Levitico 16:1-34
16 Ãcõrẽba jaraɗa awara idji quĩrãpita quera babʉda carea Aaroʉ̃ warrarãra umé beusiɗaa. Beupeɗaɗacarea Ãcõrẽra Moise ume beɗeasia.
2 Nãwã jarasia:
–Bʉ djaba Aaroʉ̃a jaradua mʉ̃ deɗe wua eatʉ jira ɓʉ jẽdaare mʉ̃ itea biara ɓʉ dejãne baridua ewariɗe eɗa wãrãmãrẽã. Baridua ewariɗe eɗa wãsira beuya, mʉ̃ra baurude ʉ̃rʉ̃ jʉ̃rãrãne ɓʉ bẽrã. Aɓabe mʉ̃a ɓʉɗa ewariɗe eɗa wãida ɓʉa.
3 Maʉ̃ ewariɗe Aaroʉ̃ba nãwã oida ɓʉa: idjia cadjirua oɗa carea paca dji umaquĩrã zaqueda eneida ɓʉa babue diai carea. Idjaɓa oveja dji umaquĩrãda eneida ɓʉa jũma babue diai carea.
4 Maʉ̃be cuipeɗa idjia edre jʉ̃bari lino wua oɗada jʉ̃ida ɓʉa. Maʉ̃ ʉ̃rʉ̃ idjia jʉ̃bari lino wua oɗa torroa ɓʉda jʉ̃peɗa cʉrrʉ trãjʉ̃bari lino oɗaba trãjʉ̃ coɓʉida ɓʉa. Idji boroɗe jʉ̃bari lino oɗa siɗa jʉ̃ida ɓʉa. Maʉ̃gʉra idjia jʉ̃ida ɓʉa mʉ̃ quĩrãpita ne obʉrʉɗe.
5 Maʉ̃ awara israelerãba cadjirua opeɗaɗa carea idjía chiwatu dji umaquĩrãda umé diaɗida panʉa dji draga babue diamãrẽã. Idjaɓa oveja dji umaquĩrãda diaɗida panʉa jũma babue diamãrẽã.
6 Aaroʉ̃ba cadjirua oɗa carea, idji ẽberãrãba cadjirua opeɗaɗa carea biɗa paca umaquĩrã zaquera eneya babue diai carea.
7 Chiwatura umena mʉ̃ quĩrãpita eneida ɓʉa mʉ̃ wua deɗe eɗa wãbada caita.
8 Maʉ̃be bãrãba cawaɗi carea jemenebada quĩrãca Aaroʉ̃ba oya cawai carea sãʉ̃gʉ chiwatuda mʉ̃ itea ɓaida idjaɓa sãʉ̃gʉda ẽjũã põãsa ewaraga ɓʉɗe ẽrãbueida.*
9 Chiwatu mʉ̃ itea ɓeɗara Aaroʉ̃ba babue diai carea ɓʉya israelerãba cadjirua opeɗaɗa carea.
10 Chiwatu ẽrãbuei carea ɓeɗara Aaroʉ̃ba mʉ̃ quĩrãpita zocai eroɓaya israelerãba cadjirua opeɗaɗara ãyã edemãrẽã ẽjũã põãsa ewaraga ɓʉɗaa.
11 Aaroʉ̃ba paca zaquera o ʉrrãgo beaida ɓʉa idjia cadjirua oɗa carea idjaɓa idji ẽberãrãba cadjirua opeɗaɗa carea biɗa.
12 Maʉ̃be quera babada epeɗecoda edapeɗa tʉbʉdau mʉ̃ quĩrãpita ɓʉ animarã babue diabadaɗebemaba biraida ɓʉa. Idjaɓa incienso quera dji ʉrabaɗada jʉwa baratʉma umé edaida ɓʉa. Maʉ̃ra jũma edeida ɓʉa mʉ̃ deɗe wua eatʉ jira ɓʉ jẽdaare.
13 Mama mʉ̃ quĩrãpita querada tʉbʉdau ʉ̃rʉ̃ cuaida ɓʉa cowa nũmemãrẽã. Maʉ̃ cowaaba mʉ̃ baurude ʉ̃rʉ̃ coɓʉra ãnã edaya. Mãwãbʉrʉ Aaroʉ̃ra beuẽ́a.
14 Maʉ̃be paca oada edapeɗa idji jʉwa jĩwĩnĩba maãrĩ jĩãpoida ɓʉa baurude ʉ̃rʉ̃ iquiɗa. Idjaɓa baurude quĩrãpe egode ɓarima siete jĩãpoida ɓʉa.
