Levitico 2:1-16
2 Aɓaʉba idji néuɗebema harina oɗada Ãcõrẽa diaibʉrʉ, dji biara ɓʉ harinada diaida ɓʉa. Maʉ̃ harina ʉ̃rʉ̃ nedragada weapeɗa incienso querada ʉ̃rʉ̃ coɓʉida ɓʉa.
2 Maʉ̃ra idjia Aaroʉ̃ warrarã sacerdoterãmaa edeida ɓʉa. Maʉ̃ harinanebemada sacerdoteba jʉwa baratʉma aɓa edaida ɓʉa nedraga bara idjaɓa jũma dji incienso quera bara. Maʉ̃gʉra animarã babue diabada ʉ̃rʉ̃ babue diaida ɓʉa. Maʉ̃ maãrĩ babue diabʉrʉɗeba acʉbi ɓʉa jũma maʉ̃ harinara Ãcõrẽa dia ɓʉda. Maʉ̃ babue diabʉrʉra Ãcõrẽba bia unuya.
3 Maʉ̃ harinanebemada maãrĩ Ãcõrẽa babue diaɗa bẽrã jũma dji ɓeɗa siɗa Ãcõrẽ itea ɓesia. Maʉ̃ bẽrã aɓabe Aaroʉ̃ba idji warrarã biɗa arima coɗida panʉa.
4 Aɓaʉba paʉ̃ ãbuɗada Ãcõrẽa diaibʉrʉ, dji biara ɓʉ harina oɗada diaida ɓʉa. Maʉ̃ paʉ̃ra ẽsãbari neẽ́ ɓaida ɓʉa. Nedraga bara oida ɓʉa wa nedragaba ʉ̃rʉ̃ pʉrʉida ɓʉa.
5 Jiorro peweɗea oɗaɗe paʉ̃ ãbuɗada diaɗe edeibʉrʉ, dji biara ɓʉ harina nedraga bara oɗada diaida ɓʉa. Maʉ̃gʉra ẽsãbari neẽ́ ɓaida ɓʉa.
6 Maʉ̃ paʉ̃ra jũma cõrãcuapeɗa nedragada ʉ̃rʉ̃ weaida ɓʉa, Ãcõrẽa diai bẽrã.
7 Paʉ̃ cuguruɗe ãbuɗada diaɗe edeibʉrʉ, dji biara ɓʉ harina nedraga bara oɗada diaida ɓʉa.
8 Maʉ̃ paʉ̃ ãbuɗaɗebemada dji Ãcõrẽa diabʉrʉba sacerdotemaa edepeɗa sacerdoteba animarã babue diabadamaa edeida ɓʉa.
9 Maʉ̃be maãrĩ edapeɗa maʉ̃gʉra animarã babue diabadaɗe Ãcõrẽa babue diaida ɓʉa. Maʉ̃ maãrĩ babue diabʉrʉɗeba acʉbi ɓʉa jũma maʉ̃ paʉ̃ra Ãcõrẽa dia ɓʉda. Maʉ̃ paʉ̃ babue diabʉrʉra Ãcõrẽba bia unuya.
10 Maʉ̃ paʉ̃nebemada maãrĩ Ãcõrẽa babue diaɗa bẽrã jũma dji ɓeɗa siɗa Ãcõrẽ itea ɓesia. Maʉ̃ bẽrã aɓabe Aaroʉ̃ba idji warrarã biɗa arima coɗida panʉa.
11 Bãrã néuɗebemada Ãcõrẽa diabʉdaɗe paʉ̃ ẽsãbari bara ɓʉda diacara panʉa, paʉ̃ ẽsãbarida, urrajõ siɗa Ãcõrẽa babue diacara panʉ bẽrã.
12 Bãrãba naãrã ewabʉdaɗebemada Ãcõrẽa diabʉdaɗe paʉ̃ ẽsãbari bara, urrajõ bara diaɗida panʉa. Baribʉrʉ animarã babue diabadaɗe babue diacara panʉa, Ãcõrẽba bia unuẽ́ bẽrã.
13 Jũma bãrã néuɗebemada Ãcõrẽa diabʉdaɗe tã bara diaɗida panʉa. Tã neẽ́ ɓʉra diacara panʉa. Tãba cawabi ɓʉa Ãcõrẽba bãrã ume beɗea ɓʉɗada jõẽ́da. Maʉ̃ bẽrã jũma Ãcõrẽa diabʉdara tã bara ɓaida ɓʉa.
14 Bãrãba naãrã ewabʉdaɗebemada Ãcõrẽa diabʉdaɗe jututiaɗapeɗa tẽũnada Ãcõrẽa diaɗida panʉa.
15 Maʉ̃ ʉ̃rʉ̃ nedragada weaɗapeɗa incienso querada ʉ̃rʉ̃ coɓʉɗida panʉa, Ãcõrẽa diaɗi bẽrã.
16 Sacerdoteba maʉ̃nebemada Ãcõrẽa babue diaida ɓʉa dji nedraga bara idjaɓa jũma dji incienso quera bara. Maʉ̃ maãrĩ babue diabʉrʉɗeba acʉbi ɓʉa jũma maʉ̃ jututiaɗara Ãcõrẽa dia ɓʉda.
