Levitico 23:1-44
23 Maʉ̃be Ãcõrẽba Moisea jarasia:
2 –Israelerãa jaradua mʉ̃a naʉ̃gʉ ewari droma ɓeada poaza obi ɓʉda. Maʉ̃ ewari ɓeaɗe bãrãra ãbaa dji jʉreɗida panʉa mʉ̃́a bia beɗeaɗi carea.
Ʉ̃nãũbada ewari
3 Sei ewari bãrã trajura oɗida panʉa, baribʉrʉ sietebema ewariɗe ʉ̃nãũnida panʉa. Maʉ̃ ewariɗe bãrãra ni maãrĩ biɗa trajaɗacara panʉa. Maʉ̃ awara ãbaa dji jʉreɗida panʉa mʉ̃́a bia beɗeaɗi carea. Bãrã panane wãbʉdama biɗa ʉ̃nãũbada ewarira mʉ̃ itea wagaɗida panʉa.
Egiptoɗeba ẽdrʉpeɗaɗa quĩrãnebabada ewari idjaɓa paʉ̃ ẽsãbari neẽ́ ɓʉ cobada ewari
4 Mʉ̃a naʉ̃gʉ ewari droma ɓeada poaza obi ɓʉa. Mʉ̃a ɓʉɗa ewariɗe maʉ̃ ewari ɓeara bãrãba oɗida panʉa. Maʉ̃ ewariɗe ãbaa dji jʉreɗida panʉa mʉ̃́a bia beɗeaɗi carea.
5 Poaza dji naãrãbema jeɗecoɗe catorce ewari queubʉrʉɗe bãrã Egiptoɗeba ẽdrʉpeɗaɗa quĩrãnebabada ewarira oɗida panʉa mʉ̃́a bia beɗeaɗi carea.*
6 Maʉ̃be aɓari jeɗecoɗe quince ewariɗeba ʉ̃taa bãrãba paʉ̃ ẽsãbari neẽ́ ɓʉ cobada ewarira oɗida panʉa mʉ̃́a bia beɗeaɗi carea.* Maʉ̃ne siete ewari bãrãba paʉ̃ ẽsãbari neẽ́ ɓʉda coɗida panʉa.
7 Dji naãrãbema ewariɗe bãrãra ãbaa dji jʉreɗida panʉa mʉ̃́a bia beɗeaɗi carea. Maʉ̃ ewariɗe bãrãra trajaɗacara panʉa.
8 Maʉ̃ siete ewariɗe animarãda mʉ̃́a ewariza babue diabiɗida panʉa. Jĩrũarebema ewariɗe bãrãra wayacusa ãbaa dji jʉreɗida panʉa mʉ̃́a bia beɗeaɗi carea. Maʉ̃ ewariɗe biɗa bãrãra trajaɗacara panʉa.–
Néuɗebema naãrã ewabʉda Ãcõrẽa diabada ewari
9 Idjaɓa Ãcõrẽba Moisea jarasia:
10 –Israelerãa nãwã jaradua: “Mʉ̃a bãrãa diai jaraɗa ẽjũãne jũẽpeɗaɗacarea poaza bãrã néu naãrã ewabʉdaɗebemada jʉwa jãmãtʉma aɓa sacerdotemaa edeɗida panʉa.
11 Maʉ̃ra idjia mʉ̃ quĩrãpita ʉ̃taa waida ɓʉa mʉ̃a bãrã bia unui carea. Mãwã oida ɓʉa bãrã Egiptoɗeba ẽdrʉpeɗaɗa quĩrãnebabada ewari nurẽma.
