Luca 6:1-49
6 Ʉ̃nãũbada ewariɗe Jesura idji ume nĩbabadarã siɗa ẽjũã trigo uɗaɗe nĩbasiɗaa. Mama nĩnane Jesu ume nĩbabadarãba trigora tʉ edaɗapeɗa jʉwaba cʉratʉɗapeɗa co nĩbasiɗaa.*
2 Ʉ̃cʉrʉ pariseorãba maʉ̃ unusiɗaɗe iwiɗisiɗaa:
–¿Bãrãba cãrẽ cãrẽã ʉ̃nãũbada ewariɗe ocara panʉda o panʉ?–
3 Jesuba panusia:
–¿Bãrãba Ãcõrẽ Beɗeara acʉɗacaca? Davi, idji ume nĩbabadarã siɗa jarra panasiɗaɗe ¿sãwã osiɗa?*
4 Davira Ãcõrẽ deɗe eɗa wãpeɗa Ãcõrẽ quĩrãpita ɓaɗa paʉ̃da edasia. Maʉ̃ paʉ̃ra ¿aɓabe sacerdoterãba coɗida panasiɗaẽ́ca? Baribʉrʉ Daviba copeɗa idji ume nĩbabadarãa diasia.–
5 Idjaɓa Jesuba jarasia:
–Mʉ̃, Naʉ̃ Djara Edaɗara ʉ̃nãũbada ewari djibaria.–
Jesuba ʉ̃nãũbada ewariɗe ẽberã biabiɗa
Mateo 12:9-14; Marco 3:1-6
6 Dewara ʉ̃nãũbada ewariɗe Jesura judiorã dji jʉrebada deɗaa wãpeɗa jaradia ɓasia. Mama ẽberã jʉwa ara beu ɓʉda ɓasia.
7 Judiorã ley jaradiabadarãda, pariseorã siɗa panasiɗaa. Ãdjia Jesura acʉ panasiɗaa ʉ̃nãũbada ewariɗe ẽberã jʉwa beu ɓʉda biabi cawaya. Biabisira biẽ́ jaraɗida crĩcha panasiɗaa.
8 Baribʉrʉ ãdjia crĩcha panʉra Jesuba cawa ɓaɗa bẽrã dji ẽberã jʉwa beu ɓʉ́a nãwã jarasia:
–Piradrʉpeɗa ẽsi nũmane zedua.–
Ara maʉ̃da dji ẽberãra piradrʉpeɗa ẽsi nũmane wãsia.
9 Maʉ̃be Jesuba ãdjía jarasia:
–Mʉ̃a bãrãa iwiɗiya: ʉ̃nãũbada ewariɗe ¿cãrẽda oɗida panʉ? ¿Biada wa cadjiruada? ¿Djãrã carebaida wa idu beubida?–
10 Maʉ̃be arima panʉra acʉpeɗa dji ẽberãa nãwã jarasia:
–Jʉwa jiradua.–
Mãwã jirabʉrʉɗe idji jʉwara biasia.
11 Maʉ̃ carea arima panʉra bio quĩrũnapeɗa ãdjiduɓa iwiɗi duanesiɗaa Jesura sãwã oɗi cawaya.
Jesuba ẽberã doce edaɗa
Mateo 10:1-4; Marco 3:13-19
12 Ewari aɓa Jesura eyaɗaa wãsia. Mama Ãcõrẽa iwiɗi ɓʉda ʉ̃nadrʉsia.
13 Ãsa baɗacarea idji ẽpẽ ɓeara ãbaa trʉ̃cuapeɗa doce edasia. Maʉ̃ doce edaɗara idjia trʉ̃ ɓʉsia “mʉ̃a diabueɗarã.”*
14 Ãdji trʉ̃ra naʉ̃gʉa: Simoʉ̃ (Jesuba idjira trʉ̃ ɓʉsia Pedro), dji djaba Andre, Santiago,* Juaʉ̃, Pelipe, Bartolomé,
