada beuya.Mãwã idji warrarãra jũma quininia.*
27 Ãcõrẽra Josue ume ɓasia. Maʉ̃ bẽrã Josuera jũma maʉ̃ druaɗe trʉ̃ ɓʉga ɓesia.
