Juda 1:1-25
1 Mʉ̃ra Judaa, Santiago djabaa idjaɓa Jesucrito nezocaa.* Naʉ̃ cartara ɓʉbʉrʉa jũma dadjirã Zeza Ãcõrẽba trʉ̃narã itea. Idjia bãrãra quĩrĩã ɓʉa idjaɓa Jesucritoɗeba waga eroɓʉa.
2 Mʉ̃a quĩrĩã ɓʉa idjia bãrãra bio quĩrã djuburia ɓaida, necai ɓaira aɗuba dia ɓaida, idjaɓa bãrãra bio quĩrĩã ɓaida.
Sewa jaradia ɓea
3 Djabarã, mʉ̃a naʉ̃ cartaɗe Ãcõrẽba dadjirã ẽdrʉ edaɗaɗebemada ɓʉ́ quĩrĩã ɓasia. Baribʉrʉ mʉ̃maarã biara ɓʉa ara nawena ɓʉida quĩrãcuita ɓeaɗamãrẽã. Bãrãba ĩjã panʉra ni aɓaʉa idu quĩrã awara jaradiabirãnadua. Ãcõrẽba wãrã beɗeara jũma idji ẽberãrãa ɓarima aɓa diasia. Quĩrã awara diacaa.
4 Mãwã ɓʉ́ ɓʉa ʉ̃cʉrʉda djabarã quĩrãca zeɗapeɗa bãrã tãẽna panʉ bẽrã. Maʉ̃ ẽberãrãba sewaɗeba jaradiabadaa Ãcõrẽba idji biaɗeba dadjirãra ẽdrʉ edaɗa bẽrã dadji cacuaba cadjirua o quĩrĩã ɓʉda oɗida panʉda. Ãdjirãba dadjirã Boro aɓa ɓʉ Jesucritora igarabadaa. Naãrãeɗaʉba ɓʉ́ ɓasia Ãcõrẽba ãdjirãra cawa oida.
5 Bãrãba cawa panʉmĩna mʉ̃a quĩrãnebabiya dadjirã Boroba idji purura Egiptoɗeba ẽdrʉ edasida. Baribʉrʉ ẽdrʉ edaɗacarea idji ĩjãpeɗaɗaẽ́ra quinibisia.
6 Idjaɓa quĩrãnebaɗadua ʉ̃cʉrʉ bajãnebema nezocarãda Ãcõrẽba ɓʉɗa quĩrãca ɓeaɗaẽ́ basida. Ãtebʉrʉ ãdji pananara igarasiɗaa. Maʉ̃ carea Ãcõrẽba uria pãĩsosoa ɓʉɗe preso ɓʉcãrĩa aɓa idjia cawa oi ewariɗaa.
7 Ara maʉ̃ quĩrãca Ãcõrẽba Sodomanebemarãda, Gomorraɗebemarãda, ãdji caita ɓea puruɗebemarã siɗa cawa osia. Maʉ̃ ẽberãrãba auɗuada obadjiɗaa. Aɓeɗa ne jũma cadjirua dadji cacuaba oiẽ́ ɓʉda obadjiɗaa. Maʉ̃ carea Ãcõrẽba ãdjirãra tʉbʉ urua quicaɗe ewariza bia mĩga eroɓʉa. Maʉ̃ba cawabi ɓʉa jũma cadjirua obadara mãwã bia mĩga pananida.
8 Bãrã tãẽna zepeɗaɗara maʉ̃ ẽberãrã quĩrãca panʉa. Ãdjirãba cãĩmocaraɗada ẽpẽbadaa. Ãdji cacuaba cadjirua o quĩrĩã ɓʉda obadaa, dadjirã Borora igarabadaa, idjaɓa jairã dji droma ɓeada biẽ́ jarabadaa.
9 Baribʉrʉ bajãnebema nezoca dji droma Miguelba mãwã oca basía. Moise beuɗacarea Miguelera idji cacua carea diauru ume caicayasia. Mãwãmĩna diaurura biẽ́ jaraida crĩchaẽ́ basía, ãtebʉrʉ jarasia: “Dadji Boroba bʉra quẽãya.”
10 Baribʉrʉ maʉ̃ ẽberãrã bãrã tãẽna zepeɗaɗaba ãdjia adua panʉnebemada biẽ́ beɗeabadaa. Ãdjia cawa panʉra animarã crĩcha quĩrãca ɓʉa. Animarã quĩrãca aɓabe ãdji cacuaba quĩrĩã ɓʉda obadaa. Maʉ̃ carea Ãcõrẽba biẽ́ ɓʉya.
11 Ãdjira mĩã djuburi ɓeaa. Caiʉ̃ba oɗa quĩrãca obadaa.* Parata awua panʉneba Balaaʉ̃ba oɗa quĩrãca ãĩ o nĩnaa. Coreba Moise igaraɗa quĩrãca Ãcõrẽda igara panʉ bẽrã ãdjirã siɗa biẽ́ ɓʉya.