15 Mateo, Tomá, Alpeo warra, Santiago, Simoʉ̃ Zelote abada,
16 Santiago djaba Juda, idjaɓa Juda Iscariote. Jĩrũare maʉ̃gʉba Jesura jidabisia.
Jesuba cãbana duanʉ́a jaradiaɗa
Mateo 4:23-25
17 Maʉ̃be Jesura idjia edaɗarã ume eyaɗeba eɗaa zesiɗaa. Jeweɗaɗe idji ẽpẽ ɓea zocãrã panʉ ume idjaɓa ẽberãrã cãbana zebʉda ume ɓesia. Maʉ̃ ẽberãrãra Judea druaɗeba, Jerusaleʉ̃neba, pusa icawabema puru Tiroɗeba idjaɓa Sidoʉ̃neba zesesiɗaa Jesuba jaradia ɓʉ ũrĩni carea idjaɓa cacua biẽ́ ɓeara biabicuamãrẽã.
18 Maʉ̃ awara Jesuba jai ɓeara ẽberãrã cacuaɗebemada ãyã jʉrecuasia.
19 Jũma dji cacua biẽ́ ɓeaba idjira tã quĩrĩã panasiɗaa Ãcõrẽ ʉɓʉaɗeba biabi ɓʉ bẽrã.
Dadji bia ɓeaɗi Jesuba jaraɗa
Mateo 5:3-12
20 Jesuba idji ẽpẽ ɓea acʉpeɗa nãwã jarasia:
Bio bia ɓeaɗia bãrã dji ne neẽ́ panʉra Ãcõrẽba bãrãra pe eroɓʉ bẽrã.
21 Bio bia ɓeaɗia jarra ɓeara Ãcõrẽba jãwũãbi bẽrã.*
Bio bia ɓeaɗia sopuaba jĩã ɓeara Ãcõrẽba ɓʉsriɗabi bẽrã.*
22 Bio bia ɓeaɗia ẽberãba mʉ̃, Naʉ̃ Djara Edaɗa carea bãrã quĩrãmabʉdaɗe, igarabʉdaɗe idjaɓa biẽ́ jarabʉdaɗe.
23 Bãrã biẽ́ obʉdaɗe bio capipiaɗadua, bãrãba nebia waiɓʉada bajãne eropanani bẽrã.*
Ãdji drõã naẽnabemarãba Ãcõrẽneba beɗeabadarãra ara maʉ̃ quĩrãca biẽ́ obadjiɗaa.
24 Baribʉrʉ mĩã djuburi ɓeaɗia bãrã dji ne bara ɓeara.
Bãrãba eropanʉneba necai panʉ bẽrã nocoarebema ewariɗe necai pananaẽ́a.
25 Mĩã djuburi ɓeaɗia bio ne co panʉneba jãwũã ɓeara, nocoarebema ewariɗe jarra panani bẽrã.
Mĩã djuburi ɓeaɗia ara nawena ipiɗa ɓeara nocoarebema ewariɗe jĩãni bẽrã idjaɓa sopuaɗi bẽrã.
26 Mĩã djuburi ɓeaɗia ẽberãrãba bãrãda bia jaraɗibʉrʉ.
Bãrã drõã naẽnabemarãba ẽberãrã Ãcõrẽ trʉ̃neba sewa jaradia ɓeara bia jarabadjiɗaa.
Dadji dji quĩrũrã quĩrĩãnida panʉ
Mateo 5:38-42, 44
27 Baribʉrʉ mʉ̃a jara ɓʉ ũrĩ panʉ́a jaraya: bãrã dji quĩrũra quĩrĩãnadua. Bãrã quĩrãma panʉra bia oɗadua.
28 Bãrã biẽ́ jarabadara bia jaraɗadua. Bãrã biẽ́ obada carea Ãcõrẽa iwiɗiɗadua ãdjirãra carebamãrẽã.
29 Aɓaʉba bʉda uridarraɗe uibʉrʉ, dewarabema uridarraɗe idu ubidua. Aɓaʉba bʉa cacuaɗe jʉ̃ ɓʉɗebemada aɓa jãrĩbʉrʉ, dewarabema bʉa jʉ̃ ɓʉ siɗa idu edebidua.
