Marco 10:1-52
10 Maʉ̃be Jesura Capernauʉ̃ puruɗeba Judea druaɗaa wãsia Jordaʉ̃ do quĩrãare. Ẽberãrã zocãrã wayacusa idjimaa zesesiɗaɗe idjia obari quĩrãca ãdjirãa jaradia ɓesia.
2 Mãwã ɓʉɗe ʉ̃cʉrʉ pariseorãda zesiɗaa. Idji biẽ́ beɗeabiɗi carea nãwã iwiɗisiɗaa:
–¿Umaquĩrãba dji quimada amaida bia ɓʉca?–
3 Jesuba panusia:
–¿Moiseba cãrẽda ɓʉsi?–
4 Pariseorãba panusiɗaa:
–Moiseba iduaribisia. Idjia jarasia aɓaʉba idji wẽrãa carta mĩã amainebemada diaibʉrʉ amaida ɓʉda.–*
5 Maʉ̃ne Jesuba jarasia:
–Moiseba maʉ̃ beɗeara ɓʉsia bãrãra cʉwʉrʉ zarea ɓea bẽrã.
6 Baribʉrʉ naʉ̃ ẽjũã osiɗe Ãcõrẽba umaquĩrãda, wẽrã siɗa osia.*
7 Maʉ̃ carea umaquĩrãba dji zezara, dji papa siɗa amepeɗa idji quima ume ãbaa ɓebaria.
8 Mãwã cacua aɓa ɓʉ quĩrãca panʉa.* Ãdjira umé panʉẽ́a, ãtebʉrʉ aɓa ɓʉ quĩrãca panʉa.
9 Maʉ̃ bẽrã Ãcõrẽba ãbaa ɓʉɗara dji amanacara panʉa.–
10 Waya diguiɗaa wãpeɗaɗacarea Jesu ume nĩbabadarãba idjía aɓari quĩrãca iwiɗisiɗaa.
11 Maʉ̃ne Jesuba panusia:
–Baridua umaquĩrãba idji quimada amapeɗa dewara wẽrãda edaibʉrʉ, maʉ̃ umaquĩrãra daunema ɓʉa.
12 Idjaɓa wẽrãba idji quimada amapeɗa dewara umaquĩrãda edaibʉrʉ, maʉ̃ wẽrãra daunema ɓʉa.–
Jesuba warra zaquerã bia jara ɓʉɗa
Mateo 19:13-15; Luca 18:15-17
13 Maʉ̃ne ẽberãrãba warra zaquerãda Jesuma enesiɗaa idji jʉwada ʉ̃rʉ̃ ɓʉpeɗa bia jara ɓʉmãrẽã. Baribʉrʉ Jesu ume nĩbabadarãba dji warrarã enebʉdara quẽãsiɗaa.
14 Ãdjia mãwã obʉdara Jesuba bio biẽ́ ununa bẽrã nãwã jarasia:
–Idu warra zaquerãra mʉ̃maa zebiɗadua, Ãcõrẽba pe eroɓʉɗebemara ãdjirã quĩrãca panʉ bẽrã.
15 Wãrã arada mʉ̃a jaraya: warra zaqueba idji zeza ẽpẽbari quĩrãca aɓaʉba Ãcõrẽda ẽpẽẽ́bʉrʉ, maʉ̃ ẽberãra Ãcõrẽba pe eroɓʉɗebema baẽ́a.–
16 Mãwã jarapeɗa Jesuba warra zaquerãra jʉwaɗe bara edapeɗa idji jʉwara ʉ̃rʉ̃ ɓʉpeɗa bia jara ɓʉcuasia.
Parata bara ɓʉ Jesu ume beɗeaɗa
Mateo 19:16-30; Luca 18:18-30
17 Jesu mamaʉba wãbʉrʉɗe ẽberãda idjimaa pira zesia. Maʉ̃ ẽberãra Jesu quĩrãpita chĩrãboroɗe coɓepeɗa iwiɗisia:
–Jaradiabari bia, Ãcõrẽ ume ewariza zocai ɓai carea ¿mʉ̃a cãrẽda oida ɓʉ?–
18 Jesuba panusia:
–¿Cãrẽ cãrẽã mʉ̃ra dji biaaɗa a ɓʉ? Ni aɓaʉda dji biaẽ́a, aɓabe Ãcõrẽdrʉ dji biaa.
