Levitico 24:1-23
24 Ãcõrẽba Moisea jarasia:
2 –Israelerãa jaradua olivo draga idji awa quiruda bʉmaa enenamãrẽã. Maʉ̃ olivo dragaba mʉ̃ deɗe ĩbĩrãra quewaraza coaɗia.
3 Mʉ̃ deɗe eatʉ jira ɓʉ wua nocoare Aaroʉ̃ba ĩbĩrãra quewaraza coa ɓʉya urua ɓamãrẽã aɓa ʉ̃nadrʉbʉrʉɗaa. Iɗiba ʉ̃taa bãrãneba yõbʉdarãba naʉ̃ beɗeara ĩjã oɗida panʉa.
4 Ĩbĩrã ɓʉbada oro idji awa quiru oɗa jʉwateza ĩbĩrãra mʉ̃ quĩrãpita quewaraza coaɗida panʉa.
Ãcõrẽ quĩrãpita ɓʉbada paʉ̃
5 Dji biara ɓʉ harinada edaɗapeɗa paʉ̃ra doce ãbuɗadua. Paʉ̃za harinara epeɗeco jũgurua umé ɓaida ɓʉa.*
6 Maʉ̃ paʉ̃ra mesa oro idji awa quiru oɗaɗe Ãcõrẽ quĩrãpita errecama umé ɓʉɗadua. Errecamaza sei paʉ̃ ɓʉɗadua.
7 Errecamaza orrocawa incienso quera idji awa quiruda coɓʉɗadua. Maʉ̃ querara dji paʉ̃ cacuabari Ãcõrẽa bá diaya. Maʉ̃ quera bá diabʉrʉba acʉbiya paʉ̃ra jũma Ãcõrẽa dia ɓʉda.
8 Ʉ̃nãũbada ewariza paʉ̃ djiwiɗida Ãcõrẽ quĩrãpita ɓʉɗida panʉa. Ãcõrẽra israelerã ume beɗea ɓʉɗa bẽrã iɗiba ʉ̃taa mãwã oɗida panʉa.
9 Maʉ̃ paʉ̃ cacuabari querara Ãcõrẽa bá diai bẽrã jũma maʉ̃ paʉ̃ra Ãcõrẽ itea ɓeya. Maʉ̃ bẽrã aɓabe Aaroʉ̃ba, idji warrarã biɗa arima coɗida panʉa.–
Ẽberãba Ãcõrẽ biẽ́ jaraɗa
10 Ẽberãda ɓasia. Dji papara Israelɗebema basía baribʉrʉ dji zezara Egiptoɗebema basía. Ewari aɓa maʉ̃ ẽberãra israelerã tãẽna pʉrrʉaɗe wãsia. Pʉrrʉa nĩne idjira ẽberã Israelɗebema ume djõsia.
11 Djõ panʉne idjia Ãcõrẽda biẽ́ jarasia. Maʉ̃ carea israelerãba idjira Moisemaa edesiɗaa cawa omãrẽã. Maʉ̃ ẽberã papara Daʉ̃neba yõna Dibri cau Selomí basía.
12 Maʉ̃ ẽberãra jida eropanesiɗaa aɓa Ãcõrẽba cawabibʉrʉɗaa sãwã oɗida panʉda.
13 Maʉ̃ne Ãcõrẽba Moisea jarasia:
14 –Jãʉ̃ ẽberã mʉ̃ biẽ́ jaraɗara bãrã duanʉmaʉba ãyã edeɗadua. Jũma idjia mʉ̃ biẽ́ jara ɓʉ ũrĩpeɗaɗaba ãdji jʉwara idji boro ʉ̃rʉ̃ ɓʉɗida panʉa acʉbiɗi carea wãrãda beɗeaɗe ɓʉda. Mãwãnacarea jũmarãba idjira mõgaraba taɓari beaɗida panʉa.
15 Israelerãa nãwã jaradua: “Bariduaba mʉ̃da biẽ́ jaraibʉrʉ, idjira beɗeaɗe ɓʉ bẽrã beuida ɓʉa.
16 Maʉ̃ bẽrã jũma bãrãba idjira mõgaraba taɓari beaɗida panʉa. Mʉ̃ biẽ́ jaraɗada Israelɗebema baibʉrʉ wa ãĩbema baibʉrʉ, idjira beaɗida panʉa.
17 Aɓaʉda mĩã beaibʉrʉ, idji siɗa beaɗida panʉa.
18 Aɓaʉba djãrã animarãda beaibʉrʉ, maʉ̃ animarã beaɗabari aɓarica animarãda djibaría diaida ɓʉa.
19 Aɓaʉba djãrãda puoibʉrʉ, ara idjia puoɗa quĩrãca idji siɗa puoɗida panʉa.
20 Djãrã ɓʉwʉrʉda ɓʉasira, idji ɓʉwʉrʉ siɗa ɓʉaɗida panʉa. Djãrã dauda ãrĩsira, idji dau siɗa ãrĩnida panʉa. Djãrã quiɗada ɓʉasira, idji quiɗa siɗa ɓʉaɗida panʉa. Ara idjia djãrã puoɗa quĩrãca idji siɗa puoɗida panʉa.
21 Aɓaʉba djãrã animarãda beaibʉrʉ, maʉ̃ animarã cacuabari aɓarica animarãda djibaría diaida ɓʉa. Baribʉrʉ mĩã beaibʉrʉ, idjira beaɗida panʉa.
22 Dji puoɗara Israelɗebema baibʉrʉ wa ãĩbema baibʉrʉ, aɓarica oɗida panʉa. Mʉ̃ra bãrã Ãcõrẽa.”–
23 Moiseba jũma maʉ̃gʉra israelerãa jarasia. Mãwã jaraɗacarea ãdjirãba dji Ãcõrẽ biẽ́ jaraɗara ãyã edeɗapeɗa mõgaraba taɓari beasiɗaa Ãcõrẽba Moisea jaraɗa quĩrãca.
Beɗea eɗaare
^ 24:5 Epeɗeco jũgurua umé. Hebreo beɗeaɗe ɓʉ́ ɓʉa “dos décimas de un efa.”
