Juece 12:1-15
12 Jepteba amonitarã poyaɗacarea Epraiʉ̃nebema sordaorãda dji jʉreɗapeɗa Jordaʉ̃ do chãnapeɗa Sapoʉ̃ puruare Jepte ɓʉmaa wãsiɗaa.* Quĩrũbiɗeba Jeptea nãwã iwiɗisiɗaa:
–¿Cãrẽ cãrẽã bʉduɓa amonitarã ume djõne wãsi? ¿Cãrẽ cãrẽã dairãra trʉ̃ẽ́ basi bʉ ume wãnamãrẽã? Mãwã oɗa bẽrã dairãba bʉra, bʉ de siɗa jũma babueɗia.–
2 Maʉ̃ne Jepteba ãdjirãa nãwã panusia:
–Mʉ̃ra, mʉ̃ ẽberãrã siɗa amonitarã ume djõ panasiɗaa. Maʉ̃ne bãrãra trʉ̃bisia baribʉrʉ bãrãba carebaɗe zeɗaẽ́ basía.
3 Carebaɗe zeɗaẽ́ bẽrã mʉ̃ra beaɗi adua amonitarã ume djõne wãsiɗe Ãcõrẽba mʉ̃́a ãdjirãra poyabisia. Maʉ̃da bãrãra ¿cãrẽ cãrẽã mʉ̃ ume djõne ze panʉ?–
4 Maʉ̃ne Epraiʉ̃nebemarãba ãdjira nãwã biẽ́ jarasiɗaa:
–Bãrã Galaɗe ɓeara dadji Epraiʉ̃neba yõpeɗaɗamĩna dairãra igaraɗapeɗa bãdjia o quĩrĩã panʉda obadaa. Dai Epraiʉ̃neba yõpeɗaɗa tãẽna idjaɓa Manaseɗeba yõpeɗaɗa tãẽna panabadamĩna bãrãra awara quĩrãca panabadaa.–*
Mãwã jara panʉ carea Jepteba Galaɗebema sordaorãda ãbaa jʉrepeɗa Epraiʉ̃nebemarã ume djõne wãnapeɗa zocãrã quenasiɗaa.
5 12:5-6 Maʉ̃ne Galaɗebemarãba Jordaʉ̃ do chãbadama jʉ̃ãsiɗaa. Mama Epraiʉ̃nebemarãra chãnida panasiɗaa jẽda ãdji druaɗaa mĩrũ wãni carea. Aɓaʉba chãi carea iwiɗibʉrʉɗe Galaɗebemarãba iwiɗibadjiɗaa:
–¿Bʉra Epraiʉ̃nebemaca?–
Maʉ̃ne Epraiʉ̃nebemaba mãwãẽ́ana asira Galaɗebemarãba jarabadjiɗaa:
–“Chibolet” adua.–*
Epraiʉ̃nebemarãba maʉ̃ beɗeara poya ariɗe jaraɗaca basía. Biara “Sibolet” abadjiɗaa. Maʉ̃ne aɓaʉba Sibolet asira Galaɗebemarãba cawabadjiɗaa idjira Epraiʉ̃nebemada. Maʉ̃ bẽrã jidaɗapeɗa ara mama Jordaʉ̃ do icawa beabadjiɗaa. Maʉ̃ ewariɗe Epraiʉ̃nebemarãra 42 mil beasiɗaa.
7 Jepteba sei poa israelerãra dji quĩrũ jʉwaeɗabemada ẽdrʉ ɓʉbadjia. Jaiɗaɗacarea Gala druaɗe idji puruɗe tʉɓarisiɗaa.*
Ibzaʉ̃, Eloʉ̃, Abdoʉ̃
8 Jepte jaiɗaɗacarea Ibzaʉ̃ Beleʉ̃nebemada israelerã ẽdrʉ ɓʉbari basía.
9 Maʉ̃ Ibzaʉ̃ba warrarãda treinta, caurã siɗa treinta eroɓasia. Idji caurãda dewara puruɗebemarãa quima diasia. Idji warrarã itea dewara puruɗebema wẽrãrãda treinta enesia ãdji quimada ɓeaɗamãrẽã. Ibzaʉ̃ra siete poa israelerã ẽdrʉ ɓʉbari basía.
10 Jaiɗasiɗe Beleʉ̃ puruɗe tʉɓarisiɗaa.
11 Ibzaʉ̃ jaiɗaɗacarea Eloʉ̃da die poa israelerã ẽdrʉ ɓʉbari basía. Maʉ̃ Eloʉ̃ra Zabuloʉ̃neba yõna basía.
12 Jaiɗasiɗe Ajaloʉ̃ puruɗe tʉɓarisiɗaa Zabuloʉ̃neba yõpeɗaɗarã ẽjũãne.
13 Eloʉ̃ jaiɗaɗacarea Hilel warra Abdoʉ̃da israelerã ẽdrʉ ɓʉbari basía. Maʉ̃ Abdoʉ̃ra Piratoʉ̃ puruɗebema basía.
14 Idjia warrarãda cuarenta idjaɓa wiuzaquerãda treinta eroɓasia. Ãdjirãra setenta burro ʉ̃rʉ̃ nĩbabadjiɗaa. Abdoʉ̃ra ocho poa israelerã ẽdrʉ ɓʉbari basía.
15 Hilel warra Abdoʉ̃ jaiɗasiɗe Piratoʉ̃ puruɗe tʉɓarisiɗaa Epraiʉ̃neba yõpeɗaɗarã ẽjũã eyaiɗa ɓʉɗe. Naẽna amalecitarãda maʉ̃ ẽjũãne panabadjiɗaa.