12 Ara maʉ̃ ewariɗe bãrãba oveja poa aɓa ɓʉda mʉ̃́a babue diabiɗida panʉa. Maʉ̃ ovejara jũma bia ɓaida ɓʉa.
13 Maʉ̃ awara dji biara ɓʉ harinada epeɗeco jũgurua umé nedragaɗaa bʉratʉɗapeɗa maʉ̃nebema siɗa mʉ̃́a maãrĩ babue diabiɗida panʉa.* Maʉ̃ harina babue diabʉrʉra mʉ̃a bia unuya. Idjaɓa uva ɓada boteya aɓa animarã babue diabada ʉ̃rʉ̃ mʉ̃́a wea diabiɗida panʉa.*
14 Poaza maʉ̃gʉra mʉ̃́a diaɗi naẽna maʉ̃ poaɗebema ewabʉdara cocara panʉa. Djiwiɗi pureaɗara, dji jututiaɗa siɗa cocara panʉa. Paʉ̃ siɗa oɗapeɗa cocara panʉa. Iɗiba ʉ̃taa bãrã panane wãbʉdaza maʉ̃ beɗeara ĩjã oɗida panʉa.
Néu naãrã ewapeɗaɗa carea ɓʉsriɗa obada ewari
15 Bãrã Egiptoɗeba ẽdrʉpeɗaɗa quĩrãnebabada ewari nurẽma bãrã néu naãrã ewabʉdaɗebemada mʉ̃́a jʉwa jãmãtʉma aɓa diaɗapeɗa domia siete juachaɗida panʉa.
16 Maʉ̃ siete domia juachapeɗaɗacarea nurẽma cincuenta ewari baya. Maʉ̃ ewariɗe bãrã néu naãrã ewapeɗaɗaɗebemada mʉ̃́a wayacusa diaɗe zeɗida panʉa.*
17 Nãwã oɗida panʉa: bãrã diguiɗaʉba paʉ̃da umé enenida panʉa mʉ̃́a ʉ̃taa wa diabiɗi carea. Maʉ̃ paʉ̃ra epeɗeco jũgurua umé dji biara ɓʉ harina ẽsãbari bara oɗa baida ɓʉa.
18 Maʉ̃ paʉ̃ diabʉdaɗe paca dji umaquĩrã zaqueda aɓa, oveja dji umaquĩrãda umé, idjaɓa oveja dji umaquĩrã zaquerã poa aɓa ɓeada siete diaɗida panʉa. Maʉ̃ animarãra jũma bia ɓeaɗida panʉa. Maʉ̃gʉra diaɗia sacerdoteba mʉ̃́a jũma babue diamãrẽã. Maʉ̃gʉrã animarã babue diabʉrʉɗe bãrã néuɗebema harina oɗara mʉ̃́a diabiɗida panʉa, uva ɓa siɗa wea diabiɗida panʉa. Maʉ̃ babue diabʉrʉra mʉ̃a bia unuya.
19 Maʉ̃be bãrãba cadjirua opeɗaɗa carea chiwatu dji umaquĩrãda aɓa beaɗapeɗa sacerdoteba babue diaida ɓʉa. Idjaɓa Ãcõrẽ ume necai ɓai carea oveja zaquerã poa aɓa ɓeada umé beaɗapeda sacerdoteba dji dragada babue diaida ɓʉa.
20 Maʉ̃ umébema oveja zaque djarara, bãrã néu naãrã ewapeɗaɗaɗebema paʉ̃ oɗa siɗa sacerdoteba mʉ̃́a ʉ̃taa wa diaida ɓʉa. Maʉ̃ne jũma maʉ̃gʉra mʉ̃ itea ɓeya. Maʉ̃ bẽrã sacerdoterãba jũma edaɗida panʉa coɗi carea.
21 Ara maʉ̃ ewariɗe bãrãra ãbaa dji jʉreɗida panʉa mʉ̃́a bia beɗeaɗi carea. Maʉ̃ ewariɗe trajaɗacara panʉa. Iɗiba ʉ̃taa bãrã panane wãbʉdaza bãrãba, bãrã warrarãneba yõbʉdarã biɗa maʉ̃ beɗeara ĩjã oɗida panʉa.