15 Maʉ̃be dajadaa wãpeɗa chiwatu mʉ̃ itea ɓeɗara o ʉrrãgo beaida ɓʉa israelerãba cadjirua opeɗaɗa carea. Chiwatu oara mʉ̃ wua deɗe eatʉ jira ɓʉ jẽdaare edepeɗa baurude ʉ̃rʉ̃, baurude quĩrãpe egode biɗa jĩãpoida ɓʉa idjia naãrã paca oa jĩãpoɗa quĩrãca.
16 Mʉ̃ wua dera bãrã dji cadjirua obadarã tãẽna ɓʉ bẽrã Aaroʉ̃ba mãwã oaba jĩãpoida ɓʉa. Mãwã mʉ̃ itea biara ɓʉ dejãda mʉ̃ quĩrãpita bia ɓʉya israelerãba cadjirua o panʉnebemada, mʉ̃ quĩrãpita biẽ́ panʉnebemada, idjaɓa mʉ̃ beɗea ĩjã oɗaẽ́ panʉnebema siɗa. Mʉ̃ itea ɓʉ dejãra ara maʉ̃ quĩrãca oida ɓʉa mʉ̃ quĩrãpita bia ɓemãrẽã.
17 Aaroʉ̃ba cadjirua carea mʉ̃ itea biara ɓʉ dejãne oa jĩãpoɗe wãbʉrʉɗe aɓa ẽdrʉbʉrʉɗaa ni aɓaʉda mʉ̃ wua deɗe ɓacara ɓʉa. Mama eɗa ɓʉɗe Aaroʉ̃ba oara jĩãpoya idjia cadjirua oɗa carea, idji ẽberãrãba cadjirua opeɗaɗa carea, idjaɓa israelerãba cadjirua opeɗaɗa carea biɗa.
18 Mʉ̃ wua deɗeba dajadaa zepeɗa mʉ̃ quĩrãpita ɓʉ animarã babue diabadamaa wãida ɓʉa bia ɓʉi carea. Idjia paca oara, chiwatu oa siɗa maãrĩ edapeɗa animarã babue diabadaɗe cachu quĩrãca ɓeara soaida ɓʉa.
19 Maʉ̃be animarã babue diabada ʉ̃rʉ̃ idji jʉwa jĩwĩnĩba oada ɓarima siete jĩãpoida ɓʉa animarã babue diabadara mʉ̃ quĩrãpita bia ɓʉi carea. Mãwã oida ɓʉa animarã babue diabadara israelerã mʉ̃ quĩrãpita biẽ́ panʉneba biẽ́ ɓebari bẽrã.
20 Mʉ̃ itea biara ɓʉ dejã, mʉ̃ itea ɓʉ dejã, animarã babue diabada siɗa mʉ̃ quĩrãpita bia ɓʉɗacarea Aaroʉ̃ba chiwatu waɗi zocai eroɓʉra caita eneida ɓʉa.
21 Idji jʉwara chiwatu boro ʉ̃rʉ̃ ɓʉpeɗa jũma israelerãba cadjirua opeɗaɗara, mʉ̃ beɗea ĩjã oɗaẽ́ panana siɗa Aaroʉ̃ba ebuɗa jaraida ɓʉa maʉ̃ cadjiruara chiwatu ʉ̃rʉ̃ ɓʉi carea. Maʉ̃be aɓaʉda ɓʉya chiwatura ẽjũã põãsa ewaraga ɓʉɗaa edemãrẽã.
22 Maʉ̃ chiwatuba jũma bãrã cadjiruara ãyã edeya ẽberãrã neẽ́maa. Mama ẽjũã põãsa ewaraga ɓʉɗe dji edeɗaba chiwatura ẽrãbueida ɓʉa.
23 Maʉ̃misa Aaroʉ̃ra mʉ̃ wua deɗe eɗa wãpeɗa idjia jʉ̃ ɓʉ lino wua oɗara ẽrãpeɗa mama ameida ɓʉa. Maʉ̃ra idjia jʉ̃baria mʉ̃ itea biara ɓʉ dejãne wãi carea.
24 Maʉ̃be arima cuipeɗa idjia ewariza jʉ̃barida jʉ̃ida ɓʉa. Maʉ̃be dajadaa wãpeɗa idjia enena ovejada, israelerãba diapeɗaɗa oveja siɗa beapeɗa jũma babue diaida ɓʉa idjia cadjirua oɗa carea, israelerãba cadjirua opeɗaɗa carea biɗa.
