Levitico 3:1-17
3 Aɓaʉba Ãcõrẽ ume necai ɓai carea pacada diaibʉrʉ, dji umaquĩrãda wa dji wẽrãda diaida ɓʉa. Maʉ̃ pacara jũma bia ɓaida ɓʉa.
2 Dji dia ɓʉba idji jʉwara paca boro ʉ̃rʉ̃ ɓʉpeɗa o ʉrrãgo beaida ɓʉa Ãcõrẽ wua deɗe eɗa wãbada caita. Maʉ̃be Aaroʉ̃ warrarã sacerdoterãba dji oara animarã babue diabada ʉ̃rʉ̃ idjaɓa orroza biɗa jĩãpoɗida panʉa.
3 3:3-4 Dji dia ɓʉba dji tʉrida, ɓiteɗabema dragada, cotruada umena dji draga bara, nequima siɗa Aaroʉ̃ warrarãa diaida ɓʉa Ãcõrẽa babue diaɗamãrẽã.
5 Ãdjirãba jũma maʉ̃gʉra animarã babue diabadaɗe Ãcõrẽa babue diaɗida panʉa animarã bá nũmʉcãda ʉ̃rʉ̃.* Maʉ̃ babue diabʉrʉra Ãcõrẽba bia unuya.
6 Aɓaʉba Ãcõrẽ ume necai ɓai carea ovejada wa chiwatuda diaibʉrʉ, dji umaquĩrãda wa dji wẽrãda diaida ɓʉa. Maʉ̃ra jũma bia ɓaida ɓʉa.
7 Ovejada diaibʉrʉ, Ãcõrẽ quĩrãpita edeida ɓʉa.
8 Idji jʉwara oveja boro ʉ̃rʉ̃ ɓʉpeɗa o ʉrrãgo beaida ɓʉa Ãcõrẽ wua de quĩrãpe. Maʉ̃be Aaroʉ̃ warrarãba dji oara animarã babue diabada ʉ̃rʉ̃ idjaɓa orroza biɗa jĩãpoɗida panʉa.
9 3:9-10 Dji dia ɓʉba dji dragada, dji dru carraya tʉɗada, dji tʉrida, cotrua umena dji draga bara, nequima siɗa sacerdoterãa diaida ɓʉa Ãcõrẽa babue diaɗamãrẽã.
11 Sacerdoteba jũma maʉ̃gʉra animarã babue diabadaɗe Ãcõrẽa babue diaida ɓʉa. Maʉ̃ babue diabʉrʉra Ãcõrẽa djico diabʉrʉ quĩrãca ɓʉa.
12 Ãcõrẽ ume necai ɓai carea dia ɓʉba chiwatuda diaibʉrʉ, Ãcõrẽ quĩrãpita edeida ɓʉa.
13 Mama idji jʉwara chiwatu boro ʉ̃rʉ̃ ɓʉpeɗa o ʉrrãgo beaida ɓʉa Ãcõrẽ wua de quĩrãpe. Maʉ̃be Aaroʉ̃ warrarãba dji oara animarã babue diabada ʉ̃rʉ̃ idjaɓa orroza biɗa jĩãpoɗida panʉa.
14 3:14-15 Dji dia ɓʉba dji tʉrida, cotruada umena dji draga bara, nequima siɗa sacerdotea diaida ɓʉa Ãcõrẽa babue diamãrẽã.
16 Maʉ̃be sacerdoteba jũma maʉ̃gʉra animarã babue diabadaɗe Ãcõrẽa babue diaida ɓʉa. Maʉ̃ babue diabʉrʉra Ãcõrẽa djico diabʉrʉ quĩrãca ɓʉa. Ãcõrẽba maʉ̃ra bia unuya. Jũma dji dragada Ãcõrẽa babue diaida ɓʉa.
17 Iɗiba ʉ̃taa naʉ̃ beɗeada ĩjã oɗida panʉa: bãrã wãbʉdaza bãrãba, bãrã warrarãneba yõbʉdarã biɗa animarã dragada, oa siɗa cocara panʉa.
Beɗea eɗaare
^ 3:5 Ãcõrẽ ume necai ɓai careabema animarã diai naẽna dji dia ɓʉba naãrã Ãcõrẽa dewara animarãda jũma babue diaida ɓʉa. Capítulo 1ne maʉ̃nebemada ɓʉ́ ɓʉa.