19 Bʉa cawa ɓʉa Ãcõrẽba obi ɓʉ beɗeara: mĩã bearãdua, daunemarãdua, ne drʉarãdua, sewaɗeba djãrãra biẽ́ jararãdua, djãrã cũrũgarãdua, bʉ zezara, bʉ papa siɗa wayadua.–
20 Maʉ̃ne ẽberãba jarasia:
–Jaradiabari, cũdra eɗaʉba mʉ̃a jũma maʉ̃gʉra ĩjã o ɓʉa.–
21 Maʉ̃ne Jesuba ẽberãra quĩrĩãneba acʉpeɗa jarasia:
–Waɗi bʉa ne aɓa oida ɓʉa. Bʉa eroɓʉra jũma nẽdobueɗe wãpeɗa dji paratara ne neẽ́ queɗeaa diadua. Mãwã nebiada bajãne eroɓaya. Maʉ̃be mʉ̃ ume nĩbaɗe zedua.–*
22 Dji ẽberãba maʉ̃ ũrĩpeɗa sopua ɓesia bio bara ɓʉ bẽrã. Ara maʉ̃da wãsia.
23 Maʉ̃ne Jesuba pʉrrʉga acʉpeɗa idji ume nĩbabadarãa jarasia:
–Wãrãda bio zarea ɓʉa ẽberã ne bara ɓʉba Ãcõrẽra idji Boroda ɓʉi carea.–
24 Idji ume nĩbabadarãba cawa crĩchaɗaẽ́ basía. Ãcõrẽba ne bara ɓeara bia pe eroɓʉda crĩcha panasiɗaa. Maʉ̃ carea Jesuba wayacusa jarasia:
–Djabarã, wãrãda bio zarea ɓʉa ẽberã ne bara ɓʉba Ãcõrẽra idji Boroda ɓʉi carea.
25 Parata bara ɓʉba Ãcõrẽra idji Boroda ɓʉi cãyãbara cameyoda ãguja uriaɗe eɗa wãichaara ɓʉa.–
26 Idji ume nĩbabadarãba wetara cawa crĩchaɗaẽ́ basía. Maʉ̃ne ãduɓa iwiɗidruasiɗaa:
–Mãwãra Ãcõrẽba ¿caidrʉ ẽdrʉ edai?–
27 Jesuba ãdjirã acʉpeɗa jarasia:
–Ẽberãba mãwã poya ocaa baribʉrʉ Ãcõrẽba poya oida ɓʉa. Ãcõrẽmaarã ne jũmada oicha ɓʉa.–
28 Maʉ̃ne Pedroba Jesua jarasia:
–Bʉ ẽpẽni carea daiba ne jũmada amesiɗaa.–
29 10:29-30 Jesuba jarasia:
–Wãrã arada mʉ̃a jaraya: mʉ̃ carea idjaɓa beɗea bia mʉ̃nebema carea aɓaʉba idji deda, djabarãda, djabawẽrãrãda, zezada, papada, quimada, warrarãda, ẽjũãda ameibʉrʉ, idjia amena cãyãbara naʉ̃ ewariɗe cien edaya: deda, djabarãda, djabawẽrãda, papada, warrarãda idjaɓa ẽjũã siɗa. Ẽberãrãba idjira biẽ́ oɗi carea ẽpẽnia baribʉrʉ jĩrũarebema ewariɗe Ãcõrẽ ume ewariza zocai ɓaya.
31 Mãwã dji jĩrũarebemada dji nabemarãda ɓeaɗia, dji nabemarãda dji jĩrũarebemada ɓeaɗia.–
Jesuba idji beaɗiɗebema waya jaraɗa
Mateo 20:17-19; Luca 18:31-34
32 Jerusaleʉ̃naa wãsiɗaɗe Jesura nocoare nĩbasia. Mama wãbʉda carea idjia doce edaɗarãba cawa crĩchaɗaẽ́ panasiɗaa. Jũma idji caiɗu wãbʉdarã siɗa ne waya panasiɗaa. Mãwã duanʉne Jesuba wayacusa idjia edaɗa doce panʉra jĩgabe edesia. Maʉ̃be idji sãwãinebemada jarasia:
34 Maʉ̃gʉrãba mʉ̃ra ipiɗa biẽ́ jaraɗapeɗa, iɗoɗapeɗa, uɗapeɗa beaɗia. Baribʉrʉ ewari ũbeaɗe mʉ̃ra ʉ̃rẽbaya.–
Zebedeo warrarãba iwiɗipeɗaɗa
Mateo 20:20-28
35 Zebedeo warrarã Santiagoda, Juaʉ̃ siɗa Jesumaa zeɗapeɗa jarasiɗaa:
–Jaradiabari, daiba quĩrĩã panʉa bʉa oida ara daiba iwiɗibʉda quĩrãca.–
36 Jesuba iwiɗisia:
–¿Cãrẽda quĩrĩã panʉ mʉ̃a bãrã itea oida?–
37 Ãdjia panusiɗaa:
–Bʉra jũmarã boroda ɓebʉrʉɗe daida aɓa bʉ jʉwa araare, aɓa bʉ jʉwa acʉare idu chũmebidua.–*
38 Maʉ̃ne Jesuba ãdjía jarasia:
–Bãrãba adua panʉa cãrẽda iwiɗi panʉda. Mʉ̃ra bio bia mĩgaya. ¿Bãrã siɗa ara maʉ̃ quĩrãca bia mĩgaɗi carea panʉca?–*
39 Ãdjia panusiɗaa:
–Mãẽ, bia mĩgaɗi carea panʉa.–
Maʉ̃ne Jesuba jarasia:
