Luca 17:1-37
17 Jesuba idji ume nĩbabadarãa jarasia:
–Ẽberã cadjiruaɗe ɓaebibadara baraa. Maʉ̃ra ewariza mãwã ɓaya baribʉrʉ ne cadjirua obibari ẽberãda mĩã djuburi ɓʉa.
2 Bariduaba dji dromaẽ́ queɗeada cadjiruaɗe ɓaebibʉrʉ, Ãcõrẽba maʉ̃ ẽberãra bio cawa oya. Maʉ̃ cawa oira bio zarea ɓai bẽrã biara ɓʉa maʉ̃ ẽberã ochiruɗe yuda jʉ̃napeɗa pusaɗe ɓatabueɗida.
3 Maʉ̃ bẽrã quĩrãcuita ɓeaɗadua. Bʉ djababa bʉda biẽ́ oibʉrʉ, idjira quẽãdua. Idjia biẽ́ oɗada igaraibʉrʉ maʉ̃ oɗara quĩrãdoadua.
4 Aɓari ewariɗe idjia bʉda ɓarima siete biẽ́ oibʉrʉ, maʉ̃be ɓarima siete bʉmaa wãpeɗa mʉ̃a biẽ́ oɗara quĩrãdoaduaɗa aibʉrʉ, idjia oɗara quĩrãdoadua.–
Daia biara ĩjãbidua
5 Maʉ̃ne Jesuba edaɗarãba idjía jarasiɗaa:
–Daira carebadua biara ĩjãni carea.–
6 Jesuba jarasia:
–Mostaza ta djuburi quiru quĩrãca bãrãba maãrĩ biɗa ĩjã panʉbara, za ɓʉ bacurua bʉ carrara ẽũtapeɗa pusaɗe ɓaɗe wãduaɗa abʉdaɗe ara maʉ̃da bacuruba bãrã beɗeara ĩjãcasia.
Nezocaba oida ɓʉ
7 Bʉ nezocada ẽjũãne traja ɓapeɗa wa oveja waga ɓapeɗa zeɗacarea ¿bʉa idjía jaraica “chũmedua ne comãrẽã”?
8 Mãwã jaraẽ́a. Ãtebʉrʉ jaraya: “Ara nawena ne djudua. Maʉ̃be djiopeɗa mʉ̃maa enedua coi carea. Maʉ̃bebʉrʉ bʉra ne coida ɓʉa.”
9 Bʉa jaraɗara bʉ nezocaba oɗa bẽrã ¿bʉa idjía bia ɓʉaɗa aica? Mãwã oẽ́a idjia oida ɓʉdrʉ oɗa bẽrã.
10 Ara maʉ̃ quĩrãca bãrãba oɗida panʉra jũma osiɗara nãwã jaraɗida panʉa: “Daira dji nezoca eɗaara queɗeaa; aɓabe daiba oɗida panʉdrʉ osiɗaa.”–
Die ẽberãrã aiɗa bara ɓeaɗa
11 Mãwãnacarea Jesura Galileaɗeba Jerusaleʉ̃naa wãsia. Wãbʉrʉɗe Samaria druaɗe jũẽne wãsia.
12 Puru zaqueɗe jũẽbʉrʉɗe die ẽberã aiɗa bara ɓeada idjimaa zesiɗaa. Baribʉrʉ caita jũẽnaẽ́ basía.
13 Jesua nãwã jĩgua ɓiasiɗaa:
–¡Jaradiabari, Jesu, dairãra quĩrã djuburiadua!–
14 Jesuba ãdji unusiɗe nãwã jarasia:
–Sacerdoterãmaa wãnadua bãrã biapeɗaɗara acʉɗamãrẽã.–*
Ara maʉ̃da ãdjira wãbʉrʉsiɗaa. Wãbʉdaɗe aɓeɗa biacuasiɗaa.
15 Maʉ̃ unusiɗe aɓa Ãcõrẽa jĩgua bia beɗea ɓʉda Jesumaa jẽda zesia.
16 Egode ɓarru coɓepeɗa Jesua bio bia ɓʉaɗa asia idji biabiɗa carea. Maʉ̃ ẽberãra Samariaɗebema basía.
17 Jesuba idjía iwiɗisia:
–¿Dji biapeɗaɗara die panʉẽ́ca? Waabema nuevera ¿sãma panʉ?
18 Naʉ̃ judioẽ́ awara ¿ni aɓaʉda Ãcõrẽa bia beɗeaɗe jẽda zeẽ́ basica?–
19 Maʉ̃ne Jesuba dji ẽberãa jarasia:
–Piraɓaripeɗa necai wãdua. Bʉa wãrãda ĩjãna bẽrã biasia.–*
Ãcõrẽ jũmarã Boro ɓaiɗebema
Mateo 24:23-28, 36-41
20 Pariseorãba Jesua iwiɗisiɗaa:
–¿Ãcõrẽ jũmarã Boro ɓebʉrʉda sãʉ̃be ununi?–
Maʉ̃ne Jesuba panusia:
–Ãcõrẽ jũmarã boro ɓebʉrʉɗe ni cãrẽ siɗa ununaẽ́a.
