Juece 11:1-40
11 Maʉ̃ ewariɗe Jepteda Gala ẽjũãne ɓabadjia. Idjira bio mẽsrã ɓasia idjaɓa sozarra ɓasia. Dji zezara Gala abadjiɗaa. Galaba wẽrã auɗua ume Jeptera unusia.
2 Gala quima biɗa warrarãda tosia. Maʉ̃ warrarã waripeɗaɗacarea Jeptea jarasiɗaa ãdji zezaba eroɓʉɗebemada edaẽ́da, dewara wẽrãba toɗa bẽrã. Mãwã jaraɗapeɗa Jeptera ãyã jʉretasiɗaa.
3 Maʉ̃ carea idji djabarã ume ɓaɗada Tob ẽjũãne ɓaɗe wãsia. Mama ẽberãrã cadjirua ɓeada pepeɗa ãdjia quĩrĩãbʉdada oɗe wãbadjiɗaa.
4 Maʉ̃misa amonitarãra Mizpa puruɗaa zesiɗaa Galaɗebema israelerã ume djõni carea.
5 Maʉ̃ carea Galaɗebema israelerã bororãra Tob ẽjũãnaa Jepte trʉ̃ne wãsiɗaa.
6 Dji bororãba idjía nãwã jarasiɗaa:
–Amonitarãra dairã ume djõne zesiɗa bẽrã daiba quĩrĩã panʉa bʉra dai ume wãpeɗa dai sordaorã boro baida.–
7 Dji bororã tãẽna idji djabarãda panʉ bẽrã Jepteba nãwã jarasia:
–¿Bãrãba mʉ̃ra quĩrãma panasiɗaẽ́ca? ¿Mʉ̃ zeza deɗebemada ãyã jʉretaɗaẽ́ basica? Bãrãra minijĩchiaɗe panʉ bẽrã ¿mʉ̃ra jãwã jʉrʉɗe ze panʉca?–
8 Maʉ̃ne dji bororãba nãwã jarasiɗaa:
–Mãẽ, maʉ̃ carea dairãba bʉra jʉrʉɗe ze panʉa. Quĩrĩã panʉa bʉra dairãare amonitarã ume djõne wãida. Wãsira bʉra dai Galaɗebema israelerã boro baya.–
9 Jepteba jarasia:
–Bãrãba mʉ̃ra jẽda amonitarã ume djõne edeɗapeɗa Ãcõrẽba mʉ̃́a ãdjirãda poyabibʉrʉ, ¿wãrãda mʉ̃ra bãrã boroda ɓʉɗica?–
10 Dji bororãba panusiɗaa:
–Mãẽ, dairãba Ãcõrẽ quĩrãpita jarabʉdaa bʉa jara ɓʉra wãrãda oɗida.–
11 Ara maʉ̃da Jeptera ãdjirã ume wãpeɗa Galaɗebema israelerãba idjira ɓʉsiɗaa ãdji sordaorã boroda idjaɓa puru boroda. Maʉ̃be Mizpa puruɗe Jepteba dji bororãa jaraɗara waya Ãcõrẽ quĩrãpita jarasia.
12 Mãwãnacarea Jepteba ʉ̃cʉrʉ diabuesia amonitarã boroa nãwã iwiɗiɗamãrẽã:
–Bʉra ¿cãrẽ cãrẽã dairã ume quĩrũ ɓʉ? ¿Cãrẽ cãrẽã dai druaɗe djõne ze ɓʉ?–
13 Amonitarã boroba Jepteba diabueɗarãa nãwã panusia:
–Bãrã israelerã Egiptoɗeba zesiɗaɗe dai druara jãrĩsiɗaa Arnoʉ̃ doɗeba aɓa Jabó doɗaa. Jũma Jordaʉ̃ do icawa ɓʉ ẽjũã ʉ̃mãdau odjabariare ɓʉra jãrĩsiɗaa. Bãrãba maʉ̃ ẽjũãda biaɗeba jẽda diaɗibʉrʉ bãrã ume djõnaẽ́a.–
14 11:14-15 Maʉ̃be Jepteba dewararãda diabuesia amonitarã boroa nãwã jaraɗamãrẽã:
–Jepteba nãwã jara ɓʉa: “Dai israelerãba bãrã amonitarã druara ni moabitarã drua siɗa jãrĩnaẽ́ basía.
