Marco 11:1-33
11 Jerusaleʉ̃ puruɗe jũẽboɗo basiɗe Betpague puru caita, Betania puru caita biɗa duanasiɗaa Olivo eya carraɗe. Maʉ̃be Jesuba idji ume nĩbabadarãda umé diabuesia.
2 Ãdjía nãwã jarasia:
–Dadjirã quĩrãpe ɓʉ puruɗaa wãnadua. Jũẽbʉdaɗe bãrãba burro zaqueda ununia. Maʉ̃ burro zaque ʉ̃rʉ̃ waɗi ni aɓaʉda wãnacaa. Ẽrã edaɗapeda enenadua.
3 Aɓaʉba bãrãa cãrẽ cãrẽã jãwã o panʉda iwiɗibʉrʉ jaraɗadua: “Dadji Boroba quĩrĩã ɓʉa baribʉrʉ nane jẽda diabueya.”–
4 Oɗe wãbʉdaɗe burrora deɗe eɗa wãbada caita jʉ̃ nũmʉda unusiɗaa. Ara maʉ̃da ẽrã edasiɗaa.
5 Ʉ̃cʉrʉ arima duanʉba iwiɗisiɗaa:
–¿Cãrẽda o panʉ? ¿Cãrẽ cãrẽã jãʉ̃ burrora ẽrã panʉ?–
6 Jesuba jaraɗa quĩrãca panusiɗaɗe dji arima duanʉba idu edebisiɗaa.
7 Maʉ̃be burro zaquera Jesumaa edeɗapeɗa ãdji cacuaɗe jʉ̃ panʉra burro ʉ̃rʉ̃ ɓʉsiɗaa. Maʉ̃bebʉrʉ Jerusaleʉ̃ puruɗaa wãi carea Jesura ʉ̃rʉ̃ chũmesia.
8 Zocãrãba Jesu bia edaɗi carea ãdjia cacuaɗe jʉ̃ panʉda oɗe tõcua wãsiɗaa. Dewararãba bacuru jʉwate quedua bara ɓeada ɓʉá tuɗapeɗa o icawa ɓʉcua wãsiɗaa.
9 Mãwã obʉdaɗe idji na nĩnaba, caiɗu zebʉda biɗa jĩgua jara duanasiɗaa:
¡Bio bia quirua! ¡Bio bia ɓʉa dadji Ãcõrẽ trʉ̃neba zebʉrʉra!*
10 ¡Bio bia ɓʉa dadji drõãenabema Daviɗeba zeɗara! ¡Dadjirã Boro bai carea zebʉrʉa!
¡Bio bia quirua Bajãne Ɓʉra!
11 Jesu Jerusaleʉ̃ne jũẽsiɗe Ãcõrẽ de dromanaa wãsia. Jũma acʉ ɓapeɗa queubʉrʉ bẽrã idjia doce edaɗarã ume Betania puruɗaa jẽda wãsiɗaa.
Jesuba higojõ bacuru biẽ́ jara ɓʉɗa
Mateo 21:18-19
12 Nurẽma Betania puruɗeba wãbʉdaɗe Jesura jarra nũmesia.
13 Maʉ̃ne higojõ quedua bara ɓʉda tʉmʉba unusia. Higojõ jaraẽ́mĩna Jesuba acʉɗe wãsia dji ca zaqueda odja ɓʉ cawaya. Araa jũẽbʉrʉɗe quedua awa nũmʉda unusia.*
14 Maʉ̃ne Jesuba higojõa jarasia:
–¡Ni aɓaʉba bʉ nejõra waa jõnaẽ́a!–
Maʉ̃ beɗeara idji ume nĩbabadarãba ũrĩsiɗaa.
Jesuba ne nẽdobuebadarã ãyã jʉrecuaɗa
Mateo 21:12-17; Luca 19:45-48; Juaʉ̃ 2:13-22
15 Jesura Jerusaleʉ̃ne wayacusa jũẽpeɗa Ãcõrẽ de dromanaa wãsia. Mama dajada Ãcõrẽa diaɗi careabema nẽdobuebadarãda unusia. Ne nẽdo ɓea siɗa zocãrã duanasiɗaa. Idjaɓa ʉ̃cʉrʉba Ãcõrẽ de dromane diaida ɓʉ paratara dji drua ãĩba zebʉdarãa nẽbʉa nẽdobuebadjiɗaa ãĩbema paratara diacara panana bẽrã. Mãwã duanʉne Jesuba ãdjirãra jũma ãyã jʉretacuasia. Dji parata nẽdobuebadarã mesa ɓeada, puchirã nẽdobuebadarã bugue siɗa jũma coracuasia.
16 Maʉ̃ awara ni cãrẽ siɗa Ãcõrẽ de droma caita idu enebiẽ́ basía.
17 Ãdjirãa nãwã jaradiasia:
–Ãcõrẽ Beɗeaɗe nãwã ɓʉ́ ɓʉa: “Mʉ̃ dera jũma puru ɓea itea dji iwiɗibada de aɗia.” Baribʉrʉ bãrãba “ne drʉabadarã mĩrũbada uria” quĩrãca eropanʉa.–*
18 Maʉ̃ beɗea ũrĩsiɗaɗe sacerdote bororãba, judiorã ley jaradiabada biɗa Jesura wayasiɗaa idjia jaradia ɓʉra jũmarãba bia ũrĩ panʉ bẽrã. Mamaʉba ʉ̃taa crĩcha jʉrʉ panesiɗaa beaɗi carea.
