Luca 21:1-38
21 Mãwã ɓʉɗe Jesuba unusia ne bara ɓeaba Ãcõrẽ de dromane ne dia panʉda.
2 Maʉ̃ne unusia pẽdra wẽrã ne neẽ́ quiruba parata eɗaara quiruda umé diabʉrʉda.*
3 Maʉ̃ carea Jesuba jarasia:
–Mʉ̃a wãrãda bãrãa jaraya: jãʉ̃ pẽdra wẽrã ne neẽ́ quiruba auɗuara diasia jũmarãba diapeɗaɗa cãyãbara.
4 Ãdjirãba dji aɗubaɗadrʉ diasiɗaa, baribʉrʉ wẽrã ne neẽ́ quiruba ne coi carea eroɓaɗada jũma diasia.–
Ãcõrẽ de droma jũma ãrĩni Jesuba jaraɗa
Mateo 24:1-28; Marco 13:1-23
5 Ʉ̃cʉrʉba jara duanasiɗaa Ãcõrẽ de dromara mõgara biya queɗeaba o coɓʉcãdada idjaɓa ẽberãrãba Ãcõrẽ itea nebia edepeɗaɗaba biya coɓʉcãdada. Mãwã panʉne Jesuba ãdjía jarasia:
6 –Bãrãba nama unu panʉra ewari aɓa jũma ãrĩnia. Naʉ̃ mõgara capeɗaɗara jũma toɗogozoaya.–
7 Maʉ̃ bẽrã ãdjia Jesua nãwã iwiɗisiɗaa:
–Jaradiabari, Ãcõrẽ de dromara ¿sãʉ̃be toɗogozoai? ¿Cãrẽneba cawaɗi maʉ̃ ewarira caita ɓʉda?–
8 Jesuba panusia:
–Quĩrãcuita ɓeaɗadua ni aɓaʉba cũrũgarãnamãrẽã. Zocãrãba jaraɗia ãdjidrʉ Ãcõrẽba ẽdrʉ edabari diai jaraɗada. Maʉ̃ awara dji ewarira bio caita ɓʉaɗa aɗia. Mãwãmĩna ãdjirãra ẽpẽrãnadua.
9 Bãrãba ũrĩnia puruda dewara puru ume djõ duanʉda idjaɓa ara ãdjiduɓa djõ duanʉda, baribʉrʉ dauperarãnadua. Maʉ̃gʉra jũma mãwãida ɓʉa. Baribʉrʉ jĩrũarebema ewarira ara maʉ̃da jũẽẽ́a.–
10 Maʉ̃ awara Jesuba jarasia:
–Aɓaʉ puruda dewara puru ume djõnia; aɓaʉ druaɗebema borora dewara druaɗebema boro ume djõnia.
11 De uremia minijĩchiada baraya, puru zocãrãne jarrabada zeya, idjaɓa cacua biẽ́ ɓaida quĩrãtanoa odjacuaɗia. Maʉ̃ awara bajãne ununaca baɗada ununia. Maʉ̃ba ẽberãrãra bio ne wayaɗia.
12 Baribʉrʉ maʉ̃ naẽna bãrãra biẽ́ oɗi carea ẽpẽnia. Ʉ̃cʉrʉ jidaɗapeɗa judiorã dji jʉrebada deɗe edeɗia. Maʉ̃be cawa oɗapeɗa preso ɓʉbiɗia. Idjaɓa mʉ̃ ĩjã panʉ carea bãrãra dji dromarã quĩrãpita, dji bororã quĩrãpita biɗa edeɗia.
13 Maʉ̃ne bãrãba mʉ̃nebemada ãdjirã quĩrãpita jaraɗia.
14 Baribʉrʉ crĩcharãnadua maʉ̃ ewariɗe dji bororãa cãrẽda jaraɗida bãrã beɗeaɗe panʉẽ́da cawabiɗi carea.
15 Mʉ̃abʉrʉ bãrãa crĩcha cawaada diaya beɗea cawaɗamãrẽã. Maʉ̃ bẽrã bãrãba jarabʉdara bãrã quĩrãma panʉba ni cãrẽ siɗa poya biẽ́ jaraɗaẽ́a.
16 Ara bãrã zezaba, bãrã djabarãba, bãrã ẽberãrãba, bãrã ume dji biarã biɗa bãrãra jida diaɗia. Mãwã bãrãra ʉ̃cʉrʉ quenabiɗia.