16 Dai israelerã Egiptoɗeba ẽdrʉsiɗaɗe naãrã ẽjũã põãsa ewaraga ɓʉɗe Pusa Purruɗaa wãsiɗaa. Mamaʉba Cadé puruɗe jũẽne wãsiɗaa.
17 Maʉ̃ne dai israelerã bororãba ʉ̃cʉrʉ diabuesiɗaa Edoʉ̃ druaɗebema boromaa. Idjía iwiɗisiɗaa dai israelerã idji druaɗe wãyã wãbimãrẽã. Baribʉrʉ idjia iduaribiẽ́ basía.* Moab druaɗebema boroa biɗa aɓarida iwiɗisiɗaa. Baribʉrʉ idjia biɗa iduaribiẽ́ basía. Maʉ̃ bẽrã dai israelerãra Cadéɗe duanesiɗaa.
18 Maʉ̃be ẽjũã põãsa ewaraga ɓʉɗe Edoʉ̃ drua auɗu idjaɓa Moab drua auɗu pʉrrʉga wãnapeɗa Arnoʉ̃ do icawa jũẽne wãsiɗaa. Mama Moab drua quĩrãpe ʉ̃mãdau odjabariare duanesiɗaa baribʉrʉ do chãnaẽ́ basía, wa quĩrãrẽ moabitarã drua bẽrã.*
19 Maʉ̃be dai israelerã bororãba ʉ̃cʉrʉ Hesboʉ̃ puruɗaa diabuesiɗaa amorreorã boro Sehoʉ̃maa. Idjía biɗa iwiɗisiɗaa dai israelerãra idji druaɗe idu wãyã wãbimãrẽã dai druaɗaa.
20 Baribʉrʉ dai israelerãba iwiɗipeɗaɗara Sehoʉ̃ba sewada crĩchaɗa bẽrã idji druaɗe idu wãyã wãbiẽ́ basía. Maʉ̃ awara idji sordaorãda jũma ãbaa jʉrepeɗa Jahaza puru caita zeɗapeɗa dai israelerã ume djõsiɗaa.
21 Baribʉrʉ dai israelerã Ãcõrẽba Sehoʉ̃ra, idji sordaorã siɗa jũma poyabisia. Maʉ̃be dai israelerãba maʉ̃ druaɗe ɓea amorreorã ẽjũãra jũma edasiɗaa.*
22 Arnoʉ̃ doɗeba aɓa Jabó doɗaa idjaɓa ẽjũã põãsa ewaraga ɓʉɗeba aɓa Jordaʉ̃ doɗaa ãdji ẽjũãra jũma edasiɗaa.
23 Dai israelerã Ãcõrẽba amorreorãra ãyã jʉretapeɗa maʉ̃ ẽjũãra dairã, idji purua diaɗa bẽrã ¿bʉra cai mãwã jãrĩ carea?
24 ¿Bʉ ãcõrẽ Quemoba bʉ́a diaɗara bʉreẽ́ca? Aɓari quĩrãca dai Ãcõrẽba dairãa diaɗara daiɗea.
25 ¿Bʉa moabitarã boro baɗa Zipor warra Baláda quĩrãneba ɓʉca? Naʉ̃ ẽjũã carea idjira dairã ume ijaraẽ́ basía ni djõne zeẽ́ basía.* ¿Bʉra Balá cãyãbara dji dromaara ɓʉca?
26 Dai israelerãra Hesboʉ̃ puruɗe, Aroer puruɗe, maʉ̃ caita ɓea puru zaqueɗe, idjaɓa Arnoʉ̃ do icawa ɓea puruɗe biɗa tresciento poa panʉa. Dairãra naʉ̃ druaɗe dãrãbʉdaa. Bãrãba ¿cãrẽ cãrẽã ʉ̃rãbʉrʉ naʉ̃ druara iwiɗi panʉ?
