Levitico 4:1-35
4 Idjaɓa Ãcõrẽba Moisea jarasia:
2 –Israelerãa nãwã jaradua: “Aɓaʉba cadjirua oi crĩchaẽ́ ɓʉɗe Ãcõrẽ leyda ãĩ oibʉrʉ, maʉ̃ cadjirua oɗa carea nãwã oida ɓʉa:
3 Sacerdote dji dromaara ɓʉba mãwã cadjiruada oibʉrʉ, puru siɗa Ãcõrẽ quĩrãpita beɗeaɗe ɓaya. Maʉ̃ cadjirua oɗa carea paca umaquĩrã zaqueda Ãcõrẽa babue diaida ɓʉa. Maʉ̃ pacara jũma bia ɓaida ɓʉa.
4 Maʉ̃ra Ãcõrẽ wua deɗe eɗa wãbada quĩrãpe edepeɗa idji jʉwara paca boro ʉ̃rʉ̃ ɓʉpeɗa o ʉrrãgo beaida ɓʉa Ãcõrẽ quĩrãpita.
5 Maʉ̃be dji oada maãrĩ edapeɗa Ãcõrẽ wua deɗe eɗa edeida ɓʉa.
6 Mama eɗa idji jʉwa jĩwĩnĩra maʉ̃ oaɗe ɓeguea edapeɗa ɓarima siete Ãcõrẽ quĩrãpita jĩãpoida ɓʉa wua eatʉ jira ɓʉ quĩrãpe.
7 Maʉ̃be quera bá diabadaɗe cachu quĩrãca ɓeara maʉ̃ oaba soaida ɓʉa Ãcõrẽ quĩrãpita. Ãcõrẽ wua deɗeba dajadaa zepeɗa dji eɗa wãbada quĩrãpe paca oa ɓeɗara animarã babue diabada coɓʉ caita jũma weaida ɓʉa.
8 4:8-9 Maʉ̃be cadjirua oɗa carea paca beaɗa ɓiteɗabema dragada jũma edaida ɓʉa: dji tʉrida, cotruada umena dji draga bara, nequima siɗa.
10 (Ãcõrẽ ume necai ɓai carea animarã draga edabari quĩrãca oida ɓʉa.) Edapeɗa jũma maʉ̃gʉra animarã babue diabadaɗe Ãcõrẽa babue diaida ɓʉa.
11 4:11-12 Pacaɗebema ɓeɗara israelerã duanʉmaʉba jũma ãyã edeida ɓʉa: dji eda, dji djarada, dji boroda, dji jĩrũda, jũma ɓiteɗabemada, dji ã siɗa. Jũma maʉ̃gʉra edeida ɓʉa animarã babueɗa pora cuabadamaa. Maʉ̃ pora ʉ̃rʉ̃ tʉbʉ cajẽrãpeɗa pacara jũma babueida ɓʉa.
13 Cadjirua oi crĩchaẽ́ ɓʉɗe Israel puruba Ãcõrẽ leyda ãĩ oibʉrʉ, cadjirua oɗara adua ɓʉmĩna Ãcõrẽ quĩrãpita beɗeaɗe ɓaya.
14 Baribʉrʉ puruba cawasira, maʉ̃ cadjirua carea paca umaquĩrã zaqueda Ãcõrẽ wua demaa edeida ɓʉa babue diabi carea.
15 Maʉ̃be Ãcõrẽ quĩrãpita israelerã bororãba ãdji jʉwara paca boro ʉ̃rʉ̃ ɓʉɗapeɗa o ʉrrãgo beaɗida panʉa.
16 Maʉ̃be sacerdote dji dromaara ɓʉba dji oada maãrĩ Ãcõrẽ wua deɗe eɗa edeida ɓʉa.
17 Mama eɗa idji jʉwa jĩwĩnĩra maʉ̃ oaɗe ɓeguea edapeɗa ɓarima siete Ãcõrẽ quĩrãpita jĩãpoida ɓʉa wua eatʉ jira ɓʉ quĩrãpe.
18 Maʉ̃be Ãcõrẽ quĩrãpita quera bá diabadaɗe cachu quĩrãca ɓeara maʉ̃ oaba soaida ɓʉa. Ãcõrẽ wua deɗeba dajadaa zepeɗa dji eɗa wãbada quĩrãpe paca oa ɓeɗara animarã babue diabada coɓʉ caita jũma weaida ɓʉa.
19 Maʉ̃be paca ɓiteɗabema dragada jũma edapeɗa animarã babue diabadaɗe Ãcõrẽa babue diaida ɓʉa.
20 Idjia oida ɓʉa ara idji cadjirua carea oɗa quĩrãca. Sacerdoteba mãwã oida ɓʉa bãrãba cadjirua opeɗaɗa carea. Mãwãbʉrʉ Ãcõrẽba maʉ̃ cadjiruara quĩrãdoaya.