25 Maʉ̃be cadjirua carea paca, chiwatu siɗa beaɗa dragada animarã babue diabadaɗe jũma babueida ɓʉa.
26 Chiwatu ẽjũã põãsa ewaraga ɓʉɗe ẽrãbueɗara jẽda zebʉrʉɗe cuida ɓʉa idjaɓa idjia cacuaɗe jʉ̃ ɓʉra tãtoida ɓʉa. Maʉ̃bebʉrʉ bãrã duanʉmaa zeida ɓʉa.
27 Bãrã cadjirua carea beaɗa pacara, chiwatu siɗa israelerã duanʉmaʉba ãyã edeida ɓʉa babuei carea. Dji era, dji djarara, dji ã siɗa jũma babueida ɓʉa. Aaroʉ̃ba maʉ̃ animarã oara mʉ̃ itea biara ɓʉ dejãne jĩãposia.
28 Ẽberã maʉ̃ animarã ãyã báɗe wã ɓaɗara jẽda zebʉrʉɗe cuida ɓʉa idjaɓa idjia cacuaɗe jʉ̃ ɓʉra tãtoida ɓʉa. Maʉ̃bebʉrʉ bãrã duanʉmaa zeida ɓʉa.
29 Iɗiba ʉ̃taa bãrã israelerãba naʉ̃ beɗeada ĩjã oɗida panʉa. Poaza sietebema jeɗecoɗe die ewari ɓʉɗe bãrãba ne coɗaca ewarida oɗida panʉa.* Maʉ̃ ewariɗe trajacara panʉa. Ãĩbemarã bãrã tãẽna panʉ siɗa trajacara panʉa.
30 Poaza maʉ̃ ewariɗe sacerdote dji dromaara ɓʉba mʉ̃a jaraɗa quĩrãca oya bãrãba cadjirua opeɗaɗa carea. Mãwã bãrãra mʉ̃ quĩrãpita bia ɓeaɗia.
31 Maʉ̃ ewarira ʉ̃nãũbada ewari dromaa. Maʉ̃ne bãrãra ne coɗacara panʉa. Iɗiba ʉ̃taa poaza maʉ̃ ewariɗe mãwã oɗida panʉa.
32 Sacerdote dji dromaara ɓʉ jaiɗabʉrʉɗe idji warra boro ʉ̃rʉ̃ olivo dragada weaɗida panʉa idji zeza cacuabari ɓemãrẽã. Maʉ̃ warraba israelerãba cadjirua opeɗaɗa carea oida ɓʉ quĩrãca oya. Maʉ̃ ewariɗe sacerdoteba lino wua oɗa jʉ̃ida ɓʉra jʉ̃ya.
33 Maʉ̃ne oa jĩãpo ɓʉɗeba idjia mʉ̃ itea biara ɓʉ dejãda, mʉ̃ itea ɓʉ dejãda, animarã babue diabada siɗa bia ɓʉya. Idjaɓa sacerdoterãba cadjirua opeɗaɗa carea, jũma bãrãba cadjirua opeɗaɗa carea biɗa idjia oida ɓʉ quĩrãca oya.
34 Iɗiba ʉ̃taa mʉ̃a naʉ̃ra ĩjã obi ɓʉa: poaza ɓarima aɓa sacerdote dji dromaara ɓʉba mʉ̃a jaraɗa quĩrãca oida ɓʉa jũma israelerãba cadjirua opeɗaɗa carea.
Maʉ̃be Ãcõrẽba Moisea jaraɗa quĩrãca o panesiɗaa.
Beɗea eɗaare
^ 16:8 Sãʉ̃gʉda ẽjũã põãsa ewaraga ɓʉɗe ẽrãbueida. Hebreo beɗeaɗe jara ɓʉa “sãʉ̃gʉda Azazel carea diabueida.” Azazel trʉ̃ba jara ɓʉra ebuɗa ɓʉẽ́a. Naʉ̃gʉrã crĩchada dia ɓʉa: chiwatu ẽjũã põãsa ewaraga ɓʉɗe ẽrãbueida, ẽjũã chiwatu ẽrãbuebadada, wa jai põãsa ewaraga ɓʉ ẽjũãne ɓabarida.
^ 16:29 Ʉ̃cʉrʉmaarã israelerã ne coɗaca ewariɗe baido docara panasiɗaa, ãdji quima ume jipa cãĩnida panasiɗaa, ãdji jĩrũne jʉ̃badada jʉ̃cara panasiɗaa idjaɓa cuicara panasiɗaa.