27 Mʉ̃a bʉra biẽ́ oẽ́ ɓʉa. Bʉdrʉ dairã ume djõ quĩrĩã ɓʉ bẽrã biẽ́ o ɓʉa. Ãcõrẽ dadji cawa obariba iɗi cawabiya cairãba jipa o panʉda: dai israelerãba wa bãrã amonitarãba.”–
28 Jepteba mãwã jarabiɗamĩna amonitarã boroba ĩjãẽ́ basía.
29 Maʉ̃ne Ãcõrẽ Jaurera Jeptemaa zesia. Maʉ̃ bẽrã Jeptera Gala ẽjũãne, Manaseɗeba yõpeɗaɗarã ẽjũãne biɗa jũma pʉrrʉasia sordaorã jʉrei carea. Sordaorã ãbaa jʉrepeɗa Gala druaɗe ɓʉ Mizpa puruɗe jũẽsia. Mamaʉba amonitarã ume djõne wãsia.
30 30-31 Mãwã ɓʉɗe Jepteba Ãcõrẽa wãrãneba nãwã jarasia:
–Bʉa amonitarãda mʉ̃́a poyabibʉrʉ, diguiɗaa wãbʉrʉɗe naãrã mʉ̃ audiaɓariɗe zebʉrʉda mʉ̃a bʉ́a babue diaya.–
32 Mãwã jarapeɗa amonitarã ume djõne wãsia. Maʉ̃ne Ãcõrẽba idjía poyabisia.
33 Jepteba amonitarãra zocãrã quenasia. Aroer puruɗeba aɓa Minit puruɗaa idjaɓa Abel-queramiʉ̃ puruɗaa biɗa veinte puru poyasia. Mãwã amonitarãra israelerã jʉwaeɗa panesiɗaa.
Jepteba idji cau Ãcõrẽa diaɗa
34 Mãwãnacarea Jeptera Mizpa puruɗaa jẽda wãsia. Diguiɗaa jũẽbʉrʉɗe idji cauba audiaɓarisia. Tõnõã zá ɓʉɗe cari ɓasia. Jepteba dewara cauda ni warra siɗa neẽ́ ɓasia. Aɓa idjidrʉ eroɓasia.
35 Idji cau unubʉrʉɗe Jeptera bio sopuasia. Maʉ̃ carea idjia cacuaɗe jʉ̃ ɓʉda cũẽtacuapeɗa idji caua nãwã jarasia:
–¡Ay, cau, bʉa mʉ̃ra bio sopuabibʉrʉa! Mʉ̃a Ãcõrẽa wãrãneba diai jaraɗara diaida ɓʉa.–
36 Dji cauba nãwã jarasia:
–Zeza, bʉa Ãcõrẽa iwiɗiɗa quĩrãca idjia amonitarã bʉ dji quĩrũra poyabisia. Maʉ̃ bẽrã bʉa idjía wãrãneba jaraɗara odua. Mʉ̃ra Ãcõrẽa babue diadua.
37 Baribʉrʉ mʉ̃ quĩrã djuburia jeɗeco umé mʉ̃ra eyaɗe idu pʉrrʉaɗe wãbidua. Mʉ̃ dji biarã ume jĩãne wãya mʉ̃ra quima edaẽ́ beui bẽrã.–
38 Jepteba panusia:
–Bia ɓʉa. Wãdua.–
Idjira jeɗeco umé idu wãbisia. Maʉ̃ne idji biarã ume eyaɗe jĩã nĩbasiɗaa, quima edaẽ́ beui bẽrã.
39 Mãwãnacarea idjira Jeptemaa jẽda zesia. Maʉ̃be Jepteba Ãcõrẽa wãrãneba jaraɗara osia. Mãwã idji caura umaquĩrã adua ɓʉda jaiɗasia.
40 Maʉ̃ carea Israelɗebema awẽrãrãba poaza ewari quĩmãrẽ Galaɗebema Jepte cau carea jĩãbadaa.