21 Maʉ̃be pacaɗebema ɓeɗara israelerã duanʉmaʉba ãyã edepeɗa jũma babueida ɓʉa ara idji cadjirua carea beaɗa paca ãyã edepeɗa jũma babueɗa quĩrãca. Mãwã oida ɓʉa maʉ̃ pacara beaɗa bẽrã Israel puruba cadjirua oɗa carea.
22 Cadjirua oi crĩchaẽ́ ɓʉɗe bãrã bororãnebemaba Ãcõrẽ leyda ãĩ oibʉrʉ, cadjirua oɗara adua ɓʉmĩna Ãcõrẽ quĩrãpita beɗeaɗe ɓaya.
23 Baribʉrʉ cadjirua oɗada cawasira, chiwatu dji umaquĩrãda edeida ɓʉa Ãcõrẽ quĩrãpita babue diabi carea. Maʉ̃ chiwatura jũma bia ɓaida ɓʉa.
24 Animarã babue diaɗi careabema beabadama idji jʉwara chiwatu boro ʉ̃rʉ̃ ɓʉpeɗa Ãcõrẽ quĩrãpita o ʉrrãgo beaida ɓʉa idjia cadjirua oɗa carea.
25 Maʉ̃be sacerdoteba maʉ̃ cadjirua carea beaɗa chiwatu oaɗe idji jʉwa jĩwĩnĩra ɓeguea edapeɗa animarã babue diabadaɗe cachu quĩrãca ɓeara soaida ɓʉa. Chiwatu oa ɓeɗara animarã babue diabada coɓʉ caita jũma weaida ɓʉa.
26 Maʉ̃be jũma dji draga ɓiteɗabemada Ãcõrẽa babue diaida ɓʉa Ãcõrẽ ume necai ɓai careabema animarã dragada babue diabari quĩrãca.* Maʉ̃gʉra sacerdoteba oida ɓʉa bãrã boroba cadjirua oɗa carea. Mãwãbʉrʉ Ãcõrẽba maʉ̃ cadjiruara quĩrãdoaya.
27 Cadjirua oi crĩchaẽ́ ɓʉɗe bãrãnebemaba Ãcõrẽ leyda ãĩ oibʉrʉ, cadjirua oɗara adua ɓʉmĩna Ãcõrẽ quĩrãpita beɗeaɗe ɓaya.
28 Baribʉrʉ cadjirua oɗada cawasira, chiwatu wẽrãda edeida ɓʉa Ãcõrẽ quĩrãpita babue diabi carea. Maʉ̃ chiwatura jũma bia ɓaida ɓʉa.
29 Animarã babue diaɗi careabema beabadama idji jʉwara chiwatu boro ʉ̃rʉ̃ ɓʉpeɗa o ʉrrãgo beaida ɓʉa idjia cadjirua oɗa carea.
30 Maʉ̃be sacerdoteba chiwatu oaɗe idji jʉwa jĩwĩnĩra ɓeguea edapeɗa animarã babue diabadaɗe cachu quĩrãca ɓeara soaida ɓʉa. Chiwatu oa ɓeɗara animarã babue diabada coɓʉ caita jũma weaida ɓʉa.
31 Maʉ̃be dji dragada jũma edaida ɓʉa Ãcõrẽ ume necai ɓai careabema animarã draga edabari quĩrãca. Edapeɗa dji dragara animarã babue diabadaɗe jũma babue diaida ɓʉa Ãcõrẽba bia unumãrẽã. Maʉ̃gʉra sacerdoteba oida ɓʉa aɓaʉba cadjirua oɗa carea. Mãwãbʉrʉ Ãcõrẽba maʉ̃ cadjiruara quĩrãdoaya.
32 Aɓaʉba chiwatu cãyãbara ovejada idjia cadjirua oɗa carea babue diabi quĩrĩã ɓʉbʉrʉ, oveja wẽrãda edeida ɓʉa. Maʉ̃ ovejara jũma bia ɓaida ɓʉa.
33 Animarã babue diaɗi careabema beabadama idji jʉwara oveja boro ʉ̃rʉ̃ ɓʉpeɗa o ʉrrãgo beaida ɓʉa idjia cadjirua oɗa carea.
34 Maʉ̃be sacerdoteba maʉ̃ cadjirua carea oveja beaɗa oaɗe idji jʉwa jĩwĩnĩra ɓeguea edapeɗa animarã babue diabadaɗe cachu quĩrãca ɓeara soaida ɓʉa. Oveja oa ɓeɗara animarã babue diabada coɓʉ caita jũma weaida ɓʉa.
35 Maʉ̃be dji dragada jũma edaida ɓʉa Ãcõrẽ ume necai ɓai careabema animarã draga edabari quĩrãca. Edapeɗa dji dragara Ãcõrẽa jũma babue diaida ɓʉa animarã babue diabadaɗe bá nũmʉcãda animarã ʉ̃rʉ̃. Maʉ̃gʉra idjia oida ɓʉa aɓaʉba cadjirua oɗa carea. Mãwãbʉrʉ Ãcõrẽba maʉ̃ cadjiruara quĩrãdoaya.
Beɗea eɗaare
^ 4:26 Levitico capítulo 3.
