Luca 4:1-44
4 Jesura Ãcõrẽ Jaureɗeba ɓʉda Jordaʉ̃ doɗeba jẽda wãsia. Maʉ̃ne Ãcõrẽ Jaureba idjira ẽjũã põãsa ewaraga ɓʉɗaa edesia.
2 Cuarenta ewari mama ɓasia. Maʉ̃ne diauruba idjira mĩã sẽ ɓasia Ãcõrẽda igarabi carea. Maʉ̃ ewariɗe Jesuba ni cãrẽ siɗa coẽ́ ɓʉ bẽrã jarra ɓasia.
3 Mãwã ɓʉɗe diauruba Jesua nãwã jarasia:
–Bʉda wãrãda Ãcõrẽ warrabʉrʉ, naʉ̃ mõgarada paʉ̃ babidua.–
4 Jesuba panusia:
–Ãcõrẽ Beɗeaɗe nãwã ɓʉ́ ɓʉa: aɓabe ne co ɓʉɗeba ẽberãra zocai ɓaẽ́a, [ãtebʉrʉ jũma Ãcõrẽba jara ɓʉ ĩjã ɓʉɗeba zocai ɓaya].–*
5 Mãwãnacarea diauruba Jesura eya ʉ̃tʉ ɓʉɗe edesia. Mamaʉba naʉ̃ ẽjũãne ɓea puruda jũma acʉbitasia.
6 Maʉ̃ne diauruba jarasia:
–Naʉ̃ ẽjũãne ɓea purura, maʉ̃ puruɗe ne bia ɓea siɗa jũma bʉ jʉwaeɗa ɓʉya. Mʉ̃re bẽrã mʉ̃a dia quĩrĩãbʉrʉ́a diaida ɓʉa.
7 Mʉ̃ quĩrãpita chĩrãboroɗe coɓepeɗa mʉ̃́a bia beɗeaibʉrʉ mʉ̃a jũma diaya.–
8 Baribʉrʉ Jesuba jarasia:
–Satana, ãyã wãdua.* Ãcõrẽ cartaɗe nãwã ɓʉ́ ɓʉa: “Aɓa bãrã Boro Ãcõrẽabʉrʉ bia beɗeaɗadua. Idjia jara ɓʉdrʉ ĩjã o pananadua.”–*
9 4:9-10 Mãwãnacarea diauruba Jesura Jerusaleʉ̃naa edesia Ãcõrẽ de droma boro ʉ̃tʉara ɓʉmaa. Maʉ̃be jarasia:
–Bʉda wãrãda Ãcõrẽ warrabʉrʉ, namaʉba uɗu jʉ̃drʉdua. Ãcõrẽ cartaɗe nãwã ɓʉ́ ɓʉa:
Ãcõrẽba idji nezocarãda bʉmaa diabueya carebaɗamãrẽã.
11 Bʉra ãdji jʉwaɗe edaɗia bʉ jĩrũra mõgaraba puarãmãrẽã.*
12 Baribʉrʉ Jesuba jarasia:
–Idji beɗeaɗe naʉ̃ siɗa ɓʉ́ ɓʉa: “Bariduada orãnadua bãrã Boro Ãcõrẽba carebai cawaya.”–*
13 Mãwã mĩã sẽ ɓapeɗa diaurura Jesu caitabemada ãyã wãsia aɓa dewara ewariɗaa.
Jesuba jaradia ɓeɗa
Mateo 4:12-17; Marco 1:14-15
14 Mãwãnacarea Jesura Ãcõrẽ Jaure ʉɓʉaɗeba ɓʉda Galilea druaɗaa jẽda wãsia. Jũma maʉ̃ druaɗe idjira bio trʉ̃ ɓʉgasia.
15 Judiorã dji jʉrebada deza idjia Ãcõrẽ beɗeara jaradia ɓabadjia. Maʉ̃ bẽrã jũmarãba idjira bia jarabadjiɗaa.
Jesu Nazareɗe ɓaɗa
Mateo 13:53-58; Marco 6:1-6
16 Mãwãnacarea Jesura idji wariɗa puru Nazareɗaa wãsia. Ʉ̃nãũbada ewariɗe idjia obari quĩrãca judiorã dji jʉrebada deɗe eɗa wãsia. Maʉ̃be idjira piradrʉsia Ãcõrẽ Beɗeada nocoare lei carea.
