Marco 12:1-44
12 Maʉ̃ne Jesuba ne jara ɓʉɗeba ãdjirãa jarasia:
–Ẽberãda ɓasia. Ewari aɓa maʉ̃ ẽberãba uvada upeɗa idji néura mõgaraba auɗu jũrã casía. Uva ɓa piabari siɗa osia. Idjaɓa deda ʉ̃tʉ osia mamaʉba jũma acʉi carea. Maʉ̃be idji néura ʉ̃cʉrʉ ẽberãrã jʉwaeɗa ɓʉsia. Ãdjirã ume beɗea ɓʉsia néu zaubʉrʉɗe jũmasãwã idjía diaɗida panʉda. Mãwã beɗea ɓʉpeɗa djibarira dewara druaɗaa wãsia.
2 Uva jara djibariba nezocada aɓa diabuesia néuɗebema idjía diaɗida panʉra edaɗe wãmãrẽã.
3 Baribʉrʉ néu acʉ panʉba dji nezocara jidaɗapeɗa puosiɗaa. Maʉ̃be jẽda jʉretabuesiɗaa ni cãrẽ siɗa diaɗaẽ́.
4 Mãwãnacarea djibariba dewara nezocada diabuesia idjía diaɗida panʉra diaɗamãrẽã. Baribʉrʉ maʉ̃ nezocara boroma usiɗaa.* Maʉ̃be wayaɗaẽ́ quẽãsiɗaa.
5 Mãwãnacarea djibariba dewarada diabuesia baribʉrʉ maʉ̃ nezocara beasiɗaa. Mãwãnacarea dewara nezocarãda zocãrã diabuesia. Baribʉrʉ ʉ̃cʉrʉra puosiɗaa, dewararãda beasiɗaa.
6 Djibariba waɗibiɗa aɓa eroɓasia diabuei carea; maʉ̃gʉra idji warra bio quĩrĩã ɓʉ basía. Idjia crĩchasia: “Mʉ̃ warradrʉ wayaɗia.” Ara maʉ̃da diabuesia.
7 Baribʉrʉ néu acʉ panʉba dji warra jũẽbʉrʉda unusiɗaɗe ãduɓa jarasiɗaa: “Jari uruba dji zezaba eroɓʉra jũma edaya. ¡Idjira beataɗia! Mãwãbʉrʉ dji ẽjũãra dadjirã itea ɓeya.”
8 Ara maʉ̃da warrara jidaɗapeɗa beasiɗaa. Maʉ̃be néu ãĩ ɓatabuesiɗaa.
9 Maʉ̃ carea néu djibariba ¿sãwã obá? Araa wãpeɗa ãdjirã jũma quenapeɗa idji néura dewararãa acʉbiya.
10 Bãrãba ¿Ãcõrẽ Beɗeaɗe acʉɗacaca? Nãwã jara ɓʉa:
De obadaba mõgara igarapeɗaɗara dji biara ɓʉda ɓesia.
11 Dadjirã Boroba mãwã oɗa bẽrã dadjirãmaarã bio biya quirua.*
12 Sacerdote bororãba, judiorã ley jaradiabadaba, judiorã dji dromarã biɗa cawasiɗaa Jesuba maʉ̃ jara ɓʉɗeba ãdjirãda biẽ́ jarasida. Maʉ̃ carea Jesura jida quĩrĩã panasiɗaa. Baribʉrʉ puruda waya panʉ bẽrã idjira idu ɓʉɗapeɗa ãyã wãsiɗaa.
¿Romanebema boro itea parata jʉrʉ pebʉdaɗe diaɗida panʉca?
Mateo 22:15-22; Luca 20:20-26
13 Mãwãnacarea pariseorãba, Herodeare ɓea biɗa Jesumaa ʉ̃cʉrʉ diabuesiɗaa idjía biẽ́ beɗeabiɗi carea.
14 Jũẽnapeɗa jarasiɗaa:
–Jaradiabari, daiba cawa panʉa bʉra ẽberã jipa ɓʉda. Ni aɓaʉda biara unuca bẽrã ni aɓaʉba bʉ́a awara crĩchabiɗacaa. Ãtebʉrʉ bʉa wãrã beɗea Ãcõrẽ oɗebemada jũmarãa jaradiabaria. Maʉ̃da Romanebema boro itea parata jʉrʉ pebʉdaza ¿dadji judiorãba diaɗida bia ɓʉca wa biẽ́ ɓʉ? ¿Diaɗida panʉca wa diacara panʉ?–
15 Jesuba cawa ɓasia dji biarã quĩrãca ze panʉda. Maʉ̃ bẽrã jarasia:
–Bãrãba ¿cãrẽ cãrẽã mʉ̃ra biẽ́ beɗeabi quĩrĩã panʉ? Parata pichida enenadua mʉ̃a acʉi carea.–
16 Ara maʉ̃da enesiɗaa. Maʉ̃ne Jesuba iwiɗisia:
–¿Cai quĩrãdarrada naʉ̃ parataɗe ɓʉ? ¿Cai trʉ̃da ɓʉ?–
Ãdjia panusiɗaa:
–Romanebema boroɗeda.–
17 Maʉ̃ne Jesuba jarasia:
–Mãwã baibʉrʉ Romanebema boroɗera Romanebema boroa diaɗadua, idjaɓa Ãcõrẽnera Ãcõrẽa diaɗadua.–
Ãdjirãba Jesu carea cawa crĩchaɗaẽ́ basía.