12 Quĩrĩãneba bãrã ãbaa ne co panʉne ãdjirã siɗa ne wayaa neẽ́ ɓʉsriɗa ne cobadaa. Mãwã bãrãba o panʉra ãrĩbadaa. Aɓabe ãdjidrʉ crĩchabadaa. Ãdjirãra jʉ̃rãrã nãũrãba ãyã edebari quĩrãca ɓeaa. Nãũrãba jʉ̃rãrã ãyã edebʉrʉɗe cue zecaa. Ara maʉ̃ quĩrãca ãdjia jaradia panʉba carebacaa. Ãdjirãra bacuru zauca quĩrãca ɓeaa. Nejõ zauca cora wãna quĩrãca ɓeaa. Mãwã ɓarima ume beuɗa quĩrãca ɓeaa.
13 Ãdjirãra pusa bogozoa quĩrãca ɓeaa. Pusa bogozoaba cõpepea do icawa ɓatabuebari quĩrãca ãdjirãba mĩã perada baridua obadaa. Ãĩ wãpeɗaɗa bẽrã chĩdau ɓaebʉrʉ quĩrãca ɓeaa. Ãcõrẽba uria bio pãĩsosoa ɓʉda o ɓʉsia ãdjirã ewariza biẽ́ ɓʉi carea.
14 1:14-15 Maʉ̃ ẽberãrãnebemada Enocoba beɗeasia. (Adaʉ̃neba aɓa Enocoɗaa siete drõãenabemarã panasiɗaa.) Enocora Ãcõrẽneba nãwã beɗeasia: “¡Ũrĩnadua! Dadjirã Boroba jũmarã cawa oi carea idjiɗerã zocãrã panʉ ume zebʉrʉa. Maʉ̃ne jũma idji quĩrĩãnacara biẽ́ ɓʉya. Idji quĩrĩãnacaɗeba cadjirua opeɗaɗa bẽrã idjaɓa idjiɗebemada bio biẽ́ beɗeapeɗaɗa bẽrã mãwã oya.”
16 Maʉ̃ ẽberãrãra baridua carea biẽ́ duanebaria, idjaɓa baridua carea djãrãra biẽ́ jarabadaa. Aɓabe ãdjia quĩrĩã ɓeadrʉ jʉrʉbadaa. Dji droma quĩrãca beɗeabadaa. Ãdji ẽpẽnamãrẽã djãrãa bia beɗeabadaa.
Djabarãba sãwã oɗida panʉ
17 Baribʉrʉ djabarã, dadjirã Boro Jesucritoba diabueɗarãba naẽna jarapeɗaɗara quĩrãnebaɗadua.
18 Bãrãa nãwã jarasiɗaa: “Jĩrũarebema ewariɗe Ãcõrẽ ipiɗa biẽ́ jarabadara baraya. Ãcõrẽda quĩrĩãnaca bẽrã ãdji cacuaba o quĩrĩã ɓʉda o ɓeaɗia.”
19 Ãdjirãba djabarãa awara awara crĩchabibadaa, baridua ãdjia quĩrĩã panʉda obadaa, Ãcõrẽ Jaureda neẽ́ ɓeaa.
20 Baribʉrʉ djabarã, biara Critoda ĩjãni carea dji carebaɗadua. Ãcõrẽa idji Jaureɗeba iwiɗiɗadua.
21 Ãcõrẽ quĩrĩãneba nĩbaɗadua. Dadjirã Boro Jesucritoba quĩrã djuburiaɗeba zocai ɓai jõcada diamãrẽã jʉ̃ãnadua.
22 Djabarã bio ĩjãẽ́ ɓeara quĩrã djuburiaɗadua.
23 Tʉbʉ uruaɗaa wãbʉdara ẽdrʉɗamãrẽã carebaɗadua. Djãrãra quĩrã djuburiaɗadua, baribʉrʉ quĩrãcuita ɓeaɗadua. Ãdjia cadjirua obadara jũma igaraɗadua.*
Judaba Ãcõrẽa bia beɗeaɗa
24 Ãcõrẽba bãrãra poya wagaya cadjiruaɗe ɓaerãnamãrẽã. Idji quĩrãwãrẽã quĩrãpita cadjirua neẽ́ poya bia ɓʉya. Mama bãrãra ɓʉsriɗa ɓeaɗia.
25 Ãcõrẽra aɓabʉrʉ ɓʉa. Idjira dadjirã Ẽdrʉ Edabaria. Idjidrʉ dji dromaa, ne jũma poya o ɓʉa. Idjira jũmarã Boroa. Naẽnaeɗa mãwã ɓasia, iɗi mãwã ɓʉa, idjaɓa ewariza mãwã ɓaya. Dadjirã Boro Jesucritoɗeba idjíabʉrʉ bia beɗeaɗida panʉa. Bia ɓʉa mãwã ɓaida.
