Juece 2:1-23
2 Ãcõrẽ nezoca bajãnebemada Gilgalɗeba Boquiʉ̃naa wãpeɗa israelerãa nãwã jarasia:
–Mʉ̃a bãrãra Egipto druaɗeba ẽdrʉ edapeɗa mʉ̃a diai jaraɗa ẽjũãnaa enesia. Mʉ̃a bãrã drõãenabemarãa nãwã jarasia: “Mʉ̃a bãrã ume beɗea ɓʉɗara ãyã ɓʉẽ́a.
2 Baribʉrʉ naʉ̃ druaɗe ɓearã ume beɗea ɓʉrãnadua. Mõgara ãdji ãcõrẽ ɓea itea ʉ̃tʉ pã buepeɗaɗada corapetacuaɗadua.” Mãwã jaraɗamĩna bãrãba ĩjãnaẽ́ basía. ¿Cãrẽ cãrẽã mãwã oɗaẽ́ basi?
3 Bãrãba ĩjãnaẽ́ bẽrã mʉ̃a jaraya: puru naʉ̃ druaɗe ɓeara mʉ̃a waa bãrã quĩrãpitabemada ãyã jʉretaẽ́a. Ãtebʉrʉ soaba bãrã ẽcarraɗe ubʉda quĩrãca ãdjirãneba bãrãra bia mĩga panania. Maʉ̃ awara bãrãba ãdji ãcõrẽ ɓea ẽpẽnapeɗa bio biẽ́ panenia.–
4 Ãcõrẽ nezoca bajãnebemaba mãwã jarasiɗe jũma israelerãra jĩgua jĩã duanesiɗaa.
5 Maʉ̃ bẽrã mama trʉ̃ ɓʉsiɗaa Boquiʉ̃.* Idjaɓa mama animarãda Ãcõrẽa babue diasiɗaa.
Josue jaiɗaɗa
6 Josueba israelerã wãbisiɗe ãdjia edapeɗaɗa ẽjũãza wãsiɗaa.*
7 Josue zocai ɓasiɗe israelerãba Ãcõrẽra ẽpẽ panasiɗaa. Idji jaiɗaɗacarea dji bororã idji ume panana zocai panasiɗaɗe biɗa ãdjirãba ẽpẽ panasiɗaa. Maʉ̃ bororãba jũma unusiɗaa Ãcõrẽba israelerã itea oɗada.
8 Nuʉ̃ warra Josue Ãcõrẽ nezocara 110 poa ɓasiɗe jaiɗasia.
9 Timnat-sera abadaɗe idjia edaɗa ẽjũãne israelerãba idjira tʉɓarisiɗaa. Maʉ̃ ẽjũãra Epraiʉ̃ eyaiɗa ɓʉ druaɗe ɓʉa Gaa eya caita.
10 Josue ewariɗebemarã jũma jaiɗapeɗaɗacarea ãdjiɗeba yõpeɗaɗarãba Ãcõrẽra, idjia israelerã itea o ɓaɗa siɗa quĩrãdoasiɗaa.
Israelerãba Ãcõrẽ igarapeɗaɗa
11 Mãwãnacarea israelerãba Ãcõrẽ quĩrãpita cadjiruada osiɗaa. Jʉwaba oɗa ãcõrẽ Baal abadada ẽpẽsiɗaa.
12 Ãcõrẽba ãdji drõã naẽnabemarãra Egiptoɗeba ẽdrʉ edaɗamĩna idjira igaraɗapeɗa ãdji caita ɓearã ãcõrẽda ẽpẽsiɗaa. Mãwã Ãcõrẽra quĩrũbisiɗaa.
13 Ãdjirãba Ãcõrẽra igaraɗapeɗa Baal abadada, Astarte abada siɗa ẽpẽsiɗaa.
14 Maʉ̃ carea Ãcõrẽra israelerã ume bio quĩrũsia. Maʉ̃ba idjia ne drʉabadarãa ãdjia eroɓeara idu jãrĩbisia. Idjaɓa ãdji dji quĩrũa ãdjirãra idu poyabisia. Djõbʉdaɗe israelerãba waa poyaɗaẽ́ basía.
15 Djõne wãbʉdaza Ãcõrẽra dji quĩrũare djõbadjia. Maʉ̃ bẽrã israelerãba poyaɗaca basía Ãcõrẽba naẽna jaraɗa quĩrãca. Mãwã bia mĩga duanabadjiɗaa.
Ãcõrẽba ẽdrʉ ɓʉbadarã diaɗa
16 Mãwã bia mĩga panʉne Ãcõrẽba ʉ̃cʉrʉ ẽberãrãda ɓʉbadjia israelerãra ne drʉabadarã jʉwaeɗabemada ẽdrʉ ɓʉɗamãrẽã.
17 Baribʉrʉ israelerãba maʉ̃ ẽdrʉ ɓʉbadarã beɗeara ĩjãnaca basía. Ãtebʉrʉ dãrãẽ́ne Ãcõrẽra wayacusa igaraɗapeɗa dewara ãcõrẽ ɓeada ẽpẽnapeɗa bia beɗeabadjiɗaa. Ãcõrẽba obi jaraɗara ãdji drõã naẽnabemaba ĩjã o pananamĩna ãdjirãba ĩjã oɗaẽ́ basía.
18 Dji quĩrũba ãdjirã biẽ́ o panʉne bia mĩga panʉ bẽrã ãduɓa mĩã sopua beɗeabadjiɗaa. Ãcõrẽba maʉ̃ ũrĩbʉrʉza ãdjirãra quĩrã djuburiapeɗa aɓa ɓʉbadjia ãdjirã dji quĩrũ jʉwaeɗabemada ẽdrʉ ɓʉmãrẽã. Ãcõrẽra maʉ̃ ẽberã ume ɓʉ bẽrã idji zocai ɓʉmisa israelerãra dji quĩrũ jʉwaeɗabemada ẽdrʉ ɓʉbadjia.
19 Baribʉrʉ dji ẽdrʉ ɓʉbari jaiɗaɗacarea israelerãba wayacusa dewara ãcõrẽ ɓeada ẽpẽnapeɗa bia beɗeabadjiɗaa. Maʉ̃ cadjirua obʉdaza ãdji djibarirãba opeɗaɗa cãyãbara auɗuara obadjiɗaa. Cʉwʉrʉ zareaɗeba ãdjia cadjirua obadara igaraɗaca basía.
20 Maʉ̃ carea Ãcõrẽra israelerã ume bio quĩrũpeɗa nãwã jarasia:
–Mʉ̃a israelerã drõã naẽnabemarã ume beɗea ɓʉɗara naʉ̃ ẽberãrãba igarasiɗaa. Mʉ̃a jaraɗara ĩjãnacaa.
21 Maʉ̃ bẽrã puru ɓea Josueba poyaɗaẽ́ra mʉ̃a israelerã quĩrãpitabemada ni aɓa biɗa ãyã jʉretaẽ́a.–
22 Ãcõrẽba maʉ̃ puru ɓeara Canaaʉ̃ druaɗe idu ɓebisia israelerãba idjida ẽpẽni cawaya ãdji drõã naẽnabemaba ẽpẽpeɗaɗa quĩrãca.
23 Josue ewariɗe Ãcõrẽba maʉ̃ puru ɓeara ãyã jʉretaẽ́ basía. Idjia Josuéa poyabiẽ́ basía, ãtebʉrʉ Canaaʉ̃ druaɗe idu ɓebisia.
