Juece 4:1-24
4 Ehud jaiɗaɗacarea israelerãba wayacusa Ãcõrẽ quĩrãpita cadjiruada o panesiɗaa.
2 Maʉ̃ carea Ãcõrẽba ãdjirãra cananeorã boro Jabiʉ̃ jʉwaeɗa ɓʉsia. Jabiʉ̃ra Hazor puruɗe ɓabadjia. Jabiʉ̃ sordaorã borora Sisará basía. Maʉ̃ Sisarára Haroset-goiʉ̃ne ɓabadjia.
3 Jabiʉ̃ba djõbada carreta jiorro oɗada noveciento eroɓasia. Veinte poa israelerãra quĩrã djuburia neẽ́ bio bia mĩga eroɓasia. Maʉ̃ne israelerãba Ãcõrẽa quĩrã djuburiada iwiɗisiɗaa.
4 Maʉ̃ ewariɗe Deboráda israelerã cawa obari basía. Idjira Ãcõrẽneba beɗeabadjia. Lapidot quima basía.
5 Maʉ̃ Deborára Epraiʉ̃ eyaiɗa ɓʉ druaɗe ɓabadjia Ramá puru idjaɓa Betel puru ẽsi. Israelerã nẽbʉraɗe panʉne idjimaa wãbadjiɗaa cawa omãrẽã. Cawa obʉrʉɗe Deborára urutaca ɓʉ edre chũmabadjia. Maʉ̃ bẽrã maʉ̃ bacurura Deborá Uruta trʉ̃ ɓʉsiɗaa.
6 Ewari aɓa Deborába Abinoaʉ̃ warra Baracoda trʉ̃bisia. Idjira Neptali druaɗe Quedé puruɗe ɓabadjia. Baraco zeɗacarea Deborába nãwã jarasia:
–Dadji israelerã Ãcõrẽba bʉ́a nãwã jara ɓʉa: “Sordaorã Neptaliɗebemada Zabuloʉ̃nebema siɗa die mil ededua Tabor eyaɗaa.
7 Mʉ̃a Jabiʉ̃ sordaorã boro Sisaráda bʉ ume djõne wãbiya. Dji carretaɗeba djõbadarãda, waabema sordaorã siɗa eneya Quisoʉ̃ do zaqueɗaa. Baribʉrʉ mʉ̃a bʉ́a ãdjirãra poyabiya.”–
8 Maʉ̃ne Baracoba Deboráa jarasia:
–Bʉda mʉ̃ ume wãibʉrʉ mʉ̃ra wãya. Bʉda wãẽ́bʉrʉ mʉ̃ siɗa wãẽ́a.–
9 Deborába jarasia:
–Bia ɓʉa, mãẽteara mʉ̃ra bʉ ume wãya. Baribʉrʉ Sisará poyaɗacarea bʉra trʉ̃ ɓʉgaẽ́a, Ãcõrẽba Sisarára wẽrãa poyabi bẽrã.–
Ara maʉ̃da Deborára Baraco ume Quedes puruɗaa wãsia.
10 Mama Baracoba sordaorã Zabuloʉ̃nebemada, Neptaliɗebema siɗa die mil ãbaa jʉrepeɗa Tabor eyaɗaa edesia. Deborá siɗa idji ume wãsia.
11 Maʉ̃ ewariɗe quenita Hebere abadada Quedes puru caita ɓabadjia. Naẽna idjira waabema quenitarã ume ɓaɗada Zaanaim jeweɗaɗe idji wua dera o eroɓasia.* Maʉ̃ Heberera Moise zãwãrẽ Hobáɗeba yõna basía.*
12 Maʉ̃ne Sisarába ũrĩsia Abinoaʉ̃ warra Baracora idji sordaorã ume Tabor eyaɗaa wãsiɗada.*
13 Maʉ̃ carea idji jiorro oɗa djõbada carreta noveciento panʉda, idji sordaorã siɗa ãbaa jʉrepeɗa Haroset-goiʉ̃neba Quisoʉ̃ do zaqueɗaa wãsiɗaa.
