Juece 7:1-25
7 Nurẽma diapeɗeɗa Gedeoʉ̃, Jerobaal abadara idji ume panʉ siɗa piraɓariɗapeɗa Harod baido ʉ̃ta bogadrʉ ɓʉmaa wãsiɗaa. Mama madianitarã ume djõni carea panesiɗaa. Madianitarãra ãdjirã quĩrãpe duanasiɗaa Jezreel jeweɗaɗe Moré eya caita.
2 Maʉ̃be Ãcõrẽba Gedeoʉ̃a jarasia:
–Bʉa sordaorãra jũmawãyã eroɓʉa. Mʉ̃a bãrã israelerã zocãrã panʉ́a madianitarãda idu poyabibʉrʉ, bãrãba jaraɗia ara bãdji ʉɓʉaɗeba poyasiɗada.
3 Maʉ̃ carea bʉ sordaorãa jaradua aɓaʉda ne waya ɓʉbʉrʉ, naʉ̃ Gala eyaɗeba diguiɗaa wãida ɓʉda.–*
Gedeoʉ̃ba mãwã jarabʉrʉɗe veintidos mil jẽda wãsiɗaa. Maʉ̃ne die mil panesiɗaa.
4 Maʉ̃be Ãcõrẽba jarasia:
–Waɗibiɗa jũmawãyã zocãrã panʉa. Do zaqueɗaa baido doɗamãrẽã ededua. Mama mʉ̃a cawabiya cairãda djõne wãnida panʉda. Mʉ̃a naʉ̃ ẽberãda bʉ ume wãyana aibʉrʉ, idjira wãida ɓʉa. Wãẽ́ana aibʉrʉ wãiẽ́ ɓʉa.–
5 Ara maʉ̃da Gedeoʉ̃ba idji sordaorãra edesia baido doɗamãrẽã. Mãwã panʉne Ãcõrẽba Gedeoʉ̃a nãwã jarasia:
–Ʉ̃cʉrʉba baidora ãdji jʉwa jãne jue edaɗapeɗa usa quĩrãca sene do panʉa. Waabemaba chĩrãboroɗe copanenapeɗa baidora do panʉa. Ãdji jʉwa jãneba do nũpanʉra awara ɓʉdua.–
6 Dji jʉwa jãneba do nũpanʉra tresciento panasiɗaa. Waabemaba chĩrãboroɗeba baidora do panasiɗaa.
7 Maʉ̃be Ãcõrẽba Gedeoʉ̃a jarasia:
–Maʉ̃ tresciento panʉba mʉ̃a bʉ́a madianitarãra poyabiya. Mãwã mʉ̃a bãrã israelerãra ẽdrʉ ɓʉya. Waabema sordaorãa jaradua ãdji diguiɗaa wãnamãrẽã.–
8 Ara maʉ̃da Gedeoʉ̃ba ãdjirãa jarasia diguiɗaa wãnamãrẽã baribʉrʉ ãdjia coɗi careabemada, oveja cachu siɗa amebisia. Ãdjirã wãpeɗaɗacarea Gedeoʉ̃ sordaorãra trescientobe panesiɗaa. Maʉ̃ne madianitarãra eɗaa Jezreel jeweɗaɗe duanasiɗaa.
9 Diamasi Ãcõrẽba Gedeoʉ̃a nãwã jarasia:
–Piraɓariɗapeɗa madianitarã ume djõne wãnadua. Mʉ̃a bʉ́a ãdjirãra poyabiya.
10 Baribʉrʉ bʉa ãdjirã ume djõne wãi carea waya ɓʉbʉrʉ, naãrã ãdjirã duanʉmaa bʉ nezoca Purá ume eɗaa wãdua.
11 Maʉ̃be ãdjirãba jara panʉda ũrĩdua. Maʉ̃ba bʉra sozarraara ɓeya ãdjirã ume djõi carea.–
Ara maʉ̃da Gedeoʉ̃ra idji nezoca Purá ume eɗaa wãsia madianitarã panʉ caita.
12 Maʉ̃ne Jezreel jeweɗara bira nũmasia madianitarãba, amalecitarãba, ʉ̃mãdau odjabariarebemarã biɗa. Ãdjirãra cãbana panasiɗaa aɗichichi néu coɗe zebada quĩrãca. Ãdji cameyora poya juachaɗaca basía ĩbʉ pusa icawa ɓʉ quĩrãca.
