Juece 10:1-18
10 Abimele jaiɗaɗacarea Puvá warra Tola abadaba israelerãra dji quĩrũ jʉwaeɗabemada ẽdrʉ ɓʉbadjia. Idjira Dodo wiuzaque basía. Isacarɗeba yõna basía. Epraiʉ̃ eyaiɗa ɓʉ ẽjũãne Samir puruɗe ɓabadjia.
2 Tolaba israelerãra 23 poa ẽdrʉ ɓʉbadjia. Jaiɗasiɗe Samir puruɗe tʉɓarisiɗaa.
3 Tola jaiɗaɗacarea Jaír Gala druaɗebemada 22 poa israelerã ẽdrʉ ɓʉbari basía.
4 Idjia warrarãda treinta eroɓasia. Maʉ̃gʉrãra treinta burro ʉ̃rʉ̃ nĩbabadjiɗaa. Gala druaɗe treinta puru ãdjirã jʉwaeɗa eropanasiɗaa. Maʉ̃ puru ɓeara waɗibiɗa Jaír puru abadaa.
5 Jaír jaiɗasiɗe Camoʉ̃ puruɗe tʉɓarisiɗaa.
Amonitarãba israelerã biẽ́ eropanana
6 Maʉ̃ ewariɗe israelerãba wayacusa Ãcõrẽ quĩrãpita cadjiruada o panesiɗaa. Baal abadada, Astarte abada siɗa ẽpẽsiɗaa. Idjaɓa Siriaɗebemarã, Sidoʉ̃nebemarã, moabitarã, amonitarã idjaɓa pilisteorã ãcõrẽ ɓeada ẽpẽsiɗaa. Ãcõrẽra aɓeɗa igarasiɗaa.
7 Maʉ̃ carea Ãcõrẽra bio quĩrũpeɗa israelerãra pilisteorã idjaɓa amonitarã jʉwaeɗa ɓʉsia.
8 Maʉ̃ ewariɗe pilisteorãba, amonitarã biɗa israelerã Gala ẽjũãne ɓeada poyaɗapeɗa dieciocho poa biẽ́ o panasiɗaa. Gala ẽjũãra amorreorã ẽjũã baɗa basía. Jordaʉ̃ doɗeba ʉ̃mãdau odjabariare ɓʉa.
9 Maʉ̃be amonitarãra Jordaʉ̃ do chãsiɗaa Judaɗebemarã ume, Benjamiʉ̃nebemarã ume, idjaɓa Epraiʉ̃nebemarã ume djõni carea. Mãwã jũma israelerãra bio bia mĩga duanabadjiɗaa.
10 Mãwã panʉne israelerãba Ãcõrẽa quĩrã djuburiada nãwã iwiɗisiɗaa:
–Dai Ãcõrẽ, bʉ quĩrãpita dairãba cadjirua waiɓʉada osiɗaa. Bʉra igaraɗapeɗa Baalda ẽpẽsiɗaa.–
11 10:11-12 Ãcõrẽba panusia:
–Egiptorãba, amorreorãba, amonitarãba, pilisteorãba, Sidoʉ̃nebemarãba, amalecitarãba, madianitarã biɗa bãrã biẽ́ obʉdaza bãrãba quĩrã djuburia iwiɗibʉdaɗe mʉ̃a bãrãra ẽdrʉ ɓʉbadjia.*
13 Mãwã oɗamĩna bãrãba mʉ̃ra igaraɗapeɗa dewara ãcõrẽ ɓeada ẽpẽsiɗaa. Maʉ̃ bẽrã mʉ̃a bãrãra waa ẽdrʉ ɓʉẽ́a.
14 ¡Bãdjia ẽpẽbada ãcõrẽ ɓeaa quĩrã djuburiada iwiɗiɗe wãnadua! ¡Ãdjirãbʉrʉ bãrã bia mĩga panʉnebemada ẽdrʉ ɓʉɗisicada!–
15 Maʉ̃ne israelerãba Ãcõrẽa jarasiɗaa:
–Daiba wãrãda cadjiruada osiɗaa. Bʉa dairã cawa o quĩrĩã ɓʉ quĩrãca odua, baribʉrʉ ¡dai quĩrã djuburia nawena ẽdrʉ ɓʉdua!–
16 Maʉ̃ne dewara ãcõrẽ ɓeara israelerãba ɓatacuaɗapeɗa Ãcõrẽra wayacusa ẽpẽsiɗaa. Israelerã bia mĩga panʉ bẽrã Ãcõrẽba waa droaẽ́ basía.
17 Maʉ̃ ewariɗe amonitarãra Gala ẽjũãne dji jʉresiɗaa israelerã ume djõni carea. Maʉ̃ne Galaɗebema israelerãra Mizpa puruɗe dji jʉresiɗaa.
18 Mãwã panʉne ãdjirãba, dji bororã biɗa ãdjiza iwiɗisiɗaa:
–¿Caida naãrã amonitarã ume djõne wãi?–
Maʉ̃be nãwã beɗea ɓʉsiɗaa:
–Djõbʉdaɗe dji nocoare ɓebʉrʉda jũma dadji Galaɗebemarã boro baya.–
Beɗea eɗaare
^ 10:11-12 Madianitarã. Griego beɗeaɗe mãwã ɓʉ́ ɓʉa. Hebreo beɗeaɗe “Maoʉ̃” ɓʉ́ ɓʉa.