21 Maʉ̃ bẽrã poya jaraɗaẽ́a: “Dadjirã Borora nama ɓʉa” wa “awuá ɓʉa.” Ãtebʉrʉ Ãcõrẽra ẽberãrã soɗebʉrʉ dji boroda ɓebaria.–*
22 Maʉ̃be Jesuba idji ume nĩbabadarãa nãwã jarasia:
–Ewari zareada zeya. Maʉ̃ ewariɗe bãrãba mʉ̃, Naʉ̃ Djara Edaɗara maãrĩ biɗa unu quĩrĩãnia, baribʉrʉ ununaẽ́a.
23 Maʉ̃ne ʉ̃cʉrʉba jaraɗia idjira nama ɓʉda wa awuá ɓʉda. Baribʉrʉ acʉɗe wãrãnadua. Ãdjira ẽpẽrãnadua.
24 Baa purewa edabʉrʉɗe jũma naʉ̃ ẽjũãra ʉ̃nabaria. Ara maʉ̃ quĩrãca mʉ̃, Naʉ̃ Djara Edaɗa zebʉrʉɗe jũmarãba ununia.*
25 Baribʉrʉ maʉ̃ ewari jũẽi naẽna mʉ̃ra bio bia mĩgaida ɓʉa. Idjaɓa iɗibema ẽberãrãba mʉ̃ra igaraɗida panʉa.
26 Naʉ̃ Djara Edaɗa zei ewarira Noé ewariɗe ɓaɗa quĩrãca ɓaya.
27 Maʉ̃ ewariɗe ẽberãrãra ne co duanabadjia, mĩã cãĩ duanabadjia, idjaɓa dji caurãra quima diacua duanabadjia. Mãwã duanabadjia aɓa Noé jãba dromane ɓadobʉrʉɗaa. Mãwãnacarea dopapada zepeɗa ẽberãrãra jũma nãbʉrʉ quinisiɗaa.*
28 Lo ewariɗe biɗa ara maʉ̃ quĩrãca ɓasia. Ẽberãrãra ne co duanabadjia, ne nẽdo duanabadjia, ne nẽdobue duanabadjia, de o duanabadjia idjaɓa ne u duanabadjia.
29 Baribʉrʉ Lo Sodomaneba ẽdrʉɗacarea bajãneba tʉbʉ uruada cue quĩrãca zesia.* Maʉ̃gʉba dji ẽberãrãra jũma bá quenasia.*
30 Mʉ̃, Naʉ̃ Djara Edaɗa zebʉrʉ ewariɗe ara maʉ̃ quĩrãca mãwãya.
31 Maʉ̃ ewariɗe dji de ʉ̃rʉ̃ ɓʉra idji deɗe eɗa wãiẽ́ ɓʉa ne edai carea. Dji peaɗe ɓʉra diguiɗaa ne jʉrʉɗe wãiẽ́ ɓʉa.
32 Lo quima sãwãnada quĩrãnebaɗadua.*
33 Bariduaba naʉ̃ ẽjũãne bia ɓai carea jʉrʉ ɓʉbʉrʉ aduaya. Baribʉrʉ ne jũmada aduaibʉrʉ, Ãcõrẽ ume ewariza zocai ɓaya.
34 Mʉ̃a jaraya: maʉ̃ ewariɗe aɓari cʉɗaɗe umé panania.* Maʉ̃ne Ãcõrẽba aɓa edeya baribʉrʉ dewarabemara ɓeeya.
35 Wẽrãrãda umé ne ɓa panania. Maʉ̃ne Ãcõrẽba aɓa edeya baribʉrʉ dewarabemara ɓeeya.
36 Ẽberãda umé ãdji néuɗe panania. Maʉ̃ne Ãcõrẽba aɓa edeya baribʉrʉ dewarabemara ɓeeya.–*
37 Ãdjirãba Jesua iwiɗisiɗaa:
–¿Maʉ̃gʉra sãma mãwãi?–
Jesuba panusia:
–Jũmarãba cawa panʉa ãgoso powua nũmʉma ne beuɗara taɓʉda. Ara maʉ̃ quĩrãca jũmarãba cawaɗia.–
Beɗea eɗaare
^ 17:14. Levitico 14:1-32.
^ 17:19. Biasia. Griego beɗeaɗe maʉ̃ beɗeaba idjaɓa jara ɓʉa “ẽdrʉsia.”
^ 17:21. Ẽberãrã soɗebʉrʉ. Griego beɗeaɗe maʉ̃ba idjaɓa jara ɓʉa “bãrã tãẽnabʉrʉ.”
^ 17:24. Naʉ̃ Djara Edaɗara zebʉrʉɗe. Griego beɗeaɗe ʉ̃cʉrʉ cartaɗe aɓabe ɓʉ́ ɓʉa “Naʉ̃ Djara Edaɗara.”
^ 17:27. Genesi 6:5-17; 7:6-24.
^ 17:29. Tʉbʉ urua. Griego beɗeaɗe ɓʉ́ ɓʉa: “Tʉbʉ urua, azupre bara.”
^ 17:29. Genesi 18:20ɗeba aɓa 19:25ɗaa.
^ 17:32. Genesi 19:26.
^ 17:34. Maʉ̃ ewariɗe. Griego beɗeaɗe “diamasi” ɓʉ́ ɓʉa.
^ 17:36. Griego beɗeaɗe ʉ̃cʉrʉ cartaɗe versículo 36 neẽ́a.
