Juece 13:1-25
13 Mãwãnacarea israelerãba wayacusa Ãcõrẽ quĩrãpita cadjiruada o panesiɗaa. Maʉ̃ carea Ãcõrẽba ãdjirãra cuarenta poa pilisteorã jʉwaeɗa ɓʉsia.
2 Maʉ̃ ewariɗe Zora puruɗe ẽberãda ɓabadjia Manoa abadada. Idjira Daʉ̃neba yõna basía. Idji quimada warra toca bẽrã warra neẽ́ ɓasia.
3 Ewari aɓa Ãcõrẽ nezoca bajãnebemada maʉ̃ wẽrãma odjapeɗa nãwã jarasia:*
–Mʉ̃a cawa ɓʉa bʉra warra toca bẽrã warra neẽ́ ɓʉda. Baribʉrʉ bʉra ɓiogoa ɓepeɗa umaquĩrã warrada toya.
4 13:4-5 Maʉ̃ warrara bʉ ɓiteɗa ɓʉ ewariɗeba ʉ̃taa Ãcõrẽ itea ɓaya. Maʉ̃ bẽrã uva ɓa aseada, dewara itua siɗa dorãdua. Maʉ̃ awara Ãcõrẽba idu cobicara corãdua. Bʉ warrara nazareo bai bẽrã idji buɗara tʉcara ɓʉa.* Idjia jʉwa ɓʉya bãrã israelerãra pilisteorã jʉwaeɗabemada ẽdrʉ ɓʉi carea.–
6 Maʉ̃be dji wẽrãra idji quima Manoamaa wãpeɗa nãwã jarasia:
–Ẽberã Ãcõrẽba diabueɗada mʉ̃maa zesia. Idjira bajãnebema nezoca quĩrãca ununa bẽrã mʉ̃a wayasia. Idjira sãmabemada, idji trʉ̃ siɗa mʉ̃a iwiɗiẽ́ basía. Idjia mʉ̃́a jaraẽ́ basía.
7 Baribʉrʉ idjia jarasia mʉ̃ra ɓiogoa ɓepeɗa warrada toida. Maʉ̃ warrara mʉ̃ ɓiteɗa ɓʉ ewariɗeba aɓa idji beubʉrʉɗaa Ãcõrẽ itea ɓayaɗa asia. Idjira nazareo bai bẽrã mʉ̃a uva ɓa aseada, dewara itua siɗa docara ɓʉaɗa asia. Maʉ̃ awara Ãcõrẽba idu cobicada mʉ̃a cocara ɓʉaɗa asia.–
8 Maʉ̃ne Manoaba Ãcõrẽa nãwã iwiɗisia:
–Dai Ãcõrẽ, mʉ̃ djuburia bʉa diabueɗa ẽberãda wayacusa daimaa diabuedua jaradiamãrẽã mʉ̃ quimaba toi warrara sãwã daupẽnida panʉda.–
9 Manoaba iwiɗiɗara Ãcõrẽba bia ũrĩsia. Maʉ̃ bẽrã bajãnebema nezocara dji wẽrãmaa waya zesia. Maʉ̃ne wẽrãra néuɗe ɓasia. Baribʉrʉ idji quima Manoara neẽ́ basía.
10 Maʉ̃ bẽrã dji wẽrãra idji quimamaa pira wãpeɗa nãwã jarasia:
–¡Mʉ̃a ẽberã sãʉ̃beɗa ununara waya zesia!–
11 Maʉ̃ carea Manoara piradrʉpeɗa idji quima ume wãsia. Dji ẽberã ɓʉma jũẽpeɗa nãwã jarasia:
–Sãʉ̃beɗa mʉ̃ quima ume beɗea ɓaɗara ¿bʉ basica?–
Dji ẽberãba panusia:
–Mãẽ. Mʉ̃ basía.–
12 Maʉ̃ne Manoaba nãwã iwiɗisia:
–Bʉa jaraɗa quĩrãca mʉ̃ quimaba warrada tosira, daiba idjira ¿sãwã daupẽnida panʉ? ¿Idjira sãwã eropananida panʉ?–
13 Bajãnebema nezocaba panusia:
–Mʉ̃a jaraɗa quĩrãca bʉ quimaba jũma ĩjã oida ɓʉa.