22 Bãrã néu ewabʉdaɗe jũma ewarãnadua. Icawa maãrĩ ɓeɗadua. Dji ɓaeɗa siɗa jʉrʉ perãnadua. Maʉ̃gʉra ɓeɗadua dji ne neẽ́ queɗea itea idjaɓa ãĩbemarã bãrã tãẽna panʉ itea. Mʉ̃ra bãrã Ãcõrẽa.”–
Cachiru zabada ewari
23 Idjaɓa Ãcõrẽba Moisea jarasia:
24 23:24-25 –Israelerãa nãwã jaradua: “Poaza sietebema jeɗecoɗe dji nabema ewariɗe bãrãba ʉ̃nãũbada ewarida wagaɗida panʉa. Bãrãra trajaɗacara panʉa. Maʉ̃ ewariɗe bãrãba cachiruda zaɗapeɗa ãbaa dji jʉreɗida panʉa mʉ̃́a bia beɗeaɗi carea. Idjaɓa animarãda mʉ̃́a babue diabiɗida panʉa.”–
26 Idjaɓa Ãcõrẽba Moisea jarasia:
27 –Poaza sietebema jeɗecoɗe die ewari ɓʉɗe mʉ̃a cadjirua quĩrãdoabari ewarida bãrãba oɗida panʉa.* Maʉ̃ ewariɗe bãrãra ne coɗacara panʉa, ãbaa dji jʉreɗida panʉa mʉ̃́a bia beɗeaɗi carea, idjaɓa animarãda mʉ̃́a babue diabiɗida panʉa.
28 Maʉ̃ ewarira mʉ̃a cadjirua quĩrãdoabari ewari bẽrã bãrãra trajaɗacara panʉa. Maʉ̃ ewariɗe sacerdoteba oya bãrãba cadjirua opeɗaɗara mʉ̃a quĩrãdoamãrẽã.
29 Maʉ̃ ewariɗe bariduaba ne coɗaca ewarida oẽ́bʉrʉ, idjira bãrã tãẽnabemada ãyã jʉretaɗida panʉa.
30 Idjaɓa bariduaba trajuda maʉ̃ ewariɗe oibʉrʉ, maʉ̃ ẽberãra mʉ̃a beubiya.
31 Maʉ̃ ewariɗe bãrãra ni maãrĩ biɗa trajaɗacara panʉa. Iɗiba ʉ̃taa bãrã panane wãbʉdaza bãrãba, bãrã warrarãneba yõbʉdarã biɗa maʉ̃ beɗeara ĩjã oɗida panʉa.
32 Maʉ̃ ewarira bãrã ʉ̃nãũbada ewari dromaa. Maʉ̃ ewariɗe bãrãra ne coɗacara panʉa. Maʉ̃ ʉ̃nãũbada ewarira wagaɗida panʉa poaza sietebema jeɗecoɗe nueve ewari queuɗaɗeba aɓa nurẽma queubʉrʉɗaa.–
Warrewarreabema de zaqueɗe panabada ewari
33 Idjaɓa Ãcõrẽba Moisea jarasia:
34 –Israelerãa nãwã jaradua: “Poaza sietebema jeɗecoɗe quince ewariɗeba ʉ̃taa siete ewari warrewarreabema de zaqueɗe pananida panʉa mʉ̃́a bia beɗeaɗi carea.
35 Dji nabema ewariɗe bãrãra ãbaa dji jʉreɗida panʉa mʉ̃́a bia beɗeaɗi carea. Maʉ̃ ewariɗe bãrãra trajaɗacara panʉa.
36 Maʉ̃ siete ewariɗe animarãda mʉ̃́a ewariza babue diabiɗida panʉa. Maʉ̃ siete ewari jõnacarea nurẽma bãrãra wayacusa ãbaa dji jʉreɗida panʉa mʉ̃́a bia beɗeaɗi carea. Idjaɓa maʉ̃ ewariɗe bãrãba mʉ̃́a animarãda babue diabiɗida panʉa. Maʉ̃ ewarira mʉ̃ itea waga panʉ bẽrã bãrãra trajaɗacara panʉa.
