Juece 15:1-20
15 Mãwãnacarea trigo jara Sansoʉ̃ba idji quima bai ɓaɗara acʉɗe wãsia. Idjía diai carea chiwatu zaqueda edesia. Jũẽpeɗa dji zãwãrẽ bai ɓaɗaa jarasia:
–Mʉ̃ wẽrã cãĩbarimaa acʉɗe wãya.–
Baribʉrʉ dji wẽrã zezaba idu wãbiẽ́ basía.
2 Idjia jarasia:
–Mʉ̃a crĩchasia bʉa mʉ̃ caura aɓeɗa igarasida. Maʉ̃ carea bʉ ume ɓaɗa ẽberãa idjira diasia. Mʉ̃ cau tẽãbemara biara quirua. Idjidrʉ dji nabema cacuabari edadua.–
3 Maʉ̃ carea Sansoʉ̃ba jarasia:
–¡Bãrãba mãwã opeɗaɗa bẽrã mʉ̃a bãrã pilisteorã biẽ́ obʉrʉɗe beɗeaɗe ɓaẽ́a!–
4 Maʉ̃be Sansoʉ̃ba usa pãda tresciento jidacuasia. Maʉ̃ra umé uméa ãbaa dji druɗe jʉ̃cuapeɗa cãdorrona ĩbĩrãda ãdji druɗe jʉ̃cuasia.
5 Maʉ̃be ĩbĩrãra coacuapeɗa usa pãra pilisteorã néuɗe buecuasia. Maʉ̃ba ãdji trigora jũma bá wãsia, dji ewapeɗaɗada, dji ewaɗaẽ́ panʉ siɗa. Maʉ̃ awara ãdji uva ẽjũãra, olivo ẽjũã siɗa jũma bá wãsia.
6 Maʉ̃ carea pilisteorãba jũmarãa iwiɗisiɗaa caiba mãwã osi cawaya. Maʉ̃ne cawasiɗaa Sansoʉ̃ba mãwã osida idji zãwãrẽ bai ɓaɗaba idji caura Sansoʉ̃a diai cãyãbara Sansoʉ̃ ume ɓaɗa ẽberãa diaɗa bẽrã. Maʉ̃ carea pilisteorãba dji wẽrãra, dji zeza siɗa bá beasiɗaa.
7 Maʉ̃ne Sansoʉ̃ba jarasia:
–Bãrãba mãwã opeɗaɗa bẽrã mʉ̃a wãrãneba jaraya ʉ̃nãũẽ́ bãrãra biẽ́ o ɓaida aɓa mʉ̃a quĩrĩãbʉrʉ quĩrãca obʉrʉɗaa.–
8 Mãwã jarapeɗa quĩrũbiɗeba pilisteorãra zocãrã quenasia. Maʉ̃be Sansoʉ̃ra Etam eya ʉra jira ɓaɗaa wãsia. Mama uriaɗe ɓesia.
Sansoʉ̃ba burro beuɗa quiɗatrʉba pilisteorã quenana
9 Sansoʉ̃ mama ɓʉɗe pilisteorãra Juda druaɗaa zeɗapeɗa ẽjũã Lehi abada caita duanesiɗaa.*
10 Maʉ̃ne Judaɗebemarãba ãdjirãa nãwã iwiɗisiɗaa:
–¿Cãrẽ cãrẽã dairã ume djõne ze panʉ?–
Pilisteorãba panusiɗaa:
–Sansoʉ̃da jidaɗe ze panʉa dairãra biẽ́ oɗa bẽrã.–
11 Maʉ̃ carea Judaɗebemarãra Etam eya ʉra jira ɓʉɗaa tres mil wãsiɗaa. Sansoʉ̃ ɓabari uriama jũẽnapeɗa idjía nãwã jarasiɗaa:
–Bʉa ¿cãrẽ cãrẽã dadjirãra nẽbʉraɗe ɓʉsi? ¿Adua ɓʉca dadjirãra pilisteorã jʉwaeɗa panʉda?–
Sansoʉ̃ba panusia:
–Ãdjirãba mʉ̃da biẽ́ opeɗaɗa bẽrã mʉ̃a ãdjira ara maʉ̃ quĩrãca osia.–
12 Maʉ̃ne Judaɗebemarãba jarasiɗaa:
–Dairãra ze panʉa bʉra pilisteorãa jida diaɗi carea.–
Maʉ̃ne Sansoʉ̃ba jarasia:
–Naãrã wãrãneba jaraɗadua bãrãba mʉ̃ra beaɗaẽ́da.–
13 Judaɗebemarãba jarasiɗaa:
–Bʉra beaɗaẽ́a. Aɓabe bʉ jʉwara jʉ̃napeɗa pilisteorãa jida diaɗia.–
Ara maʉ̃da jʉ̃cara djiwiɗi uméba Sansoʉ̃ra jʉ̃napeɗa idji ɓabari uriaɗeba jida edesiɗaa.
14 Ẽjũã Lehi abadaɗe jũẽbʉdaɗe pilisteorãra ɓʉsriɗa ɓʉga duanʉda idjimaa zesiɗaa. Baribʉrʉ Ãcõrẽ Jaureɗeba Sansoʉ̃ra bio juerza barapeɗa idji jʉwa jʉ̃ ɓaɗa jʉ̃carada tʉcuasia lino nayãna bá wãna quĩrãca.
15 Maʉ̃ne burro beuɗa quiɗatrʉda unupeɗa edasia. Maʉ̃ba pilisteorãda mil quenasia.
16 Quenapeɗa nãwã jarasia:
Mʉ̃a burro quiɗatrʉba ãdjira boromea bue nũmʉsia.
Burro quiɗatrʉba mʉ̃a ẽberãrãda mil quenasia.
17 Mãwã jarapeɗa Sansoʉ̃ba quiɗatrʉra ɓatabuesia. Mama trʉ̃ ɓʉsiɗaa Ramat-Lehi.*
18 Sansoʉ̃ra bio opichia nũmʉ bẽrã Ãcõrẽa quĩrã djuburiada nãwã iwiɗisia:
–Bʉa mʉ̃, bʉ nezocaa ãdjirãra poyabisia. Maʉ̃da ¿mʉ̃ra opichiaba idu beubica? ¿Opichiaba cacua norraɓaripeɗa mʉ̃ra pilisteorã idu jidabica?–
19 Maʉ̃ne Ãcõrẽba uriaɗeba baidoda ʉ̃taa bogadrʉbisia. Sansoʉ̃ba dopeɗa cacua ʉɓʉasia. Maʉ̃ baido Lehiɗe ʉ̃taa bogadrʉ ɓʉra trʉ̃ ɓʉsiɗaa En-hacore.* Maʉ̃ra waɗi Lehiɗe ɓʉa.
20 Israelerã pilisteorã jʉwaeɗa panasiɗaɗe Sansoʉ̃ra veinte poa ãdji ẽdrʉ ɓʉbari basía.