17 Maʉ̃ne Ãcõrẽneba beɗeabari Isaía cartada idjía diasiɗaa. Maʉ̃ra ewara edapeɗa naʉ̃ beɗeada jʉrʉpeɗa jĩgua lesia:
18 4:18-19 Ãcõrẽ Jaurera mʉ̃ ume ɓʉa. Idjia mʉ̃ra edasia dji ne neẽ́ queɗeaa jaramãrẽã Ãcõrẽba ãdjirãra carebaida.
Idjia mʉ̃ra diabuesia sopua ɓeada sobiabicuamãrẽã,* jida edepeɗaɗarã ẽdrʉɗida jaramãrẽã,
dauɓerrea ɓeaa unubimãrẽã, djãrã jʉwaeɗa mĩga ɓeara bia ɓʉcuamãrẽã,
idjaɓa jaramãrẽã Ãcõrẽba ẽdrʉ edai ewarira jũẽsida.*
20 Leɗacarea cartara bʉrapeɗa dji wagabaría diasia. Maʉ̃be chũmesia jaradiai carea. Jũmarãba idjira acʉ duanasiɗaa.
21 Maʉ̃ne Jesuba jarasia:
–Maʉ̃ beɗeaba jara ɓʉra iɗi bãrã quĩrãpita mãwãbʉrʉa.–
22 Jũmarãba idjiɗebemada bia beɗeasiɗaa. Idjia bia jaradia ɓʉ carea cawa crĩchaɗaẽ́ basía. Ara ãdjiduɓa jara duanasiɗaa: “¿Idjira Jose warrada jãwã ɓʉẽ́ca?”
23 Jesuba jarasia:
–Bãrãba naʉ̃ beɗeada mʉ̃́a jaraɗia: “Nẽãrã diabari, ara bʉdjida biabidua. Bʉa Capernauʉ̃ne oɗara daiba ũrĩsiɗaa. Nama bʉ puruɗe biɗa aɓarica odua.”–
24 Maʉ̃ awara jarasia:
–Mʉ̃a bãrãa wãrãda jaraya: ni aɓaʉ Ãcõrẽneba beɗeabarida ara idji druaɗe bia edaɗacaa.
25 Quĩrãnebaɗadua, Elía ɓasi ewariɗe Israel druaɗe pẽdra wẽrãrãra zocãrã panasiɗaa. Maʉ̃ ewariɗe poa ũbea ẽsidra cue zeẽ́ ɓaɗa bẽrã jarrabada zesia.
26 Baribʉrʉ Ãcõrẽba Elíara ni aɓaʉ pẽdra wẽrã Israelɗebema carebaɗe wãbiẽ́ basía. Ãtebʉrʉ pẽdra wẽrã Sidoʉ̃ druaɗe Sarepta puruɗe ɓʉmaa wãbisia.*
27 Ara maʉ̃ quĩrãca Eliseo ɓasi ewariɗe aiɗa bara ɓeada Israel druaɗe zocãrã panasiɗaa baribʉrʉ ãdjirãnebema ni aɓaʉda idjia biabiẽ́ basía. Ãtebʉrʉ Siria druaɗebema Naamaʉ̃da biabisia.–*
28 Maʉ̃ ũrĩsiɗaɗe jũma dji jʉrebada deɗe duanʉra quĩrũbucasiɗaa.
29 Ara maʉ̃da Jesura puru dajadaa erreɓari edeɗapeɗa eya eɗaa tuca jira ɓʉɗe ɓatabueɗi carea edesiɗaa.
30 Baribʉrʉ Jesura ara ãdji daiɗu necai wãsia.
Jesuba ẽberã jai bara ɓʉ biabiɗa
Marco 1:21-28
31 Mãwãnacarea Jesura Galilea druaɗe Capernauʉ̃ puruɗaa wãsia. Ʉ̃nãũbada ewariɗe idjia jaradia ɓasia.
32 Bio cawa ɓʉɗeba ebuɗa jaradia ɓʉ bẽrã jũmarãba cawa crĩchaɗaẽ́ basía.
33 Judiorã dji jʉrebada deɗe ẽberã jai bara ɓʉda ɓasia. Cawaẽ́ne idjia jĩgua jarasia:
35 Maʉ̃ carea Jesuba idjía jarasia:
–Chupeadua. Idji cacuaɗebemada ẽdrʉdua.–
Ara maʉ̃da jaiba ẽberãra egode ɓaebipeɗa ẽdrʉsia. Baribʉrʉ maʉ̃ ẽberãra ni cãrẽ siɗa biẽ́ oẽ́ basía.
