Luca 3:1-38
3 Tiberio Cesar quince poa Romanebema boro ɓʉɗe Poncio Pilatoda Judea druaɗe dji boro basía. Herodeda Galilea druaɗe dji boro basía.* Dji djaba Pelipeda Traconite druaɗe idjaɓa Iturrea druaɗe dji boro basía.* Lisaniada Abilene druaɗe dji boro basía.
2 Anáda idjaɓa Caipáda sacerdote dji dromarã basía.*
Maʉ̃ ewariɗe ẽjũã põãsa ewaraga ɓʉɗe Ãcõrẽba Zacaria warra Juaʉ̃a beɗeasia.
3 Maʉ̃ bẽrã Juaʉ̃ra jũma Jordaʉ̃ do caita ɓearãa jaraɗe wãsia ãdji cadjiruara igaraɗapeɗa Ãcõrẽmaa zeɗamãrẽã. Idjia jaradiasia mãwã osiɗara Ãcõrẽba ãdji cadjiruara quĩrãdoaida. Dji ĩjãbʉdara idjia doeɗa borocuebadjia.
4 Jũma maʉ̃gʉra mãwãsia Ãcõrẽneba beɗeabari Isaíaba naẽna ɓʉɗa quĩrãca:
Ẽberãda ẽjũã põãsa ewaraga ɓʉɗe jĩgua beɗea ɓʉa:
Ora jariɗadua dadjirã Boro bia edaɗamãrẽã. Ora idji itea jipa jariɗadua.
5 Jogoa ɓeara jũma daucha ocuaya. Eya ʉ̃tʉ ɓeara, eya jeweɗea ɓea siɗa daucha ocuaya.
O jũrẽã ɓeara jipa jariya, o biẽ́ ɓeara jũma biya ocuaya.
6 Mãwã jũmarãba ununia sãwã Ãcõrẽba ẽdrʉ edabarida.*
7 Zocãrã ẽberãrãda zebadjiɗaa Juaʉ̃ba borocuemãrẽã. Baribʉrʉ Juaʉ̃ba ʉ̃cʉrʉa jarabadjia:
–Dama ẽberãrã, ¿caiba jarasi bãrãra Ãcõrẽ quĩrũbiɗebemada poya mĩrũnida?
8 Bãrãba o panʉneba unubiɗadua wãrãda Ãcõrẽmaa zesiɗada. Crĩcharãnadua Abrahaʉ̃ warrarã bẽrã Ãcõrẽba cawa oẽ́da. Mʉ̃a bãrãa ebuɗa jaraya: Ãcõrẽba quĩrĩãibʉrʉ za taɓea mõgarara Abrahaʉ̃ warrarã babicuaya.
9 Maʉ̃ awara mʉ̃a jaraya Ãcõrẽba zagarada eroɓʉa bacuru tutacuai carea. Jũma bacuru bia zauɗacara tutacuapeɗa tʉbʉɗe ɓatacuaya. Ara maʉ̃ quĩrãca Ãcõrẽba cadjirua obadarãda cawa oya.–
10 Maʉ̃ carea ẽberãrãba idjía iwiɗibadjiɗaa:
–Mãẽteara daiba ¿cãrẽda oɗida panʉ?–
11 Juaʉ̃ba panusia:
–Cacuaɗe jʉ̃bada umé eroɓʉba dji neẽ́ quirúa aɓa diaida ɓʉa. Dji coi eroɓʉba dji coi neẽ́ quirúa diaida ɓʉa.–
12 Mãwã ɓʉɗe Romanebema boro itea parata jʉrʉ pebadarãda borocueɗi carea zesiɗaa. Maʉ̃be ãdjia iwiɗisiɗaa:
–Jaradiabari, dairãba ¿cãrẽda oɗida panʉ?–
13 Juaʉ̃ba ãdjía jarasia:
–Bãrãba parata jʉrʉ peɗida panʉ auɗu diabirãnadua.–
14 Maʉ̃ne sordaorã arima duanʉba Juaʉ̃a iwiɗisiɗaa:
–Dairãba ¿cãrẽda oɗida panʉ?–
Juaʉ̃ba panusia:
–Bãrã trajubari parata dia panʉneba necai ɓeaɗadua. Waraga panʉneba djãrã paratara jãrĩrãnadua idjaɓa sewaɗeba djãrã biẽ́ jararãnadua.–
15 Arima duanʉba maʉ̃ ũrĩsiɗaɗe bio quĩrãcuita duanesiɗaa cãrẽda sãwãi cawaya. Ara ãduɓa nãwã crĩcha panasiɗaa: “¿Juaʉ̃ra Ãcõrẽba ẽdrʉ edabari diai jaraɗaca?”