14 Uvara cocara ɓʉa. Uva ɓa aseada, dewara itua siɗa docara ɓʉa. Maʉ̃ awara Ãcõrẽba idu cobicara ni maãrĩ biɗa cocara ɓʉa. Mʉ̃a jaraɗara idjia jũma ĩjã oida ɓʉa.–
15 Manoaba bajãnebema nezocaa nãwã jarasia:
–Dai djuburia waɗi wãrãdua. Chiwatu zaqueda beaɗapeɗa bʉ itea djuɗia.–
16 Bajãnebema nezocaba panusia:
–Mʉ̃ ɓebʉrʉ siɗa bãrã djicora coẽ́a. Baribʉrʉ bãrãba quĩrĩã panʉbʉrʉ, maʉ̃ chiwatu zaquera Ãcõrẽa babue diaɗadua.–
Manoaba bajãnebema nezocada mãwã ɓʉda waɗi cawaẽ́ ɓasia.
17 Maʉ̃ne Manoaba Ãcõrẽ nezoca bajãnebemaa jarasia:
–Bʉ trʉ̃ra daia jaradua. Mãwã bʉa jaraɗa quĩrãca dai warra toɗacarea bʉra bia jaraɗia.–
18 Baribʉrʉ bajãnebema nezocaba jarasia:
–Bʉa ¿cãrẽ cãrẽã mʉ̃ trʉ̃ra cawa quĩrĩã ɓʉ? Mʉ̃ trʉ̃ra jũmawãyã bia quirua. Ẽberãrãba poya cawaɗaẽ́a.–
19 Manoaba chiwatu zaquera beapeɗa néuɗebema siɗa edapeɗa umena mõgara ʉ̃rʉ̃ coɓʉpeɗa Ãcõrẽa jũma babue diasia. Maʉ̃ne Manoaba idji quima biɗa acʉ panʉne Ãcõrẽba ne ununacada nãwã osia:
20 Manoaba babue diaɗara waiɓʉa eradrʉ nũmʉne Ãcõrẽ nezoca bajãnebemara maʉ̃ uruaɗeba bajãnaa wãsia. Manoaba idji quima biɗa maʉ̃ ununapeɗa Ãcõrẽ wayaaɗeba chĩrãboroɗe copanenapeɗa ãdji dratura egoroɗaa tẽũ copanesiɗaa.
21 Ãcõrẽ nezoca bajãnebemara Manoama, dji quimama biɗa waa odjaẽ́ basía. Maʉ̃ bẽrã Manoaba cawasia dji ẽberãra wãrãda Ãcõrẽ nezoca bajãnebemada mãwã ɓasida.
22 Maʉ̃ne idji quimaa nãwã jarasia:
–Ãcõrẽda unupeɗaɗa bẽrã dadjira beuɗia.–
23 Baribʉrʉ dji quimaba jarasia:
–Mãwãẽ́a. Ãcõrẽba dadjida bea quĩrĩã ɓaɗabara dadjia chiwatu idjaɓa néuɗebema babue diapeɗaɗara bia edaẽ́ bacasia. Maʉ̃ awara idjia ne ununaca oɗara unubiẽ́ bacasia ni dadji warra ununinebemada jaraẽ́ bacasia.–
24 Mãwãnacarea dji wẽrãba warrada tosia. Maʉ̃ warrara trʉ̃ ɓʉsia Sansoʉ̃. Sansoʉ̃ waribʉrʉɗe Ãcõrẽba idjira careba ɓasia.
25 Maʉ̃ ewariɗe Sansoʉ̃ra Daʉ̃neba yõpeɗaɗarã puruɗe ɓabadjia Zora puru idjaɓa Estaol puru ẽsi. Mama Ãcõrẽ Jaureba unubibadjia idjira Sansoʉ̃ ume ɓʉda.