37 Jũma mʉ̃a jaraɗa ewari droma ɓeara bãrãba oɗida panʉa. Maʉ̃ ewari ɓeaɗe bãrãra ãbaa dji jʉreɗida panʉa mʉ̃́a bia beɗeaɗi carea idjaɓa mʉ̃́a animarãda babue diabiɗi carea. Ewariza mʉ̃a jaraɗa quĩrãca bãrãba animarã ɓeada babue diabiɗida panʉa, bãrã néuɗebemada diabiɗida panʉa, mʉ̃ ume necai ɓeaɗi carea animarã ɓeada babue diabiɗida panʉa, idjaɓa uva ɓada wea diabiɗida panʉa.
38 Domiazabema ʉ̃nãũbada ewari awara mʉ̃a jaraɗa ewari droma ɓeara bãrãba oɗida panʉa. Bãrãba ewariza mʉ̃́a diaɗida panʉ awara, soɗeba mʉ̃́a dia panʉ awara, mʉ̃́a diaɗida jarapeɗaɗa awara, mʉ̃a jaraɗa ewari droma ɓeaɗe diabi ɓʉra diaɗida panʉa.
39 Bãrã néu jũma ewapeɗaɗacarea siete ewari bãrãra warrewarreabema de zaqueɗe panabada ewarida oɗida panʉa mʉ̃́a bia beɗeaɗi carea. Maʉ̃ ewarira oɗida panʉa poaza sietebema jeɗecoɗe quince ewariɗeba ʉ̃taa. Dji nabema ewariɗe bãrãba ʉ̃nãũbada ewarida wagaɗida panʉa. Idjaɓa maʉ̃ siete ewari jõnacarea nurẽma bãrãba ʉ̃nãũbada ewarida wagaɗida panʉa.
40 Dji nabema ewariɗe bãrãba dji biara ɓea nejõda, uruta queduaca ɓeada, bacuru jʉwate quedua bara ɓeada, do icawabema bacuru jʉwate quedua bara ɓea siɗa edaɗida panʉa.* Maʉ̃be siete ewari bãrãra mʉ̃ quĩrãpita ɓʉsriɗa duananida panʉa.
41 Poaza sietebema jeɗecoɗe bãrãba maʉ̃ ewari dromada siete ewari oɗida panʉa mʉ̃́a bia beɗeaɗi carea. Iɗiba ʉ̃taa bãrãba, bãrã warrarãneba yõbʉdarã biɗa naʉ̃ beɗeara ĩjã oɗida panʉa.
42 Maʉ̃ siete ewari droma o panʉne jũma bãrã israelerãra warrewarreabema de zaqueɗe pananida panʉa.
43 Mãwã bãrã warrarãneba yõbʉdarãba cawaɗia bãrãra warrewarreabema de zaqueɗe panabadjiɗada mʉ̃a bãrãra Egiptoɗeba ẽdrʉ enesiɗe. Mʉ̃ra bãrã Ãcõrẽa.”–
44 Ãcõrẽba mãwã jaraɗacarea Moiseba israelerãa jarasia jũma Ãcõrẽba jaraɗa ewari droma ɓea oɗamãrẽã.
Beɗea eɗaare
^ 23:5 Exodo 12:1-11
^ 23:6 Exodo 12:14-20
^ 23:13 Epeɗeco jũgurua umé. Hebreo beɗeaɗe ɓʉ́ ɓʉa “una décima de un efa.”
^ 23:13 Boteya aɓa. Hebreo beɗeaɗe ɓʉ́ ɓʉa “un cuarto de hin.”
^ 23:16 Maʉ̃ ewarira Nuevo Testamentoɗe Pentecoste abadaa.
^ 23:27 Levitico 16:1-34
^ 23:40 Dji biara ɓea nejõda. Hebreo beɗeaɗe ebuɗa ɓʉẽ́a cãrẽda jara ɓʉda.