13 Gedeoʉ̃ madianitarã duanʉma jũẽsiɗe ũrĩsia ẽberãda umé beɗea panʉda. Aɓaʉba nẽbʉrʉ ɓasia idjia cãĩmocaraɗe ununada. Nãwã jarasia:
–Mʉ̃ cãĩmocaraɗe unusia cebada paʉ̃ borococoa oɗada nama dadjirã duanʉmaa bʉraɓari zebʉrʉda. Maʉ̃ba wua deɗaa taɓariɗe zebʉrʉba coratasia.–
14 Maʉ̃ne dewarabemaba jarasia:
–Maʉ̃gʉba jara ɓʉa jãʉ̃ Israelɗebema Joasa warra Gedeoʉ̃da idji neco bara djõne zebʉrʉda. Wãrãda Ãcõrẽba idjía dadji madianitarãra dadjirãare panʉ siɗa jũma poyabiya.–
15 Gedeoʉ̃ba maʉ̃ cãĩmocarara, dji cawa jaraɗa siɗa ũrĩpeɗa Ãcõrẽa bia beɗeasia. Maʉ̃be israelerã sordaorã panʉmaa jẽda wãpeɗa jarasia:
–Ãcõrẽba dadjirãa jãʉ̃ madianitarãra poyabiya. ¡Ara nawena piraɓariɗadua djõne wãni carea!–
16 Maʉ̃be Gedeoʉ̃ba idji sordaorã tresciento panʉda awara awara ɓʉsia. Idjia cien edasia, dewara boro umé panʉ́a ãdjiza cien diasia. Maʉ̃be oveja cachuda, zoco siɗa jũmarãa jeɗecasia. Cãdorrona ĩbĩrãda maʉ̃ zocoɗe eɗa ɓʉbicuasia ebuɗa ʉ̃narãmãrẽã.
17 7:17-18 Maʉ̃be ãdjirãa jarasia:
–Naãrã dadjirãba madianitarãra jũrã edaɗia. Mʉ̃da acʉɗadua. Mʉ̃da ãdjirã duanʉ wagabe jũẽsira mʉ̃a obʉrʉ quĩrãca oɗadua. Mʉ̃a, mʉ̃ ume wãbʉda biɗa cachura jĩgua zabʉdaɗe bãrã biɗa zaɗadua. Maʉ̃be nãwã ɓiaɗadua: “¡Ãcõrẽ trʉ̃neba, Gedeoʉ̃ trʉ̃ne biɗa djõbʉdaa!”–
19 Maʉ̃be Gedeoʉ̃ra idji sordaorã cien panʉ ume madianitarã panʉ wagaa jũẽsiɗaa. Dãrãẽ́ ɓasia madianitarãba ãdji ariquẽtra wagabadarãda ɓʉcuapeɗaɗada. Maʉ̃ne Gedeoʉ̃ba idji ume panʉ biɗa cachura jĩgua zasiɗaa. Zoco ãdji jʉwaɗe eropanʉ siɗa aɓeɗa bogatasiɗaa.
20 Ara maʉ̃ne dji bororã umé panʉba ãdji sordaorã biɗa cachura zasiɗaa. Ãdji zoco siɗa bogatasiɗaa. Maʉ̃be dji ĩbĩrãda ãdji jʉwa acʉare edasiɗaa. Cachura ãdji jʉwa araare eropanasiɗaa. Maʉ̃ne nãwã ɓiasiɗaa:
–¡Ãcõrẽ trʉ̃neba, Gedeoʉ̃ trʉ̃ne biɗa djõbʉdaa!–
21 7:21-22 Maʉ̃ne israelerã tresciento panʉba cachura ãdji duanʉma zá panesiɗaa. Ãdjirãba madianitarãra jũrã eropanana bẽrã madianitarãra ɓiaɗapeɗa mĩrũ piraposiɗaa. Maʉ̃ne Ãcõrẽba madianitarãra ara ãdjiduɓa necoba djõbigasia. Mãwã panʉne madianitarãra Zereraɗaa wãbada oɗe Bet-sita puruɗaa mĩrũ wãsiɗaa. Idjaɓa Abel-mehola puruɗaa Tabat caita mĩrũ wãsiɗaa.
23 Maʉ̃ne Gedeoʉ̃ba israelerã Neptaliɗebemada, Aserɗebemada, jũma Manaseɗebema siɗa trʉ̃bigasia madianitarã ẽpẽnamãrẽã.
24 Gedeoʉ̃ba beɗeada Epraiʉ̃ eyaiɗa ɓʉ ẽjũãnaa diabuesia Epraiʉ̃nebemarã djõne zeɗapeɗa madianitarã Jordaʉ̃ doɗe idu chãbirãnamãrẽã. Ara maʉ̃da Epraiʉ̃nebemarãra eɗa zeɗapeɗa Bet-baraɗe, Jordaʉ̃ jeweɗaɗe biɗa do chãbadama jʉ̃ãsiɗaa.
25 Mãwã panʉne madianita bororãda umé jidasiɗaa, Oreb idjaɓa Zeeb.* Oreb abadara beasiɗaa eya ʉra jira ɓʉma. Mama trʉ̃ ɓʉsiɗaa “Oreb eya ʉra jira ɓʉ.” Zeeb abadara beasiɗaa uva biwadʉgabada uriaɗe. Mama trʉ̃ ɓʉsiɗaa “Zeeb uva biwadʉgabada.” Israelerãba waabema madianitarã ẽpẽpeɗaɗacarea ãdjia Oreb borora, Zeeb boro siɗa ɓʉá tuɗapeɗa Jordaʉ̃ do quĩrãrẽ Gedeoʉ̃maa edesiɗaa.