14 Maʉ̃be Deborába Baracoa jarasia:
–¡Ãdjirã ume isabe djõne wãnadua! ¡Iɗibʉrʉ Ãcõrẽba bʉ́a Sisarára poyabiya! ¡Ãcõrẽra bʉ na wãbʉrʉa!–
Ara maʉ̃da Baracora idji sordaorã die mil panʉ ume Tabor eyaɗeba eɗaa djõne wãsiɗaa.
15 Djõne wãbʉdaɗe Ãcõrẽba Sisarára, carretaɗeba djõbadarãra, waabema sordaorã siɗa bio ne wayabisia. Maʉ̃ bẽrã Baracoba idji sordaorã ume necoba zocãrã quenasiɗaa. Baribʉrʉ Sisarára idji carretaɗeba uɗu jʉ̃drʉpeɗa mĩrũ pira wãsia.
16 Maʉ̃ne Baracoba Sisará carretaɗeba djõbadarãra, waabema sordaorã siɗa ẽpẽsiɗaa aɓa Haroset-goiʉ̃naa. Mãwã Sisará sordaorãra jũma quenasiɗaa. Ni aɓa biɗa zocai ɓeẽ́ basía.
17 4:17-18 Maʉ̃ ewariɗe Hazorɗebema boro Jabiʉ̃ra quenita Hebere ẽberãrã ume necai ɓasia. Maʉ̃ carea Sisarára ãdjimaa mĩrũ wãsia. Jũẽsiɗe wẽrã Jael abadaba idjira audiaɓariɗe wãsia. Maʉ̃ wẽrãra Hebere quima basía. Jaelba nãwã jarasia:
–Mʉ̃ boro, diguiɗaa zedua. Ne wayarãdua.–
Ara maʉ̃da Sisarára Jael wua deɗe eɗaa wãpeɗa taɓesia. Maʉ̃ne Jaelba idjira boroɓaba ãnẽɓari ɓʉsia.
19 Sisarába jarasia:
–Mʉ̃ quĩrã djuburia baidoda diadua. Mʉ̃ra opichia ɓʉa.–
Jaelba paca juɓada animarã e oɗaɗe tʉ eroɓasia. Maʉ̃ra ewapeɗa paca juɓara diasia. Maʉ̃be Sisarára wayacusa ãnẽɓari ɓʉsia.
20 Sisarába jarasia:
–Wua deɗe eɗa wãbadama chũmedua. Bariduada zepeɗa nãwã iwiɗibʉrʉ: “¿caida nama ɓʉ?”, jaradua ẽberã neẽ́da.–
21 Sisarára sẽ ɓʉ bẽrã bio cãĩ ɓesia. Maʉ̃be Hebere quima Jaelba wua de egoroɗaa cachibada bacuru cũmiada, dji cachibada siɗa edasia. Jaelera chupea eɗa wãpeɗa maʉ̃ bacuruba Sisará borora egoroɗaa wãyã cachi nũmʉsia. Mãwã Sisarára beasia.
22 Baracoba Sisará jʉrʉ ɓʉɗe Jael puruɗe jũẽsia. Maʉ̃ne Jaelba idji audiaɓariɗe wãpeɗa nãwã jarasia:
–Zedua, bʉa jʉrʉ ɓʉra mʉ̃a acʉbiya.–
Ara maʉ̃da Baracora Jael wua deɗe eɗa wãpeɗa Sisarára beu taɓʉda unusia. Jaelba cachiɗa bacurura waɗi Sisará boroɗe su nũmasia.
23 Maʉ̃ ewariɗe Ãcõrẽba israelerã quĩrãpita cananeorã boro Jabiʉ̃ra mãwã poyasia.
24 Mamaʉba ʉ̃taa israelerãra cananeorã boro Jabiʉ̃ ume djõbʉdaza poyabadjiɗaa aɓa idji beabʉdaɗaa.