17 Mʉ̃ ĩjã panʉ carea jũmarãba bãrãra quĩrãmania.
18 Baribʉrʉ bãrã jaurera mʉ̃a ewariza bio waga eroɓaya.*
19 Maʉ̃ ewari zareaɗe bãrãba mʉ̃ ĩjã panʉda igaraɗaẽ́bʉrʉ, ewariza Ãcõrẽ ume zocai panania.
20 Bãrãba ununia sordaorãba Jerusaleʉ̃ purura jũrãbʉdada. Maʉ̃ unubʉdaɗe cawaɗia dji puru jũma ãrĩni ewarira jũẽsida.
21 Maʉ̃ne Judea druaɗe ɓeara eyaɗaa isabe wãnadua, Jerusaleʉ̃ne ɓeara ẽdrʉɗadua, dji puru caita ɓeara puruɗaa wãrãnadua.
22 Maʉ̃ ewariɗe Ãcõrẽba idji purura cawa oya.* Idji cartaɗe ɓʉpeɗaɗara jũma mãwãya.
23 Maʉ̃ ewariɗe wẽrãrã ɓiogoa ɓeara, warra ju dawa eroɓea siɗa bio mĩã djuburi ɓeaɗia. Jũmarãda bia mĩgaɗia Ãcõrẽba naʉ̃ purura cawa obʉrʉ bẽrã.
24 Ʉ̃cʉrʉ necoba quenania, ʉ̃cʉrʉ drua ɓeaza jida edecuaɗia. Maʉ̃ne judiorãẽ́ba Jerusaleʉ̃ra ãdji jʉwaeɗa eropanania aɓa Ãcõrẽba ɓʉɗa ewariɗaa.*
Naʉ̃ Djara Edaɗa zeiɗebema
Mateo 24:29-35, 42-44; Marco 13:24-37
25 Bãrãba ʉ̃mãdaura, jeɗecora, chĩdau siɗa quĩrã awara ununia. Maʉ̃gʉba unubiya ewari minijĩchiada zebʉrʉda.* Maʉ̃ carea naʉ̃ ẽjũãne ẽberãrãra bio dauperaɗia. Ãdjirãba cawa crĩchaɗaẽ́a pusa quĩrũ ɓʉba dji cãbãyã jĩgua nũmʉ bẽrã.
26 Bajãne ɓea quĩrã awara ɓebʉrʉɗe ẽberãrãra bio dauperaɗia. Naʉ̃ ẽjũãra minijĩchia nũmʉda unu panʉ bẽrã aɓeɗa ʉ̃yãba neẽ́ ɓaecuaɗia.
27 Maʉ̃nebʉrʉ mʉ̃, Naʉ̃ Djara Edaɗa jʉ̃rãrãne ʉɓʉa bara zebʉrʉda idjaɓa quĩrãwãrẽã dorrodorroa ɓʉda ununia.*
28 Maʉ̃ unubʉdaɗe ɓʉsriɗaɗadua, bãrã ẽdrʉɗi ewarira ʉ̃rʉ̃ ɓʉ bẽrã.–
29 Maʉ̃be Jesuba ne jara ɓʉɗeba nãwã jarasia:
–Higojõda wa baridua bacuruda bio quĩrãcuita acʉɗadua.
30 Bacuru itucu nũmebʉrʉɗe bãrãba cawabadaa dãrãẽ́ne poara zeida.
31 Ara maʉ̃ quĩrãca bãrãba jũma maʉ̃ unubʉdaɗe cawaɗia Ãcõrẽ jũmarã Boro bai ewarira caita ɓʉda.
32 Mʉ̃a bãrãa wãrãda jaraya: naʉ̃ ewariɗebema ẽberãrã beuɗi naẽna maʉ̃ra jũma mãwãya.
33 Bajãra jõya, naʉ̃ ẽjũã siɗa jõya baribʉrʉ mʉ̃a jaraɗara wãrãda mãwãya.
34 21:34-35 Quĩrãcuita ɓeaɗadua Ãcõrẽra quĩrãdoaɗa amaaba. Beu nĩbarãnadua idjaɓa naʉ̃ djaraba o quĩrĩã ɓʉra orãnadua. Naʉ̃ ẽjũãnebemada jũmawãyã crĩcharãnadua. Quĩrãcuita ɓeaɗaẽ́bʉrʉ, maʉ̃ ewariba bãrãra jidaya animarã jidabada dji animarã ʉ̃rʉ̃ cawaẽ́ne ɓaebari quĩrãca. Maʉ̃ ewarira jũmarã ʉ̃rʉ̃ cawaẽ́ne zeya.
36 Maʉ̃ carea bio quĩrãcuita ɓeaɗadua. Ãcõrẽa ewariza iwiɗi pananadua maʉ̃ ewari minijĩchiaɗebemada ẽdrʉɗi carea idjaɓa mʉ̃, Naʉ̃ Djara Edaɗa quĩrãpita peraɗi neẽ́ panani carea.–
37 Jesuba Ãcõrẽ de droma dajada ãsa jaradia ɓapeɗa diamasi Olivo eyaɗaa wãbadjia.
38 Maʉ̃ bẽrã diapeɗeɗa ẽberãrãra Ãcõrẽ de dromanaa wãbadjiɗaa Jesuba jaradia ɓʉ ũrĩni carea.