19 Queubʉrʉɗe Jesura idji ume nĩbabadarã ume Jerusaleʉ̃neba ẽdrʉsiɗaa.
Higojõ purruba nũmena
Mateo 21:20-22
20 Nurẽma diapeɗa Jesura idji ume nĩbabadarã siɗa wayacusa Jerusaleʉ̃naa wãsiɗaa. Wãbʉdaɗe unusiɗaa higo bacurura dji carraɗe eɗa purruba nũmʉda.
21 Maʉ̃ne Jesuba jaraɗara Pedroba quĩrãnebasia. Maʉ̃ carea jarasia:
–Jaradiabari, acʉdua. Bʉa biẽ́ jara ɓʉɗa higojõra purruba nũmesia.–
22 Jesuba jarasia:
–Bãrãba Ãcõrẽra ĩjãnida panʉa.
23 Wãrã arada mʉ̃a jaraya: bariduaba za ɓʉ eyaa namaʉba pusaɗe tẽũne wãduaɗa aibʉrʉ, idjia jarabʉrʉ quĩrãca mãwãya. Baribʉrʉ idji soɗe crĩchaiẽ́ ɓʉa idjia jarabʉrʉra mãwãẽ́da, ãtebʉrʉ wãrãda mãwãida ĩjãida ɓʉa.
24 Maʉ̃ carea mʉ̃a bãrãa jaraya: jũma bãrãba Ãcõrẽa iwiɗibʉdara wãrãda edaɗida ĩjãnibʉrʉ, edaɗia.
25 Idjaɓa bãrãba Ãcõrẽa iwiɗi panʉne baridua ẽberã ume biẽ́ panʉbʉrʉ, maʉ̃ ẽberãba biẽ́ oɗara naãrã quĩrãdoaɗadua. Mãwãbʉrʉ bãrãba biẽ́ opeɗaɗara bãrã Zeza bajãne ɓʉba quĩrãdoaya.
26 Dewaraʉba biẽ́ oɗada quĩrãdoaɗaẽ́bʉrʉ, bãrãba biẽ́ opeɗaɗara bãrã Zeza bajãne ɓʉba quĩrãdoaẽ́a.–*
¿Cai trʉ̃neba Jesuba jaradia ɓʉ?
Mateo 21:23-27; Luca 20:1-8
27 Maʉ̃be ãdjira wayacusa Jerusaleʉ̃ne jũẽsiɗaa. Jesura Ãcõrẽ de droma caita nĩne, sacerdote bororãda, judiorã ley jaradiabadada, judiorã dji dromarã siɗa idjimaa zesiɗaa.
28 Ãdjirãba iwiɗisiɗaa:
–Bʉa nama o ɓʉra ¿caiba obi ɓʉ?–
29 Jesuba panusia:
–Mʉ̃a biɗa bãrãa iwiɗiya. Bãrãba panusiɗara mʉ̃a jaraya caiba mʉ̃́a nãwã obi ɓʉda.
30 ¿Caiba Juaʉ̃ra diabuesi borocuemãrẽã? ¿Ẽberãba wa Bajãne Ɓʉba? Panunadua.–
31 Maʉ̃ne ara ãdjiduɓa jara duanesiɗaa:
–Bajãne Ɓʉba diabuesiaɗa aɗibʉrʉ, idjia jaraya: “Maʉ̃da ¿cãrẽ cãrẽã ĩjãnaẽ́ basi?”
32 Baribʉrʉ ¿sãwã jaraɗi ẽberãba diabuesida?–
Ãdjia mãwã jara panasiɗaa purura waya panʉ bẽrã. Purumaarã Juaʉ̃ra wãrãda Ãcõrẽneba beɗeabari basía.
33 Maʉ̃ bẽrã Jesua jarasiɗaa:
–Daiba adua panʉa.–
Maʉ̃ne Jesuba jarasia:
–Mãẽteara mʉ̃a biɗa bãrãa jaraẽ́a caiba mʉ̃́a jãwã obi ɓʉda.–
Beɗea eɗaare
^ 11:9. Salmo 118:25-26. Bio bia quirua. Arameo beɗeaɗe “Hosana” jarabadaa.
^ 11:13. Israel druaɗe higojõ dji ca zaqueda marzo jeɗecoɗe, abrilɗe biɗa coɗida panʉa. Dji ca zaquera ununibʉrʉ cawabadaa junione maãrĩ zauida idjaɓa agostoɗeba aɓa octubreɗaa waiɓʉa zauida. Baribʉrʉ Jesuba quedua awa ununa bẽrã cawasia jũma maʉ̃ poaɗe higojõra zauẽ́da.
^ 11:17. Mʉ̃ dera jũma puru ɓea itea dji iwiɗibada de aɗia. Isaía 56:7. Ne drʉabadarã mĩrũbada uria. Jeremia 7:11.
^ 11:26. Griego beɗeaɗe ʉ̃cʉrʉ cartaɗe maʉ̃ versículora neẽ́a.