16 Baribʉrʉ Juaʉ̃ba jũmarãa jarasia:
–Wãrãda mʉ̃a bãrãra baidoba borocue ɓʉa. Baribʉrʉ mʉ̃ cãyãbara dji dromaara ɓʉda zeya. Idjia jĩrũne jʉ̃ ɓʉ ẽrãi carea mʉ̃ra bia ɓʉẽ́a. Idjiabʉrʉ Ãcõrẽ Jaureda diaya.* Baribʉrʉ ĩjãnaẽ́bʉrʉ cawa oya.*
17 Ezoai careabemara idji jʉwaɗe eroɓʉa porara dji ta umebemada ãyã ɓʉi carea. Maʉ̃be dji tara wagaya baribʉrʉ dji porara tʉbʉ uruaɗe babueya.–
18 Ara maʉ̃ quĩrãca ne quĩrãtanoaneba Juaʉ̃ba beɗea bia dadji ẽdrʉɗiɗebemada jaradia ɓapeɗa jarabadjia ĩjãnamãrẽã.
19 Baribʉrʉ Juaʉ̃ba Galileaɗebema boro Herodera quẽãbadjia idjia wẽrã eroɓʉ Herodía carea. Maʉ̃ Herodíara ara Herode djaba Pelipe quima basía. Maʉ̃ awara Juaʉ̃ba idjira quẽãbadjia ne jũma cadjirua o ɓʉ carea.
20 Herodeba maʉ̃ cadjirua o ɓʉ awara naʉ̃gʉ cadjirua siɗa osia: Juaʉ̃ra preso ɓʉbisia idji quẽã ɓʉ carea.*
Juaʉ̃ba Jesu borocueɗa
Mateo 3:13-17; Marco 1:9-11
21 Juaʉ̃ba ẽberãrã borocuecua ɓasiɗe Jesu siɗa borocuesia. Maʉ̃ne Jesuba Ãcõrẽa beɗeabʉrʉɗe bajãda ewasia.
22 Ewapeɗa Ãcõrẽ Jaureda bajãneba puchirã quĩrãca idji ʉ̃rʉ̃ zesia. Maʉ̃ne Ãcõrẽba bajãneba eɗaa nãwã beɗeasia:
–Bʉra mʉ̃ Warra quĩrĩã ɓʉ́a. Bʉ carea mʉ̃ra bio ɓʉsriɗa ɓʉa.–*
Jesu drõã naẽnabemarã trʉ̃
Mateo 1:1-17
23 Jesuba jaradia ɓesiɗe treinta poa ɓasica ɓʉa. Ẽberãrãba idjira Jose warrada crĩcha panasiɗaa. Josera Eli warra basía,
24 Elira Matá warra basía, Matára Levi warra basía, Levira Melqui warra basía, Melquira Janai warra basía, Janaira Jose warra basía.
25 Josera Matatía warra basía, Matatíara Amó warra basía, Amóra Nahuʉ̃ warra basía, Nahuʉ̃ra Esli warra basía, Eslira Nagai warra basía.
26 Nagaira Máha warra basía, Máhara Matatía warra basía, Matatíara Semei warra basía, Semeira Jose warra basía, Josera Juda warra basía.
27 Judara Johanaʉ̃ warra basía, Johanaʉ̃ra Resa warra basía, Resara Zorobabel warra basía, Zorobabelera Salatiel warra basía, Salatielera Neri warra basía.