30 Aɓaʉba bʉ́a ne iwiɗibʉrʉ, wãgarãdua. Maʉ̃ awara bʉa eroɓʉɗebemada aɓaʉba jãrĩsira iwiɗirãdua jẽda diamãrẽã.
31 Bãrãba quĩrĩã panʉa djãrãba bãrãra bia oɗida. Ara maʉ̃ quĩrãca bãrãba djãrãra bia oɗadua.
32 Aɓabe bãrã dji biarãdrʉ quĩrĩã panʉbʉrʉ, ¿caiba bãrãra bia jarai? Cadjirua obadarã biɗa ãdji dji biarãra quĩrĩãbadaa.
33 Maʉ̃ awara aɓabe bãrã dji biarãdrʉ bia oɗibʉrʉ, ¿caiba bãrãra bia jarai? Cadjirua obadarã biɗa ara maʉ̃ quĩrãca obadaa.
34 Maʉ̃ awara bãrãba aɓabe dji poya jẽda diaɗida ɓeaa diaɗibʉrʉ ¿caiba bãrãra bia jarai? Cadjirua obadarã biɗa ara maʉ̃ quĩrãca obadaa ãdjia diapeɗaɗara waya jẽda edaɗida crĩcha panʉ bẽrã.
35 Maʉ̃ carea bãrã dji quĩrũra quĩrĩãnadua. Ãdjirãra bia oɗadua. Ãdjirãa ne diaɗadua. Baribʉrʉ diabʉdaɗe ãdjirãneba edaɗida crĩcharãnadua. Mãwãbʉrʉ bãrãba Ãcõrẽneba edaɗira bio waiɓʉa ɓaya idjaɓa unubiɗia wãrãda bãrãra Ãcõrẽ dji dromaara ɓʉ warrarãda. Idjia cadjirua obadarãda, idjía bia ɓʉaɗa aɗaca siɗa idji biaɗeba carebabaria.
36 Ara maʉ̃ quĩrãca bãrãba quĩrã djuburia ɓeaɗida panʉa bãrã Zeza bajãne ɓʉba quĩrã djuburiabari quĩrãca.
Djãrã biẽ́ jarabadaɗebema
Mateo 7:1-5
37 Djãrãra biẽ́ jararãnadua Ãcõrẽba bãrã biẽ́ jararãmãrẽã. Ni aɓaʉda beɗeaɗe ɓʉaɗa arãnadua, Ãcõrẽba bãrãda beɗeaɗe ɓeaɗa arãmãrẽã. Bãrã biẽ́ opeɗaɗara quĩrãdoaɗadua. Mãwã bãrãba biẽ́ opeɗaɗara Ãcõrẽba quĩrãdoaya.
38 Djãrãa ne diaɗadua. Mãwãbʉrʉ Ãcõrẽba bãrãa bio aɗuba diaya ẽ bio birapeɗa cuguzoa ɓʉ quĩrãca. Idjia diaya bãrãba djãrãa diabada quĩrãca.–
39 Maʉ̃ awara Jesuba jarasia:
–¿Dauɓerrea ɓʉba dewara dauɓerrea ɓʉda poya eronĩbaica? ¿Eronĩbaibʉrʉ, ãdjira umena uriaɗe ɓaeɗaẽ́ca?
40 Ne cawa quĩrĩã ɓʉra dji jaradiabari cãyãbara ne cawaara ɓʉẽ́a. Baribʉrʉ idjia bio cawaɗacarea dji jaradiabari quĩrãca ɓeya.