36 Maʉ̃ unusiɗaɗe jũmarãba cawa crĩchaɗaẽ́ basía. Ãdjiza iwiɗi duanesiɗaa:
–Idji beɗeaba ¿sãwã jãwã o ɓʉ? Idjia jarabʉrʉra jairãba ĩjãbadaa. Idjira ʉɓʉa ɓʉ bẽrã beɗeabʉrʉɗe jaira ẽdrʉcuabadaa.–
37 Maʉ̃ bẽrã idjira puru caita ɓeaza bio trʉ̃ ɓʉgasia.
Jesuba Simoʉ̃ Pedro pãcõrẽ biabiɗa
Mateo 8:14-15; Marco 1:29-31
38 Judiorã dji jʉrebada deɗeba ẽdrʉpeɗa Jesura Simoʉ̃ deɗaa wãsia. Mama Simoʉ̃ pãcõrẽda bio cʉwa nũmasia. Maʉ̃ carea Jesua beɗea djuburiasiɗaa biabimãrẽã.
39 Jesuba eɗaa acʉpeɗa dji cʉwamiara quẽãsia. Ara maʉ̃da cʉwamiara dugusia. Maʉ̃be wẽrãra piradrʉpeɗa ãdjira ne cobisia.
Jesuba zocãrã biabicuaɗa
Mateo 8:16-17; Marco 1:32-34
40 Queubʉrʉɗe zocãrã quĩrãtanoa cacua biẽ́ ɓeada Jesumaa enesiɗaa. Jesuba idji jʉwara ãdjirã ʉ̃rʉ̃ ɓʉpeɗa biabicuasia.
41 Ara maʉ̃ quĩrãca zocãrã jairãda ẽberãrã cacuaɗebemada ẽdrʉbicuasia. Ẽdrʉbʉdaɗe nãwã ɓia jarasiɗaa: “¡Bʉra wãrãda Ãcõrẽ warraa!” Ãdjia cawa panasiɗaa idjira Ãcõrẽba diai jaraɗa ẽdrʉ edabarida. Maʉ̃ carea Jesuba ãdjira quẽãbadjia chupeaɗamãrẽã.
Galileaɗe jaradia nĩbaɗa
Marco 1:35-39
42 Diapeɗeɗa Jesura puru dajadaa wãsia ẽberã neẽ́maa. Baribʉrʉ ẽberãrãba idjira jʉrʉ panasiɗaa. Unusiɗaɗe jarasiɗaa ãdji puruɗe ɓemãrẽã.
43 Baribʉrʉ Jesuba ãdjía jarasia:
–Mʉ̃a dewara puru ɓeaɗe jaradiaida ɓʉa Ãcõrẽra zebʉrʉda ãdji Boro bai carea. Maʉ̃ beɗea bia jaramãrẽã Ãcõrẽba mʉ̃ra diabuesia.–
44 Maʉ̃ bẽrã Jesuba judiorã druaɗe dji jʉrebada deza jaradia wãsia.*
Beɗea eɗaare
^ 4:4. Deuteronomio 8:3. Griego beɗeaɗe ʉ̃cʉrʉ cartaɗe beɗea corcheteɗe ɓʉra neẽ́a.
^ 4:8. Satana, ãyã wãdua. Griego beɗeaɗe ʉ̃cʉrʉ cartaɗe maʉ̃ra neẽ́a.
^ 4:8. Deuteronomio 6:13.
^ 4:11. Salmo 91:11, 12.
^ 4:12. Deuteronomio 6:16.
^ 4:18-19. Sopua ɓeada sobiabicuamãrẽã. Griego beɗeaɗe ʉ̃cʉrʉ cartaɗe maʉ̃ra neẽ́a.
^ 4:18-19. Isaía 61:1-2; 58:6.
^ 4:26. 1 Reye 17:1-16.
^ 4:27. 2 Reye 5:1-14.
^ 4:44. Judiorã drua. Griego beɗeaɗe ʉ̃cʉrʉ cartaɗe Judea druada wa Galilea druada ɓʉ́ ɓʉa.