28 Nerira Melqui warra basía, Melquira Adi warra basía, Adira Cosaʉ̃ warra basía, Cosaʉ̃ra Elmodaʉ̃ warra basía, Elmodaʉ̃ra Ere warra basía.
29 Erera Josue warra basía, Josuera Elieze warra basía, Eliezera Joriʉ̃ warra basía, Joriʉ̃ra Matá warra basía.
30 Matára Levi warra basía, Levira Simeoʉ̃ warra basía, Simeoʉ̃ra Juda warra basía, Judara Jose warra basía, Josera Jonaʉ̃ warra basía, Jonaʉ̃ra Eliaquiʉ̃ warra basía.
31 Eliaquiʉ̃ra Melea warra basía, Meleara Mainaʉ̃ warra basía, Mainaʉ̃ra Matata warra basía, Matatara Nataʉ̃ warra basía, Nataʉ̃ra Davi warra basía.
32 Davira Jesé warra basía, Jeséra Obé warra basía, Obéra Boo warra basía, Boora Salmoʉ̃ warra basía, Salmoʉ̃ra Naasoʉ̃ warra basía.
33 Naasoʉ̃ra Aminadá warra basía, Aminadára Araʉ̃ warra basía, Araʉ̃ra Esroʉ̃ warra basía, Esroʉ̃ra Paré warra basía, Paréra Juda warra basía.
34 Judara Jacobo warra basía, Jacobora Isa warra basía, Isara Abrahaʉ̃ warra basía, Abrahaʉ̃ra Tare warra basía, Tarera Naco warra basía, Nacora Seru warra basía.
35 Serura Ragau warra basía, Ragaura Pele warra basía, Pelera Hebere warra basía, Heberera Sala warra basía.
36 Salara Cainaʉ̃ warra basía, Cainaʉ̃ra Arpaxa warra basía, Arpaxara Seʉ̃ warra basía, Seʉ̃ra Noé warra basía, Noéra Lame warra basía.
37 Lamera Matusaleʉ̃ warra basía, Matusaleʉ̃ra Enoco warra basía, Enocora Jaré warra basía, Jaréra Majalaleel warra basía, Majalaleelera Cainaʉ̃ warra basía.
38 Cainaʉ̃ra Enó warra basía, Enóra Se warra basía, Sera Adaʉ̃ warra basía, Adaʉ̃ra Ãcõrẽ warra basía.
Beɗea eɗaare
^ 3:1. Maʉ̃ Herodera Antipa trʉ̃ jarabadjiɗaa. Idjiɗebemada beɗea ɓʉa Mateo 14:1-10ɗe, Marco 6:14-28ɗe, Luca 3:19ɗe, 9:7-9ɗe, 13:31-33ɗe, 23:6-12ɗe.
^ 3:1. Maʉ̃gʉ Pelipeɗebemada aɓa naʉ̃ versículoɗe ɓʉ́ ɓʉa. Dewarabema Pelipera Herode-Pelipe abadada unubadaa Mateo 14:3ɗe, Marco 6:17ɗe, idjaɓa Luca 3:19ɗe. Herode dji Droma abadara ãdji zeza basía. Antipa ume dji djabarã basía.
^ 3:2. Caipára Aná wigu basía. Anára sacerdote dromada ɓasia poa 6ɗeba aɓa 15ɗaa. Caipára sacerdote dromada ɓasia poa 18ɗeba aɓa 36ɗaa.
^ 3:4-6. Isaía 40:3-5.
^ 3:16. Ãcõrẽ Jaureda diaya. Griego beɗeaɗe ɓʉ́ ɓʉa: “Ãcõrẽ Jaureba borocueya.”
^ 3:16. Cawa oya. Griego beɗeaɗe ɓʉ́ ɓʉa: “Uruaba borocueya.”
^ 3:20. Mateo 14:1-10; Marco 6:14-28.
^ 3:22. Bʉ carea mʉ̃ra bio ɓʉsriɗa ɓʉa. Griego beɗeaɗe maʉ̃ba idjaɓa jara ɓʉa: “Mʉ̃a bʉda jʉrʉ edasia.”