Beuɗarã ʉ̃rẽbaɗiɗebema Jesuba jaraɗa
Mateo 22:23-33; Luca 20:27-40
18 Mãwã panʉne ʉ̃cʉrʉ saduceorãda Jesumaa zesiɗaa. Saduceorãba jarabadaa beupeɗaɗara ʉ̃rẽbaɗacada. Maʉ̃ bẽrã Jesua nãwã jarasiɗaa:
20 Ewari aɓa siete djabarãda panasiɗaa. Dji nabemada quima edasia baribʉrʉ warra neẽ́ jaiɗasia.
21 Idjiarebemaba dji pẽdra wẽrãra edasia baribʉrʉ idji siɗa warra neẽ́ jaiɗasia. Ũbeabema siɗa aɓari quĩrãca mãwãsia.
22 Jũma maʉ̃ siete panʉra warra neẽ́ jaiɗasiɗaa. Mãwãnacarea dji wẽrã siɗa jaiɗasia.
23 Maʉ̃ siete djabarãba aɓari wẽrãda edasiɗaa. Mãwãra ʉ̃rẽbaɗi ewariɗe ¿sãʉ̃gʉba idjira eroɓei?–
24 Maʉ̃ carea Jesuba panusia:
–Bãrãba Ãcõrẽ Beɗeada, idji ʉɓʉa siɗa adua panʉ bẽrã ãĩ crĩcha panʉa.
25 Ũrĩnadua. Beupeɗaɗarã ʉ̃rẽbaɗi ewariɗe ẽberãra quima edaɗaẽ́a ni quima diaɗaẽ́a, ãtebʉrʉ Ãcõrẽ bajãnebema nezocarã quĩrãca ɓeaɗia.
26 ¿Bãrãba beupeɗaɗarã ʉ̃rẽbaɗiɗebemada Moise cartaɗe acʉɗacaca? Ãcõrẽba bacuru zaque uruga nũmʉneba Moisea jarasia: “Mʉ̃ra Abrahaʉ̃ Ãcõrẽa, Isa Ãcõrẽa, idjaɓa Jacobo Ãcõrẽa.”*
27 ¡Idjira beu ɓea Ãcõrẽẽ́a ãtebʉrʉ zocai ɓea Ãcõrẽa! Bãrãba aɓeɗa ãĩ crĩcha panʉa.–
Ãcõrẽba obi ɓʉ beɗea dji dromaara ɓʉ
Mateo 22:34-40
28 Mãwã beɗea panʉne judiorã ley jaradiabarida Jesu caita zesia. Maʉ̃ jaradiabariba ũrĩsia Jesuba saduceorãa bia panunada. Maʉ̃ carea iwiɗisia:
–Ãcõrẽba obi ɓʉ beɗeaɗebemara ¿sãʉ̃gʉda dji dromaara ɓʉ?–
29 Jesuba panusia:
–Ãcõrẽba obi ɓʉ beɗeaɗebema dji dromaara ɓʉra naʉ̃gʉa: “Ũrĩnadua, israelerã. Dadjirã Boro Ãcõrẽra aɓabʉrʉ ɓʉa.
30 Jũma bʉ soɗeba, jũma bʉ jaureɗeba, jũma bʉ crĩchaɗeba, idjaɓa jũma bʉ ʉɓʉaɗeba bʉ Boro Ãcõrẽra quĩrĩãdua.”* Ãcõrẽba obi ɓʉ beɗeaɗebemara maʉ̃drʉ dji dromaara ɓʉa.
31 Idjaɓa maʉ̃are ɓʉda aɓari quĩrãca ɓʉa. Maʉ̃gʉba nãwã jara ɓʉa: “Djãrãra quĩrĩãdua ara bʉdji quĩrĩã ɓʉ quĩrãca.”* Maʉ̃ umébema beɗea cãyãbara dji dromaara ɓeada neẽ́a.–
32 Maʉ̃ne judiorã ley jaradiabariba jarasia:
–Bia ɓʉa, Jaradiabari, bʉa jara ɓʉ quĩrãca Ãcõrẽra aɓabʉrʉ ɓʉa, dewarada neẽ́a.