41 Bãrãba ¿cãrẽ cãrẽã nejarra djãrã dauɗe ɓʉda acʉbada? ¿Sãwãẽrã bacuru waiɓʉa bãdji dauɗe ɓʉda acʉɗaca?
42 Bacuru waiɓʉa bãdji dauɗe ɓʉda ununaẽ́ panʉbʉrʉ ¿sãwã djãrãa nãwã jaraɗi? “Nejarra bʉ dauɗe ɓʉra mʉ̃a auɓariya.” ¡Bãrãba jarabada quĩrãca oɗacaa! Naãrã bacuru waiɓʉa bãdji dauɗe ɓʉda auɓariɗadua. Mãwã poya ununia nejarra djãrã dauɗe ɓʉra auɓariɗi carea. Ara maʉ̃ quĩrãca bʉa cadjirua o ɓʉra naãrã idu ɓʉdua. Maʉ̃bebʉrʉ djãrãra carebaida ɓʉa.–
Bacurura dji nejõneba cawabadaa
Mateo 7:15-20; 12:34-35
43 Bacuru cadjiruaba nejõ biada zaucaa. Ara maʉ̃ quĩrãca bacuru biaba nejõ cadjiruada zaucaa.
44 Bacurura dji nejõneba cawabadaa. Ʉrʉ bara ɓʉba higojõda zaucaa. Idjaɓa jũĩchichiba uvada zaucaa.
45 Ara maʉ̃ quĩrãca ẽberã biaba idji soɗe ne bia eroɓʉɗeba ne biada jarabaria. Baribʉrʉ ẽberã cadjiruaba idji soɗe ne cadjirua eroɓʉɗeba ne cadjiruada jarabaria. Ẽberãba idji soɗe crĩcha ɓʉ quĩrãca beɗeabaria.
De uménebema
Mateo 7:24-27
46 Mʉ̃a jara ɓʉra bãrãba oɗacaa. Maʉ̃da ¿cãrẽ cãrẽã mʉ̃ra bãrã boroaɗa abada?
47 Mʉ̃maa zebʉrʉba mʉ̃ beɗeada ũrĩpeɗa ĩjã oibʉrʉ mʉ̃a jaraya idjira cai quĩrãca ɓʉda.
48 Idjira ẽberãba de obʉrʉ quĩrãca ɓʉa. Maʉ̃ ẽberãba bio eɗu corosia aɓa mõgara zarea unubʉrʉɗaa. Maʉ̃ ʉ̃rʉ̃ de jĩrũra u nũmʉsia. Maʉ̃ dera bio zarea nũmʉ bẽrã do waiɓʉa zebʉrʉɗe cora edeẽ́ basía.
49 Baribʉrʉ mʉ̃ beɗeada ũrĩpeɗa ĩjãẽ́ra naʉ̃ quĩrãca ɓʉa. Ẽberãba deda osia baribʉrʉ de jĩrũra eɗu uẽ́ basía. Maʉ̃ bẽrã do waiɓʉa zebʉrʉɗe idji dera cora wãsia. Aɓeɗa jũma ãrĩsia.–
Beɗea eɗaare
^ 6:1. Deuteronomio 23:24-25.
^ 6:3. 1 Samuel 21:1-6.
^ 6:13. Mʉ̃a diabueɗarã. Cãpũrĩã beɗeaɗe jara ɓʉa “apóstoles.”
^ 6:14. Maʉ̃ Santiagora idjaɓa Jacobo abadaa. Cãpũrĩã beɗeaɗe Santiago trʉ̃ra zesia “San Jacobo” isabe jarabʉrʉɗeba.
^ 6:21. Jeremia 31:25. Bio bia ɓeaɗia jarra ɓeara Ãcõrẽba jãwũãbi bẽrã. Maʉ̃ba naʉ̃ crĩcha siɗa dia ɓʉa: “Bio bia ɓeaɗia soɗeba Ãcõrẽ cawa quĩrĩã ɓeara, Ãcõrẽba cawabi bẽrã.”
^ 6:21. Salmo 126:5-6; Isaía 57:18; 61:2-3; Apocalipsi 7:16-17.
^ 6:23. 2 Cronica 36:16.
