Levitico 5:1-19
5 Bãrã bororãba ẽberã cawa obʉdaɗe aɓaʉda trʉ̃nibʉrʉ, maʉ̃gʉ ẽberãba ununada wa ũrĩnada jaraẽ́bʉrʉ cadjiruada o ɓʉa. Maʉ̃ carea beɗeaɗe ɓaya.
2 Bãrãba cocara panʉ animarã mẽãbemada, daupẽbadada, wa jãne wãbada beuɗada aɓaʉba waraibʉrʉ, waraɗada adua ɓʉmĩna maʉ̃ ẽberãra Ãcõrẽ quĩrãpita biẽ́ ɓeɗa bẽrã beɗeaɗe ɓʉa.*
3 Aɓaʉba Ãcõrẽ quĩrãpita biẽ́ ɓʉ ẽberãda waraibʉrʉ wa maʉ̃ ẽberãnebemada waraibʉrʉ, mãwã waraɗara adua ɓʉmĩna cawabʉrʉɗe beɗeaɗe ɓaya.*
4 Aɓaʉba quĩrãcuita crĩchaẽ́ne bariduaɗe oida wãrãneba jaraibʉrʉ, mãwã jaraɗara quĩrãdoaimĩna cawabʉrʉɗe Ãcõrẽ quĩrãpita beɗeaɗe ɓaya.
5 Mãwã ɓea cadjirua oɗaba idjia oɗara jũmarãa ebuɗa jaraida ɓʉa.
6 Idjia cadjirua oɗa carea idji animarãnebema oveja wẽrãda wa chiwatu wẽrãda edeida ɓʉa Ãcõrẽa babue diabi carea. Maʉ̃be sacerdoteba maʉ̃gʉ animarã dragara Ãcõrẽa babue diaida ɓʉa maʉ̃ ẽberãba cadjirua oɗa carea.
7 Ne neẽ́ quiruba ovejada diai carea neẽ́ ɓʉbʉrʉ, puchirãda umé wa putujuda umé edeida ɓʉa. Aɓa Ãcõrẽ quĩrãpita beabida ɓʉa idjia cadjirua oɗa carea idjaɓa aɓa Ãcõrẽa jũma babue diabida ɓʉa.
8 Maʉ̃ umébema ĩbanara sacerdotemaa edepeɗa sacerdoteba aɓa otapuya beaida ɓʉa dji edeɗaba cadjirua oɗa carea. Otapuya beabʉrʉɗe aɓeɗa dji borora tʉcara ɓʉa.
9 Maʉ̃ cadjirua carea ĩbana beaɗa oara animarã babue diabada orro aɓaare maãrĩ jĩãpoida ɓʉa. Oa ɓeɗara animarã babue diabada coɓʉ caita jũma weaida ɓʉa. Mãwã oida ɓʉa dji edeɗaba cadjirua oɗa carea.
10 Maʉ̃be sacerdoteba dewarabema ĩbanara jũma Ãcõrẽa babue diaida ɓʉa Ãcõrẽba obi jaraɗa quĩrãca.* Jũma maʉ̃gʉra idjia oida ɓʉa dji edeɗaba cadjirua oɗa carea. Mãwãbʉrʉ Ãcõrẽba maʉ̃ cadjiruara quĩrãdoaya.
11 Baribʉrʉ ne neẽ́ quiruba puchirãda umé wa putujuda umé diai carea neẽ́ ɓʉbʉrʉ, dji biara ɓʉ harinada epeɗeco jũgurua umé diaida ɓʉa idjia cadjirua oɗa carea.* Maʉ̃ harinane nedragada, incienso quera siɗa ɓʉcara ɓʉa cadjirua carea dia ɓʉ bẽrã.
12 Maʉ̃ harinara sacerdotemaa edepeɗa sacerdoteba jʉwa baratʉma aɓa edapeɗa Ãcõrẽa babue diaida ɓʉa animarã babue diabadaɗe bá nũmʉcãda ʉ̃rʉ̃. Maʉ̃ maãrĩ babue diabʉrʉɗeba acʉbi ɓʉa harinara jũma Ãcõrẽa dia ɓʉda. Maʉ̃ harina diaɗara cadjirua carea diasia.
13 Sacerdoteba mãwã oida ɓʉa dji edeɗaba cadjirua oɗa carea. Mãwãbʉrʉ Ãcõrẽba maʉ̃ cadjiruara quĩrãdoaya. Harina ɓeɗara sacerdote itea ɓaya bãrã néuɗebema Ãcõrẽa babue diabʉrʉɗe dji ɓeɗara idji itea ɓebari quĩrãca.”–
Beɗeaɗe ɓʉba diaida ɓʉ
14 Idjaɓa Ãcõrẽba Moisea jarasia:
15 –Cadjirua oi crĩchaẽ́ ɓʉɗe aɓaʉba Ãcõrẽa diaida ɓʉɗebemada jũma diaẽ́bʉrʉ, maʉ̃ cadjirua oɗa carea idji animarãnebema oveja dji umaquĩrãda Ãcõrẽa diaida ɓʉa. Maʉ̃ ovejara jũma bia ɓaida ɓʉa. Dji nẽbʉara daucha ɓaida ɓʉa idjia diaida ɓʉ quĩrãca. Maʉ̃bari paratara diabʉrʉbara Ãcõrẽ deɗe zabada quĩrãca diaida ɓacasia.
16 Idjia Ãcõrẽa diaẽ́ ɓʉda diapeɗa sacerdotea maʉ̃ auɗu diaida ɓʉa.* Maʉ̃be idjia ovejara beapeɗa idji cadjirua carea sacerdoteba Ãcõrẽa babue diaya. Mãwãbʉrʉ Ãcõrẽba maʉ̃ cadjiruara quĩrãdoaya.
17 Aɓaʉba Ãcõrẽ leyda ãĩ oibʉrʉ, ãĩ oɗada adua ɓʉmĩna Ãcõrẽ quĩrãpita maʉ̃ cadjirua carea beɗeaɗe ɓʉa.
18 Cawabʉrʉɗe idji animarãnebema oveja dji umaquĩrãda sacerdotemaa edeida ɓʉa Ãcõrẽa babue diamãrẽã maʉ̃ cadjirua oɗa carea. Maʉ̃ ovejara jũma bia ɓaida ɓʉa. Dji nẽbʉara daucha ɓaida ɓʉa idjia diaida ɓʉ quĩrãca. Ovejara beapeɗa idji cadjirua carea sacerdoteba Ãcõrẽa babue diaya. Mãwã idjia adua ɓʉɗe cadjirua oɗara Ãcõrẽba quĩrãdoaya.
19 Maʉ̃ ẽberãba Ãcõrẽ leyda ãĩ oɗa bẽrã beɗeaɗe ɓʉa. Maʉ̃ bẽrã ovejara babue diaida ɓʉa.