–Bãrã siɗa wãrãda mʉ̃ quĩrãca bia mĩgaɗia.*
40 Baribʉrʉ mʉ̃ jʉwa araare, mʉ̃ jʉwa acʉare chũpananida mʉ̃a poya diaẽ́a. Ãcõrẽbʉrʉ mama chũpananida eroɓʉa.–
41 Maʉ̃ne Santiagoba, Juaʉ̃ biɗa iwiɗibʉdada waabema die panʉba ũrĩsiɗaa. Maʉ̃ carea ãdji ume quĩrũsiɗaa.
42 Baribʉrʉ Jesuba ãdjirã trʉ̃peɗa jarasia:
–Bãrãba cawa panʉa naʉ̃ ẽjũãnebema bororãba ãdji ẽberãrãra jũmawãyã zocabadada. Ãdjirãba unubibadaa ãdjia jarabʉdara jũmarãba ĩjã oɗida panʉda.
43 Baribʉrʉ bãrãra mãwã ɓeaɗiẽ́ panʉa. Bãrãnebemada dji dromada ɓa quĩrĩã ɓʉbʉrʉ waabemarã nezocada ɓaida ɓʉa.
44 Dji dromaara ɓa quĩrĩã ɓʉra jũmarã cãyãbara eɗaara ɓaida ɓʉa.
45 Maʉ̃ quĩrãca mʉ̃, Naʉ̃ Djara Edaɗara zeẽ́ ɓʉa ẽberãrã mʉ̃ nezocarãda ɓeaɗamãrẽã. Ãtebʉrʉ ze ɓʉa ẽberãrã nezocada ɓai carea. Mãwã mʉ̃ra beuya zocãrã ẽberãrãda ẽdrʉ ɓʉi carea.–
Jesuba ẽberã dauɓerrea ɓʉ biabiɗa
Mateo 20:29-34; Luca 18:35-43
46 Jesura, idji ume nĩbabadara, dewararã zocãrã panʉ siɗa Jerico puruɗe jũẽne wãsiɗaa. Ẽdrʉbʉdaɗe ẽberã dauɓerrea ɓʉda o icawa parata iwiɗi ɓʉda chũmasia. Maʉ̃ ẽberãra Timeo warra Bartimeo basía.
47 Bartimeoba ũrĩsia Jesu Nazareɗebemara mama wãbʉrʉda. Maʉ̃ carea ɓia jarasia:
–¡Jesu, Daviɗeba zeɗa, mʉ̃ra quĩrã djuburiadua!–
48 Maʉ̃ne zocãrãba idjira chupeamãrẽã quẽãsiɗaa baribʉrʉ idjia wetara ɓiasia:
–¡Jesu, Daviɗeba zeɗa, mʉ̃ra quĩrã djuburiadua!–
49 Maʉ̃ ũrĩsiɗe Jesura nũmesia. Nãwã jarasia:
–Idjira trʉ̃nadua.–
Maʉ̃ne ʉ̃cʉrʉba dauɓerrea ɓʉra trʉ̃napeɗa jarasiɗaa:
–Sobiadua. Piradrʉdua. Jesuba bʉra trʉ̃ ɓʉa.–
50 Ara maʉ̃da Bartimeoba idjia ʉ̃rʉ̃ jʉ̃ ɓaɗara ẽrãpeɗa isabe piradrʉpeɗa Jesumaa wãsia.
51 Maʉ̃ne Jesuba idjía iwiɗisia:
–¿Cãrẽda quĩrĩã ɓʉ mʉ̃a oida?–
Dji dauɓerrea ɓʉba jarasia:
–Jaradiabari, mʉ̃ dauba unuida quĩrĩã ɓʉa.–
52 Maʉ̃ne Jesuba jarasia:
–Wãdua. Bʉa ĩjãna bẽrã biasia.–
Ara maʉ̃da dauɓerrea ɓaɗaba unu ɓesia. Maʉ̃be Jesu ume ãbaa oɗe wãsia.
Beɗea eɗaare
^ 10:4. Deuteronomio 24:1-4.
^ 10:6. Genesi 1:27; 5:2.
^ 10:8. Genesi 2:24.
^ 10:21. Griego beɗeaɗe ʉ̃cʉrʉ cartaɗe idjaɓa nãwã ɓʉ́ ɓʉa: “Bʉra bia mĩgai carea ɓʉbʉrʉ.”
^ 10:37. Jũmarã boroda ɓebʉrʉɗe. Griego beɗeaɗe ɓʉ́ ɓʉa: “Bʉ bia quiruɗe.”
^ 10:38. Griego beɗeaɗe nãwã ɓʉ́ ɓʉa: “¿Bãrãra mʉ̃ borocueɗi quĩrãca borocueɗica? ¿Mʉ̃a doida ɓʉra bãrã biɗa poya doɗica?”
^ 10:39. Jesuba jaraɗa quĩrãca wãrãda mãwãsia. Hecho 12:1-3; Apocalipsi 1:9.