33 Dadjirãba wãrãda Ãcõrẽra jũma dadji soɗeba, jũma dadji crĩchaɗeba, jũma dadji jaureɗeba, jũma dadji ʉɓʉaɗeba biɗa quĩrĩãnida panʉa. Idjaɓa djãrãra ara dadji quĩrĩã ɓʉ quĩrãca quĩrĩãnida panʉa. Maʉ̃gʉra zocãrã animarã Ãcõrẽa babue diai cãyãbara biara ɓʉa.–
34 Judiorã ley jaradiabariba maʉ̃gʉra crĩcha cawaaɗeba jaraɗa bẽrã Jesuba jarasia:
–Bʉra Ãcõrẽba pe eroɓʉɗebemada ɓaida boɗoa.–
Mãwãnacarea dewararãba Jesua iwiɗiɗida wayasiɗaa.
Ãcõrẽba ẽdrʉ edabari diai jaraɗara ¿cai warra?
Mateo 22:41-46; Luca 20:41-44
35 Jesuba Ãcõrẽ de droma dajada jaradia ɓasiɗe ẽberãrãa nãwã iwiɗisia:
–Judiorã ley jaradiabadaba ¿sãwãẽrã jara panʉ Ãcõrẽba ẽdrʉ edabari diai jaraɗara Davi warrada?
36 Ara maʉ̃ Daviba Ãcõrẽ Jaureɗeba nãwã jarasia:
Dadjirã Boroba mʉ̃ boroa jarasia: mʉ̃ jʉwa araare chũmedua aɓa bʉ ume dji quĩrũrã mʉ̃a bʉ jʉwaeɗa ɓʉbʉrʉɗaa.*
37 Ãcõrẽba ẽdrʉ edabari diai jaraɗada Daviba mʉ̃ Boroaɗa asibʉrʉ, ¿sãwã Davi warra bai?–
Jesuba mãwã jaradia ɓʉda zocãrã ẽberãrãba bia ũrĩ duanasiɗaa.
Jesuba pariseorã biẽ́ jaraɗa
Mateo 23:1-36; Luca 11:37-54; 20:45-47
38 Jesuba waɗi jaradia ɓʉɗe nãwã jarasia:
–Judiorã ley jaradiabadarã ume quĩrãcuita ɓeaɗadua. Ãdjirãba djio nẽbʉa ɓeada jʉ̃ awua ɓeaa. Maʉ̃ awara puruɗe nĩnane quĩrĩãbadaa ẽberãrãba wayaaɗeba “mẽrã” aɗida.
39 Judiorã dji jʉrebada deɗe ãdjira dji dromarã chũmebadaɗe chũme quĩrĩãbadaa; ãbaa ne cobʉdaɗe biɗa ara maʉ̃ quĩrãca obadaa.
40 Baribʉrʉ pẽdra wẽrãrãba eroqueɗeada sewaɗeba jãrĩnapeɗa jũmarã quĩrãpita Ãcõrẽa dãrã iwiɗibadaa ãdjira jipa ɓeada crĩchaɗamãrẽã. Maʉ̃ carea Ãcõrẽba dewararã cãyãbara ãdjirãra wetara cawa oya.–
Pẽdra wẽrã ne neẽ́ quiruba Ãcõrẽa parata diaɗa
Luca 21:1-4
41 Ãcõrẽ de droma carea parata ɓʉbada quĩrãpe chũmasiɗe Jesuba unusia ẽberãrãba paratada eɗa ɓʉ́ duanʉda. Zocãrã ne bara ɓeaba paratada waiɓʉa eɗa ɓʉ́ panasiɗaa.
42 Maʉ̃ne pẽdra wẽrã parata neẽ́ quiruda zepeɗa parata eɗaara quiruda umébe eɗa ɓʉsia.
43 Jesuba idji ume nĩbabadarãa jarasia:
–Mʉ̃a wãrãda bãrãa jaraya: jãʉ̃ pẽdra wẽrã ne neẽ́ quiruba auɗuara diasia jũmarãba diapeɗaɗa cãyãbara.
44 Ãdjirãba dji aɗubaɗadrʉ eɗa ɓʉsiɗaa baribʉrʉ wẽrã ne neẽ́ quiruba ne coi carea eroɓaɗada jũma diasia.–
Beɗea eɗaare
^ 12:4. Maʉ̃ nezocara boroma usiɗaa. Griego beɗeaɗe ʉ̃cʉrʉ cartaɗe nãwã ɓʉ́ ɓʉa: “Mõgara ɓatatabʉdaɗe maʉ̃ nezocara boroɗe diasiɗaa.”
^ 12:11. Salmo 118:22-23.
^ 12:26. Exodo 3:2-6.
^ 12:30. Deuteronomio 6:4-5. Dadjirã Boro Ãcõrẽra aɓabʉrʉ ɓʉa. Maʉ̃gʉra idjaɓa jara ɓʉa: “Aɓa Ãcõrẽdrʉ dadjirã Boroa.”
^ 12:31. Levitico 19:18.
^ 12:36. Salmo 110:1.
